Babylaw raona
1 He hmo hnôh lâna heta vâlyuhchâpa hropa, biehneina thata a hneipa avâ tawhta a za chôpa hmô na ta; a rônahna ta alei cha pakhaihsa khai ha ta.
2 Ano chata ao paro ngaitapata, “Babylaw rônahpa cha a pao haw, a pao haw! Ahripazy pahrâna, thlahpa puapa torai atâhna nata pavaw puapa nata pasichhihpa torai atâhna a vaw châ haw;
3 a sihry hmâhpa vâta hiehâhna kresawti cha phopi zydua ta dô haw tlôh ei ta, alei liata abeizy chata ano cha sihry khei haw ei ta, alei liata sôhpalietuhpazy chata a phasakheina cha ama hneirôh khei tyh,” tahpata aw ta.
4 Chatawhcha avâ tawhta ao hropata he tahna heta a reipa ei thei: “Ei chyhsa saih u, ano moleinazy liata namâ hlao lei nawpata nata ano hrienazy nama to hra lei nawpata, ano tawhtapa vaw pua teh u;
5 a moleinazy chata avâ cha tlô ha tlôh ta, Khazohpa ta a hmoparaonazy cha a thei thlâh ha tlôh ta.
6 Ano ta a piepa hawhta tlai pie hri ula, a hmotaozie lymâ hawhta a lie no ta thô ula; apahlaona nyu liata ano chata a lieno ta pahlaopa teh u.
7 A parônahsana nata a phasakheina hawhta pasasapata, pachâ parôhsa hri teh u. A pathipalôh ta cha,’ Abeinô ta ei tyuh, nôhmeipa rai châ va na, pachârôhna hmô chacheita aw va na,’ tah tlôh ta.
8 Chavâta noh kha chhôh tlaita ano hrienazy, potlana zy, pachârôhna zy, chakâhna zy cha a vaw tlô khai aw, mei ta pakâsa khaipata a y hra aw, ano a pachiatuhpa Abeipa Khazohpa cha a thatlô tlôh ta,” tahpata.
9 Chatawhcha alei liata abeizy, a sihrykhei tyhpa nata a phasakhei tyhtuhpazy chata a kâpa khuh ama hmô tita,
10 “Babylaw khihpi rônahpa, khih â ipa cha, a pei rimâ cha, a pei rimâ cha! Dawh kha chhôh deitata na chô liata ryureina cha vaw tlô ha tlôh ta.” tahpata a pasasana chipa vâta lâhlapi liata a duahpata ano chakheipata ama chachôhna amâ chô aw.
11 Alei liata sôhpalietuhpazy chata ano chakheipata ama pachârôhna, ahyhma ta ama sôh ama chalei khao leipa vâta;
12 ama sôh zy cha ngôh zy, tâkâ zy, alôsôpazy, taikulôzy, poh naipa zy, poh nohsaihpâpa zy, atatahpa poh zy, poh sailawpa nata tho rohpahâhpa to rai zy, masiah naoh ta taopa hmobaoh torai zy, tho sôh ngaitapa nata dawh nata thua nata awh-lôteihpa ta taopa hmobaoh torai zy.
13 Lôiasopa zy, a ia-ô zy, rohpahâhpa raopa zy, sathaw rohpahâhpa zy, deiry zy, myu zy, kresawti zy, Ôli thaw zy, viahdie di ngaitapa zy, uit sâh zy, viahchao zy, mietahkupazy, arâzy, talailizy, seizy, chyhsa hronazy chhao a châ.
14 “Theilâpa na palôh ta a byuh kawpazy chata cha siesai ha ta, hmo pahâhpa nata a ngiapa zydua chata cha leidiasai haw ta, ahyhma ta hmô heih chacheita khao aw veih ei!”
15 He hmozy ta sôhpaliepazy, ano vâta a vaw hneirôhpazy chata; “Khihpi rônahpa, poh naipa nata poh nohsaipapa nata poh saih-lawpa a bupata,
16 ngôh nata a lôsôhpa nata taikulô ta a tobipa cha, a pei rimâ cha, a pei rimâ cha!
17 Dawh kha chhôh deitata sôh cha zie zydua cha a lei khai ha he!” tahpata chapa nata pachârôhna chôta a pasa pataosa chi vâta lâhlapi ta amâ duah aw. Balyh hyutuhpa maihzy, balyh ta a sietuhpa maihzy, balyh puhpazy, tilaipi liata rai a hriapa maih cha lâhlapi ta a duahpata,
18 ano kâpa khuh cha saina chôta, “He khihpi rônahpa tlupa he khâpa khih ma a y aw?” tahpata awh ei ta.
19 Chatawhcha chapa nata pachârôna chôta, “A hneirôhpa vâta tilaipi liata balyh a hneituhpazy hneirôna khihpi rônahpa cha, a pei rimâ cha, a pei rimâ cha! Dawh kha chhôh deitata a lei khai ha he!” tahpata awpata ama luh buhchado ta athia ei ta.
20 “Hy avâ nata nâmo’ mopathaihpa sahlaozy, lyuhchâpazy, hrohsopazy saih u, ano liata thaphapata y teh u, ano nama chôta a pachiana chata Khazohpa ta a chô liata a pachia haw hra hih,” tahpata.
21 Chatawhcha vâlyuhchâpa thatlô ngaitapata sâhcharona lô lai ngaitapa hawhpa alô la ta, tilaipi liata thy ta, “Babylaw khih rônahpa cha he hawhta rarô-ypata thypa châ aw ta, ahyhma ta hmô heih khao chachei ta aw veih ei.
22 Totâ a tôtuhpazy, hlasatuhpazy, ramo tôtuhpazy, chiahmie tôtuhpazy pyu chhao na chhôh liata theipata y khao chacheita leipa aw ta; zôthaipa, zôthaina kheihawhpa rai na chhôh liata hmôpa châ khao chacheita leipa aw ta; sâhcharona lô pyu chhao na chhôh liata theipata y khao chacheita leipa aw ta;
23 meiôh khaihna chhao na chhôh liata khaih chacheita leipa aw ta; myuthieh a hneituhpa nata myuthieh aochhaona chhôh liata theipata y khao chacheita aw vei; na sôhpalietuhpazy cha alei liata molaipazy châ tlôh ei ta; na dyu ta phopi zydua dôpata ama y haw.
24 A chhôh liata hrohsopazy, mopathaihpazy, alei liata thiepa zydua thisaih cha hmôpata y ta,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||