Chatlai chiehpazy hla
1 Chatawhcha kaw moh na ta. Mietahkupa Taw Zaio Tlâh liata aduahpa nata ama khi liata a moh nata a Paw moh a ropa, chyhsa thy sykha nata thy palih nata sâh palih a hnohta hmô na ta.
2 Chatawhcha avâ tawhta ao, tisao a hluhpi a paropa hawhta nata tôkalôhpa thata a thuapa pyu hawhta thei na ta; ao ei theipa cha totâ a tôpazy ta ama totâ ama tôpa pyu hawhta châ ta;
3 abeidyuchhai hmiakô liata nata hmohrohneipa miapalih nata machâzy hmiakô liana chata hla thiehpa sa ei ta. Chatawhcha alei tawhtapa chatlai chiehpa, chyhsa thy sykha nata thy palih nata sâh palihzy dei leipa khata cha ahyhma ta cha hla cha a chu thei veih ei.
4 Hezy he a pathaihpa châ tlôh ei ta; hezy he Mietahkupa Taw a siena maihta a zituhpazy cha ama châ; hezy he Khazohpa châta nata Mietahkupa Taw châta a pathei tua chaipazy châ awpata chyhsa hry tawhtapa chatlaipa ama châ.
5 Ama pakah liata haipa bie a puapa rai thei beih veih ei; seina a hnei leipa châ tlôh ei ta.
Vâlyuhchâpa pathôh bietapazy
6 Chatawhcha alei liata a pahrâpazy hnohta nata pho to zy, chi to zy, reih to zy, mo to zy hnohta tlâh-awhkhei awpata chhâzaw Thâtihpha a hneipa vâlyuhchâpa hropa avâ liata a zawpa hmô na ta.
7 Ano chata ao paro ngaitapata, “A pachiana daihti cha a vaw tlô hawpa vâta Khazohpa cha chi ula, palyupalih teh u; avâ zy, alei zy, tilaipi zy, tihnawh zy a taotuhpa cha a chhy teh u,” tah ta.
8 Vâlyuhchâpa hropa, a panona chata, “Babylaw rônahpa, apheina kyh vâta hiehâhna kresawti pho zydua a padosatuhpa cha a pao haw, a pao haw,” tahpata vaw zi ta.
9 Vâlyuhchâpa hropa, a pathôhna chata ao paro ngaitapata, “Ahyrai ta sahrâhpa nata a nohthlahpa achhypata ama khi liata tlyma, ama ku liata tlyma pahnona ama hnei khiahtala,
10 chazy tlai chata Khazohpa hiehâhna kresawti, a hiehâhna nyu liata khâpahma pahlao leipata taopa cha doh aw ei ta, vâlyuhchâpa pathaihpazy mohmô ta nata Mietahkupa Taw mohmô liana chata mei nata kaih ta pasasapata ama y hra aw.
11 Cha chyhsazy pasasana meikhuh cha chhâzaw ta kiah lymâ aw ta; sahrâhpa nata a nohthlahpa achhytuhpazy, â mo pahnona a hneituhpa maihzy chhao chata, a chhô a zâ ta a pahâna rai hnei aw veih ei,” tahpata âmo cha vaw zi ta.
12 He liana heta mopathaihpazy, Khazohpa biepiepazy nata Zisu angiapâna bie a zyhtuhpazy tao hualuana a lâ theina a y.
13 Chatawhcha avâ tawhta ao ta, “He tana heta roh teh; Atahmâ rakha tawhta, a thipa. Abeipa liata a thipazy cha ama nohhlao aw,” Thlahpa ta, “A châ na, ama hriapasanazy cha amâ pahâsai ha aw; ama hmotaopazy chata vaw zi hra tlôh aw ta! a tah na,” a tahpa ei thei.
Alei sâhhriana
14 Chatawhcha kaw moh na ta, meihdo râhpa hmô na ta; meihdo chô liana chata chyhsa sawchapawpa a lyupa, ngôh lakho a khopata sava tiah ngaitapa a chabapata a tyuhpa hmô hra na ta.
15 Chatawhcha vâlyuhchâpa hropa, Khazohpa achhyna-o tawhta vaw pua ta, meihdo chô liata a tyuhpa hnohna chata ao paro ngaitapa ta, “‘Na sava kha phia la, â teh; a â ti a daih ha tlôh ta; alei liata sâh khu a lo ha khuh,” tah ta.
16 Chatanachata meihdo chô liata a tyuhpa chata a sava cha alei lâta pathla ta, alei sâh cha âpa châ haw ta.
17 Chatawhcha vâlyuhchâpa hropa avâ liata Khazohpa achhyna-o tawhta vaw pua heih ta, ano chhao chata sava tiah ngaitapa chaba hra ta.
18 Chatawhcha vâlyuhchâpa hropa, mei chô liata biehneituhpa cha maisâh tawhta vaw pua heih ta; ano chata ao paro ngaitapata, “Na sava tiah ngaitapa kha phia la, alei liata krezô thei saozy za â teh; kre theizy khu liahsa a hmoh haw khu,” tahpata sava tiah ngaitapa a chabatuhpa cha aw ta.
19 Chatanachata vâlyuhchâpa chata a sava cha alei lâta za pathla ta, alei liata kre thei cha â ta, kre saona khaoh kawh ngaitapa, Khazohpa hiehâhna kre saona khaoh liana chata thy ta;
20 khihpi khôtho lâta kre saona khaoh liana chata saoh ei ta. Chatanachata kre saona khaoh tawhna chata thisaih vaw pua ta, lyu sâh kha nata lyu za charu* ta seihpa, arâ chhâri taihta a thupa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||