1 He hmo hnôh lâna heta avâ liata zawpi hluh ngaitapa ao paro ngaitapa alyupa tlai cha, “Haleluia! Pachhana zy, rônahna zy, hmotaotheina zy cha eima Khazohpa eih a châ,
2 a ryureinazy cha a do ta a sia hra; ano chata sihryhpa rônah ngaitapa, a sihryhna vâta alei a pathusatuhpa cha pachia haw ta, a seizy thisaih phuh cha a chôta viari a thô haw hih,” a tahpa thei na ta.
3 Âmo chata: “Haleluia! A khuh chhâzaw ta a kaw kiah aw,” tah heih ei ta.
4 Chatawhcha machâ pakih nata papalih nata hmohrohneipa miapalihzy cha a khu ei ta, “Amen! Haleluia!” tahpata Khazohpa, abeidyuchhai liata a tyuhpa cha achhy ei ta.
5 Chatawhcha abeidyuchhai tawhta ao vaw pua ta, “Nâmo a sei zydua, ano a zatuhpa, molaipa nata mo chyhpa saih u, eima Khazohpa cha reithai teh u,” tahpata.
Mietahkupa Taw lahpinô pakiana kyhchhi
6 Chatawhcha zawpi hluh ngaitapa ao hawhta nata ti hluhpi pyu hawhta nata tôkalôhpa thata a thuapa pyu hawhta ei thei, “Haleluia! Abeipa eima Khazohpa Atotaotheipa chata ryu a reih haw hih.
7 Thapha ngaitapata nata aly ngaitapata y ei sihla, ano palyupalih ei suh u, Mietahkupa Taw lahpinô pakiana cha a daih ha tlôh ta, a myuh chhao â chhuahdy haw,”
8 Poh naipa pathaih ngaitapa nata a di ngaitapa a bu awpata pasaipa a châ. (Poh naipa cha mopathaipazy hmotao siapa châ tlôh ta.)
9 Chatawhcha vâlyuhchâpa chata ei hnohta, “He hawhta roh teh: ‘Mietahkupa Taw lahpinô pakiana kyhchhi liata hruapazy cha ama nohhlao na,’ tahpata.” Chatawhcha ei hnohta, “Hezy he Khazohpa bie hmeiseihpa ama châ,” tah ta.
10 Kei cha a phei thaby liata ano achhypata pao na ta, châhrasala ano chata ei hnohta, “Heta la tah khâ! Kei cha nâma nata na unawhpazy, Zisu pahnosana bie a pyhtuhpazy sei heihpa ei châ; Khazohpa tlao achhy teh; Zisu pahnosana bie cha chhochhieliena thlahpa châ tlôh ta,” tah ta.
Arâ râhpa a kiahtuhpa
11 Chatawhcha avâ a pahypa hmô na ta; arâ râhpa nata a chô liata a kiahpa, Ngâchhihpa nata Hmeiseihpa ama bipa cha hmô hra na ta; ano chata sia ngaitapata ryu reih ta, a dyuh tyh hra.
12 A mokhaozy cha mei paleih hawhta a châ, a luh liata chhao lakho a hluhpi a kho ta; moh ropa, ano dei leipata cha ahyhma ta pahno leipa hnei ta.
13 Ano cha thisaih liata nypa poh a bu ta, a moh cha, “Khazohpa Bie,’ tahpata bipa a châ.
14 Avâ liata pheisaih sahlaozy chata poh naipa ngyuh ngaitapa nata pathaih ngaitapa a bupata arâ râhpa chô liatazy kiapata zi ei ta.
15 A pakah tawhta zaozi tiah ngaitapa pua ta, cha cha pho to a chhawna awpa a châ; ano chata thua chôchahrei ta âmo chô liata ryu reih aw ta; Khazohpa Atotaotheipa hiehâh pasana kre saona khaoh liana chata a tly aw.
16 A pôh liata nata a byhpi liata, “Abeizy Beipa nata hyutuhpazy Hyutuhpa,” tahpata moh ropa a y.
17 Chatawhcha noh liana khita vâlyuhchâpa a duahpa hmô na ta; ano chata avâ liata pavaw a zawpa zydua hnohna chata ao paro ngaitapata, “A vy ula, Khazohpa zâpati rônahpa liata a vaw hlao pakhy teh u,
18 abei sa zy, pheisaih hyutuhpa sa zy, chyhsa thatlôpa sa zy, arâ nata a chô liata a kiahpa sa zy, chyhsa zydua, sei nata khotalaipa, anawhpa nata alaipa chyhsa sapa cha nama nie thei nawpata,” tahpata awh ta.
19 Chatawhcha sahrâhpa zy, alei liata abeizy, ama pheisaih sahlaozy, arâ chô liata a kiahpa kha adyuh awpa nata a pheisaih sahlao adyuhpata ama pahmaoh pakhypa hmô na ta.
20 Sahrâhpa cha patupata y ta, hrohso pakheipa sahrâhpa ngiana a hneipa nata a nohthlahpa a chhytuhpazy a dona hmonoâhpa a mohmô liata a taotuhpa kha patu pâpa châ hra ta. Ama pano ta kaih ta a kâ ngâpa meitipo liana chata a hropata thypata y ei ta.
21 Chatawhcha mo hropazy cha arâ chô liata a kiahpa zaozi, a pakah tawhta a puapa khata chhawsaopa ama châ haw; pavaw zydua cha âmo sapa niepata ama rih bie khai hâ ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||