Hiehâhna biebuzy
1 Chatawhcha achhyna-o tawhna chata ao paro ngaitapata, vâlyuhchâpa pasarizy hnohna chata, “Sie ula, Khazohpa hiehâhna biebu sâsarizy cha alei liata leihtha teh u,” a tahpa thei na ta.
2 A hmiatua chaipa cha sie ta, a biebu cha alei liata leihtha ta; sahrâhpa pahnona ahneipa chyhsazy nata a nohthlahpa achhypazy chô liana chata hmah chhiepa nata thata pasapa lâta a vaw lie haw ta.
3 A panona chata a biebu cha tilaipi liata leihtha ta; chyhsa a thipa thisaih hawhta thisaih lâta ti cha a lie ha ta. Chatanachata hmo hroh a hneipa zydua tilaipi liata a ypazy cha thi khai haw ei ta.
4 A pathôhna chata a biebu cha chavahzy liata nata tihnawhzy liata leihtha ta, thisaih lâta a lie ha ta.
5 Ti vâlyuhchâpa chata: “Na moh Pathaihpa, he hawhta ryu na reipa vâna heta nâ, a y haipa nata a y hawpa, na sia na.
6 Chyhsazy chata mopathaihpazy nata hrohsopazy thisaih palosa ei ta, chatawhcha nâma ta do awpata thisaih lilaw na pie hripa he. A do tlâh ama châ tlai na!” a tahpa ei thei.
7 Maisâh tawhta ao chata, “Hy Beipa Khazohpa, Atothaotheipa, na ryureipazy cha a do ta a sia na!” a tahpa ei thei.
8 A papalihna chata a biebu cha noh liata leihtha ta, noh cha mei ta chyhsazy pa-usa awpata hmotaotheina piepa châ ta.
9 Chyhsazy cha a sah ngaitapata pa-usapata y ei ta, cha hriena chôta biehneituhpa Khazohpa moh cha reipachhie ei ta, ano palyupalih awpata ro hlei veih ei.
10 A papangawhna chata a biebu cha sahrâhpa abeidyuchhai liata leihtha ta, a khihnarâh cha vaw zoh khai ha ta; chyhsazy cha ama pasapa vâta ama paleihzy sie ei ta,
11 ama pasanazy nata ama hmahzy vâta avâ Khazohpa cha reipachhie ei ta; ama hmotaopazy cha ro hlei veih ei.
12 A pacharuna chata a biebu cha vapi Euphrate liata leihtha ta, noh chhina lâ tawhta abei a vy awpazy châta lâpi cha a chhuahdy chiehpa a vaw châ thei nawpata a ti cha kua ha ta.
13 Chatawhcha drakao pakah tawhta nata sahrâhpa pakah tawhta nata hrohso pakheipa pakah tawhna chata thlahpa puapa miathôh, châchie a lyupa a vaw puapa hmô na ta;
14 chazy cha ahripa thlahpazy, hmonoâhchhihpa a tao tyhpazy ama châ; âmo cha Khazohpa Atotaotheipa noh rônahpa liata adyuhna liata a chhi pakhy awpata khizaw zydua liata abeizy lâ sie ei ta.
15 “Nahthlie teh, parutuhpa hawhta ei vy aw! A hrohrua ta a pohzy a sai thlâh hawpa cha a nohhlao na, chata leipatala thluahruapa ta a khie aw ta, maophyupata ama hmô pathlei aw na!
16 Hebrai reihta Harmakedaw ama tahpa su liana chata a chhi pakhy haw ei ta.
17 A pasarina chata a biebu cha a ruapa liata leihtha ta, chatanachata achhyna-o tawhta abeidyuchhai tawhtapa, “A tlô haw!” tahpata ao paro ngaitapa vaw pua ta.
18 Chatawhcha dôhlazy, aozy, tôkalôhpa a thuapazy vaw y ha ta; alo chhao thata a vaw sih ta, alei liata chyhsa y tua rakha tawhta cha tlupa hawhpa cha y beih vei, cha tlupota rarô-ypa cha.
19 Chatanachata khihpi rônahpa cha su thôh ta a vaw pachhaih ta, pho to khihzy cha vaw cho ta; a hiehâh pasana kresawti nyu cha a hnohta pie awpata Babylaw khihpi rônahpa cha Khazohpa hmiakô liata pahno thlâhpata a vaw y haw.
20 Chatawhcha liahpahlô to lei khai haw ta, tlâhzy chhao hmô awpa y khao hra vei.
21 Chatawhcha pareih lai ngaitapa, Pound za kha tlu chyuta a hripa, avâ tawhta chyhsapazy chô liata tla ta; chyhsazy chata pareih ta hriena vâna chata Khazohpa reipachhie ei ta; cha hriena cha pasa ngaita tlôh ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||