Avâ thiehpa nata alei thiehpa
1 Chatawhcha avâ thiehpa nata alei thiehpa hmô na ta; avâ hmiatuapa nata alei hmiatuapa cha leidia ha ta, tilaipi chhao cha y khao vei.
2 Chatawhcha khihpi pathaihpa Zerusale thiehpa cha, myuhthie a vahpa chata a chhuahdy ta amâchiehpata a ypa hawhta Khazohpa tawhtapa avâ tawhta a za chôpa hmô hra na ta.
3 Abeidyuchhai tawhta ao paro ngaitapata, “Khazohpa pahrâna cha chyhsa hry liata a vaw y haw. Ano cha ama hnohta pahrâ aw ta, âmo chhao a chyhsazy châ aw ei ta, Khazohpa tlai cha âmo hnohta y aw ta; ano cha ama Khazohpa a châ aw.
4 Ama mo tawhtapa mothlih cha hru khai aw ta, thina cha y khao leipa aw ta, pachârôhna zy, chana zy, pasana zy chhao y khao hra aw vei, hmo hmiatuapazy cha lei khai ha tlôh ta,” a tahpa ei thei.
5 Chatawhcha abeidyuchhai liata a tyuhpa chata, “Nahthlie teh, hmo to a thiehpata ei tao,” tah ta. “Ro teh, he biezy he ngâ a chhih ta a do tlôh ta,” tah ta.
6 Chatawhcha ei hnohta, “Pakipa a châ haw. Kei Alpha nata Omeka, a thaona nata a chhâna ei châ, A dâh phipa maih hnohna chata hrona tihnawh tawhtapa ti a saipata ei pie aw.
7 A pahnietuhpa maih chata he he to aw ta, kei ano Khazohpa châ aw na ta, ano cha ei saw a vaw châ hra aw.
8 Anodeikuacha chyhsa riahchhiepa zy, a ngiapâleipa zy, pasichhihpa zy, lianycheihpazy, apheihmâhpazy, dyuthaipazy, nohthlahpa achhypazy, haihthaipa zydua to awpa cha mei nata kaih ta a kâ ngâpa tipo liana chata y aw ei ta; cha cha thina einona cha a châ,” tah ta.
Zerusala thiehpa
9 Biebu miasari, hriena hnôh chaipa sâsari ta a biepa a cheipa vâlyuhchâpa pasari hry liata pakha cha a vy ta; ano chata, “He lâ he a vy teh, myuthieh, Mietahkupa Taw lahpinô cha ei cha pamosa aw,” tahpata na chho ta.
10 Ano chata Thlahpa ta tlâh laipapi nata a sâh ngaitapa Khazohpa tawhtapa avâ liata a za chô haipa na pamosa ta.
11 Khazohpa rônahna hneipata, a khaihnazie cha alôsôh ngaitapa hawhpa, zaspy lô hawhna tlai châ ta, krystal lô hawhta mopahliepa a châ.
12 Kuh rônahpa sâhrawhleino hnei hra ta, chhikao thaby liata chhao vâlyuhchâpa pahrawhleino y ei ta; cha chhikaozy liana chata mo ropa y hra ta, chazy cha Izarel pathlapazy pho hrawh nata pho no mohzy cha a châ;
13 nochhi lâ chhikao miathôh, mawlâ chhikao miathôh, chho lâ chhikao miathôh, notla lâ chhikao miathôh y ta.
14 Cha khihpi kuh chata alôbôpa miahrawhleino hnei ta, chazy liana chata Mietahkupa Taw apôstôl pahrawhleino mohzy a choh ta.
15 Na chhotuhpa vâlyuhchâpa chata khihpi nata a chhikaozy nata a kuh cha thlie nawpata ngôh lothi hnei ta.
16 Khihpi cha kipalih ta y ta, a doh lâ cha a hâ tie a châ; khihpi cha lothi chata thlie ta, lyu thy kha nata lyu sâh no a châ; a doh lâ nata a hâ lâ nata a sâhna lâ chhao cha a kho sai hra.
17 A kuh dôhpa cha thlie heih ta, chyhsa thlienazie hawhta dy za kha nata dy sypalih nata dy palih a châ, cha cha vâlyuhchâpa thlie tyhpa cha a châ.
18 A kuh dôhpa cha zaspy lô ta taopa a châ; khihpi cha thlalâ pathaihpa hawhta ngôh suapata taopa a châ.
19 Cha khihpi bôna kuh dôhpa lôzy cha alôsôhpa chi torai ta tobipa a châ; a bôna lô tuapa cha zaspy châ ta; a mianona cha saphai lâ a châ, a miathôhna cha kalisidôni lô châ ta; a miapalihna cha emyra lô a châ.
20 a miapangawhna cha sadôny lô châ ta; a miacharuna cha sadi lô a châ; a miasarina cha krysôlite lô châ ta; a miachariena cha bery lô a châ; a miachakina cha tôpazi lô châ ta; a miahrawhna cha krysôparase lô a châ; hleikhana cha zaki lô, a hleinona cha amethy lô a châ.
21 Chhikao miahrawhleino cha taikulô miahrawhleino a châ; chhikao zydua cha taikulô miakha chyuta taopa a châ; khihpi othliah cha ngôh suapa châ ta, thlalâ mohpahlie theipa hawhta a châ.
22 A chhô liata a chhyna-o rai hmô leipa na ta; Abeipa Khazohpa Atotaotheipa nata Mietahkupa Taw cha amâ achhyna-o châ tlôh ei ta.
23 Cha khihpi cha pakhaihsa awpata noh byuh leipata, thlâpâ chhao byuh hra vei; Khazohpa rônahna chata pakhaihsa ta, a meiôh cha Mietahkupa Taw châ tlôh ta.
24 A khaihna liana chata phopizy charei aw ei ta; alei beizy chhaota ama rônahna amâ ngiakhei hra aw,
25 a chhikaozy cha nohchhô ta khawpata y chachei ta aw vei, cha liana chata zâ rai y chacheita hra aw vei.
26 Phopizy ta ama rônahna nata zachhihna cha amâ ngiakhei aw.
27 Châhrasala hmo puapa rai a ngia leipa aw ta, hmo pasichhihpa a taopa nata hai a hmâhpazy chhao a ngia chacheita hra aw veih ei, Mietahkupa Taw hrona châbu liata moh a ropazy deita amâ ngia aw.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||