1 Vâlyuhchâpa chata hrona ti chavah krystal lô hawhta a pathliepa, Khazohpa nata Mietahkupa Taw abeidyuchhai liata a vaw puapa na pamosa ta.
2 Cha othliah lialiah nata chavah kiah rairie liata hrona tho, chi nanopa miahrawhleino ta a patheipa, thla chareih ta a patheipa y ta; cha thohnazy cha phopizy patlâhsa nawpa a châ.
3 Chhiesana rai y khao leipa aw ta, Khazohpa nata Mietahkupa Taw abeidyuchhai cha tlao a y ha aw; chatanachata a seizy chata ano ama chakao aw;
4 a hmia hmô aw ei ta, ano moh cha ama khi liata â choh hra aw.
5 Zâ y khao leipa aw ta, meiôh khaihpa nata noh khaihpa chhao byuh khao aw veih ei; Abeipa Khazohpa chata âmo cha pakhaihsa tlôh aw ta; chhâzaw ta ryu ama reih aw.
Zisu cha a vy patoh aw
6 Chatawhcha ano chata ei hnohta, “He biezy he ngâ a chhih ta â do hra. Chatanachata Abeipa, hrohsopazy thlahpa Khazohpa chata hmo thlai a vaw tlô awpazy cha a chakaotuhpa hnohta pamosa awpata a vâlyuhchâpa tuah ta.
7 Nahthlie teh, ei vy pato aw,” tah ta. He châbu chhochhieliena bie a pyhpa cha a nohhlao na.
8 Kei, Zawhana, he hmo zydua a hmôtuhpa nata a theituhpa cha ei châ. Chatawhcha thei na ta, ei hmô nahta, he hmozy na pamosatuhpa vâlyuhchâpa phei thaby liata achhy awpata kei pao na ta;
9 châhrasala ano chata ei hnohta, “He hawhna heta tah khâ! Kei cha nâma nata na unawhpa hrohsopazy nata he châbu bie a pyhtuhpazy chakaolâhpa mâh ei châ tâh. Khazohpa achhy teh,” tah ta.
10 Chatawhcha ano chata ei hnohta, “He châbu chhochhieliena biezy he phih khâ; a daihti cha a hnia ha tlôh ta.
11 Chyhsa sia leipa cha a sia leipata y thlâh ha se; chyhsa puapa cha a puapata y thlâh ha se; chyhsa siapa cha a siapata y thlâh ha se; chyhsa pathaihpa cha a pathaihpata y thlâh ha se.
12 “Nahthlie teh, ei vy patoh aw; chyhsa to ama hmotaopa chyu lymâ hawhta pie awpata ei lymâ cha ei hnohta y ta.
13 Kei Alpha nata Omeka, hmiatua chaipa nata hnôh chaipa, a thaona nata a chhâna cha ei châ.
14 Hrona tho chô liata bie ama hnei theina awpa nata chhikaozy liana chata khihpi liata amâ ngia thei nawpata ama chysiazy a pasupa cha ama nohhlao na.
15 Khôtho liana chata Izy, dyuthaipazy, a pheihmâhpazy, lianycheihpazy, nohthlahpa a chhypazy, hai a khohpazy nata hai a hmâhpazy maih cha y ei ta.
16 “Kei, Zisu heta awnanopa sahlaozy châta he bie he nama hnohta pahnosa awpata ei vâlyuhchâpa cha ei vaw tuah. Davi thabypa nata a pathlapa, awhsi khaih ngaitapa, awhkho tahpa cha ei châ,” tah ta.
17 Thlahpa nata myuthieh chata, “A vy teh,” tah ei ta. A theipa maihta, “A vy teh,” tah ei se. A dâhphipa maih a vy se; a khohpa maihta hrona ti he a saipata la se.
18 He châbu chhochhieliena bie a theipa maih hnohta ei pahnosa: ahyrai ta he biezy he a baichha khiahtala, he châbu liata hriena ropazy he Khazohpa ta a chô liata a baichha hra aw;
19 ahyrai ta he chhochhieliena châbu liata biezy a thy bâ khiahtala, he châbu liata ropa hrona tho nata khihpi pathaihpa liata a tovyuh cha Khazohpa ta a lapa hra aw.
20 He hmozy a pahnosatuhpa heta, “Hmeiseihtata ei vy patoh aw,” tah ta. Amen. A vy mah y, Abeipa Zisu!
21 Abeipa Zisu ngiachhiena cha mopathaihpa zydua hnohta y mawh sy, Amen.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||