Mara Holy Bible: 2 Abeizy

Showing posts with label 2 Abeizy. Show all posts

2 Abeizy 1

ABEIZY CHÂBU SÂNONA

2 Abeizy 1

1 Ahaba a thi tawhta Môaba sahlao cha Izarel zy chô liata aty ei ta.

2 Ahaziah cha Samari liata a chhôhpadahpa chô chaipa diahpai opy liata tla ta, pasa haw ta; chatanachata chyhsa tuah ta, ama hnohta, “Sie ula, he ei pasapa he ei tlâh thei aw tlyma Ekraw khih khazoh Baalzebu kei hiahri teh u,” tah ta.

3 Châhrasala ABEIPA vâlyuhchâpa ta Tisabi chyhsa Elaiza hnohta, “Thyu la, Samari beipa chyhsa tuapa zy chho awpa ta sie la, ama hnohta, ‘Izarel râh liana heta Khazohpa a y khao leipa vâta ma, Ekraw khih khazoh Baalzebu cha hiahri awpa ta nama sie tly?’ tahpa ta.

4 ABEIPA ta he tana heta a tah, ‘Rakhô na kiapa kha, za chô khao leipa aw chi ta, na thi tlai aw,’ tahpa ta tah mah y,” tah ta. Chatawhcha Elaiza cha sie haw ta.

5 A chyhsa tuapa zy cha ano lâta vaw kua heih ei ta, ano chata ama hnohta, “Kheihta zie ta nama vaw kua thlâh ha heih?” tah ta.

6 Âmo chata a hnohta,” Chyhsa pakha bie maniah a chho awpa ta a vy ta, eima hnohta, “Sie ula, cha vaw tuah tuhpa abeipa lâna chata kua ula, a hnohta, ABEIPA ta he tana heta a tah, Izarel râh liana heta Khazohpa a y khao leipa vâta ma Ekraw khih khazoh Baalzebu cha hiahri awpa ta na tuah tly? Rakhô liata na kiapa kha chô khao leipa aw chi ta, na thi tlai aw,’ tahpa ta tah teh,” tah ei ta.

7 Ano chata ama hnohta, “Bie cha chho awpa ta a vypa, cha biezy cha chhotuhpa cha kheihawhpa chyhsa e a châ?” tah ta.

8 Âmo chata a chhy ei ta, “Sahmi poh a bupa châ ta, a chai liata savo chaisaihna â sai,” tah ei ta. Ano chata, “Tisabi chyhsa Elaiza a cha chu,” tah ta.

9 Beipa chata pheisaih sypangawh hyutuhpa, a sahlao zy sypangawh chhaota ano lâta tuah ta. Ano lâta khy ta; ano cha tlâh laki liata a vaw tyuh ta, ano chata, “Nâ Khazohpa chyhsa y, abeipa ta, ‘A zu mawh sy,’ a cha tah na,” tah ta.

10 Elaiza chata pheisaih sypangawh hyutuhpa hnohta, “Khazohpa chyhsa ei châ tlai khiahtala, ava tawhtapa mei za tla sala, nâma nata na sahlao zy sypangawh kha cha kâ patlô khai ei se,” tah ta. Avâ tawhtapa mei tla ta, ano nata a sahlao zy sypangawh cha kâ patlô khai haw ta.

11 Ano lâta pheisaih sypangawh a hyutuhpa hropa a sahlao zy sypangawh chhaota tuah heih ta. Ano cha kiah ta, a hnohta, “Nâ Khazohpa chyhsa y, abeipa ta, ‘A zu parah mawh sy,’ a cha tah,” tah ta.

12 Elaiza ta a chhy ta ama hnohta, “Khazohpa chyhsa ei châ tlai khiahtala avâ tawhta mei za tla sala, nâma nata na sahlao zy sypangawh kha, cha kâ patlô khai ei se,” tah ta. Khazohpa mei cha avâ tawhta za tla ta, ano nata a sahlao zy sypangawh cha kâ patlô khai haw ei ta.

13 Pheisaih sypangawh hropa hyutuhpa a sahlao zy sypangawh chhaota tuah heih ta. Cha pheisaih sypangawh hropa hyutuhpa cha khy ta, Elaiza hmiakô liata a pakhu paneih ta, a hnohta, “Hy Khazohpa chyhsa y, ei hrona nata he na chakaotuhpa chyhsa sypangawh zy hrona he, na mohmô liana heta sôh mawh sy.

14 Avâ tawhta mei za tla ta, pheisaih sypangawh hyutuhpa zy pano kha, ama sahlao sypangawh chhaota, mei ta kâ patlô haw ei ta; keima hrona deikua he na mohmô liana heta sôh mawh sy,” tahpa ta a haw ta,

15 ABEIPA vâlyuhchâpa chata Elaiza hnohta, “Ano hnohta zu teh; ano cha chi khâ,” tah ta. Chatawhcha thyu ta, abeipa lâna chata zu haw ei ta,

16 ano chata a hnohta, “ABEIPA ta he tana heta a tah, ‘Ekraw khih khazoh Baalzebu a chhohia awpa ta chyhsa zy na tuah bao hrapa he, Izarel râh liana heta Khazohpa a chhohia awpa ta a y leipa vâta ma a châ tly? Chavâta rakhô na kiapa kha za chô khao leipa aw chi ta, na thi tlai aw,’ tahpa ta,” tah ta.

17 Elaiza reipa ABEIPA bie hawhna chata thi haw ta. Sawchapawpa a hnei leipa vâta Zudah beipa Zahôsapha sawchapawpa Zehôra kô no abeina kô liana chata ano unawhpa Zehôra cha ano vyuhpa ta a bei pathao haw ta.

18 Ahaziah hmotaopa thâtih hropa zy cha Izarel abeizy ama bei no tahpa kyh rona châbu liata ropa ta y vei ma?

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 2

Elaiza avâ lâta lapa a châ

1 ABEIPA ta Elaiza cha avâ liata khisô ta â chhi chyna khata Elaiza nata Elaisa cha Kilkal tawhta pua ei ta.

2 Elaiza ta Elaisa hnohta, “He liana heta vaw y teh; ei châ haw na; ABEIPA ta Bethel taihta sie awpa ta eina tuah,” tah ta. Elaisa chata, “ABEIPA hrona nata na hrona reipa ta ei reih, cha y sai cheita aw va na,” tah ta. Chatanachata Bethel lâta zu haw ei ta.

3 Bethel liata a ypa hrohsopa sahlao sawchapawpa zy cha Elaisa lâta a vy ei ta, a hnohta, “Atanoh he ABEIPA ta na chôta hyutuhpa he a cha lapa aw tahpa na pahno ma?” tah ei ta. Ano chata, “Y, ei pahno; a chalih thlâh ha teh u,” tah ta.

4 Elaiza ta a hnohta, “Elaisa y, he liana he vaw y teh, ei châ haw na; ABEIPA ta Zerikô lâ sie awpa ta eina tuah,” tah ta. Ano chata, “ABEIPA hrona nata na hrona reipa ta ei reih, cha y sai aw va na,” tah ta. Chatanachata Zerikô tlô haw ei ta.

5 Zerikô liata a ypa hrohsopa sahlao sawchapawpa zy chata Elaisa a kei hnia ei ta, a hnohta, “Atanoh he ABEIPA ta na chôta hyutuhpa he a cha lapa aw tahpa na pahno ma?” tah ei ta. Ano chata a chhy ta, “Y, ei pahno; a chalih thlâh ha teh u,” tah ta.

6 Elaiza ta a hnohta, “He liana heta vaw y teh, ei châ haw na; ABEIPA ta Zawdah lâ sie awpa ta eina tuah,” tah ta. Ano chata, “ABEIPA hrona nata na hrona reipa ta ei reih, cha ysai cheita aw va na,” tah ta. Chatanachata ama pano ta sie haw ei ta.

7 Hrohsopa sahlao sawchapawpa zy hry liatahpa sypangawh vawh ei ta, âmo dady liata a hlapi ta a kei duah ei ta.

8 Elaiza chata a poh cha la ta, a tôh lâta chaty ta, ti cha tu ta, hiakha lâ hiakha lâta a vaw pachhaih haw ta, ama pano ta alei hipa liata chaka haw ei ta.

9 Ama chaka tawhna chata Elaiza ta Elaisa hnohta, “Nâ tawhta lapa ta ei y hlâna heta khâpa ei cha tao pa aw, na hiah teh,” tah ta. Elaisa chata, “Na thlahpa topa lie no to awpa, ei châ haw,” tah ta.

10 Ano chata, “Hmo ru ngaitapa na hiah he; ru hra sala nâ tawhta lapa ta ei y nota eina hmô chi khiahtala, to aw chi ta; eina hmô vei chi khiahta deikua cha to aw va chi,” tah ta.

11 Chatawhcha sie khoh lymâ ei ta, bielôhawhpa ama rei nona chata mei talaili nata mei arâ zy, thlai a vaw lâ ta, ama likawh liata tlapa ta pachhaih haw ta. Elaiza cha khisô liata avâ lâ kiah haw ta.

12 Cha cha Elaisa chata hmô ta, “Ei pâ, ei pâ y, Izarel zy talaili nata arâ kiahpa chyhsa zy cha,” tahpa ta aw ta. Chatawhcha Elaiza cha hmô khao leipa ta.

Elaisa ta Elaiza su â thla

A poh cha patu ta, su no lâta hrie ta.

13 Elaiza poh a vaw tlapa chhao cha chaba ta, kua haw ta, Zawdah kiah liana chata a duah ta.

14 Elaiza poh a vaw tlapa cha la ta, ti cha tu ta, “ABEIPA, Elaiza Khazohpa cha khataih liata a y?” tah ta. Ti a tu nahta hiakha lâ hiakha lâta a vaw pachhaih haw ta; Elaisa cha chaka haw ta.

15 Zerikô liata hrohsopa sahlao sawchapawpa ano dady ta a ypa zy ta, ama hmô nahta, “Elaiza thlahpa cha Elaisa chô liata â choh haw tlai na,” tah ei ta. Ano dy awpa ta vawh ei ta, a hmiakô liata alei taihta a bôh ei ta, a naoh ei ta.

16 Âmo chata a hnohta, “Pachâ teh, na chakaotuhpa zy heta chyhsa thatlô ngaitapa sypangawh y lâh pi ta; na zibeipa tlua awpa ta sie ei se; ABEIPA Thlahpa ta khykhei ha aw ta, khataih tlâh liata tlyma, khataih saikao liata tlyma a pathla thlâh ha ngyu aw na,” tah ei ta. Chatawhcha ano chata, “Pasiesa aw veih eichi,” tah ta.

17 Ano chata nozachhihna taihta amâ haw tawhna chata, “Pasiesa teh u,” tah haw ta. Chatanachata chyhsa sypangawh tuah ei ta; noh thôh chhôh tlua ei ta, châhrasala hmô leipa ei ta.

18 Zerikô liata a y nona chata ano lâta vaw kua ei ta, ano chata ama hnohta, “Nama hnohna khata sie kha u, cha tah vei eina mâ?” tah ta.

19 Cha khih chyhsa zy chata Elaisa hnohta, “Moh tua, he khih su he pha kaw ta, eima beipa chhaota hmô thlâh ha hra chi ta, châhrasala ti he pha leipa ta, a râh he a pathei leipa râh a châ,” tah ei ta.

20 Ano chata tithei thiehpa na vaw pie ula, alôh ryh teh u,” tah ta. Chatanachata vaw pie ei ta.

21 Chatawhcha tikhaoh lâ vawh ta, cha cha hie ta, “ABEIPA ta he tana heta a tah, he ti he ei pahâsa haw; atahmâ tawhta thina nata nawh raona y khao aw vei, tahpa ta,” tah ta.

22 Elaisa a reipa hawhta atanoh taihta ti cha pahâh haw ta.

23 Cha tawhna chata Bethel lâ khy ta; cha lâpi liata a sie hai nota khih tawhta chapaw hawti sahlao vaw pua ei ta, vaw pahneisao ei ta a hnohta, “Nâ, luh pôlôpa khy bâ teh, nâ, luh pôlôpa khy bâ teh,” tah ei ta.

24 A vaw heih ta, âmo vaw hmô ta, ABEIPA moh ta chhie sapa ta. Chatawhcha lyurâhpa tawhta chavyh chanôpa pô no vaw pua ta, ama hry liata hawti sypalih nata pano vaw hrie chheih haw ta.

25 Cha tawhna chata Kamel Tlâh lâ sie ta, Samari lâta kua haw heih ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 3

Izarel beipa Zehôra abeina

1 Zudah beipa Zehôsapha kô hrawhleicharie a bei kô ta, Ahaba sawchapawpa Zehôra cha Izarel sahlao chô liata kô hrawhleino a bei ta.

2 ABEIPA mohmô liata hmo pha lei ngaitapa tao tyh ta, anodeikuacha a nô nata a paw hawh ngâsâ ta la hmo tao vei, ano ta la a paw ta Baal alô a vaw bôpa kha a thy haw.

3 Châhrasala Izarel sahlao zy hmo paraosapa ta a taopa Neba sawchapawpa Zerôbaw moleina zy liata khâchâ a baih ta; siesai khao vei.

Môaba mo pahniena Elaisa chhochhieliena

4 Môaba beipa Mesa cha mietahkupa taw thy sykha hmi nata mietahkupa tôhpa thy sykha hmi cha Izarel beipa hnohta chhie châta a cheih tyh,

5 Anodeikuacha Ahaba a thi tawhna chata Môaba beipa cha Izarel beipa chô liata aty haw ta.

6 Cha nona chata Abei Zehôra cha Samari tawhta pua ta, Izarel sahlao zydua cha pakhy khai ta.

7 Zudah beipa Zehôsapha hnohta, “Môaba beipa chata ei chô liata aty ta; Môaba sahlao eina dyuh khei khoh aw chi mâ?” tahpa ta chyhsa tuah ta. Ano chata, “Ei cha dyuhkhei aw; kei nata nâma, ei chyhsa zy nata a chyhsa zy cha pôh kha châ pi ta, ei arâ zy nata nama arâ zy cha pôh kha ama châ mâ tâh,” tah ta.

8 Ano lilaw chata, “Khataih lâpi lâta e eima vaw sie aw?” tah ta. ano chata a chhy ta, “Edôma râhpathohpa lâ lâpi lâta,” tah ta.

9 Izarel beipa cha Zudah beipa nata Edôma beipa chhaota sie haw heih ta. Noh sari chahlô ei ta, pheisaih sahlao zy nata ama sa a chhipa zy do awpa ti y leipa ta.

10 Izarel beipa chata, “A pei rimâ cha! ABEIPA ta abei pathôh zy he Môaba sahlao ku liata pie awpa ta maniah a chhitha he zaw,” tah ta.

11 Zehôsapha chata, “He liana he ta ABEIPA maniah a chhohiapa awpa ABEIPA hrohsopa ahy tlyma chhâ y vei ei mâ?” tah ta. Izarel beipa chakaotuhpa pakha chata a chhy ta, “Elaiza ku ti a bao tyhpa Shapha sawchapawpa Elaisa, he liana heta a y mâ tâh,” tah ta.

12 Zehosapha chata, “Ano hnohta ABEIPA bie a y thlâh ha chu,” tah ta. Chatanachata Izarel beipa nata Zehôsapha nata Edôma beipa cha ano lâta zu ei ta.

13 Elaisa ta Izarel beipa hnohta, “Nâma nata keima ta a hmâna khâpa e eima hnei tly? Na paw hrohsopa zy hnohta nata na nô hrohsopa zy lâta sie teh,” tah ta. Izarel beipa ta a hnohta, “Sie aw va na, abei pathôh zy he Môaba sahlao ku liata pie awpa ta ABEIPA ta maniah a chhi hih,” tah ta.

14 Elaisa ta, “A kiapâh liata ei y tyhna Pheisaih zy ABEIPA hrona reipa ta ei reih, Zudah beipa Zehôsapha he ei za leipa khiahtala, nâ lâta chhao a heih khopa ta hmo chhao ei cha hmô khoh leipa awpa a châ.

15 Khâparai châ sala totâ a tô thaipa na aw pa teh u,” tah ta. Chatawhcha totâ a tô thaipa ta a tô nahta “ABEIPA ku cha a chô liata vaw y haw ta.

16 Ano chata, “ABEIPA ta he tana heta a tah,” He saikao zydua he a thuhpa ta chao teh u, ’tahpa ta.

17 ABEIPA ta he tana heta a tah, ‘Ziza rai pahno leipa aw eichi ta, vâsua rai chhao hmô leipa aw eichi ta, châhrasala he saikao he ti ta a bie khai aw, chatanachata nâma nata nama sahroh zaw zy nata nama sa zy heta nama do aw,’ tahpa ta.

18 Cha cha ABEIPA pachâ ta hmo chyhpa ta dei châ ta; Môaba sahlao he nama ku liata a pie hra aw,

19 kuh a hneipa khih zydua nata khihpi phapa zydua cha parao aw eichi ta, tho phapa zydua cha thlu aw eichi ta, tikhaoh zydua cha papo aw eichi ta,, su phapa zydua cha alô ta vawpa ta nama parao khai aw,” tah ta.

20 My ta hmohlâpa daihti rachhôh ta Edôma râh lâ tawhta ti vaw loh chaimâh ta, a râh cha ti ta bie haw ta.

21 Môaba sahlao zydua chata âmo adyuh awpa ta abei sahlao ama khy tahpa ama thei nahta chariah adyuh theipa maih a aw pakhy ei ta, râhri liata a vaw byh ei ta,

22 mydi ta thyu ei ta, noh ta ti cha za khai ta, Môaba sahlao chata ama dady liata ti cha thisaih hawh tlaita a saihpa ta hmô ei ta:

23 “Thisaih a châ hao; abei sahlao âmo nata âmo adyuh ei ta, âmo nata âmo amâ thiepa a châ thlyu aw. A vy teh u, Môaba mozy saih u, hraona hmo la ei suh u!” tah ei ta.

24 Izarel sahlao riehmo ama tlô nahta, Izarel sahlao cha sôkha ta thyu ei ta, Môaba sahlao cha adyuh ei ta, ama hmiakô liata a râpai haw ei ta; Môaba sahlao thie lymâna chôta ama râh lâ a chadai ei ta.

25 Khih zy cha parao ei ta, ama su phapa zydua cha chyhsa to ta alô ta vawh ei ta, alô ta bie khai haw ta, tikhaoh zydua papo ei ta, tho phapa zydua thlu ei ta; Kiharese khih liatahpa deita alô cha ama hria leipa a châ, cha chhao cha alô vawna ta vawhpa ta a padô ei ta, ama pahnie.

26 Môaba beipa ta amâ dyuhpa cha pahnie awpa ta a pahno khao leipa ta Edôma beipa lâta tlô awpa ta chatôh pathla a chhuahpa ta zaozi a chabapa chyhsa za sari a chhi ta; châhrasala tao thei leipa ei ta.

27 A sawchapawpa uhthei chaipa ano vyupa ta a bei awpa cha kuh tlâh liana chata raopa hlâna châta hmâh haw ta. Izarel sahlao zy cha ama pathi-ia ngaita ta kuasai ei ta, ama râh lâ a di haw ei ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 4

Nôhmeipa sathaw

1 Hrohsopa sawchapawpa sahlao lahpinô zy hry liata chanô pakha ta Elaisa hnohta, “Na chakaotuhpa ei vahpa cha thi haw ta; na chakaotuhpa khata ABEIPA cha a chi tyh tahpa pahno chi ta, dyu a cheituhpa chata ei sawzy pano sei châta a chhi awpa ta â vy,” tahpa ta a nôpona kyh reih ta.

2 Elaisa ta a hnohta, “Khâpa ei cha taopa aw? Na chho teh; o liata khâpa na hnei?” tah ta. Ano chata, “Na seichanônô heta sathaw ôh kha deita leipa ta cha o liata khâpahmah ta hnei va na,” tah ta.

3 Ano chata, “Vawh la, na opa sahlao beih ruapa a kei hlâh teh, a chyhta a hlâh khah y.

4 A ngia la, nâma nata na sawchapawpa zy chhaota, ochhi a khawhlôh ula, cha beih zydua liana chata ryh la, a biepa cha a nano ta soh lymâ mah y,” tah ta.

5 Ano tawhtapa cha sie haw ta, ano nata a sawchapawpa zy chhaota ochhi a khawhlôh ei ta; âmo chata beihzy cha vaw la ei ta, ano chata vaw ryh lymâ ta.

6 Beih zy cha a bie khai tawhta a sawchapawpa hnohta, “Beih na pie heih teh,” tah ta. Chatawhcha sathaw kua haw ta.

7 Khazohpa chyhsa cha kei chho ta, ano chata, “Vawh la, sathaw cha kei zuah la, na leibâh cha thô la, a laibâhpa chata na sawchapawpa zy chhaota pasana ta hmâh teh u,” tah ta.

Elaisa nata Shuna chanô

8 Noh kha cha Elaisa cha Shuna khih lâta kei tlyh ta, cha liana chata chanô hneirôh ngaitapa y ta, ano chata pati nie awpa ta a vaw ngiakhei ta. Chatanachata a siena maihta cha liana chata pati nie awpa ta a ngia tyh ta.

9 Ano chata a vahpa hnohta, “Pachâ teh, he chyhsa maniah chapia tyhpa he, Khazohpa chyhsa pathaihpa a châ tahpa ei pahno na.

10 Pâhchhô liata chhôhpadâhpa pazaopa ei si, rakhô zy, tlâhkhai zy, dyuchhai zy, meiôh sona zy sopa ei si, chatanachata keimo lâ a vyna maih ta a ngia tyhna hâh ta,” tah ta.

11 Noh kha cha vawh heih ta, cha chhôhpadâhpa liana chata a kei ngia ta, a zia ta.

12 A chakaotuhpa Kehazi hnohta, “He Shuna chanô he kei aw tua,” tah ta. Ano cha kei aw ta, a hmiakô liata a vaw duah ta.

13 Elaisa chata a chakaotuhpa hnohta, “Pachâ teh, nâma ta maniah pasô ngaita chi ta; khâpa ei cha taopa hra aw? Abeipa tlyma, pheisaih hyutuhpa tlyma ei cha chhopa awpa na khoh ma? tahpa ta a hnohta reih teh,” tah ta. Ano chata a chhy ta, “Ei chiheih zy hry liata a pahrâpa ei châ mâ tâh,” tah ta.

14 Ano chata, “Khâpama ei taopa aw tly?” tah ta. Kehazi chata a chhy ta, “Sawchapawpa hnei leipa ta, a vahpa hra cha pawpi haw tlôh ta,” tah ta.

15 Ano chata, “Kei aw tua,” tah ta. A kei aw na ta, chhikao liata a vaw duah ta.

16 Ano chata, “Atahmâ ti a vaw tlô heih tita cha sawchapawpa nâ pyh hra aw,” tah ta. Ano chata, “Ei zibeipa y, nâ Khazohpa chyhsa chi; na seichanônô liata haih khâ,” tah ta.

17 Châhrasala chanô cha nawh hnei ta, Elaisa ta a hnohta a reipa hawhna tlai khata cha daihti a vaw tlô nahta sawchapawpa sa haw ta.

18 Hawsaih cha vaw laiseih ta, noh kha cha a paw hnohta, sâh hriatuhpa zy lâta sie hra ta.

19 A paw hnohna chata, “Ei luh, ei luh!” tah ta. A paw chata a chakaotuhpa hnohta, “A nô lâta kei pie teh,” tah ta.

20 A chhi ta, a nô lâta a tlô nahta a byh chô liata nohchhô taihta a tyuh ta, chatanachata thi haw ta.

21 Chatawhcha khy ta Khazohpa chyhsa rakhô liana chata pazia ta, ochhi khawhlôh ta, pua haw ta.

22 A vahpa cha aw ta, “Chakaotuhpa ahy tlyma nata alâ pô kha tlyma na pachâpa teh, Khazohpa chyhsa lâta vaw parah aw na ta, ei vaw kua heih aw,” tah ta.

23 Ano chata, “Khazia e atanoh cheingei ano lâta sie nâ chhuah, thla thiehpa chhao châ leipa ta, pahânoh chhao châ tlôh va,” tah ta. Ano chata, “Â ryh thlâh ha aw,” tah ta.

24 Alâ ky padia ta, a chakaotuhpa hnohta, “Parahsa la, sie lymâ teh; bie ei cha pie vei khiahtala na pahawh cheita khâ,” tah ta.

25 Sie haw ta, Khazohpa chyhsa lâna chata Kamel Tlâh lâta sie ta.Khazohpa chyhsa chata lâ hlapi tawhta vaw hmô ta, a chakaotuhpa Kehazi hnohta, “Moh tua, hao hao Shuna chanô kha a châ;

26 ano dy awpa ta a kei râ la, a hnohta, ‘Na tlâh ma? Na vahpa a tlâh ma? Hawtipa kha a tlâh ma? kei tah teh.” tah ta. Ano chata a vaw chhy ta, “Ama tlâh na,” vaw tah ta.

27 Tlâh liata Khazohpa chyhsa lâta a tlô nah ta, a phei khâchâ patu ta. Ano cha vaw pahneisa awpa ta Kehazi chata kei pangai ta. Châhrasala Khazohpa chyhsa chata, ‘Kheihtahmah tah khâ, a palôhrupa nô a po hih; ABEIPA ta kei tawhta nyu chy ta, na chho mâh vei,” tah ta.

28 Ano chata, “Ei beipa he sawchapawpa ei cha hiah ma khâ? Na dôvei khah y, cha tah vana ma khâ?” tah ta.

29 Kehazi hnohta, “Na chai a saih la, ei chôhchahrei he cheih la, sie teh. Ahyrai kei hmô la, a naoh khah y; ei chôhchahrei he hawtipa hmia liata pahnieh mah y,” tah ta.

30 Hawtipa nô chata, “ABEIPA hrona nata na hrona reipa ta ei reih, cha siesai cheita aw va na,” tah ta. Chatawhcha thyu ta, zi haw ta.

31 Kehazi chata chôhchahrei cha hawtipa hmia liana chata pahnieh ta, châhrasala reikah nata pahno theina rai hnei leipa ta. Chatanachata chho awpa ta kua heih ta, “Hawti cha a mo padeih vei,” tahpa ta chho ta.

32 Elaisa cha o liata a ngia nahta, hawtipa cha vaw thi haw ta, a rakhô liata vaw pazia thlâh ha ei ta.

33 A kei ngia ta, ama pano ta ochhi khawhlôh ta, ABEIPA lâta thlahchhâ ta.

34 Chatawhcha kiah ta, hawti cha a khu thlu ta, a hmao nata a hmao, a mo nata a mo, a ku nata a ku, patyh ta; a chô liana chata a khu thlu ta, chatanachata hawtipa pôhpa cha vaw lalôh lymâ ta.

35 Za chô heih ta, o chhôh liata a khiekhâ ta, kiah ta, a chô liana chata a khu thlu heih ta; chatanachata hawtipa cha ei sari vaw hâthih ta, hawtipa cha a mo vaw padeih haw ta.

36 Kehazi aw ta, “He Shuna chanô he kei aw teh,” tah ta. Kei aw ta, ano lâta a kei ngia nahta, “Na sawchapawpa he a pyh teh,” tah ta.

37 A kei ngia ta, a phei thaby liata pao ta, a hmia alei taih a bôhpa ta a naoh ta; chatawhcha a "sawchapawpa cha a pyh ta, pua haw ta.

Hrohsopa zy chata Elaisa hmotao noâhpa zy

38 Elaisa cha Kilkal lâta sie heih ta, cha râh liana chata chakâhna tlô ta. Hrohsopa sahlao sawchapawpa zy a hmiakô liata a tyuh ei ta, a chakaotuhpa hnohta, “Beih laipapi kha khaih la, hrohsopa sahlao sawchapawpa zy he abie pati chhoh pa teh,” tah ta.

39 Chyhsa pakha lyurâhpa lâta âhmie tlua awpa ta sie ta, zôh-ripa hmô ta, cha râh ôhpyh cha a pôh ta vaw padao ta, avy ta, â ta, beih liata abie pati liana chata thla ta, khâpa a châ tahpa pahno leipa ei ta.

40 Cha chyhsa sahlao nie awpa ta vaw si ta, pati cha ama nie hai no ta, “Hy Khazohpa chyhsa y, beih chhôh liana heta thina a y he zaw!” tah hôlô ei ta. Chatanachata nie thei khao leipa ei ta.

41 Elaisa chata, “Viahdie vaw cheih teh u,” tah ta. Cha cha beih liata thla ta, “He chyhsa zy nie awpa ta vaw si teh u,” tah ta. Chatanachata beih liana chata chichhihpa khâpahmah y khao leipa ta.

42 Baalsalisa tawhta chyhsa pakha a vy ta, Khazohpa chyhsa cha sâh thiehpa ta taopa bali viahchhâ tlâ syno nata sâh thiehpa su sahria ta vaw phaohpa ta. Ano chata, “He chyhsa zy nie awpa ta pie teh u,” tah ta.

43 A chakaotuhpa chata, “Kheihta e, he heta chyhsa za kha tlai ei tô aw mâ?” tah ta. Ano deikua chata, “He chyhsa zy nie awpa ta pie teh, ABEIPA ta he tana heta a tah, ‘Nie aw eichi ta, a laibâhpa a y aw,’ tahpa ta,” tah ta.

44 A noh tato ta. Nie ei ta, ABEIPA a tahpa hawh tlaita a laibâhpa y hra ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 5

Naama phawhpa patlâhsana

1 Suria beipa pheisaih hyutuhpa Naama he ABEIPA ta Suria sahlaozy pachhatuhpa ta a hmâh tyhpa vâta a zibeipa pachâna liata chyhsa zachhih ngaitapa châ ta. Ano cha chyhsa thatlôpa riahphapa châ hra ta; anodeikua cha a phawhpa châ ta.

2 Suria sahlaozy cha a hlao a hlao ta hrâ sie ei ta, Izarel râh tawhta chanô hawti chyhpa ta he sei ta a vaw chhi ei ta, ano chata Naama lahpinô chakao tyh ta.

3 Ano chata a zibeinô hnohta, “Ei zibeipa he, Samari liata hrohsopa hmiakô liata vawh sala, ei tah kaw dia! A phawhpa he a vaw patlâh thâh ha awpa tlai,” tah ta.

4 Naama cha a kei ngia ta, “Izarel râh liata chanô hawtipa ta khata cha hawhta a tah,” tahpa ta a zibeipa cha chho ta.

5 Suria beipa chata, “Vawh teh, Izarel beipa lâta châ ei paphao aw,” tah ta.Chatanachata pua haw ta, tâkâri talent miahrawh nata ngôh tlo sâ charu nata chysia a patly awpa mia hrawh phaoh ta.

6 He châ vaw hmô aw chi ta, ei chakaotuhpa Naama he a phawhpa na vaw patlâh awpa ta nâma lâta ei vaw tuah,” tahna châ cha Izarel beipa kei pie ta.

7 Izarel beipa ta cha châ cha a reih nata a poh hrie ta, “Chyhsa zy thie thei ta, a pahro heih theituhpa Khazohpa ma châ na ta, he chyhsa heta phawhpa patlâh awpa ta kei lâta a vaw tuah tly? Pachâ ula, a hryu eina pahao tahpa pahno teh u,” tah ta.

8 Khazohpa chyhsa Elaisa ta Izarel beipa ta a poh a hrie tahpa a thei nah ta, “Khâpa vâta ma na pohna hrie? Keima lâta a vy sa, chatanachata Izarel râh liana heta hrohsopa a y tahpa a pahno aw,” tahpa ta abeipa lâta chyhsa tuah ta.

9 Naama cha a arâ zy chhaota, a talaili zy chhao chata vawh ta, Elaisa o chhikao kiapâh liata a kei duah ta.

10 Elaisa chata, “Zawdah liata ei sari na ngai a si la, na sapa a ualuapa phaoh heih aw chi ta, na vaw pathaih ha aw,” tahpa chho awpa ta chyhsa tuah ta.

11 Châhrasala Naama cha a hie hâh kaw ta, sie haw ta, “A no tlai cha kei lâta vaw pua aw ta, a vaw duah aw ta, a phawhpa chôta a ku hiepa ta phawhpa a patlâh aw khiah ma, ei tah mâ tâh.

12 Damaska chavah Abne zy, Phapa zy cha Izarel râh chavah zydua hlâta pha via vei mâ? Chazy liana chata ngai a sipa ta a pathai thei va na mâ?” tah ta. Chatanachata a vaw lie ta, hiehâh ngaitapa ta sie haw ta.

13 A chakaotuhpa zy ta a kei hnia ei ta, chho ei ta, “Ei pâ y, hrohsopa khata hmo a khiakhi ngaitapacha pataosa sala, tao aw va chi mâ? ‘Na ngai a kei si la, a kei pathai teh,’ na hnohta a vaw tahpa kha tahna zie awpa châ vei mâ?” tah ei ta.

14 Chatanachata zu ta, Khazohpa chyhsa a reipa hawhna chata Zawdah liata ei sari a zâ ny ta; a sapa cha hawsaih sapa hawh tlaita vaw châ haw ta, vaw pathaih haw ta.

15 Ano nata a sahlao zydua ta Khazohpa chyhsa yna lâta kua ei ta, a hmiakô liata a kei duah ei ta, ano chata, “Izarel râh liata dei leipa ta cha aleilô zydua liana heta Khazohpa y vei tahpa ei pahno haw; chatanachata na chakaotuhpa lymâ he la teh,” tah ta.

16 Châhrasala ano chata, “ABEIPA hrona reipa ta ei reih, khâpahmah la aw va na,” tah ta. La awpa ta reipasao chaimâh ta, châhrasala khoh chachei leipa ta.

17 Naama chata, “Cha khiahtala, na chakaotuhpa he alâ phao no phao alei na palasa teh; atahmâ tawhta la na chakaotuhpa heta ABEIPA lâta dei leipa ta cha raopa hlâna nata atheihna he khazoh hropa zy lâta hlâ khao cheita aw va na.

18 He hmo liana heta ABEIPA ta na chakaotuhpa he a ngiahthai mawh sy; ei zibeipa he ei ku a ngâchhâpa ta a naoh awpa ta Rimô o liata ei bôh hrapa kyh liana chata ABEIPA ta na chakaotuhpa he a ngiahthai mawh sy,” tah ta.

19 Ano chata a hnohta, “Thlahlôh ngaitapa ta sie teh,” tah ta."Ano tawhtapa cha pua ta, kha châ tlyma sie hmâ ta,

20 Kehazi, Khazohpa chyhsa Elaisa chakaotuhpa chata, “Khei he, ei zibeipa heta Suria chyhsa Naama a hmo a vaw cheipa zy la chachei leipa ta, ngiachhie ta, pasiesa haw ta. ABEIPA hrona reipa ta ei reih, a kei chadai aw na ta, khâpa chhâ tlyma ei kei lapa tua aw,” tah ta.

21 Chatanachata Kehazi chata Naama cha a chadai ta. Naama ta ahy tlyma a vaw chadaipa a hmô nahta bie a chho awpa ta talaili tawhtapa chô ta, “Phana lâ kyh bao ma?” tah ta.

22 Ano chata, “Phana lâ kyh na. Ei zibeipa ta, ‘Ephrai tlâh râh tawhta hrohsopa sahlao sawchapawpa zy hry ta satlia pano ta na vaw tly ei ta; âmo cha tâkâri talent miakha nata chysia a patly awpa zo no pie teh,’ tahpa ta eina vaw tuah,” tah ta.

23 Naama chata, “Talent miano he la teh,” tah ta. Ano chata la awpa ta reipasao chaimâh ta, tâkâri talent miano cha chysia a patly awpa zo no chhaota sykhao zy liata khô ta, a chakaotuhpa pano paphaosa ta, a hmiakô liata siekhei ei ta.

24 Tlâh a kei tlô nahta la ta, o chhôh liata soh ta; cha chyhsa zy cha pasiesa ta, sie haw ei ta.

25 Anodeikuacha a ngia ta, a zibeipa hmiakô liana chata a kei duah ta, Elaisa ta a hnohta, “Kehazi, khataih tawhta nâ vy?” tah ta. Ano chata, “Na chakaotuhpa he khataih lâ hmahta sie va na,” tah ta.

26 Ano chata a hnohta, “Bie cha chho awpa ta a talaili tawhtapa kha chyhsa a zu haipa khata ei palôhrupa na hnohta sie lymâ hra vei mâ?"Tâkâ zy, chysia zy, ôli sahdô zy, kresahdô zy, mietahkupa zy, viahchao tôhpa zy, seichapaw nata seichanô zy he a hlapa daihti a châ mâ?

27 Naama phawhpa khata cha patu aw ta, chhâzaw ta na pathlazy chhao a patu lymâ aw,” tah ta. Kehazi cha ano tawhtapa cha dâhaw hawhta ngyuhpa ta, phawhpa ta pua haw ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 6

Ahrei cha a kaw pho

1 Hrohsopa sahlao sawchapawpa zy chata Elaisa hnohta, “Moh teh, na kiapâh liata eimâ tyuh pahmaohpa he, eima châta a cha-ie tu ha ta.

2 Zawdah lâta zu aw pi ta, cha liata tho cha za la chyu aw pi ta, eima tyu pahmaona awpa ta cha liana chata za tao ei sih y,” tah ei ta. Ano chata a chhy ta, “Sie teh u,” tah ta.

3 Chyhsa pakha chata, “Palôhtlâhpa ta y la, na chakaotuhpa zy hnohta sie hra mah y,” tah ta. Ano chata, “Ei sie hra aw na,” tahpa ta a chhy ta,

4 ama hnohta sie hra ta. Zawdah ama tlô nahta tho cha thlu ei ta.

5 Chyhsa pakha ta tho a thlu nota, ahrei cha ti liata tla haw ta; ano cha, “Cha rimâ cha, ei zibeipa! Eima hlâpa a châ mâ tâh,” tahpa ta aw ta.

6 Khazohpa chyhsa chata, “Khataih liata a tla?” tah ta. Ano chata a tlana pamosa ta, thody chhawh ta, cha liana chata za thy ta, thua cha a kaw pho haw ta.

7 Ano chata, “A huah teh,” tah ta, kei paza ta a huah haw ta.

Elaisa nata Suria mo

8 Suria beipa ta Izarel zy adyuh ta, “Cha su, kha su liana khata a byh ei suh u,” tahpa ta a chakaotuhpa zy chhohia ta.

9 Khazohpa chyhsa chata Izarel beipa hnohta, “Cha hawhpa su lâ sie lei awpa ta a chado teh, cha liana chata Suria sahlao amâ zu aw,” tahpa ta bie ta ta.

10 Izarel beipa chata Khazohpa chyhsa ta a vaw chho awpa su cha chyhsa kei pamoh pathlisa tyh ta, cha liana chata ei kha, ei no dei châ leipa ta a vaw paboh tyh ta.

11 Cha kyh liana chata Suriabeipapathipalôh cha a nôpo kaw ta; a chakaotuhpa zy cha aw ta, ama hnohta, “Eima hry liata chyhsa ahy he ma Izarel beipa chhâh a châpa na chho khoh aw veih ei chi mâ?” tah ta.

12 A chakaotuhpa zy hry liata chyhsa pakha chata, “Ahyhmah ta cha ma pi, hy abeipa ei zibeipa y; Izarel râh liata a ypa hrohsopa Elaisa heta na chhôhpadâhpa chhôh liata na reipa zy he Izarel beipa a chho lymâ tyhpa tlao a châ,” tah ta.

13 Ano chata, “Khataih liata ma a y, kei tlua teh u, ei patusa aw,” tah ta. “Dôtha khih liata a y,” tahpa ta chho ei ta.

14 Chatanachata arâ zy, talaili zy, pheisaih hluhpi zy cha lâna chata tuah ta; zâ ta vawh ei ta, khih cha padô ei ta.

15 Khazohpa chyhsa chakaotuhpa cha mydi ta thyu ta, a kei pua nahta, pheisaih sahlao chata arâ nata talaili chhaota, khih vaw chadô thlâh ha ta. A chakaotuhpa chata, “Cha rimâ cha, ei zibeipa! Kheihta eima tao aw?” tah ta.

16 Chatawhcha ano chata, “Chi khâ, âmo chhâh a châpa hlâta cha keimo chhâh a châpa eima hluh via mâ tâh,” tah ta.

17 Elaisa chata thlahchhâ ta, “ABEIPA y, a hmô thei nawpa ta a mo padeihsa mah y,” tah ta. ABEIPA ta cha satlia mo cha padeisa ta, chatanachata hmô haw hra ta; Elaisa kiapâh liata tlâh cha mei talaili nata arâ ta bie thlâh ha ta.

18 Ano lâta amâ zu nahta Elaisa ta ABEIPA lâta thlahchhâ ta, “He sahlao ama mo pachaosa mah y,” tah ta. Elaisa ta ama hnohta, “He he cha lâpi châ vei, he he cha khih chhao châ hra vei; na zi teh u, nama tluapa chyhsa lâna chata ei cha chhihtha aw ei,” tah ta. Chatanachata Samari lâta chhi haw ei ta.

20 Samari khih chhôh ama tlô nahta, Elaisa ta, “ABEIPA y, he sahlao heta ama hmô thei nawpa ta ama mo vaw padeisa mah y,” tah ta. ABEIPA ta ama mo cha vaw padeisa ta, hmô haw ei ta Samari khih chhôh chata vaw y thlâh haw ei ta.

21 Izarel beipa chata ama sahlao cha a hmô nahta Elaisa hnohta, “Ei pâ ei thie aw ei mâ? Ei thie aw ei mâ?’ tah ta.

22 Ano chata a chhy ta, “Thie bao va, na zaozi nata na libaw ta na sei patupa zy cha na thie aw mâ? Viahchhâ nata ti vaw tôh la, niepa ta doh ei sala, ama zibeipa lâta a di heih ei se,” tah ta.

23 Chatanachata niepa thata a chhuahnohpa ta; niepa ta ama doh khai nahta pasiesa khai haw ta, ama zibeipa lâta a di haw ei ta. Suria sahlao zy cha Izarel râh lâna chata hra sie khao veih ei.

Elaisa nata Samari dôna

24 Cha tawhna chata Suria beipa Benhada ta a pheisaih zydua pakhy ta, Samari khih padô ta.

25 Samari liana chata chakâhna ru ngaitapa tlô ta, khâchâ padô ei ta, alâ luh he tâkâ sycharie sekel ta zuah ei ta, vachhuh ie he kab* su palih ta pachhaih ta su kha tâkâ sekel pangawh ta zuah ei ta.

26 Izarel beipa cha kuh tlâh liata a sie hai nota chanô pakha ta. “Hy beipa, ei zibeipa, na bao teh!”tahpa ta vaw awsao ta.

27 Ano chata, “ABEIPA ta a cha bao leipa ta cha keima ta khataih tawhtapa ta ma zua ei cha bao aw? Sawhri tawhtapa ta tlyma, kresaohna khaoh tawhtapa ta tlyma a châ aw mâ?” tah ta.

28 Beipa ta a hnohta, “Khâpa na tah tlyma,” tah heih ta. Ano chata a chhy ta, “He chanô heta eihnohta, ‘Atanoh he na sawchapawpa eima nie awpa ta thyu teh, my lâ kei sawchapawpa he eima nie hra aw,’ tah ta.

29 Chatanachata ei sawchapawpa cha pasyu pi ta, nie pi ta. A mylâ ta cha keima ta a hnohta, ‘Na sawchapawpa cha eima nie awpa ta thyu hra teh,’ tah na ta; a sawchapawpa cha a nyu haw,” tah ta.

30 Beipa ta cha chanô bie reipa cha a thei nahta a poh hrie ta; kuh tlâh liata a sie hai nota châ ta, zawpi zy chata moh ei ta, a sapa a daihpa lâna chata latho poh a vaw bu thlâh ha ta,

31 ano chata, “Atanoh he Shapha sawchapawpa Elaisa heta a luh a bô thlâh ha khiahtala Khazohpa ta ano tao ta na tao sala, cha hlâta tha via chhao ta,” tah ta.

32 Elaisa cha ano o liata a tyuh ta, machâ sahlao chhao a tyuh hra ei ta. Beipa chata ano lâta chyhsa pakha tuah ta; châhrasala a chyhsa tuapa chata a kei tlô hlâta machâ sahlao hnohna chata, “He lianycheituhpa sawchapawpa heta ei luh la awpa ta chyhsa a vaw tuah tahpa nama pahno hra ma? Achyhsa tuapa cha a vaw tlô pata nahta ochhi khaw ula, ochhi liana khata khâchâ pakhâ teh u. A hnôh lâna chata a zibeipa phei pyu a thei ngyu vei mâ?” tah ta.

33 Cha hawhta âmo a chho hai nona chata Abeipa cha vaw tlô ta, beipa chata, “He hmo pha leipa he ABEIPA a vaw tuapa a châ hih! ABEIPA cha khazia e ei hâ khao aw?” tah ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 7

1 Elaisa ta, “ABEIPA bie he thei teh u; ABEIPA ta he tana heta a tah, mylâ atahmâ ti rachhôhheta Samari kuh chhikao liana chata viahdie dipa panuana hmo kha cha sekel miakha ta zuah aw ei ta, bali sâh panuana hmo no cha sekel miakha ta,” tahpa ta reih ta.

2 Pheisaih hyutuhpa abeipa ta a ku a ngâchhâpa chata Khazohpa chyhsa cha a chhy ta, “ABEIPA ta avâ liata opy pahy sala cha hawhpa cha a châ thei aw mâ?” tah ta. Ano chata, “Na mo ta la hmô tlai aw chi ta, a nie deikua cha nie aw va chi,”tah ta.

3 Kuh a ngiana chhikao kiapâh liata a phawhpa chapaw papalih y ei ta; âmo chata, “Khazia ma thi ha thlâh hapa ta he liana he eimâ tyuh thlâh ha tly?

4 Khih chhôh lâ a ngia ei suh u,’ tah mawh ei sihla, khih chhôh chakâh ei ta, thi thlâh ha tlôh aw pi ta; he liana heta a tyuh thlâh ha ei sih la, thi thlâh ha thlyu tlôh hra aw pi ta. A vy teh u, Suria pheisaih sahlao zy lâta a ngia thlâh ha aw pi ta; maniah ama pahlôh khiahta hroh aw pi ta, maniah ama thie khiahta thi thlâh ha la vâ pi,” tahpa ta a chho ei ta.

5 Suria sahlao zy riehmo lâ vawh awpa ta a zo hrahri ta pua ei ta; Suria sahlao riehmo tytuapa ama tlô nahta, ahyhmah y leipa ei ta.

6 ABEIPA ta Suria pheisaih sahlao zy cha talaili pyu zy, arâ pyu zy, pheisaih hlupi pyu zy patheisa ta, “Izarel beipa heta Hiti abei sahlao zy, Izi abei sahlao zy he maniah adyuh awpa ta a pahrua hih,” tahpa ta a chho ei ta.

7 Chatanachata thyu ei ta, a zo hrahri ta a râpai haw ei ta, ama poh-o zy, ama arâ zy, ama alâ zy nata amâ riehmo cha a ualua ta râsai ei ta, ama hrona pabohsa nawpa ta a râpai ei ta.

8 Cha a phawhpa sahlao chata riehmo tytuapa ama kei tlô nahta, poh-o miakha liata a kei ngia ei ta,niepa ta doh ei ta, cha liata tâkâri zy, ngôh zy, chysia zy cha la ei ta, nyu ei ta; chatawhcha kua ei ta, poh-o hropa liata a ngia heih ei ta, cha liatahpa chhao cha la ei ta, nyu heih ei ta.

9 He hawhna heta a chhohia ei ta, “Eima tao chhei kaw na. Atanoh he thâtih phapa tlôna noh châ ta; keimo he a chalih thlâh ha pi ta, khihdeipa eima hâ khiahtala hriena eimâ tyh aw; chatanachata a vy teh u, abeipa chhôhkha zy kei chho ei suh u,” tahpa ta.

10 Chatanachata khih ochhi vaihtuhpa cha awsao ei ta, “Suria sahlao riehmo lâ vawh pi ta, ahyhmah vaw y leipa ei ta, chyhsa pyu rai chhao y leipa ta, arâ zy nata alâ zy deita hraipa ta y ta, poh-o zy chhao cha a y ualuapa ta a y thlâh haw,” tahpa ta chho ei ta.

11 Ochhi vaihtuhpa cha aw ta, âmo chata abeipa o chhôh liata chyhsa zy cha kei chho ei ta.

12 Beipa cha za ta thyu ta, chakaotuhpa zy hnohna chata, “Suria sahlao maniah ama taona zie he ei cha chho aw ei. Eima nodi zie he pahno ei ta; chavâta ‘Khihpi tawhta ama vaw pua khiahtala a hrohpa ta patu aw pi ta, khih chhôh lâ eimâ ngia aw,’ tahpa ta lyurâhpa lâta a nyu awpa ta ama riehmo ama puasai hih,” tah ta.

13 A chakaotuhpa pakha chata a chhy ta, “Khihpi liata arâ a y tlakaipa zy hry liata pô pangawh he ahyzy tlyma pachhisa teh, Izarel zawpi sahlao a hrohpa zydua cha athipa ta pachâpa zy hawhta ama châ mâ tâh; kei tuah rai ei suh u,” tah ta.

14 Talaili a daophituhpa arâ pô no a chhi ei ta, abeipa chata, “Kei moh tua teh u,” tahpa ta Suria pheisaih sahlao zy a chadai awpa ta tuah ta.

15 Zawdah taihta a kei chadai ei ta; Suria sahlao zy ta ama pahrâpa vâta ama thypa chysia zy natahmodâh zy cha lâpi tlykha ta y lymâ ta. A chyhsa tuapa zy cha vaw kua ei ta, abeipa cha vaw chho ei ta.

16 Zawpi cha kei pua ei ta, Suria sahlao riehmo cha hrao ei ta. ABEIPA bie hawh tlaita viahdie dipa panuapa hmo kha cha sekel miakha ta zuah ei ta, bali sâh panuana hmo no cha sekel miakha ta.

17 Beipa chata pheisaih hyutuhpa a ku a vaw ngâchhâhpa kha kuh chhikao vaihtuhpa ta rao ta, zawpi zy chata kuh chhikao kiapâh liana chata tly sao ei ta. Khazohpa chyhsa ta ano lâta abeipa a zu no ta avaw reipa hawhna khata thi haw ta.

18 Khazohpa chyhsa ta abeipa hnohta, “Mylâ atahmâ ti rachhôh liana heta Samari kuh chhikao liata bali panuana hmo no cha sekel miakha ta zuah aw ei ta, viahdie dipa panuana hmo kha cha sekel miakha ta,” tah ta.

19 Pheisaih hyutuhpa ta Khazohpa chyhsa cha a chhypa ta, “ABEIPA ta avâ liata opy pahy sala cha hawhpa cha a châ thei aw mâ?” tah ta. Elaisa ta, “Na mo ta la hmô tlai aw chi ta, nâ deikua cha nie aw va chi,” tahpa ta a reipa kha.

20 Cha hawhna tlai chata a chô liata a vaw tlô haw, zawpi ta kuh chhikao kiapâh liana chata tly sao ei ta, a thie haw.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 8

Shuna chanô râh pie lilawpa a châ

1 Elaisa ta sawchapawpa a patlâhsapa chanô hnohna chata, “Thyu la, nâma nata na chhôhkha chhaota,namay theina su lâta kei y chy teh u; ABEIPA ta chakâhna a patlôsa aw na, he râh liana heta kôsari chhôh tlai a tlô aw tahpa ta vaw reih haw ta.

2 Chanô cha thyu ta, Khazohpa chyhsa bie hawhna chata tao ta; a chhôhkha zy chhaota, Philistina sahlao râh lâta kô sari kei y ei ta.

3 Kô sari tawhna chata cha chanô cha Philistina sahlao râh tawhtapa kua haw ta, a o nata a lyuabeipahia awpa ta vawh ta.

4 Beipa chata Khazohpa chyhsa a chakaotuhpa Kehazi cha, “Elaisa ta hmo rôhnahpa a taopa zydua na vawchho ta,” tahpa ta a chho hai nota châ ta.

5 Chyhsa pakha a thi hawpa a pahro heihna kyh abeipaachho nona chata, a sawchapawpa a pahro heihpa chanô chata a o nata a lyu abeipa vaw hiah hra ta. Kehazi chata, “Hy abeipa, ei zibeipa y, he he chanô cha a châ, he he a sawchapawpa Elaisa a pahro heihpa cha a châ,” tah ta.

6 Beipa ta chanô cha a hiahri nata chho haw ta. Beipa chata hyutuhpa pakha rao ta, “Ano eih zydua a lyu tawhta a veihpa zydua taihta he râh a kuasai tawhta atahmâ taih tahpa he pie khai heih teh,” tah ta.

Hazael cha Suria beipa a vaw châ

7 Elaisa cha Damaska khih lâta sie ta. Suria beipa Benhada cha tlâh leipa ta y ta; “Khazohpa chyhsa he lâ â vy” tahpa ta chho ei ta.

8 Beipa ta Hazael hnohta, “Lymâ cheih ta, Khazohpa chyhsa bie a chho awpa ta vawh la, ‘Ei pasapa he ei tlâh heih thei aw tlyma?’ tahpa ta ABEIPA na chhohiapa tua mawh sy,” tah ta.

9 Hazael cha ano a chhohia awpa ta vawh ta, lymâ châta Damaska khih liata hmo phapa to, râraoseihpa sypalih phao cheih ta. A hmiakô liata a kei duah ta, “Na sawchapawpa Benhada, Suria beipa ta, ‘Ei pasapa he ei tlâh heih thei aw tlyma?’ tah awpa ta nâ lâta eina vaw tuah,” tah ta.

10 Elaisa ta a hnohta, “Vawh heih la, a hnohta, ‘Na tlâh heih aw,’ a tah na, tah mah y; anodeikuachaa thi tlai aw tahpa ta ABEIPA ta eina pahnosa,” tah ta.

11 Ano chata nozachhihna taihta tawpa thlâh ha ta. Khazohpa chyhsa cha cha haw ta.

12 Hazael chata, “Khazia e, ei zibeipa cha a cha tly?” tah ta. Ano chata a chhy ta, “Izarel pathlazy chô liata hmo pha leipa na tao awpa ei pahnopa vâta a châ; ama kuhzy rao aw chi ta, ama satliapa zy zaozi ta thie aw chi ta, ama sawnawh chyhpa ta zy cha tai chhei aw chi ta, nawh a hneipa ama chanô zy cha na hriechhei aw,” tah ta.

13 Hazael chata, “Kei, na chakaotuhpa, a rôhnahpa heta cha hawpa hmopapi cha a tao thei awpa ei châ mâ?” tah ta. Elaisa ta a chhy ta, “Suria sahlao chô liata na bei aw tahpa ABEIPA ta eina pahnosa,” tah ta.

14 Elaisa tawhtapa cha pua ta, a zibeipa lâta vawh haw ta, ano chata, “Elaisa ta khâpa a cha vaw chho?” tah ta. Ano chata, “A tlâh heih tlai aw, tahpa ta eina chho,” tah ta.

15 A mylâ ta cha poh chhangaitapa la ta, ti liata ny ta, cha chata a hmia pahlypa ta, thie haw ta. Hazael cha ano vyuhpa taâ bei haw ta.

Zudah beipa Zehôra abeina(2 Tr 21: 1-20)

16 Izarel beipa Ahaba sawchapawpa Zôrama kô pangawh a bei kô ta, cha nona chata Zehôsapha cha Zudah beipa châ ta. Zudah beipa Zehôsapha sawchapawpa Zehôra cha abei pathao ta.

17 A bei pathao nona chata kô sythôh nata kô nopa châ ta, Zerusale liata kô charie ryu reih ta.

18 Ahaba chhôhkha zy hawhta Izarel abei zy lâpi a chhipa cha a chhih hra ta, Ahaba sawchanônô lahpinô ta hnei ta. ABEIPA mohmô liata hmo pha lei ngaitapa tao tyh ta.

19 Anodeikuacha ABEIPA ta a chakaotuhpa Davi vâta Zudah râh cha parao leipa ta a pathlazy taihta meiôh pahneisa thlâh ha awpa bie vaw taih haw tlôh ta.

20 Ano chhâ liana chata Edôma sahlao cha Zudah zy ryureina tawhta aty ei ta, âmo chô liata a bei awpa arao sasyh ta a tao ei ta.

21 Zôrama cha Zaira khih lâta a talaili zydua chhaota vawh ta, zâ ta pua ta, âmo a padôtuhpa Edôma sahlao zy nata ama talaili chô liata hyutuhpa zy cha a kei dyuh ta; chyhsa zy cha ama poh-o zy lâta a râ khai haw ei ta.

22 Edôma sahlao cha atanoh taihta Zudah sahlao liata amâ ty. Cha nona chata Libnah khih chhao a vaw ty hra ei ta.

23 Zôrama thâtih hropa zy nata a hmotaopa zydua cha Zudah bei zy abei no tahpa thâtih rona châbuliata ropa ta y vei mâ?

24 Zorama cha a mahpaw zy hnohta a mô ta, a mahpaw zy hry liata Davi khihpi liata pabu haw ei ta; a sawchapawpa Ahaziah cha ano vyuhpa ta abei ta.

Zudah beipa Ahaziah abeina(2 Tr 22: 1-6)

25 Izarel beipa Ahaba sawchapawpa Zorama a beina kô hrawhleino kô liana chata Zudah beipa Zehôra sawchapawpa Ahaziah cha a bei pathao ta.

26 Ahaziah ta ryu a rei pathao nona cha kô syno nata kô nopa châ ta, Zerusale liata kô kha ryu reih ta. A nô moh cha Athaliah, Izarel beipa Ômri sawchanônô a châ.

27 Ahaba chhôhkha zy lâpi a chhihpa cha a chhih hra ta, Ahaba chhôhkha zy hawhta ABEIPA mohmô liata hmo pha lei ngaitapa tao tyh ta, Ahaba chhôhkha zy piahpa châ tlôh ta.

28 Ano cha Ahaba sawchapawpa Zorama ta Ramôkilia khih liata Suria beipa Hazael adyuhna liana chata a hlao hra ta, Suria sahlao chata Zorama cha hmah paphao ei ta.

29 Beipa Zorama cha Suria beipa Hazael amâ dyuhna liata Suria sahlao ta Ramah khih liata hmah ama paphaopa cha Zezrel khih liata a patlâ awpa ta kua haw ta. Zudah beipa Zehôra sawchapawpa Ahaziah cha Ahaba sawchapawpa Zorama a pasapa vâta a hmô awpa ta Zezrel khih lâta zu ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25

2 Abeizy 9

Zehu Izarel beipa sathaw thupa a vaw châ

1 Hrohsopa Elaisa ta hrohsopa sahlao sawchapawpa zy hry liata pakha aw ta, a hnohta, “Na chai a sai la, he sathaw byh he cheih la Ramôkilia khih lâta vawh teh.

2 Na kei tlô nata Nimsi saw Zehôsapha sawchapawpa Zehu kei tlua la, a kei ngia la, a unawhpa zy hrytawhtapa aw la, chhôhpadâhpa chhôh chaipa liata a ngiakhei teh.

3 Sathaw byh he la la, a luh liata hry la, ‘ABEIPA ta he tana heta a tah, Izarel zy chô liata abei châta sathaw ei cha thu,’ tahpa ta tah teh. Chatanachata ochhi pahy la, a râ teh; bohpi y khâ,” tah ta.

4 Satliapa hrohsopa cha Ramôkilia lâna chata sie ta.

5 A kei tlô nata pheisaih hyutuhpa sahlao a vaw tyuh pahmaoh ei ta; ano chata, “Pheisaih hyutuhpa y, na hnohta bietapa reih awpa ei hnei,” tah ta. Zehu chata, “Ahy hnohna heta maw?” tah ta. Ano chata, “Pheisaih hyutuhpa y, nâma hnohna heta,” tah ta.

6 Thyu ta, a o liata a ngia ta; a luh liata sathaw hry ta, a hnohta, “ABEIPA Izarel zy Khazohpa ta he tana heta a tah, ABEIPA zawpi sahlao, Izarel sahlao chô liata abei châta sathaw ei cha thu.

7 Ei chakaotuhpa hrohsopa zy thisaih nata ABEIPA chakaotuhpa zydua thisaih phuh cha Zezebel liata ei la thei nawpa ta na zibeipa Ahaba chhôhkha zy cha pahleipadia khai aw chi ta.

8 Ahaba chhôhkha zydua cha leidia khai aw ei ta; Ahaba tawhna heta chapaw saw maih cha Izarel râh liata chyhsa sei a châpa nata khotalaipa chhao ei pahleipadia aw.

9 Chatawhcha Ahaba chhôhkha zy cha Neba sawchapawpa Zerôbaw chhôhkha zy nata Ahizah sawchapawpa Baasha chhôhkha zy hawhta tao aw na ta.

10 Zezebel cha Zezrel khih kuh kiapâh liata i-zy ta ama chaih aw, a pabutuh awpa rai y aw veih ei, tahpa ta,” tah ta. Chatawhcha ochhi pahy ta a râ haw ta.

11 Zehu cha a zibeipa chakaotuhpa zy lâta vaw pua ta, pakha chata a hnohta, “Phana lâ kyh ma a châ? Kha ahrupa kha kheihta zie ta nâ lâta a vypa ma a châ tly?” tah ta. Ano chata ama hnohta, “Nama pahnopa chyhsa châ ta, a bie reipa chhao kha nama pahno mâ tâh,” tah ta.

12 Âmo chata, “Châ bao va, maniah chho tua,” tah ei ta. Ano chata he tana heta eina tah, “ABEIPA ta, ‘Izarel sahlao chô liata abei châta sathaw ei cha thu,’ tahpa ta,” tah ta.

13 Chyhsa to ta ama poh hlai ei ta, kiana chô liata phaw chyu ei ta, “Zehu abei a châ haw,” tahpa ta chiahmie tô ei ta.

Zehu ta Zorama a thie

14 Nimsi sawchapawpa Zehôsapha sawchapawpa Zehu chata Zorama cha tei ta. (Suria beipa Hazael vâta Zorama nata Izarel sahlao zydua chata Ramôkilia khih cha vaih ei ta;

15 Abei Zorama deikua cha Suria beipa Hazael nata amâ dyuhna liata Suria chyhsa zy ta hmah ama paphaohpa kha Zezrel khih lâta a patlâh awpa ta a kua heihpa kha.) Zehu chata, “Ei chhâh a châpa nama châ khiahtala, ahyhmah ta Zezrel khih lâta he bie zy he reih awpa ta khih tawhtapa he papua khah u,” tah ta,

16 Zehu cha talaili liata kiah ta, Zezrel khih lâta sie ta, Zorama cha cha liana chata a zia ta. Zudah beipa Ahaziah chhao, Zorama a hmô awpa ta zu ta.

17 Zezrel kuh liata riahvaihtuhpa a duah ta, ano chata Zehu sahlao a vypa cha hmô ta, “Chyhsa hluhpi ei hmô,” tah ta. Zorama chata, “Arâ a kiahpa chyhsa âmo dy awpa ta tuah la, ‘Phana lâ kyh ma?’ kei tah ei se,” tah ta.

18 Chyhsa pakha arâ a kiahpa dy awpa ta vawh ta, “Beipa ta he tana heta a tah, ‘Phana lâ kyh ma?’ tahpa ta,” tah ta. Zehu chata, “Phana lâ kyh cha nama pahno awpa khâpa a y? Ei hnôh lâta sie hra teh,” tah ta. Riahvaihpa chata, “Eima chyhsa tuapa chata âmo lâ cha kei tlô tlai ta, châhrasala vaw kua khao chei ta vei,” tahpa ta chho ta.

19 Chyhsa pakha arâ a kiahpa tuah heih ta, cha chyhsa chhao cha âmo lâta kei tlô ta, “Beipa ta he tana heta a tah, ‘Phana lâ kyh ma?’ tahpa ta,” tah ta. Zehu ta a chhy ta, “Phana lâ kyh cha nama pahno awpa khâpa a y? Ei hnôh lâna heta sie hra teh,” tah ta.

20 Riahvaihtuhpa chata, “Ano chhaota âmo lâ cha kei tlô tlai ta, ano chhao cha vaw kua cheita khao vei. A pasiesana zie chhao Nimsi sawchapawpa Zehu pasiesana yzie tlai a châ; chahra ngaitapa ta a pasiesa,” tah ta.

21 Zorama chata, “A chhuanoh teh u,” tah ta. A talaili cha a chhuahnoh ei ta, Izarel beipa Zorama nata Zudah beipa Ahaziah cha ama talaili chyu ta kei pua ei ta, Zehu a kei hmô nahta, “Zehu, phana lâ kyh ma?” tah ta. Ano chata a vaw chhy ta, “Na nô Zezbel heta sihryhna nata dyuh a hmâh ngaita chhôhna heta phana lâ kyh khâpa a y thei aw?” tah ta.

23 Zorama ta a pahieh ta a râ ta, Ahaziah hnohta, “Ahaziah, a dôna a y hih!” tah ta.

24 Zehu chata a libaw cha tha y maihchâh ta a kei ta, Zorama kâ ru likawh liata ka ta, châtai cha a châh-ao liata a ngia ta, a talaili liata a chahy haw ta.

25 Zehu ta a pheisaih hyutuhpa Bidaka hnohta, “A pyh la, Zezrel chyhsa Nabô sahdô su liata thy pathlah teh, eikhano ta nâma nata a paw Ahaba hnohta hmaohkha ta eima kia no ta ABEIPA ta he phao he a chô liata a pahniehpa rai a châ:

26 ABEIPA ta, ‘Zâhiah Nabô thisaih nata a sawchapawpa zy thisaih ei hmô tlai mâ tâh, a tahpa kha, ABEIPA ta he su tlai liana heta viari ei cha thô aw,’ a tah heihpa kha. ABEIPA bie hawhta a pyh la, he su tlai liana heta thy teh,” tah ta.

Zehu ta Ahaziah a thie(2 Tr 22: 7-9)

27 Zudah beipa Ahaziah ta cha cha a hmô nahta sahdô liata o lâta a râ haw ta. Zehu chata a chadai ta, “Ano chhao talaili liana khata thie hra teh u,” tah ta. Iblia khih kiapâh Kura khyna liata tei ei ta, Mekidô khih lâta a râ ta, cha liana chata thie haw ta.

28 A chakaotuhpa zy chata Zerusale lâta talaili ta siekhei ei ta, ano thlâ liata a mahpaw zy hry liata Davi khihpi liata pabu haw ei ta.

29 Ahaba sawchapawpa Zorama kô hrawhleikha a bei kô ta, Ahaziah cha Zudah sahlao chô liata abei pathao ta.

Zezebel thina

30 Zehu cha Zezrel liata a kei ngia nahta, Zezebel ta vaw thei ta; a mozy vaw hnia ta, a sâ zy a vaw tobi ta, opy liata a vaw luah ta.

31 Zehu kuh chhikao liata a vaw ngia no ta, “Na a zibeipa a thietuhpa Zimri y, phana lâ kyh ma?” vaw tah ta.

32 Ano cha opy lâ a heipa ta mohmia kaw pasaih ta, “Ahy e kei chhâh a châ eichi? Ahyzy ei?” tah ta. Chyhsa hrilyupa pano tlyma, pathôh tlyma ano lâ avaw heih ei ta.

33 Ano chata, “Za thy pathla teh u,” tah ta. Za thy pathlah ei ta; a thi cha pâhchhô nata arô zy cha thata a pie ta, arâ zy chata tly ei ta.

34 A ngia ta, nie ta, doh ta; “Chhiesapa ta a ypa nô kha kei pachâ ula, kei pabu teh u,” abei sawchanônô châ tlôh ta,” tah ta.

35 Châhrasala pabu awpa ta vawh ei ta, a luh ru zy, a phei zy, a ku pazah zy dei leipa ta cha hmô khao leipa ei ta.

36 A vy heih ei ta, vaw chho ei ta, ano chata, ”He he ABEIPA ta a chakaotuhpa Tisabi chyhsa Elaizahmâpa ta, ‘Zezrel kuh kiapâh liata i ta Zezebel sapa cha chaih aw ei ta;

37 Zezebel ri chaZezrel kuh kiapâh liata sahdô liata ie hawhta châ aw ta, he he Zezebel a châ ama tah lei nawpa ta,’ tahpa bie reipa kha a châ hih,” tah ta.

2 Abeizy (2 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25