Zehôahaza abeina
1 Zudah beipa Ahaziah sawchapawpa Zôasha kô syno nata kô thôh a bei kô liana chata Zehu sawchapawpa Zehôahaza cha Izarel zy chô liata Samari liana chata abei pathao ta, kô hrawhleisari abei ta.
2 ABEIPA mohmô liata hmo pha lei ngaitapa tao tyh ta, Izarel sahlao zy hmo paraosapa ta a taopa Neba sawchapawpa Zerôbaw moleina zy cha tao hra ta; siesai khao vei.
3 ABEIPA pathi cha Izarel zy chô liana chata vaw ia ta, Suria beipa Hazael ku liata nata Hazael sawchapawpa Benhada ku liana chata pie lymâ ta.
4 Zehôahaza chata ABEIPA lâta a haw chaimâh ta, ABEIPA ta a bie cha nahthlie ta; Izarel zy pasaipa-ipa ta ypa ta Suria beipa ta âmo a pasaipa-ina zie cha hmô thlâh ha tlôh ta.
5 ABEIPA Izarel sahlao zy cha pachhatuhpa pie ta, chatanachata cha hmialâ hawhna khata ama o liata y molo thlâh ha ei ta.
6 Anodeikuacha Izarel zy hmo paraosapa ta a taopa ta a taopa Zerôbaw chhôhkha zy moleina zy kha siesai leipa ei ta, tao ngâthlâh ha ei ta; Samari liana chata Ashera chhao cha y thlâh ha ta.
7 Zehôahaza cha a chyhsa hry liata arâ a kiahpa chyhsa sypangawh nata talailih miahrawh nata pheisaih thy kha tah leipa ta cha hnei awpa pasaih tlôh lei khâh ta. Suria beipa chata pahleipadia khai ta, sawhri buhchâh hawh tlaita a tao.
8 Zehôahaza thâtih hropa zy, a hmotaopa zydua zy, a hmotaothei zie zy cha Izarel abei zy amâ bei no tahpa kyh rona châbu liata ropa ta y vei mâ?
9 Zehôahaza cha a mahpaw zy hnohta a mô ta, Samari liata pabu ei ta; a sawchapawpa Zôasha cha ano vyuhpa ta abei ta.
Izarel beipa Zehôasha abeina
10 Zudah beipa Zôasha kô sythôhna a kô sari a bei kô liana chata Zehôahaza sawchapawpa Zehôasha cha Izarel zy chô liata Samari liata abei pathao ta, kô hrawhleicharu abei ta.
11 ABEIPA mohmô liata hmo pha lei ngaitapa tao tyh ta, Izarel zy hmo paraosapa ta a taopa Neba sawchapawpa Zerôbaw moleina zydua kha siesai leipa ta, tlao tao lymâ ta.
12 Zôasha thâtih hropa zy, a hmotaopa zy, a hmotaopa zydua zy Zudah bei Amaziah a dyuh nota a hmotaotheina zie zy cha Izarel abeizy amâ bei no tahpa kyh rona châbu liata ropa ta y vei mâ?
13 Zôasha cha a mahpaw zy hnohta a mô ta, Zerôbaw cha a beidyuchhai liata a tyuh ta; Zôashacha Samari liata Izarel abeizy hnohta pabu ei ta.
Elaisa chhochhieliena hnôh chaipa nata athina
14 Elaisa cha a thikheina awpa pasana ta pasa haw ta, chatanachata Izarel beipa Zôasha cha ano lâtazu ta, chakhei ta, “Ei pâ, ei pâ y! Izarel zy talaili nata arâ a kiahpa chyhsa zy a khôtuhpa y!” tah ta.
15 Elaisa ta a hnohta, “Libaw nata châtai zy vaw cheih teh,” tah ta, ano ta libaw nata châtai cha la ta.
16 Elaisa ta Izarel zy beipa hnohna chata “Libaw kha a kei teh,” tah ta; chatanachata a kei ta. Elaisa chata beipa ku chô liata a ku pahnieh ta.
17 Chatawhcha ano chata, “Nochhi lâ opy kei pahy teh,” tah ta; ano ta ka ta. Hrohsopa chata, “ABEIPA pahniena châtai, Suria mo pahniena châtai a châ khaw! Aphe khih liana chata Suria sahlao zy cha leidiana taihta na pahnie aw,” tah ta.
18 Châtai zy kha la teh,” tah heih ta; chatanachata la ta. Izarel abei hnohna chata, “Alei kha a chô tua,” tah ta, chatanachata ei thôh a chô ta, bâhsai haw ta.
19 Khazohpa chyhsa cha a chô liata a pathi-ia ta, “Ei pangawh, ei charu nâ chô awpa ma a châ tâh; chatanachata Suria sahlao cha leidiana taihta na pahnie awpa châ ta; anodeikuacha Suria sahlao cha ei thôh deita na pahnie aw hih,” tah ta.
20 Chatawhcha Elaisa cha thi ta, pabu haw ei ta. Chatawhcha kô a thaona lâta Môaba sahlao zy chata ama râ cha vaw siehnao tyh ei ta.
21 Chyhsa pakha ama pabu awpa no ta hlao kha kei hmô ei ta, cha chyhsa cha Elaisa thlâ liana chata thy ei ta; a ri chata Elaisa ru zy cha a za hria pata nahta vaw hroh heih ta, a duah thlâh ha ta.
22 Suria beipa Hazael chata Zehôahaza chhâ liana chata Izarel zy cha pasaipa-i ngâthlâh ha ta.
23 Châhrasala ABEIPA ta Abaraha hnohta zy, Aisika hnohta zy, Zakaw hnohta zy, bie a hraihpa vâta âmo cha ngiachhie ta, thapasa ta a papeisa ta, âmo cha pahleipadia khoh leipa ta; ano tawhta thy pathlah khoh leipa ta khâ y ta.
24 Suria beipa Hazael cha a thi nahta, a sawchapawpa Benhada cha ano vyuhpa ta abei ta.
25 Zehôahaza sawchapawpa Zehôasha chata Hazael sawchapawpa Benhada ta a paw Zehôahaza siehnao ta, khih a lapa zy kha chhu heih ta. Zôasha chata ei thôh pahnie ta, Izarel râh khihpi cha la heih ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |