2 Abeizy 17
Samari raona nata Izarel seichâna
1 Zudah beipa Ahaza kô hrawhleino a bei kô ta, Elah sawchapawpa Hôsia cha Izarel zy chô liata Samari liata abei pathao ta, kô chaki abei ta.
2 ABEIPA mohmô liata hmo pha lei ngaitapa tao tyh ta; anodeikuacha a hmia lâta Izarel abei zy hawh ngâsâ ta la tao vei.
3 Asuria beipa Shalmanesa ta a vaw dyuh ta; chatanachata Hôsia cha a chakaotuhpa ta y haw ta, chhie zy pie tyh ta.
4 Asuria beipa ta Hôsia ta a teina kyh vaw thei ta; Izi beipa Sô hnohta chyhsa tuah hra ta, kô chareih a pie tyhpa hawhna khata Asuria beipa cha chhie pie khao lei khâh ta; chavâta Asuria beipa chata patâhna o liata chahryna chô ta khô haw ta.
5 Chatanachata Asuria beipa chata Samari khih cha la ta, Izarel sahlao zy cha Asuria râh lâ a chhi ta, Halah râh liata zy, Kôzah râh liata Habaw chavah liata zy, Mede sahlao khihzy liata paysa ta.
7 Cha hawhta ama vaw yna chhâpa cha Izarel pathlazy chata Izi beipa Phirao ku tawhtapa Izi râh tawhta a chhihthatuhpa ABEIPA ama Khazohpa chô liata hmo parao ei ta, khazoh zy tlao a papeisa ei ta,
8 ABEIPA ta Izarel pathlazy hmiakô liata a vaw papua hawpa phozy bieraopa nata Izarel beizy a pyhpa bieraopa zy hawhta ama ypa vâta a châ.
9 Izarel pathlazy chata ABEIPA ama Khazohpa chô liata hmo pha lei ngaitapa a ru lâta tao tyh ei ta. Ama khih zydua liata riahvaihtuhpa zy o a sapa tawhta kuh a hneipa khih taihta su sâhpa zy tao ei ta;
10 tlâh sâhpa to liata nata tlâh hropa to ry liata lôbô zy bôpa ta Ashera zy tao ei ta;
11 cha su a sâhpa zydua liana chata ABEIPA ta ama hmiakô liata a chadai hawpa pho zy taona zie hawhna khata rohpahâhpa zy rao ei ta. ABEIPA pathi pa-ia nawpa ta hmo molei ngaitapa tao tyh hra ei ta.
12 ABEIPA ta ama hnohta, “He hawhna he tao khah u,” a tahpa khazoh nohthlahpa zy tlao ama chakao tyh.
13 ABEIPA chata, “Ryhpa a chhih awpa nama mahpaw zy ei piepa nata ei chakaotuhpa hrohsopa zy hmâpa ta ei cha pahnosapa lymâ hawhna chata nama yzie moleipa he a heisaih ula, ei biepiepa zy nata ei bieraopa zy cha a pyh teh u,” tahpa ta Izarel zy nata Zudah zy cha hrohsopa to nata hmôtheituhpa to hmâpa ta pahnosa tyh ta.
14 Cha chôna chhaota a pyh khoh leipa ei ta, ama mahpaw ABEIPA ama Khazohpa a ngâ khoh leipa zy chhorupa ta ama ypa hawhta chhorupa ta y hra ei ta.
15 A bieraopa zy ama mahpaw zy hnohta a biehraipa zy ama hnohta a biepahnosapa zy cha papeisa khoh leipa ei ta. Hmo hraoleipa a pyh ei ta khâpahrao leipa vaw châ haw ei ta, âmo kyh liata ABEIPA ta âmo hawhna chata ama tao lei awpa a vaw tah hawpa ama chheipâh liata pho zy, taona zie a la hra ei ta.
16 ABEIPA ama Khazohpa biepiepa zydua cha a heisai ei ta, viahchao taw nohthlahpa leipa miano tao ei ta; Ashera tao ei ta, avâ liata a ypa zydua a chhy ei ta, Baal chakao tyh ei ta.
17 Ama sawchapawpa zy nata ama sawchanônô zy cha mei liata pangiasa ei ta, pachaopa zy nata dyu zy hmâh ei ta, ABEIPA pathi-ia nawpa ta a mohmô liata hmo pha lei ngaitapa tao awpa ta âmosasyh ta a zuah ei ta.
18 Chavâta ABEIPA cha Izarel zy chô liata a pathi-ia ngaita ta a hmo pha leina lâta pasie syulyu haw ta; Zudah pho dei leipa cha a ypa y khao leipa ei ta.
19 Zudah zy chhao chata ABEIPA ama Khazohpa biepiepa zy cha zyh leipa ei ta, Izarel zy pathlazy cha khoh khao leipa ta, âmo cha ama rie pathei ta, a mohmô pha leipa lâta a pasie syulyu hlâ lei cha a dyuhtuhpa zy ku liata pie haw ta.
21 Izarel zy cha Davi chhôhkha zy ama châna thy pa haw tlôh ta, chatanachata Neba sawchapawpa Zerôbaw kha abei ta tao ei ta. Zerôbaw chata Izarel zy ta ama zipa cha tleikhei ta, hmo moleipa thata pataosa ta.
22 Izarel pathlazy chata Zerôbaw hmoparaopa hawhpa zydua cha tao hra ei ta;
23 chazy cha ABEIPA ta a hrohsopa zydua hmâpa ta a vaw rei hawpa hawhta a mohmô pha leipa lâta a pasie syulyu hlâ lei cha siesai leipa ei ta. Chatanachata Izarel sahlao zy cha âmo râh tawhtapa Asuria râh lâta a chhi haw ei ta, atanoh taihta ama y.
Samari pahrâ leina
24 Asuria beipa ta Babylaw khih liata chyhsa zy, Kutha khih liata chyhsa zy, Avâ khih liata chyhsa zy, Hama khih liata chyhsa zy, Sephavai khih liata chyhsa zy bieta ta, Samari râh khih zy liana chata Izarel pathlazy su pataosa ta; chatanachata Samari râh cha pahrâ ei ta, a khih zy liana chata y haw ei ta.
25 Cha liata ama y tua nona chata ABEIPA chi leipa ei ta; ABEIPA ta ama hry liata chakeibarôhneipa zy tuah ta, chyhsa thokha zy cha thie ei ta.
26 Asuria beipa hnohta, “Na pasiepa sahlao pho zy Samari râh khih liata na pahrâsapa zy he ta, he râh liata khazoh a chhyna zie he pahno leipa ei ta; cha vâna chata ama hry liata chakeibarôhneipa zy tuah ta, he râh khazoh a chhyna zie ama pahno hra leipa vâta ama thie tyh,” tahpa ta reih ei ta.
27 Asuria beipa chata, “Kha liata sei ta namâ chhipa zy hry liatahpa theihthaipa pakha a chhi ula; vawh y hra sala, cha râh khazoh achhyna zie cha pachu mawh sy,” tahpa ta bie pie ta.
28 Samari râh tawhta amâ chhipa zy hry liata theihthaipa pakha cha Bethel lâta kei y ta, ABEIPA ama china zie awpa pachu ta.
29 Châhrasala pho to chata ama khazoh zy chyu tao ei ta, Samari chyhsa zy ta su sâhpa ama taopa ozy liana chata pho to ama yna khih chyu liata soh ei ta;
30 Babylaw chyhsa zy chata Sukôbenô tao ei ta, Kutha sahlao chata Naka tao ei ta, Hama sahlao chata Ashima tao ei ta,
31 Avi sahlao chata Nibha nata Tarta tao ei ta; Sephavai sahlao chata Sephavai sahlao khazoh Adrameleka nata Anameleka mo ta ama saw zy mei liata rao tyh ei ta.
32 ABEIPA cha chi ei ta, ama hry liatahpa su sâhpa theihthaipa zy ta a tao ei ta, su sâhpa ozy liana chata chyhsa thei tyh ei ta.
33 ABEIPA cha chi ei ta, chhihthapa ta ama yna râh liata chyhsa zy pho taona zie hawhta âmo khazoh zy cha chakao tyh ei ta.
34 Cha hlâta ama taona zie hawhta atahmâ taihta ama tao. ABEIPA cha chi leipa ei ta,ABEIPA ta Zakaw pathla Izarel zy tahpa ta a bipa zy hnohta,
35 “Khazoh hropa zy cha chi leipa ula, âmo cha a chhy leipa ula, âmo lâta atheih kha u;
36 ABEIPA hmotaotheina rôhnah ngaitapa nata bâh pazawhpa ta Izi râh tawhta cha chhihthatuhpa, ano cha tlao nama chi awpa châ ta; ano cha namâ chhy awpa châ ta, ano lâta namâ theih awpa a châ.
37 Chatanachata bieraopa zy, pachiapa zy, ryhpa zy, biepiepa zy nama châta a ro hawpa kha chhâzaw ta namâ pyh awpa châ ta. Khazoh hropa zy cha nama chi awpa châ vei,
38 nama hnohta bie ei hraihpa he nama my awpa châ vei, khazoh hropa zy cha nama chi awpa châ hra vei,
39 ABEIPA nama Khazohpa deikua nama chi awpa a châ, chatanachata nama khakhaipa zydua ku tawhtapa cha a cha pachha aw ei,” tahpa ta bie hraih ta. Ama châta ABEIPA biepiepa zy, bieraopa zy, pachiapa zy, ryhpa taopa zy cha zyh hra veih ei.
40 Kheihtarai chhaota a pyh khoh hlei leipa ei ta, cha hlâta taona zie hawhta tao ngâthlâh ha ei ta.
41 Cha phozy chata ABEIPA chi ei ta, ama khazoh nohthlahpa zy taopa chakao hra ei ta; cha hawhna hra chata ama pathlazy nata ama pathlazy pathla taih chhaota atanoh taihta ama mahpaw zy taopa hawhta ama tao ngâthlâh haw.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |