Senakeri ku tawhta Zudah a bohna (2 Tr 32:20-23; Is 37:1-38)
1 Beipa Hezekiah chata cha cha a thei nata a chysia zy hrie ta, latho poh a bu ta, ABEIPA o liana chata a ngia haw ta.
2 Chatawhcha o chhôh lâ hyuthupa Eliakima nata chârohtuhpa Shebna nata theihthaipa machâ zy cha latho poh a bupa ta Amôza sawchapawpa hrohsopa Isai lâta tuah ta.
3 Âmo chata a hnohta, “Hezekiah ta he tana heta a tah, Atanoh he nôpona nata râh nata mohchhiena noh a châ; saw zy cha ama pina a daih ha tlôh ta, sa nawpa ta thatlôna y khao tlôh va.
4 A zibeipa, Asuria beipa ta Khazohpa hrohpa reipachhie nawpa ta a tuapa Rebasake bie zydua cha ABEIPA na Khazohpa ta thei ta, a bie reipa ABEIPA na Khazohpa ta a bie theipa cha a ra ngyu aw lah; chavâta a laibâhpa zy cha thlahchhâpa teh,’ a tah na,” tah ei ta.
5 Beipa Hezekiah chyhsa zy cha Isai lâta ama vawh nahta,
6 Isai chata ama hnohta, “Nama zibeipa lâta he tana he reih teh u, ABEIPA chata he tana heta a tah, na bie theipa Asuria beipa chyhsa zy ta eina reipachhiena zy kha chi khâ.
7 A chô liana chata thlahpa paysa aw na ta, bie pathâhpa thei aw ta, ano zaozi ta papaopa ta ei paysa aw, a tah na,’ tahpa ta,” tah ta.
8 Rabasake cha kua heih ta, Asuria beipa chata Libnah khih a vaw dyuh haipa kei hmô ta; Lakhi khih tawhtapa cha a kua tahpa thei tlôh ta.
9 Nâma adyuh awpa ta a pua haw,” tahpa Tirhakah Ethiôpia râh beipa kyh chyhsa reipa a vaw thei nahta Hezekiah lâta chyhsa zy tuah ta,
10 “He tana heta Zudah beipa Hezekiah lâta reih teh u; ‘Na Khazohpa na ngâpa chata Zerusale khih Asuria beipa ku liata piepa châ aw vei,’ tahpa ta cha dô kha se.
11 Asuria abei zy ta râh zydua parao khaipa ta a chô liata ama hmotaopa zy kha pahno chi ta. Nâma he pachhapa na châ hlei aw mâ?
12 Pho to khazoh zy chata ei mahpaw zy ta ama pahleipadiapa zy kha ama pachha ma? Kôza zy, Harana zy, Rezepha zy, Ida saw Sephavai khihpa abei zy, Hena bei zy, Iva bei zy kha khataih lâ ama y haw?’ tahpa ta,” tah ta.
14 Hezekiah chata a chyhsa tuapa zy ku tawhtapa cha hmô ta, reih ta; chatanachata Hezekiah cha ABEIPA o liana chata a ngia ta, ABEIPA hmiakô liana chata pakai ta.
15 Hezekiah chata ABEIPA hmiakô liata thlahchhâ ta, “Hy ABEIPA, cherubi zy chô liata a tyuhpa, Izarel Khazohpa y, nâ, nâma deita he leilô khihnarâh zydua Khazohpa cha na châ; alei nata avâ he nâma taopa a châ.
16 Hy ABEIPA y, na nah vaw pachôh la, nahthlie tua; hy ABEIPA y, na mo padeih la, moh tua; Khazohpa hrohpa reipachhie awpa ta Senakeri ta bie a vaw reipa he vaw nahthlie tua,
17 ABEIPA y, Asuria abei zy ta pho zy nata ama râh zy cha parao tyh tlai ei ta,
18 ama khazoh zy cha mei liata thy tyh hra ei ta; cha zy cha Khazohpa châ leipa ei ta, chyhsapa ku ta taopa tho nata alô tlao ama châ; chavâta ama pahleipadia.
19 Chavâta hy ABEIPA eima Khazohpa y, nâ, nâma deita he ABEIPA Khazohpa na châ tahpa leilô pahrâpa râh zydua heta ama pahno thei nawpa ta ano tawhtapa he maniah pachha tlai mah y,” tahpa ta.
20 Cha nona chata Amôza sawchapawpa Isai chata Hezekiah hnohta, “ABEIPA Izarel Khazohpa chata he tana heta a tah; ‘Asuria beipa Senakeri raona awpa lâta kei lâta na thlahchhâpa kha ei thei na,” tahpa ta.
21 He he a thâtih ABEIPA ta a reipa cha a châ:Zaio sawchanônô laihsakôpa chata, cha mohnao ta, a cha pahneisao:Zerusale sawchanônô chata a luh a cha chahuah chie.
22 Ahyma a moh pachhiepa ta na reipachhie tly? Ahy chô liata ma na ao pasâhsa chi ta, na mo pasie tly?Izarel sahlao Mo Pathaihpa chô liata a châ mâ tâh!
23 Na chyhsa na tuapa zy hmâpa ta ABEIPA cha a moh pachhie chi ta,‘Ei talaili hluhpi chhaota Lebanaw râh tlâh sâhpa zy kaw tlô haw na ta;cha liata sidy tho a sâh ngaitapa zy nata meisah tho phapa zy cha thlu aw na ta; a chhaolei phapa râhhmâhpa a pahrâna su liahliah chaipa lâna chata ei ngia aw.
24 Râh hropa tikhaorei chao na ta, tizy doh na ta,ei pheipazah ry heta Izi chavah zydua cha ei pakua khai aw,’ tah chi ta.
25 Keima ta zâkhano tawhta chazy cha ei chhuahpa a châna zie zy,hlâno tawhta chazy cha ei chhuahnohpa a châna zie zy thei va chi mâ? Khih kuh a hneipa zy cha o a chopa ahmaohpakhypa hawhta a paraotuhpa châta ei rao haw hih,
26 cha vâna chata a chhôh liata a ypa zy cha thatlôna hnei leipa ei ta,ama riahchhie ta ama vaw maohphyu haw khâ,sibiepa su sibiepa hawhta nahta,sibiepa panyuhpa hawhta nata o chô liata sibiepa hawhta; nata sâh a lai hlâta hri a hnei kawhpa hawpa ama châpa kha.
27 Kei chata nâ tyupa zy,nâ ngiahpa nata na puapa zy,ei chô liata na hiehâhna zy ei pahno mâ tâh.
28 Ei chô liata na pathi-iapa vâta nata na sâlâna cha ei nahkhao liata a kaw ngia hawpa vâna heta,ei hnaridaona cha na hnapasu liata patao aw na ta, ei chhâri cha na hmao liata, nâ vyna lâpi lâna tlai khata ei cha pakuasa heih aw,tahpa ta,
29 “He he na châta ngiana a châ aw: atakô liana heta sâh sawhlipa nie aw eichi ta, hâhkô a sawhlipa hra; chatawhcha a kô thôhna liana chata sâh zy tu ula, hria ula, kresahdô zy tao ula, a theilâpa zy nie teh u.
30 Zudah chhôhkha zy hry liata a laibâhpa zy chata mathi lâta thari thla aw ei ta, a machhuah lâta ama pathei heih aw;
31 Zerusale tawhta a laibâhpa zy Zaio Tlâh tawhta a râpa zy cha ama pua aw. ABEIPA phahnai khohna chata chazy cha a tao aw.
32 “Chavâta ABEIPA chata Asuria beipa kyh cha he tana heta a reih, ‘He khihpi he vaw tlô leipa aw ta, he liana heta châtai ka hra aw vei, vyhphao chhao a kiapâh liata a vy hra leipa aw ta, a khih kiapâh liata alei pacho hra aw vei.
33 A vyna lâpi lâta cha lâna tlai chata kua heih aw ta, he khihpi he vaw tlô aw vei.
34 Keima vâta nata ei chakaotuhpa Davi vâta he khihpi he paboh awpa ta ei vaih aw,’ ABEIPA ta a tah,” tahpa ta chyhsa tuah ta.
35 Cha zâ liana chata ABEIPA vâlyuhchâpa cha pua ta, Asuria sahlao riehmo liana chata chyhsa thy sykha nata thy charie nata sâh pangawh thie ta; mydi ta ama thyu nata athihpa ri sai vaw châ thlâh ha ta.
36 Chatanachata Asuria beipa Senakeri cha pua ta, a lie haw ta, sie lymâ ta, Niniva khih liana chata pahrâ haw ta.
37 A khazoh Nisrô o liana chata ano a chhy hai nota Adramele nata Shareza zy chata zaozi ta thie ei ta, chatanachata Ararat râh lâna chata a râ haw ei ta. Chatawhcha a sawchapawpa Esahadô cha ano vyuhpa ta abei haw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |