1 Zehu kô sari a bei kô ta Zehôasha cha bei pathao ta, Zerusale liata kô sypalih a bei ta. A nô moh cha Zibiah, Besheba khihpa a châ.
2 Theihthaipa Zehôiada ta Zehôasha cha a pachu chhôh zydua ABEIPA mohmô liata hmo phapa tao tyh ta.
3 Anodeikuacha su sâhpa zy cha pahleipadia hlei vei; su sâhpazy liana chata chyhsa cha atheihpa ta rohpahâhpa ama rao tyh.
4 Zehôasha ta theihthaipa zy hnohta “ABEIPA o liata a ngiakheipa hmo ziehpa chatlaina sôh zydua, rei chiehpa zie hry liata a siepa maih châta a hnawpa ama hro chatlana sôh zy, ahyrai ta ABEIPA o liata a ngiakhei ama pasaipa sôh zydua cha,
5 theihthaipa zy ta ama pahnopatheipa zy tawhta la chyu ei sala; chatanachata o raopa a raona lia maihta tao mawh sy,’ tah ta.
6 Châhrasala Abei Zehôasha cha kô syno nata kô thôh a bei tawh chhaota theihthaipa zy chata o raopa cha tao leipa ta khâ y ei ta.
7 Beipa Zehôasha chata theihthaipa Zehôiada nata theihthaipa hropa zy cha aw ta, ama hnohta, “Khazieo a raopa zy he nama tao vei?” Atahmâ la nama pahno patheipa zy tawhta tâkâ cha la khao khah u, o raopa tao nawpa ta tlao pie teh u,” tah ta.
8 Theihthaipa zy chata chyhsa zy tawhta tâkâ la khao lei awpa nata o raopa zy a taotuhpa châ lei awpa cha â ryh tah ei ta.
9 Anodeikua cha theihthaipa Zehôiada ta thoby la ta, a phiehru liata a khao vieh ta, ABEIPA o liata a ngiana chachâh lâchhâh maisâh thaby liata patyuh ta; cha liana chata ABEIPA o lâta tâkâ a vaw pangiapa zydua cha ochhi a vaihtuhpa theihthaipa zy chata vaw soh lymâ ei ta.
10 Chatawhcha thoby liana chata tâkâ a hluh kaw haw tahpa ama pahno nahta abeipa châ rohtuhpa natatheihthaipa beichaipa cha vawh ei ta, sykhao ta chahry ei ta, ABEIPA o liata tâkâ a ypa zie cha reih ei ta.
11 Ama tâkâ reipa cha raihriatuhpa sahlao ABEIPA o a satuhpa zy chô liata hyutuhpa zy pie ei ta; âmo chata o a satuhpa zôthaipa zy nata o a satuhpa zy hlao châta zy,
12 alô a daihtuhpa nata a lô a chaotuhpa zy, ABEIPA o araopa zy taona awpa ta tho nata alô daina châta zy nata a tao nawpa ta a byuhpa maih zy hmâh tyh ei ta.
13 Anodeikuacha ABEIPA o chhôh lâta ama tâkâ vaw cheipa chata ABEIPA o châta tâkâri nyu zy, meiôh poh chakiena zy, rahô zy, chiahmie zy, ngôh hmobaoh zy, tâkâri hmobaoh zy tao veih ei,
14 raihriatuhpa zy pie tyh ei ta, ABEIPA o taona ta tlao ama hmâh.
15 Raihriatuhpa zy pie awpa ta tâkâ ama pavaosapa zy chhao kha reih veih ei, âmo cha ngâchhih ngaitapa ta tao tyh tlôh ei ta.
16 Hmoparaona atheihna hlâpa tâkâ nata moleina atheihna hlâpa tâkâ zy cha ABEIPA o lâna chata a ngiakhei veih ei; theihthaipa tovyuh a châ.
17 Cha nona chata Suria beipa Hazael chata Katha khih adyuh ta, la ta. Hazael cha Zerusale lâ sie lymâ a chhuah ta,
18 Zudah beipa Zehôasha chata Zudah beipa a mahpaw zy sahlao Zehôsapha zy, Ahaziahzy ama vaw hlâ hawpa hmo ziehpa zydua nata ano hmo ziehpa zy nata ABEIPA o liatahpa nata abei o liata ryu pahmaohna liatahpa ngôh a ypa zydua cha la khai ta, Suria beipa Hazael paphao ta, chatanachata Zerusale cha a heisaih haw heih ta.
19 Zôasha thâtih hropa zy, a hmotaopa zydua zy cha Zudah abeizy amâ bei no tahpa kyh rona châbu liata ropa ta y veih mâ?
20 A chyhsa zy cha thyu ei ta, a ru lâta thie ei ta, Zôasha cha Sila zuna lâpi lâta Milô o liata thie ei ta.
21 Ano chyhsa Simiathi sawchapawpa Zôzaka nata Shôma sawchapawpa Zehôzaba zy ta ama thie. Chatanachata a mahpaw zy hry liata Davi khihpi liata pabu ei ta, a sawchapawpa Amaziah cha ano vyuhpa ta abei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |