Zôsiah taopathina zy (2 Tr 34:3-7)
1 Beipa chata chyhsa zy tuah ta, Zudah râh nata Zerusale khihpi liata machâ zydua ano lâta aw pakhy ta.
2 Chatawhcha beipa cha Zudah râh liata chyhsa zydua chhaota, Zerusale liata chyhsa zydua chhaota, theihthaipa zy nata hrohsopa zy chhao, zawpi zydua chhaota, a lai a chyh ta ABEIPA o lâna chata khy ei ta; ABEIPA o liata ama châbu hmôpa biehraina châbu liata a ropa zydua cha ama nahkhao theina liata reih ta.
3 Chatawhcha abeipa cha otôh kiapâh liata a duah ta. Cha châbu liata a rohpa biehraina bie cha pa-i awpa ta, pathipalôh tlokhuh nata thlahpa tlokhu ta ABEIPA zi awpa nata a biepiepa zy, biepahnosapa zy, a bieraopa zy a pyh awpa ta ABEIPA hmiakô liata bie hraih ta; zawpi zydua chhao ta a bie hraikhei ei ta.
4 Beipa ta theihthaipa bei chaipa Hilkiah zy, a pazituhpa theihthaipa zy, chhikao vaihtuhpa zy cha ABEIPA achhyna-o chhôh liata Baal nata Ashera nata avâ liata hmo a ypa sahlao zydua châta taopa hmobao zydua cha la khai awpa ta bie pie ta; chatanachata Zerusale khôtho lâ Kidraw sibiepa su liata mei ta rao ta, a paohpa zy cha Bethel lâ siekhei ta.
5 Ano ta khazoh nohthlahpa a chhypa sahlao theihthaipa zy Zudah bei zy ta, Zudah râh khihpi su sâhpa zy liata, Zerusale chheipâh ta rohpahâhpa rao awpa ta ama vaw raopa zy cha pabâsa ta; Baal châta zy, noh châta zy, thlâpâ châta zy, awhsi châta zy, avâ liata a ypa sahlao zydua châta zy ta rohpahâhpa a raotuhpa zy chhao cha pahleipadia ta.
6 ABEIPA o liata Ashera cha Zerusale khôtho lâ Kidraw chavah lâta puakhei ta, Kidraw chavah liana chata rao ta, a zaona taih tlychheih ta, a pôhpa cha chyhsa zawrâpa zy thlâ liata hie ta.
7 Ashera chata poh raipa thai asapa sahlao chanô yna ABEIPA o liata chapaw chaohaohpa sahlao yna ozy cha parao pa ta.
8 Zudah khihpi tawhtapa zy cha theihthaipa zydua a chhi ta, theihthaipa sahlao zy rohpahâhpa raona su a sâhpa zy cha Keba tawhta Besheba taihta parao khai ta; khihpi chhikao a ngiana chavei lâchhâh ta, khihpi ryureituhpa Zawsua chhikao a ngiana chhikao zy liata su a sâhpa zy cha pacho pathla ta.
9 Su sâhpa theihthaipa zy cha Zerusale lâ ABEIPA maisâh lâta ama khy hra lei tarawpa ta, ama unawhpa zy hry liata viahchhâ thinô pahlao leipa deikua cha ama nie tyh hra.
10 Chatawhcha ahyhmah ta ama sawchapawpa tlyma, ama sawchanônô tlyma Môleka chata mei liata ama pangiasa khao lei nawpa ta Hinô pathlazy saikao liata Tôphe cha parao ta.
11 ABEIPA o a ngiana liata a o dôhpachhôh liata abei o a vaihtuhpa Nathamele chhôhpadâhpa kiapâh liata Zudah abei zy ta noh châta arâ ama piepa zy cha pasie khai ta; noh talailizy cha mei ta rao ta.
12 Chatawhcha Ahaza o chhâh chô liata Zudah abei zy ta maisâh ama taopa zy nata Manase ta ABEIPA o dôhpachhôh tlyhmia miano liata maisâh a taopa zy cha abeipa chata parao khai ta, pakei chhei ta, a dipa zy cha Kidraw chavah liata thy ta.
13 Chatawhcha Zerusale kiapâh raona tlâh chachâh lâchhâh ta Sidaw sahlao khazoh pasichhih ngaitapa Astarô châta zy, Môaba sahlao khazoh pasichhih ngaitapa Khemô châta zy, Amawna pathlazy khazoh pasichhih ngaitapa Milkô châta zy Izarel beipa Sawlawmaw ta su sâhpa a taopa zy cha abeipa chata parao ta.
14 Chatawhcha lôbô zy cha pakei chhei khai ta, Ashera zy thlu ta, cha su zy cha chyhsapa rupa zy ta pabie ta.
15 Cha leipa chhao cha Izarel zy hmo a paraosatuhpa Neba sawchapawpa Zerôbaw ta Bethel liata maisâh nata su sâhpa a taopa cha, cha maisâh nata su sâhpa cha mei ta rao ta, a zaona taih tly chhei ta; Ashera cha mei ta rao ta.
16 Chatawhcha Zôsiah cha a kaw heih ta, tlâh liata thlâ zy cha hmô ta; chatanachata thlâ liata rupa zy cha kei palasa ta, chazy kyh a vaw reituhpa Khazohpa chyhsa ta a vaw chho chhieliepa “ABEIPA bie hawhna tlaita maisâh liana chata mei ta rao ta, parao ta.
17 Chatanachata ano chata, “Hao hao ahy lôbô ma ei hmôpa hao?” tah ta. Chatawhcha khih liata chyhsa zy chata, “Khazohpa chyhsa Zudah râh tawhta a vypa, Bethel liata maisâh chô liata na tao hawpa a vaw chho chhielie tyhpa thlâ a châ hao,” tahpa ta chho ei ta.
18 Chatawhcha ano chata, “Khâpahmah tah kha u; ahyhmah ta a rupa zy cha pasie khah se,” tah ta. Chatanachata a rupa zy cha Samari râh tawhta hrohsopa a vypa rupa zy chhaota kheihta hmah tao veih ei.
19 Chatawhcha Izarel abeizy ta ABEIPA pathi pa-iapa ta ama sapa Samari râh khih zy liata su sâhpa o zydua chhao cha Zôsiah chata pasie khai ta; Bethel liata a taopa hawh tlaita tao khai ta.
20 Cha liata su sâhpa theihthaipa a ypa zydua cha maisâh chô liata thie ta, chazy liana chata chyhsapa rupa zy rao ta. Zerusale lâ kua haw heih ta.
Zawpakhô avaona(2 Tr 35:1-19)
21 Beipa ta chyhsa zydua hnohta, “He biehraina châbu liata ropa hawhna heta ABEIPA nama Khazohpa châta zawpakhô tao teh u,” tahpa ta bie pie ta.
22 Izarel zy chô liata ryureituhpa zy ta ryu ama reih tawhta Izarel abeizy abei chhôhkha zydua zy, Zudah abeizy abei chhôhkha zydua chhaota cha hawhta zawpakhô cha vaw hnei veih ei;
23 beipa Zôsiah abeina kô hrawhleicharie kô liana deikua chata cha zawpakhô cha Zerusale liata ABEIPA châta ama hneipa a châ.
Zudah chô liata Abeipa hiehâhna
24 ABEIPA o liata theihthaipa Hilkiah ta a hmôpa châbu liata ryhpa bie ropa zy kha a pa-i thei nawpa ta ahripa abeipa zy, dyuthaipa zy, khazoh nohthlahpa zy, nohthlahpa zy, Zudah râh nata Zerusale liata hmo pasichhihpa ama hmô tyhpa zydua cha Zôsiah chata pahlei khai hra ta.
25 Mawsi ryhpa zydua hawhta pathipalôh tlokhuh nata thlahpa tlokhuh nata thatlôna tlokhuh ta ABEIPA a pyhpa ano hawhpa rai a hmia lâta abei ahyhmah y leipa ei ta; a hnôh lâ chhao ano hawhpa ahyhmah y khao hra aw veih ei.
26 Chata chôna chhaota ABEIPA chata a hiehâhna ru ngaitapa Manase ta a pathi a pa-iana zydua vâta Zudah chô liata a hiehâhna iapa cha papai hlei vei.
27 ABEIPA ta, “Izarel ei pasipa hawhna heta Zudah chhao he ei hmo pha leipa lâta pasi aw na ta, he khih ei tlypa Zerusale tlai nata cha liana chata ei moh cha a y aw, ei tahpa o he ei pahlei khai aw,” tah ta.
Zôsiah thina(2 Tr 35: 20-27)
28 Zôsiah thâtih hropa zy, a hmotaopa zydua cha Zudah abei zy amâ bei no tahpa Thâtih Rona Châbu liata ropa ta y vei ma?
29 A bei nona chata Izi beipa Phirao Nekô cha Asuria beipa adyuh awpa ta Euphrate lâta a khy ta. Beipa Zôsiah chata ano cha a dyuh ta; chatawhcha ano chata a hmô pata nahta Mekidô khih liata thie ha ta.
30 A chakaotuhpa zy chata Mekidô tawhta a ri cha talaili ta siekhei ei ta, Zerusale liata a ngiakhei ei ta, ano thlâ liata pabu haw ei ta. Cha râh liata chyhsa zy chata Zôsiah sawchapawpa Zehôahaza cha a chhi ei ta, sathaw thu ei ta, a paw vyuhpa ta a bei ta tao haw ei ta.
Zehôahaza abeina nata pabâna(2 Tr 36:1-4)
31 Zehôahaza cha a bei tua no ta kô syno nata kô thôhpa châ ta, Zerusale liata thla thôh a bei ta. A nô moh cha Hamuia, Libnah khih liata Zeremiah sawchanônô a châ.
32 A mahpaw zy taona zie hawhpa zydua ABEIPA mohmô liata hmo pha lei ngaitapa tao tyh ta.
33 Phirao Nekô chata Zerusale liata ryureih thei khao lei awpa ta Hama râh liata Hiblah khih liata patâhsa ta, chatawhcha ama râh cha tâkâ talent za kha nata ngôh talent kha pacheisa ta.
34 Phirao Nekô chata Zôsiah sawchapawpa Eliakima cha a paw Zôsiah vyuhpa ta pabeisa ta, a moh cha Zehôiki tahpa ta thla ta. Zehôahaza deikua cha a chhi syulyu ha ta; Izi râh lâta sie ta. cha liana chata thi haw ta.
35 Chatawhcha Zehôiki chata tâkâ nata ngôh cha Phirao pie ta, ama râh zy cha Phirao biepiepa hawhta a tâkâ lâta pie awpa ta chhie tlao pacheisa ta. Phirao Nekô lâta pie awpa ta chyhsa to chei awpa ta a taihpa zie chyu hawhta cha râh liata chyhsa zy ei tâkâ nata ngôh pacheisa ta.
Zehôiki abeina(2 Tr 36:5-8)
36 Zehôiki cha a bei tua no ta kô syno nata kô pangawhpa châ ta, Zerusale liata kô hrawhleikha a bei ta. A nô moh cha Zebudah Rumah khih liata Pedai sawchanônô a châ.
37 A mahpaw zy taona zie hawhpa zydua, ABEIPA mohmô liata hmo pha lei ngaitapa tao tyh ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |