1 A bei nona chata Babylaw beipa Nebukaneza cha khy ta, Zehôiki cha ano a chakaotuhpa châta kô thôh y ta; cha tawhna chata a heisai ta, a chô liata a ty haw ta.
2 ABEIPA ta Kaldia sahlao zy, Suria sahlao zy, Môaba sahlao zy, Amawna pathla sahlao zy ano adyuh awpa ta tuah ta, a chakaotuhpa hrohsopa zy hmâpa ta a reipa ABEIPA bie hawhta Zudah râh paraosa awpa ta tuah ta.
3 Manase hmotaopa zydua, a hmoparaopa nata a thaipa thisaih palopa ta;
4 Zerusale cha a thaipa thisaih ta a pabiepa vâta, a hmo pha leipa lâta pasi syulyu awpa kyh Zudah chô liata ABEIPA bie ta vaw tlô haw tlai ta, ABEIPA ta a ngiahthai khoh vei.
5 Zehôiki thâtih hropa nata a hmotaopa zydua cha Zudah abei zy amâ bei no tahpa Thâtih Rona Châbu liata ropa ta y vei mâ?
6 Chatanachata Zehôiki cha a mahpaw zy hnohta a moh ta, a sawchapawpa Zehôikina cha ano vyuhpa ta a bei haw ta.
7 Izi beipa cha a râh tawhta vaw pua khao leipa ta, Babylaw beipa chata Izi râh chavah tawhta Euphrate chavah taihta Izi beipa râh chhôh zydua la haw tlôh ta.
Zehôikina nata molaipa zy Babylaw seichâna lâta amâ chhi (2 Tr 36:9-10 )
8 Zehôikina cha a bei tua no ta kô hrawhleichariepa châ ta, Zerusale liata thla thôh a bei ta. A nô moh cha Nehusata, Zerusale khih liata Elanatha sawchanônô a châ.
9 A paw taona zie hawhpa zydua taopa ta, ABEIPA liata hmo pha lei ngaitapa tao tyh ta.
10 Cha nona chata Babylaw beipa Nebukaneza chakaotuhpa zy cha Zerusale lâ khy ei ta, khih cha dôh haw ei ta.
11 Cha hawhta a chakaotuhpa zy ta ama dô nona chata Babylaw beipa Nebukaneza cha khih lâ vawh ta;
12 Zudah beipa Zehôikina cha a nô zy, a chakaotuhpa zy, a molaipa zy, a pawhrâhpa zy chhaota Babylaw beipa lâta kei pua ei ta. A beina kô chariena kô liata Babylaw beipa chata patu ta,
13 ABEIPA reipa hawhna khata, ABEIPA o liata ryu zydua nata abei o liata ryu zydua cha puakhei ta, ABEIPA achhyna-o liata Izarel zy beipa Sawlawmaw ta ngôh hmobaoh taopa zydua cha chhawh khai ta.
14 Zerusale liata chyhsa zydua, molaipa zy, chyhsa thatlôpa riahphapa zydua zy, sei thy kha tlai, zôthaipa nata syudaihpa zydua a chhi khai ta: cha râh liata chyhsa sipasapa tah leipa ta cha ahyhmah y khao veih ei.
15 Zehôikina cha Babylaw lâta a chhi ta; abei nô zy, a bei lahpinô zy, a pawhrâhpa zy, cha râh liata chyhsa thatlôpa zy cha Babylaw lâta sei ta a chhi ta.
16 Babylaw beipa chata riahphapa zydua sâh sari tlai nata zôthaipa nata syudaihpa sâh kha, chyhsa thatlôpa maih zydua adyuh theipa chyhsa sai ta Babylaw lâta seichâna ta a chhi khai ta.
17 Chatawhcha a paw unawhpa Mataniah cha Babylaw beipa chata a vyuhpa ta pabeisa ta, a moh cha Zedekia tahpa ta thla ta.
Zedekia abeina (2 Tr 36:11-16; Zer 52:1-3)
18 Zedekia cha a bei tua no ta kô syno nata kô khapa châ ta, Zerusale liata kô hrawhleikha a bei ta. A nô moh cha Hamuta, Libnah khih liata Zeremiah sawchanônô a châ.
19 Chatawhcha Zehôiki taona zie hawhpa zydua taopa ta ABEIPA mohmô liata hmo pha lei ngaitapa tao tyh ta.
20 ABEIPA pathi-iana vâta a hmo pha leipa lâ a pasie syulyuna taihta Zerusale nata Zudah chô liata hmo a vaw tlô lymâ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |