Athaliah ta abeina a la (2 Tr 21: 10-23 )
1 Ahaziah nô Athaliah ta a sawchapawpa a thi tahpa a thei nahta, thyu ta abei saw zydua cha thie khai haw ta.
2 Ahaziah sawchapawpa Zôasha deikua cha abeipa Zorama sawchanônô Ahaziah sietanô Zehôsheba chata abei sawchapawpa ama thiepa zy hry tawhtapa cha a chhi haw ta, a mokhâhtuhpa chhaota rakhô chhôhpadâhpa liata paysa ta. Athaliah hmô thei lei nawpa ta nyu ta, chatanachata thiepa châ khao leipa ta;
3 ano cha ano nata ABEIPA o liata kô charu a nyu ei ta, Athaliah chata cha râh liana chata ryu reih haw ta.
4 A kô sarina liana chata Zehôiada ta Kari mozy nata vaihtuhpa pheisaih zy hry liatahpa za kha hyutuhpa zy cha pa-awsa ta, ABEIPA o liata ano lâta pachhithasa ta; ama hnohta bie hraih ta, ABEIPA o liana chata chhie pasasa ta, abeipa sawchapawpa cha pamosa chyu ta.
5 Ano chata, “Nama tao awpa cha he he a châ; nama hry liata pahânoh ta a vy awpa zy he su thôh ta pachhaih ta su kha cha vaihtuhpa zy hnôh lâta kuh chhikao liata nama y aw, cha hawhna chata o cha vaih aw eichi ta, a pakhâtuhpa ta nama y awpa a châ;
7 nama hry liata hlao no pahânoh ta a bâh awpa zydua chata abeipa chheipâh liata ABEIPA o cha vaih aw eichi
8 chyhsa tota chaihrai chabapa ta abeipa cha pado aw eichi ta; ahyrai padôpa chhôh o liata a vaw ngiapa maih cha thie lymâ awpa a châ. Chatanachata abeipa chata a ngiapa nata a puapa cha zi lymâ teh u,” tahpa ta bie pie ta.
9 Pheisaih za kha hyutuhpa zy chata theihthaipa Zehôiada biepiepa zydua hawhna chata tao ei ta, âmo hyutuhpa zy chyu pahânoh ta a vy awpa zy nata pahânoh ta a bâh awpa zy cha a chhi ei ta, theihthaipa Zehôiada lâta vawh ei ta.
10 Theihthaipa chata pheisaih za kha hyutuhpa zy cha ABEIPA o liata a ypa Abei Davi asei nata vyhphao zy cha pie ta;
11 chatawhcha vaihtuhpa pheisaih zy chata chaihraih chaba chyupa ta o chachâh lâchhâh tawhta chavei lâchhâh taihta maisâh nata o chheipâh liata abeipa cha chadô ei ta.
12 Chatanachata abei sawchapawpa cha vaw papua ta, abei lakho pakhosa ta, pahnosana bie cha pie ta; abei ta tao ei ta, sathaw thu ei ta; ama ku chabaih ei ta, “Khazohpa ta abeipa hrôbieh mawh sy,” tah ei ta.
13 Vaihtuhpa pheisaih zy nata zawpi sahlao zy pyu cha Athaliah ta a vaw thei nahta ABEIPA o liata zawpi zy hry liata zawpi zy hry lâna chata vawh ta;
14 moh ta, abeipa cha a yzie hawhta otôh kiapâh liata a vaw duah ta, pheisaih hyutuhpa zy nata chiahmie a tôtuhpa zy cha abeipa kiapâh liata a duah ei ta, cha râh liata chyhsa zydua cha thapha ngaitapa ta y ei ta, chiahmie tô chaimâh ei ta. Chatanachata Athalia chata a poh zy hrie ta, ”Sathi sahlaina! Sathi sahlaina a châ haw!” tahpa ta awh ta.
15 Theihthaipa Zehôiada chata pheisaih za chô liata hyutuhpa ta raopa sahlao zy likawh liata papuasa teh u; ahyrai a zipa maih cha zaozi ta chhawh sao awpa a châ,’’ tah ta. Theihthaipa chata, “ABEIPA o liata la thie awpa châ vei,” vaw tah haw tlôh ta.
16 Chatanachata lâpi tlei ei ta; arâ a ngiana lâpi liata abeipa o lâta vawh ta, cha liana chata ama thie haw.
17 Zehôiada chata ABEIPA nata abei nata zawpi zy likawh liana chata ABEIPA chyhsa zy ama vaw châ nawpa bie hraih haw ta; abei nata zawpi zy likawh liata chhao.
18 Cha râh liata chyhsa zydua cha Baal o lâta vawh ei ta, pacho ei ta; a maisâh zy nata a nohthlahpa zy cha pakei chhei khai ei ta, Baal theihthaipa Mata chhao maisâh kiapâh liata thie ei ta. Chatawcha theihthaipa chata ABEIPA o a vaihtuhpa hyutuhpa zy tao ta.
19 Chatawhcha pheisaih za kha hyutuhpa zy, Kari mozy, vaihtuhpa pheisaih zy nata cha chyhsa zydua cha a chhi ta; ABEIPA o tawhtapa abei cha zâ chhi ei ta, vaihtuhpa zy chhikao liata angiapa ta abei o lâta vawh ei ta. Chatawcha abei sahlao zy abeidyuchhai liata a tyuh haw ta.
20 Cha râh liata chyhsa zydua cha a byh ei ta; khihpi cha atymâ leipa ta y haw ta, chatawhcha Athaliah cha zaozi ta abei o liata thie ei ta.
Zudah beipa Zehôasha abeina(2 Tr 24: 1-27)
21 Zehôasha ta ryu a rei pathao nona cha kô saripa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |