Manase abeina (2 Tr 33:4-20)
1 Manase cha a bei tua nota kô hrawhleinopa châ ta, Zerusale liata kô sypangawh nata kô pangawh a bei ta. A nô moh cha Hephazibah a châ.
2 ABEIPA ta Izarel pathlazy hmiakô liata a papua hawpa pho zy ta hmo pasichhih ngaitapa ama tao tyhpa hawhta ABEIPA mohmô liata hmo pha lei ngaitapa zy cha tao ta.
3 A paw Hezekiah ta a parao hawpa su sâhpa zy cha padua ta, Ashera zy tao ta, avâ liata a ypa zydua a chhy ta, chakao ta.
4 ABEIPA ta, “Zerusale liata ei moh ei paysa aw,” a tahna. ABEIPA o liana chata maisâh zy tao ta.
5 ABEIPA o dôhpachhôh tlyhmia miano liana chata avâ liata a ypa zydua châta maisâh tao ta.
6 A sawchapawpa cha mei liata pangiasa ta, pachaopa zy hmâh kaw ta, dyuzy hmâh ta, ahripa pachao thaipa a peihpa zy nata dyuthaipa zy hrua tyh ta. ABEIPA mohmô liata hmo pha lei ngaitapa a pathi pa-ia awpa ta tao tyh ta.
7 ABEIPA ta Davi nata a sawchapawpa Sawlawmaw hnohta, “He o nata Zerusale khih, Izarel chi zydua hry liata ei tlyhpa liana heta ei mo chhâzaw ta paysa aw na ta;
8 bie ei piepa hawhpa zydua nata ei chakaotuhpa Mawsi ta ryhpa a piepa hawhpa zydua kha amâ pyh khiahtala ama mahpaw zy ei pie hawpa râh tawhtapa cha Izarel zy pheizy chhao he papua khao hra aw va na,” a vaw tah hawpa o liana chata Ashera nohthlahpa a taopa cha soh ta.
9 Châhrasala a pyh khoh leipa ei ta, ABEIPA ta Izarel pathlazy sahlao hmiakô liata a papua hawpa phozy taopa hlâta hmah ta a ru viapa hmo parao awpa ta Manase chata chyhsa zy reipasao tyh ta.
10 ABEIPA ta a chakaotuhpa hrohsopa zy hmâpa ta bie reih ta,
11 Zudah beipa Manase heta he hmo pasichhih ngaitapa zy he tao ta, a hmiakô liata Amawri mozy hlâta hmahta thata parao ta, Zudah sahlao he ano khazoh nohthlahpa zy ta he tana heta a tah, ‘Pachâ teh u, Zerusale nata Zudah chô liana heta a theipa maihta nah karâ no a khaina taihta hmo pha leipa ei patlôsa aw.
13 Samari thliena ri nata Ahaba chhôhkha padona cha Zerusale chô liata parai aw na ta: chatawhcha chyhsa ta beihkoh a hnao ta a palipa haw tlaita Zerusale ei hnaoh aw.
14 Chatawhcha ei ryuto a laibâhpa zy cha thy aw na ta, ama khakhaipa zy ku liata ei pie aw, chatanachata ama mahpaw zy,
15 Izi râh tawhta ama vaw pua tawhta atanoh taih heta ei mohmô liata hmo pha lei ngaitapa tao ei ta, ei pathi eina pa-iapa vâna heta ama khakhaipa zydua zy patu awpa nata hraona châta ama châ aw,’ tahpa ta,” tah ta.
16 ABEIPA mohmô liata hmo pha leipa ngaitapa taopa ta Zudah zy hmo paraosapa ta moleina rei leipa ta, Manase chata a thaipa thisaih thata palosa ta, Zerusale doh nata hâ bie ta.
17 Manase thâtih hropa zy, a hmotaopa zydua zy, a hmo paraopa zy cha Zudah abei zy amâ bei no tahpa thâtih zy rona châbu liata ropa ta y vei mâ?
18 Chatawhcha Manase cha a mahpaw zy hnohta a mô ta, Uza sahdô liata ano o kiapâh liata pabu haw ei ta; a sawchapawpa Amawna cha ano vyuhpa ta abei haw ta.
Amawna abeina (2 Tr 33: 21-25)
19 Amawna cha a bei tua no ta kô syno nata kô no châ ta, Zerusale liata kô no a bei ta. A nô moh cha Meshuleme, Zôbah khih liata Haruza sawchanônô châ ta.
20 A paw Manase a taopa hawhta ABEIPA mohmô ta hmo pha lei ngaitapa tao tyh ta.
21 A paw lâpi a chhihpa zydua cha a chhi hra ta, a paw ta khazoh nohthlahpa a chakaopa zy cha chakao ta; a chhy hra ta;
22 ABEIPA, a mahpaw zy Khazohpa cha siesai ta, ABEIPA lâpi cha a chhih leipa ta.
23 Amawna chakaotuhpa zy ta a ru lâta ano tei ei ta, beipa cha ano o liata thie ei ta.
24 Châhrasala cha râh liata chyhsa zy chata beipa Amawna a ru lâta a teituhpa zydua cha thie khai haw ei ta, chatanachata cha râh liata chyhsa zy chata a sawchapawpa Zôsiah cha ano vyuhpa ta abei ta tao haw ei ta.
25 Amawna hmotaopa thâtih hropa zy cha Zudah abei zy amâ bei no tahpa Thâtih Rona Châbu liata y vei mâ?
26 Chatawhcha Uza a sahdô liata ano thlâ liata pabu ei ta; a sawchapawpa Zosiah cha ano vyuhpa ta abei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |