Zôsiah nata ryhpa châbu (2 Tr 34: 1-25; 8: 33)
1 Zôsiah a bei tua no ta kô chariepa châ ta, Zerusale liata kô sythôh nata kô kha a bei ta. Anô moh cha Zedidah. Bôska khih liata Adaia sawchanônô a châ.
2 ABEIPA mohmô liata hmo sia ngaitapa tao tyh ta, a mahpaw Davi lâpi a chhihpa zydua a chhih hra ta, chachâh lâ tlyma, chavei lâ tlyma tlei sai leipa ta.
3 Beipa Zôsiah a beina kô hrawhleichariena liata beipa chata Meshula saw Azaliah sawchapawpa chârohtuhpa Shaphana cha ABEIPA o lâta tuah ta,
4 Theihthaipa bei chaipa Hilkiah lâta khy la, ochhi vaihtuhpa zy ta chyhsa zy tawhta ama lapa ABEIPA o liata tâkâ ama vaw sopa cha reih sala;
5 ABEIPA o mokhâhuhpa raihriatuhpa zy pie mawh sy; chatawhcha âmo chata o raopa a taotuhpa ABEIPA o liata raihriatuhpa sahlao pie mawh sy.
6 thoby taotuhpa zy, o a satuhpa zy, alô a hriatuhpa zy chata, o raopa taona tho nata alô daipa ama chalei thei nawpa ta.
7 anodeikuacha tâkâ ama piepa zy cha pachâ khei lymâ hlei awpa châ vei. Ngâchhih ngaitapa ta ama tao tyhpa vâta,” tahpa ta.
8 Theihthaipa bei chaipa Hilkiah chata chârohtuhpa Shaphana hnohta, “ABEIPA o liata ryhpa châbu cha ei hmô haw,” tah ta. Chatawhcha Hilkiah chata châbu cha Shaphana pie ta, ano chata reih ta.
9 Chatawhcha chârohtuhpa Shaphana cha abeipa lâta vawh ta, abeipa lâta bie cha kei tlôkhei ta, “Na chyhsa zy cha o liata tâkâ a ypa cha ama pie khai haw, ABEIPA o mokhâhtuhpa raihriatuhpa zy ama pie khai haw,” tah ta.
10 Chatawhcha chârohtuhpa Shaphana chata, “Theihthaipa Hilkiah ta châbu eina pie mâ tâh,” tahpa ta abeipa chho ta. Chatawhcha Shaphana chata abeipa hmiakô liata reih ta.
11 Beipa ta ryhpa châbu bie zy cha a thei nahta a poh zy hrie ta.
12 Beipa chata theihthaipa Hilkiah zy, Shaphana sawchapawpa Ahika zy, Mikhai sawchapawpa Akbaw zy, chârohtuhpa Shaphana zy, abeipa chakaotuhpa Asaiah zy hnohna chata,
13 Kei nata zawpi nata Zudah sahlao zydua chata he châbu hmôpa bie a ropa kyh liana heta ABEIPA maniah a chhohiapa teh u; eima tao awpa he cha liata ropa hawhpa zydua he, eima mahpaw zy ta ama zyh leipa vâta, eima chô liana heta ABEIPA hiehâhna cha thata a ia haw hih,” tah ta.
14 Chatanachata theihthaipa Hilkiah zy, Ahika zy, Akbaw zy, Shaphana zy. Asahi zy cha chysia mohôhtuhpa Harha sawchapawpa Tikvah sawchapawpa, Shaluma lahpinô hrohsopa Hulda lâna chata vawh ei ta, kei chho ei ta, (ano cha Zerusale a hnai lâta a pahrâpa châ ta.)
15 Ano chata ama hnohta, “ABEIPA Izarel zy Khazohpa ta he tana heta a tah: ‘Kei lâta cha tuahtuhpa he chho teh u,
16 ABEIPA ta he su liata nata a chhôh liata a pahrâpa sahlao zy chô liana heta hmo pha lei ngaitapa ei vaw patlôsa aw, Zudah beipa ta châbu liata a bie reipa zydua hawhpa kha.
17 Na siesai ei ta, khazoh hropa zy lâta rohpahâhpa rao ei ta, ama ku hriana ta ei pathi eina pa-iapa vâta he su liana heta ei pathi-iana thata ia aw ta, pachhapa ta châ aw vei.
18 Châhrasala ABEIPA a chhohia awpa ta cha tuahtuhpa Zudah beipa lâna chata he hawhna heta reih teh u, ABEIPA Izarel zy Khazohpa ta he tana heta a tah: Na bie theipa kyh liana chata,
19 he su nata a chhôh liata a pahrâpa zy he rohryhrapa nata chhiesapa ta ama y aw tahpa kyh ei reipa kha vaw theipa ta, na palôhrupa zy naipa ta ABEIPA hmiakô liata a panawhpa ta na poh zy hriepa ta, ei hmiakô liata na chapa nahta, kei chhaota na bie cha ei vaw thei na, ABEIPA ta a tah.
20 Chavâta na mahpaw zy lâta châ chhi aw na ta, na thlâ liata thlahlôh ngaitapa ta chhihthapa ta y aw chi ta, he su liata hmo pha lei ngaitapa ei vaw patlôsa awpa cha. Na mo ta hmô khai aw va chi, a tah na,’ tahpa ta,” tah ta. Chatanachata bie cha beipa lâta kei tlôkhei ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 |