Ryhpa Chaneina Bo 34

Ryhpa Chaneina Bo 34

Mawsi thina

1 Chatawhcha Mawsi cha Môaba bypi tawhta Zerikô dady ta Nebô Tlâh, tlâh laki lâna chata khy ta. ABEIPA ta Kilia râh zydua Dana taihta pamosa ta,

2 Nathalai nata Ephrai râh zydua, Manase nata Zudah râh zydua lâ Notla Tilaipi taihta;

3 Neke nata Bypi, cha cha thiahra khih Zerikô saikao Zawa taihta.

4 Chatawhcha ABEIPA ta a hnohta, “He râh he, Abaraha zy, Aisika zy, Zakaw zy hnohta, ‘Na pathlazy ei pie aw,’ tahpa ta chhiesapa ta bie ei taihpa kha a châ, cha pahmôsa na ta, châhrasala cha liana chata angia aw va chi,” tah ta.

5 Chatanachata ABEIPA chakaotuhpa Mawsi cha ABEIPA bie hawhta Môaba râh liata thi ta,

6 Bypi dady ta, Môaba râh liata saikao liata pabu ei ta; châhrasala a thlâ cha atahmâ taihta ahyhmah ta pahno veih ei.

7 Mawsi cha a thi nota kô za kha nata kô syno pa a châ; â mo zo leipa ta a tha chhao tlei hlei vei.

8 Chatawhcha Izarel pathlazy chata Mawsi cha Môaba bypi liata noh sythôh mâchhi sa ei ta; chatanachata Mawsi mâchhiesapa ta ama chana nohzy cha vaw chhâ haw ta.

9 Nuna sawchapawpa Zawsua cha sona thlahpa ta bie ta, Mawsi chata a chô liata a ku a pahniehpa vâta; Izarel pathlazy chata a biezy zyh ei ta, ABEIPA ta Mawsi bie a pie pa hawhna chata tao ei ta.

10 Cha rakha tawhna cha Izarel hry liata Mawsi hawhta ABEIPA ta hmia a chhypa tlai ta, bie a chhopa hrohsopa rai y khao leipa ei ta,

11 pahnona zydua hnohta nata Izi râh zydua liata pamosapa ta,

12 ku thatlô ngaitapa nata chichhih ngaitapa zy ta Izarel chyhsa zydua mohmô liata Mawsi ta a tao hawpa a tao hrapa zy chhao. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 33

Ryhpa Chaneina Bo 33

Mawsi ta Izarel phozy chôta byhnâ a awna

1 He byhnâ awna heta Khazohpa chyhsa Mawsi ta a thi hlâta Izarel pathlazy byhnâ a aw pa.

2 Ano chata,'Sinai tawhta ABEIPA cha a vy ta, Seira tawhta âmo lâta thyu ta, Paran Tlâh tawhta khai ta, mo pathaihpa sâ hrawh hry tawhta â vy, a ku chachâh lâna cha ama châta ryhpa ia theipa y ta.

3 Chatatlyh, chi tozy cha kyhpachâ ta, a mo pathaihpa zydua cha na ku liata y ei ta, na phei thaby liata a tyu ei ta, na bie cha amâ pyh chyu aw,

4 Mawsi chata ryhpa maniah pie ta, Zakaw sahlao zawpi châta ryuto awpa.

5 Zesuru liata abei ta, zawpi sahlao pawhrâhpa pôhpakhy ei ta, Izarel chi zydua hmaohkha ta.

6 Rubena cha hroh thlâh ha sala, thi leipa ta, a chyhsa zy deikua cha tlao chyh ei se,’ tah ta.

7 ABEIPA y, Zudah ao cha nahthlie la a chyhsa zy lâta chhihtha teh. A ku ta ano châta a chhu ta, a khakhaipa zy a dyuhkheituhpa na châ aw,” tahpata.

8 Chatawhcha Livai sahlao kyh liana chata, “Na Thumim nata na Urim cha, nâ mo pathaihpa hnohta a y, Masah liata pasia chi ta, Meriba tizy liata na dyuhpa kha;

9 ‘Ei nô nata ei paw pahno va na,’ a tahtuhpa khata, a unawhpa zy pahno hra vei, ano sawzy tlai chhao pahno hra vei. Na bie cha a pyh ei ta, na biehrai ama zyh.

10 Zakaw sahlao cha na pachiana zy pachu aw ei ta, Izarel sahlao zy na ryhpa; na hmiakô liata rohpahâhpa ama soh aw, na maisâh liata tlokhuh raopa hlâna.

11 Byhnâ aw teh, ABEIPA y, a sôh nata a piah, a ku hriapa zy a vaw pyh la; a dyuhtuhpa zy chai cha tu la a haotuhpa zy chai chhaota, ama thyu heih khao lei nawpa ta,” tah ta.

12 Benzami sahlao kyh liana chata, “ABEIPA kho ngaitapa cha, a kiapâh liata a bôhpa ta a pahrâ aw; noh-y ta y pâ aw ta, a pi tyh aw,” tah ta.

13 Chatawhcha Zawsi sahlao kyh liana chata, “A râh cha ABEIPA byhnâ piepa ta y mawh sy, avâ hmo sôhpa diati zy ta, ti a thu ngaitapa ry liata ti zy ta,

14 noh ta a patheisapa hmo sôhpa zy ta, thlâpâ ta hmo sôhpa a papuapa zy ta,

15 hlâno tlâh zy liata hmo khochhih chaipa zy ta, chhâzaw tlâh liata hmo sôhpa zy ta,

16 leilô nata a chô liata hmo sôhpa zy ta, chhobuh liata a ypa khokheina ta. Byhnâ cha Zawsi sahlao luh chô liata y mawh sy, a unawhzy tawhtapa pananopa laki liana chata.

17 A rôhnahna cha a viahchao tôhpa a pih tuapa rôhnahna hawhta châ ta, a ki cha chaoliah tôhpa ki hawhta a châ; chazy chata pho to a daih aw, kaokih taihta; Manase sahlao sâhkha zy ama châ,” tah ta.

18 Chatawhcha Zebulawna sahlao kyh liana chata,” Aly teh, Zebulawna y, na pua eina liata zy; chatawhcha Iskara y, na poh-o liata zy.

19 Tlâh liata chi to aw aw ei ta; cha liana chata siana atheihna zy ama hlâ aw; tilaipi hneirôna nie tlôh aw ei ta, raphyu liata ryu a pabupa zy chhaota, tah ta.

20 Chatawhcha Kada sahlao kyh liana chata, “Kada sahlao a pakawhtuhpa cha reithaipa ta y mawh sy! Chakeibarôhneipa hawhta a byh ta, bâh nata luh zy hriechhei ta.

21 A pha chaipa ano châta a tlyh ta, ryureituhpa tovyuh cha pahlôhpa ta y ta; pawhrâhpa sahlao zy hnohta vawh ta, ABEIPA pachiana siapa zi ta, Izarel zy hnohta a ryureina zy cha,” tah ta.

22 Chatawhcha Dana sahlao kyh liana chata, “Dana cha chakeibarôhneipa taw a châ, Basana tawhta a vaw puapa cha,” tah ta.

23 Chatawhcha Nathalai sahlao kyh liana chata, “Hy Nathalai, khokheina ta palôhtlâhpa, ABEIPA byhnâ awna ta lôhrâtlôpa y, notla nata chho pahrâ teh,”tah ta.

24 Chatawhcha Asera sahlao kyh liana chata, “Asera cha sawnawh ta byhnâ piepa ta y sala; a unawhpa zy hry liata lykheipa ta y sala, thaw liata a phei pachie mawh sy.

25 Na siena zy cha thua nata dawh a châ aw; na hro chhôh noh hawhta na thatlona chhao a châ aw, tah ta.

26 “Khazohpa hawhpa ahyhmah y veih ei, Hy Zesuru y, cha bao awpa ta avâ liata a ypa, rôhnah ngaitapa ta avâ liata a ypa cha.

27 Chhâzaw Khazohpa cha na yna châ ta, ary lâna chata chhâzaw bâh a y. Khakhaipa zy cha cha papaipa ta, pahleipadia teh, a tah.

28 Chatawhcha Izarel cha thlalôh ngaitapa ta pabohsa ta, Zakaw tikhaoh rei a to, sa nata kresawti râh liana chata, chatatlyh, avâ zy ta diati ama patlasa.

29 Na nohhlao na, hy Izarel y! Nâ hawhpa ahy e a y, ABEIPA pachhapa chyhsa zy, nâma cha baotuhpa vyhphao, na rôhnahna zaozi a châ! Na khakhaipa zy nâ lâta a ngiarih aw ei ta; ama su a sâhpa zy nâ tlyh aw,” tah ta. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 32

Ryhpa Chaneina Bo 32

1 “Nah pachôh teh u, avâzy saih u,ei reih aw na; ei reikah puapa leilô ta thei se.

2 Vâsua hawhta ei bie cha a suah aw, diati hawhta ei bie cha a tla aw, sibie panyupa chô liata vâsuah haw ta, nata sipopa chô liata vâsuah haw ta.

3 ABEIPA moh cha ei phuah aw na. Rôhnahna cha eima Khazohpa pie teh u!

4 Lôpanô, a hmotaopa cha a sia paki; a yzie zydua cha siana a châ. Khazohpa ngâchhihpa hmo paraona hnei leipa, siapa nata phapa a châ,

5 Pha lei ngaitapa ta a chô liata tao ei ta, a sawzy cha vei ei, ama molei hapa vâta, chhâ dyutlai leipa nata chhorupa ama châ.

6 Hy ahrupa nata a so leipa saih u, cha hawhta ma ABEIPA cha viari nama thô aw? Châ taotuhpa ei cha nama paw châ vei mâ? Cha tao ta, cha pa-i vei mâ?

7 Hlâno nohzy cha a thei thlâh ha la, chhâ hluhpi kôzy cha pachâ tua; na paw hiahri la a cha chho aw; na machâ zy chhaota ama cha chho aw.

8 Chônôchaipa ta phopi khihnarâh a pie nota, chyhsa saw zy a pachhai nona khata; phozy râhri pakhâh ta, Izarel pathlazy hluhna zie ta.

9 ABEIPA tovyuh cha a chyhsa zy châ ei ta, Zakaw sahlao cha a ryuto ama châ.

10 Râhchawhpa râh liata a huah ta, râhpathohpa ruapa dâhpa liata a chheipa ta ypa ta mohôh ta,a mo sawzy hawh tlaita.

11 Pahmôpi ta a bu liata a taw pahra ta, a taw chô liata a mathlaw pakai ta; a mathlaw zy pakai ta, la ta, a mathlaw ta a cheih tyhpa hawhta.

12 ABEIPA deita ta a chhi tyh ta, râh hropa khazoh cha a hnohta y vei.

13 Alei su sâhpa liata zy pakiasa ta, lyu liata a veihpa zy ri ta; lôpanô tawhta kheihti pasysa ta; lôsoh tawhta thaw chhao chata.

14 Viahchao sâhpiti kuapa nata mietahkupa sâhpiti, mietahkupa taw nata mietahkupa tôhpa thaw zy ta; Basana râh viahchao hri nata miezy, viah sâh lopa thawzy chhaota kresawti saipa, kre tawhtapa doh chi ta.

15 “Zakaw cha nie ta, a rih bie ta, Zesuru cha vaw thawh ta aty haw; vaw thawh chi ta, mihpa ta, na pahly; Khazohpa cha taotuhpa na siesai haw, na pachhana lôpanô mohnao tlôh chi.

16 Râh hropa khazoh ta a hia patlia ta hmo pasichhipa ta a hie pahâhpa ta.

17 Khazoh a châ leipa hripa zy lâta a theih ei ta, ama pahno beih leipa khazoh zy lâta, khazoh thipa zy a hnôh lâ pi ta a vaw ypa, nama mahpaw zy chi beih leipa hnohta.

18 Châ satuhpa Lôpanô pasasa va chi, châ taotuhpa Khazohpa na my hra.

19 Cha cha ABEIPA ta hmô ta â hao, a sawchapaw zy nata a sawchanô zy hie pahâhpa vâta.

20 ‘Anyusai aw na ta, kheihta ma ama y rai, chhâ dyutlai leipa ama châ, ngâchhih leipa saw zy.

21 Khazoh a châ leipa hmo ta a hia patlia ei ta; ama hmo khâpa hrao leipa ta ei hie na pahâh ei ta. Chi ta rei leipa zy ta hia patlia aw na ta, pho hrupa zy ta hie ei pahâh aw.

22 Mei chata ei pathi-ia ta, Sheol chao ki lâ a kâ, leilô a kô veihna chhaota a kâ khai, tlâh bôna zy a kâ.

23 ‘Ama chô liata raona pachô aw na ta, ama chô liata li ei pathlie aw; 24 nodipa ta pahâpahaoh aw ei ta, mei nata paraona diathlâpa ta châ leipa ta a kâ patlô aw; ama chô liata lyurâhpa sa hâh zy tuah aw na ta; doh lei liata alyhpa zy châmaih chhao.

25 Khôtho lâta zaozi ta thie aw ei ta, chhôh liata thlazohpa ta, satlia nata laihsa, sapi a ngipa, sa pawpazy chhao tai.

26 Âmo cha chhawh pathla awpa nahta, ama pahno thlâhna zydua chhao ei pahlei aw,

27 châhrasala ama khakhaipa zy reipachhiena cha ei chi, âmo chata he hawhna heta reipa ta, “Eima tiah haw, ABEIPA baona a hlao leipa ta,” ama tah aw.

28 “Sona a hnei leipa pho châ ei ta, âmo liata novâhna y vei.

29 Âmo so mawh sala, hezy he pahnothai aw ei ta, ama hnoh lâ kyh ama pachâ awpa tlai!

30 Kheihta e pakha ta a sâh kha â chadai aw ta, pano ta thy kha amâ chadaipai aw, ama Lôpanô ta âmo zuapa ta, ABEIPA ta a piepa ama châ tlôh vei khiahta cha?

31 Ama lôpanô cha eima Lôpanô hawhpa châ tlôh va, eima khakhaipa zy tlai pachâna zie chhaota.

32 Ama krezô cha Sawdawma krezô Kawmawra râh liatahpa a châ, a krezy cha châmaih kre a châ,a saozy cha a pa-ia

33 ama kresawti zy cha parih châmaih, nata vâzi châmaih chi chhih ngaitapa a châ.

34 Cha cha ei pakhy, ei ryubyh liata baipa châ vei ma?

35 Phuh lapa nata viarithôpa cha keima tao awpa a châ, ama pheibu â phie tita ama raona noh cha â vaw hnia haw; ama chô liata hmo a vaw tlô awpazy cha a vaw tlô patoh aw.

36 ABEIPA chata a chyhsa zy ryurei aw ta, a chakaotuhpa zy no a paza aw, ama thatlôna y khao leipa aw ta, a hroh thei awpa cha ama sôh.

37 ‘Khataih liata e ama khazoh; tahpa ta ama lôpanô ama ngâpa cha,

38 ama theina thaw a nietuhpa, ama dopa hlâna kresawti a dohtuhpa zy cha? Vaw thyupa ta, cha bao ei sala, nâmo cha pabohtuhpa châ mawh sy!

39 ‘Kei, keima tlai ei châpa he, pahno ula, khazoh hropa y veih ei; thie tyh na ta, ei pahro tyh hra; hmah paphao tyh na ta, ei patlâh tyh hra; ei ku tawhtapa na chhu theipa rai y veih ei.

40 Avâ lâta ei ku pazawh na ta, ei hrona reipa ta ei reih.

41 Ei zaozi diehpa chata na ta, ei ku ta pachiana a patupa cha ta, ei khakhaipa zy chô liata phuh la aw na ta, nâ haotuhpa zy cha viari ei thô aw.

42 Ei châtai zy cha thisaih ta parisa aw na ta, ei zaozi ta sapa a palâ aw, thiepa nata seizy thisaih chhaota, khakhaipa hyutuhpa zy luh tawhta ei  tao,’ a tah aw.

43 “Hy nâmo pho to saih u, a chyhsa zy chhaota aly teh u; a chakaotuhpa zy thisaih phuh cha a la aw, ano a dyuhtuhpa zy chô liata phuh a la aw, a khihnarâh nata a chyhsa zy chata aryhna pakipa a tao aw,” tahpa ta.

44 Zawpi zy nahkhao theina liata cha hla bie zydua cha Mawsi ta reih ta, ano nata Nuna sawchapawpa Zawsua chhaota.

45 Mawsi ta cha bie zydua cha Izarel mo zydua hnohta a rei khai nahta,

46 ama hnohta, “Atanoh nama hnohta bie ei cha pahnosapa liata nama pathipalôh khâchâ pachhô ula, he ryhpa bie zydua he a chado ngaitapa ta zyh awpa ta nama sawzy bie pie teh u.

47 Nama châta hmo khâpa hrao leipa châ leipa ta nama hrona châ tlôh ta; chatawhcha he hmozy taopa heta hnei awpa ta Zawdâh nama chakapa râh liana chata nama hro a pareih aw” tah ta.

Kâna râh sai awpa ta Mawsi cha pasaipa a châ

48 Cha noh lilaw liana chata ABEIPA ta Mawsi chho ta.

49 “Môaba râh liata Zerikô dady ta Abari lâthlôh liata Nebô Tlâh lâna chata khy la, Izarel pathlazy hnei awpa ta ei piepa Kana râh cha sai teh;

50 chatanachata na unawhpa Arawna, Hôra Tlâh liata thi ta, a chizy lâta pahlypa a châ hawpa hawhna khata na kiana liana chata thi aw chi ta, na chizy lâta pahlypa na châ aw;

51 Zin râhpathohpa liata Kedesa liata Meriba ti liata Izarel pathlazy hry liata eina palyupalih leipa vâna chi khata.

52 Râh cha hmô aw chi ta, châhrasala Izarel pathlazy ei piepa râh liana chata a ngia aw va chi,” tahpa ta. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 31

Ryhpa Chaneina Bo 31

Zawsua, Mawsi â thlatuhpa

1 Mawsi ta Izarel mo zydua hnohta he biezy he reih ta.

2 Ama hnohta, “Atahmâ cha kô za kha nata syno châ hawna ta, pua-ei thei khao leipa na ta, ABEIPA ta, ‘He Zawdâh he chaka aw va chi,’ na tah ta.

3 ABEIPA nama Khazohpa chata cha chhihtha aw ei ta; he phozy he pahlei aw ta, ama râh cha nama hnei aw; ABEIPA ta a rei hawpa hawhta Zawsua ta a cha chhihtha aw ei.

4 Chatawhcha ABEIPA ta Amawri mo abei zy, Sihaw nata Ôka nata ama râh chô liata a taopa hawhta ama chô liata a tao aw, âmo cha a pahleipadia khaw.

5 ABEIPA ta âmo cha pie aw ei ta, bie ei cha piepa biepiepa zydua hawhna khata ama chô liata nama tao awpa a châ.

6 Thatlôpa nata riahpha ngaitapa ta y ula, chi khah ula, âmo cha a pahlaw hra khah u; nama hnohta a siepa cha ABEIPA nama Khazohpa châ tlôh ta; cha my leipa aw ei ta, cha pathlua hra aw veih ei,” tah ta.

7 Chatawhcha Mawsi ta Zawsua cha aw ta, Izarel mo zydua mohmô liata a hnohta, “Thatlô ngaitapa nata riahpha ngaitapa ta y teh; he chyhsa zy hnohta ama mahpaw zy ABEIPA ta chhiesapa ta pie bie a vaw taih hawpa râh liana chata na sie awpa châ ta; âmo he na patosa awpa a châ.

8 Châ chhihthatuhpa cha ABEIPA châ aw ta; na hnohta y lymâ aw ta, cha my leipa aw ta, cha siesai chacheita aw vei; chi leipa la, riahchhiepa ta y khâ,” tah ta.

Kô sarina maihta ryhpa phuah awpa

9 Chatawhcha Mawsi chata cha ryhpa cha roh ta, ABEIPA Biehrai Byh a sytuhpa Livai sawchapawpa theihthaipa zy nata Izarel machâ sahlao zydua cha pie ta.

10 Mawsi ta, “Kô sari kô a ngiahthaina kô maihta byureih kyhchhi liata,

11 su a rao awpa liata Izarel mo zydua ABEIPA nama Khazohpa hmiakô liata amâ vaw luah tita, he ryhpa he Izarel mo zydua theipa ta nama reih awpa a châ.

12 Zawpi sahlao a chapaw a chanô, nama sawnawh chyhpata zy, nama y lâhpa râh hropa chyhsa zy, âmo chata nahthliepa ta, achupa ta, ABEIPA nama Khazohpa cha chipa ta, he ryhpa bie zydua he a chado ngaitapa ta ama zyh thei nawpa nata,

13 ama sawzy a pahno leipa zy chhaota theipa ta Zawdâh chakapa ta nama hnei awpa râh liata nama y chhôh zydua ta ABEIPA nama Khazohpa china amâ chu thei nawpa ta awpakhy teh u,” tahpa ta bie pie ta.

Mawsi hnohta Abeipa biepiena hnôh chaipa

14 Chatawhcha ABEIPA ta Mawsi hnohta, “Na thina daihti a hnia ha ta; Zawsua cha aw la, apahmaohpakhyna poh-o liana chata a kei luah teh u, bie ei pie aw na,” tah ta. Mawsi nata Zawsua cha vawh ei ta, apahmaohpakhyna poh-o liana chata a kei luah ei ta.

15 ABEIPA cha poh-o liana chata ameitôh ta a luah ta; chatawhcha ameitôh cha poh-o chhikao luh chô liana chata a duah ta.

16 ABEIPA ta Mawsi hnohta, “Na mahpaw zy hnohta â mo aw chi ta; he chyhsa zy he thyu aw ei ta, ama yna awpa zy hry liata cha râh khazoh zy liana chata a phei aw ei ta, nâ heihsai aw ei ta, ei biehrai ama hnohta ei hraipa cha ama parao aw.

17 Cha daihti liana chata ama chô liata ei pathi-ia aw ta, a heihsai aw ei na ta, a nyusai aw ei na ta, kâ patlôpa ta y aw ei ta; hmo pha leipa nata nôpona hluh ngaitapa ama chô liata tlô aw ta, cha noh liana chata, ‘Eima Khazohpa eima hryta a y leipa vâta he hmo pha leipa he eima chô liata a vaw tlôpa châ vei mâ?’ tah aw ei ta.

18 Khazoh hropa zy lâ a heihpa ta hmo pha leipa ama tao awpa zydua vâna chata âmo tawhta cha daihti liana chata ei nyu tlai aw.

19 Chavâta he hawhpa hla he nama châta phi la, Izarel pathlazy pachu teh, Izarel pathlazy kyh liata he hla he na pahnokheituhpa a châ thei nawpa ta pavaosa teh.

20 Ama mahpaw zy hnohta chhiesapa ta ei taihpa, sâhpiti nata kheihti ta a lohpa râh liana chata a chhipa ta, nie nata bawhpa ta ypa ta lôhrâtlôpa ta ypa ta, ama vaw thawh tina chata khazoh hropa zy lâta a heih aw ei ta, chakao aw ei ta, na mohnao aw ei ta, ei biehrai zy ama parao aw.

21 Chatawhcha hmo pha leipa nata nôpona hluhpi ama chô liata a vaw tlô tita, he hla he a pahnosatuhpa a châ aw, ama pathlazy pakah tawhta my theipa châ tlôh leipa aw ta; atahmâ chhie ei sapa râh lâta ei chhi hlâ rai chhaota ama pachânazie cha ei pahno thlâh ha na,” tah ta.

22 Chatanachata Mawsi ta he hla he cha noh liana chata phi ta, Izarel pathlazy pachu ta.

23 ABEIPA ta Nuna sawchapawpa Zawsua cha pasyu ta, “Thatlô ngaitapa nata riahpha ngaitapa ta y teh; Izarel pathlazy cha ama hnohta chhiesapa ta ei taihpa râh liana chata na chhihtha aw: na hnohta ei y lymâ aw;” tah ta.

24 Mawsi ta he ryhpa biezy he châbu liata roh khaipa ta a chhâ tawhta,

25 Biehrai Byh a sytuhpa Livai sahlao zy cha Mawsi ta,

26 “He ryhpa châbu he la ula, nâmo kyh liata a pahnotuhpa chata ABEIPA nama Khazohpa Byh kâ lâta soh teh u.

27 Aty thaipa nama châna zie nata nama chhoru zie ei pahno; atanoh ei cha hro lâh nota hmahta ABEIPA chô liata aty tyh eichi ta, ei thi tawhta chhochhi cha kha tlatlu ta ma a châ aw tly?

28 Ama nahkhao theina liata he biezy he reih na ta, âmo kyh liata a pahnotuhpa ta alei nata avâ ei aw thei nawpa ta nama pho pawhrâhpa zydua zy, nama hyutuhpa zy, na aw pa teh u.

29 Ei thi tawhta cha nâmosasyh ta thata a paraoh aw eichi ta, bie ei cha piepa lâpi tawhtapa he nama tlei aw tahpa ei pahno thlâh haw; a chhâna lâ chhochhi ta cha hmo pha leipa ta a cha tla thlu aw ei, nama ku hmotaopa ta pathi pa-ia nawpa ta ABEIPA mohmô liata hmo pha leipa nama tao awpa vâta,” tahpa ta bie pie ta.

Mawsi hla

30 Chatanachata Mawsi ta Izarel pôhpakhypa sahlao zydua nahkhao theina liana chata he hla bie he a chhâna taihta reih khai ta: 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 30

Ryhpa Chaneina Bo 30

Hmôheihna nata byhnâ to theina kyh zy

1 Chatawhcha he hmo zydua nama hmiakô liata ei paysapa byhnâ nata chhiesapa zy he nama chô liata tlôpa ta ABEIPA ta a cha papaina pho zydua hry liata nama pahno heih nahta,

2 ABEIPA nama Khazohpa lâ a heih heihpa ta atanoh ta bie ei cha piepa hawhna heta nâmo nata nama sawzy chhaota nama pathipalôh zydua nata nama palôhrupa zydua ta a ao namâ ngiah tina chata;

3 ABEIPA nama Khazohpa ta nama seichâna pahlei aw ta, cha ngiachhie aw ei ta, ABEIPA nama Khazohpa ta pho to hry ta a cha papaina tawhtapa a cha pakhy heih aw ei.

4 Nama hry liatahpa avâ chy chhâna taihta topa ta ama y khiahtala, ABEIPA nama Khazohpa ta cha tawhtapa cha cha pakhy aw ei ta, cha tawhtapa cha a cha chhihtha aw;

5 ABEIPA nama khopata ta nama mahpaw zy ta ama pahrâpa râh lâna khata cha pangiasa heih aw ta, pahrâ aw eichi ta; ano chata thlao cha pachhisa aw ei ta, nama mahpaw zy khopa ta a cha papôh aw ei.

6 Chatawhcha nama hroh thei nawpa ta ABEIPA nama Khazohpa cha nama pathipalôh zydua nata nama palôhrupa zydua ta a kyh nama pachâ thei nawpa ta nama Khazohpa ta nama pathipalôh nata nama pathlazy pathipalôh a cha chhihtha* aw ei.

7 Chatawhcha ABEIPA nama Khazohpa ta he chhiesana zydua he cha taolatuhpa nama khakhaipa zy nata châ haotuhpa chô liata a paysa aw.

8 Chatawhcha a vaw heih aw eichi ta, ABEIPA ao he a pyh aw eichi ta, atanoh ta bie ei cha piepa ei, a biepiepa zydua he nama zyh aw.

9 Chatawhcha ABEIPA nama Khazohpa chata nama ku hriapa zydua liata zy, nama saw liata zy, nama viahchao hri pôhpa liata zy, nama chhaolei patheipa liata zy thata cha papôh aw ei ta; nama mahpaw zy chô liata alypa hawhna khata nama chô liata ABEIPA aly heih aw,

10 he ryhpa châbu liata a ropa, a biepiepa zy, a ryhpa zy zyh awpa ta ABEIPA ao zyhpa ta nama pathipalôh zydua nata nama palôhrupa zydua ta ABEIPA nama Khazohpa lâ namâ heih khiahtala.

11 He biepiepa atanoh ta ei cha piepa ei he, nama châta ru tu leipa ta châ hla hra veih ei.

12 Theipa ta eima zyh thei nawpa ta ahy e, avâ lâta maniah siepa aw ta, maniah a kaw lapa aw?’ tah awpa ta avâ liatahpa châ vei. Theipa ta eima zyh thei nawpa ta ahy e tilaipi khô lâta maniah sie pa aw ta, maniah a lapa aw?’ tah awpa ta tilaipi haosâ lâ tahpa châ hra vei.

14 Nama zyh thei nawpa ta bie chata châ hnia ei ta; nama pakah liata nata nama pathipalôh liata a y.

15 Atanoh he nama hmiakô liata hrona nata phana, thina nata hmo pha leipa soh na ta;

16 ABEIPA nama Khazohpa kyhpachâ awpa zy, a lâpi a chhih awpa zy, a biepiepa zy, a ryhpa zy, a pachiapa zy a pyh awpa ta atanoh ta bie ei cha piepa ei he nama zyh khiahtala hroh aw eichi ta, pôh aw eichi ta, nama hnei awpa râh liana chata ABEIPA nama Khazohpa ta byhnâ a cha pie aw ei.

17 Anodeikuacha nama pathipalôh ta a hro lâ a heihpa ta, nahthlie leipa ta, paviasapa ta y pa ta, khazoh hropa zy a chhypa ta nama chakao khiahtala,

18 nama leidia tlai aw tahpa atanoh he ei cha chho ei; Zawdâh chakapa ta hnei awpa ta namâ ngiana râh liana chata hroh parei aw veih eichi.

19 Nama hmiakô liata hrona nata thina, byhnâ nata chhie ei soh tahpa atanoh he nâmo kyh liata pahnotuhpa chata alei nata avâ, ei aw; chatanachata hrona cha a tlyh teh u, nama hroh thei nawpa ta, nâmo nata nama pathlazy chhaota,

20 ABEIPA nama Khazohpa kyhpachâpa ta, a ao a ngiapa ta, ano khâchâ patupa ta; ano cha nama hrona, nama hro pasihna châ tlôh ta, chatanachata nama mahpaw Abaraha zy, Aisika zy, Zakaw zy chhiesapa ta pie a taipa râh liana chata nama pahrâ aw,” tah ta. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 29

Ryhpa Chaneina Bo 29

Môaba râh liata Izarel hnohta Abeipa biehraina

1 Hôriba liata ama hnohta bie a hraipa rei leipa ta ABEIPA ta Môaba râh liata Izarel pathlazy hnohta Mawsi bie a pahraisapa biehrai biezy cha hezy he a châ.

2 Mawsi ta Izarel chyhsa zydua cha aw ta ama hnohta: “Izi râh liata Phirao chô liata zy, a chyhsa zydua chô liata zy, a râh zydua chô liata zy nama mohmô lia tlaita ABEIPA ta hmo a taopa zydua kha hmô eichi ta,

3 pasiana ru ngaitapa zy, pahnona zy, hmonoâhpa zy nama mo tlaita nama hmôpa kha;

4 châhrasala ABEIPA ta atanoh taihta pahno thaina pathipalôh zy, hmô theina mo zy, thei theina nahkhao zy a cha pie leipa ei a châ.

5 Râhpathohpa liata kô sypalih cha chhihtha ei na ta; nama chysia zy cha chy leipa ta, nama pheiky zy cha chy hra leipa ta; 6 kei he ABEIPA nama Khazohpa ei châ tahpa nama pahno thei nawpa ta, viahchhâ nie leipa eichi ta, kresawti chhao, sahhma chhao doh leipa eichi ta.

7 Chatawhcha he su nama vaw tlô nahta Hesbaw beipa Sihaw nata Basana beipa Ôka cha mania adyuh awpa ta vaw pua ei ta, âmo cha pahnie pi ta;

8 ama ra cha la pi ta, Rubena mo zy, Kada mo zy, Manase pho khophie zy pahrâ awpa ta pie pi ta.

9 Chavâta nama hmotaopa zydua liata thlaochhipa ta nama y lymâ thei nawpa ta he biehraipa biezy he a pyh ula tao teh u.

10 Atanoh he nama zydua ta nama pho pawhrâhpa zy, nama machâpa zy, nama hyutuhpa zy, Izarel chyhsa zydua,

11 nama sawnawh chyhpa ta zy, nama lahpinô zy, nama yna râh hropa chyhsa nama ylâhpa nama tho a thlutuhpa nata nama ti a thaihtuhpa zy taihta,

12 ABEIPA nama Khazohpa chhiesapa nata a biehrai ABEIPA nama Khazohpa ta atanoh ta nâmo liata a hraipa liana heta nama ngia thei nawpa ta;

13 nama mahpaw Abaraha zy, Aisika zy, Zakaw zy hnohta chhie a vaw sa hawpa hawhta nata nama hnohta a vaw rei hawpa hawhta a chyhsa zy chata atanoh ta a cha pa-i thei nawpa nata nama Khazohpa a châ thei nawpa ta ABEIPA nama Khazohpa hmiakô liata nama y.

14 He chhiesapa nata biehraipa bie he nama hnohta deita a hraihpa châ leipa na ta, 15 atanoh ta ABEIPA eima Khazohpa hmiakô liata a duahpa zy nata atanoh ta ei hnohta a y hra leipa zy hnohna chhao heta a châ.

16 Izi râh liata eima yzie zy, pho hropa zy chato pathlapa ta nama siena zie zy pahno eichi ta;

17 ama hry liata ama hmo pasichhihpa zy nata ama khazoh nohthlahpa tho nata alôzy tâkâ ri nata ngôh zy hmô hra eichi ta.

18 Chata leipa ta la nama hry liata chapaw tlyma, chanô tlyma, chhôhkha tlyma, pho tlyma, cha phozy khazo zy achhy awpa chata ama pathipalôh ta atanoh ta ABEIPA eima Khazohpa cha a heisaihpa ta; nama hry liata châmaih nata hmo khapa puana thabypa zy nama y pathlei aw na,

19 cha hawhta a châ khiahtala he chhiesapa bie he a pahno nahta, ‘Hmo hiepa ta hmo dâhpa thie a chhuahpa tahpa hawhta pathipalôh chhorupa ta y hra aw sala thlalôhna cha ei hnei thlâh ha aw,’ tahpa ta a pathipalôh ta anosasyh ta byhnâ a aw pathlei aw na.

20 ABEIPA chata a ngiahthai chachei leipa aw ta, ABEIPA hiehâhna nata hiatliana chata cha chyhsa cha khu aw ta, he châbu liata chhiesapa a rohpa zydua he a chô liata y aw ta, ABEIPA ta avâ ry tawhtapa âmo cha tlao a pahlei aw.

21 He ryhpa châbu liata ropa chhiesapa biehraipa zydua hawhna heta Izarel pho zydua hry tawhtapa pananopa ta hmo pha leipa lâta ABEIPA ta a pahlaosa aw.

22 Chatawhcha thyutlia a vaw y awpa, nama hnoh lâta nama sawzy a vaw y awpa nata râh hropa chyhsa lâhlapi tawhta a vy awpa zy chata cha râh liata bie nata ABEIPA ta pasana a pahneisapa zy,

23 a râh tlokhuh cha kaih nata alôh nata kâ rypa, khâpahmah chi cheih leina, khâpahmah pyu leina, sibiepa zy chhao thao leina, Sawdawma nata Kawmawra nata Admah nata Zebaw paraopa, ABEIPA hiehâhna nata pathi-iana ta a paraopa hawhta a raopa a châpa ama hmô tina chata,

24 pho to ta, ‘Khâpa vâta ma he râh he, he hawhta ABEIPA ta a tao, he hiehâhna ru ngaitapa he kheihtazie ta ma a châ tly?’ ama tah aw.

25 Chatanachata chyhsa ta, ‘Izi râh tawhta a chhihtha nota a biehraipa ABEIPA ama mahpaw zy Khazohpa biehraipa cha a heihsai ei ta,

26 khazoh hropa ama pahno beih leipa khazoh zy, ano ta âmo châta a raopa a châ leipa zy chakao ei ta, amâ chhypa vâta a châ;

27 chavâta he châbu liata a rohpa chhiesana zydua patlôsa awpa ta, he râh chô liana heta ABEIPA pathi cha a ia;

28 chatawhcha hiehâhpa nata pathi-iapa nata pathi-ia ngaitapa tlai ta ama râh tawhtapa phia pathla khai ha ta, râh hro lâta a hie patla, atanoh ta ama yzie hawhna hih,’ ama tah aw.

29 Hmo a nyupa zy cha ABEIPA eima Khazohpa eih châ ta; hmo palâsapa zy deikua cha he ryhpa bie zydua he eima zyh thei nawpa ta keimo nata eima pathlazy eih, chhâzaw ta a châ aw. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 28

Ryhpa Chaneina Bo 28

Reingiahna byhnâ zy

1 ABEIPA nama Khazohpa ao cha pakhâta ta nahthliepa ta, atanoh ta bie ei cha piepa zydua a chado ngaitapa ta nama zyh khiata la, ABEIPA nama Khazohpa chata “khizaw pho zydua liata chônô chaipa ta a cha tao ei.

2 ABEIPA nama Khazohpa bie namâ pyh khiahtala, he byhnâ zydua he nama chô liata y aw ta, a cha zi lymâ aw ei.

3 O lâ nata râh lâna zy chata byhnâ piepa ta y aw eichi ta.

4 Nama saw zy, nama chhaolei patheipa zy, nama sahroh zaw pôhpa, nama viahchao nata nama mietahkupa zaw a pôhpa zy cha byhnâ piepa ta a y aw.

5 Nama hrâbyh nata nama viahchhâ nyna beihkoh zy byhnâ piepa ta y aw ta.

6 Namâ ngia nota byhnâ piepa ta y aw ta, nama puapazy chhao byhnâ piepa ta nama y aw.

7 Nama khakhaipa nâmo châ dyuhtuhpa zy cha ABEIPA ta nama hmiakô liata panawhsa pa aw ei ta, cha dyuh awpa ta lâpi miakha liata a vaw ngia aw ei ta, lâpi miasari ta amâ râpai aw.

8 ABEIPA ta nama sawva chô liata zy, nama hriapa zydua chô liata zy, byhnâ cha pie aw ta; ABEIPA nama Khazohpa ta râh a cha piepa liana chata byhnâ a cha pie aw ei.

9 Nama hnohta chhie a sa hawpa hawhta ABEIPA chata ano châta pho pathaihpa ta a cha pa-isa aw ei, ABEIPA nama Khazohpa biepiepa zy zyhpa ta a lâpi zy namâ chhih khiahtala,

10 chatanachata khizaw pho to ta ABEIPA moh bipa nama châpa pahno aw ei ta, a cha chi aw ei.

11 Chatawhcha namo pie awpa ta nama mahpaw zy ABEIPA ta a vaw taipa râh liana chata nama sawzy, nama sahroh zaw pôhna liata zy, nama chhaohlei patheipa liata zy, ABEIPA ta thata cha papôh pa aw ei.

12 ABEIPA chata a daihti liata nama râh a pasa awpa ta vâsua cha pie awpa nata nama ku hriapa zydua byhnâ pie awpa ta avâ, a ryubyh phapa cha cha pahypa aw ei ta; chatanachata phopi hluhpi dyu pacheisa aw eichi ta, nâmo deikua chata chei aw vei eichi.

13 Chatawhcha ABEIPA ta chaolahmei châ leipa ta luh ta cha tao aw ei ta; a ry châ leipa ta a chô lymâ ta nama châ aw; ABEIPA nama Khazohpa biepiepa zyhpa ta atanoh ta ei cha piepa ei he, a chado ngaitapa ta a pyhpa ta,

14 atanoh ta bie ei cha piepa, a biezy he a kheihawhpa liata hmahta chachâh lâ tlyma, chavei lâ tlyma liata khazoh hropa zy zipa nata chakao awpa ta nama tleisai vei khiahtala.

Reingiah leina theilâpa zy

15 Anodeikuacha ABEIPA nama Khazohpa ao cha pakhâta ta nahthliepa ta, atanoh ta bie ei cha piepa biepiepa zydua a chado ngaitapa ta nama zyh leipa khiahtala, he chhie zydua he nama chô liata vaw y aw ta, a cha tlô thlu aw ei.

16 O lâ chhiesapa ta y aw eichi ta, râh lâta chhiesapa ta nama y hra aw.

17 Nama hrâbyh nata nama viahchhâ nyna beihkoh zy chhiesapa ta a y aw.

18 Nama sawzy nama chhaolei patheipa zy, nama viahchao pôhna nata nama mietahkupa zaw pôhna zy cha chhiesapa ta a y aw.

19 Namâ ngiahpa zy chhiesapa ta y aw ta, nama puapazy chhao chhiesapa ta nama y aw.

20 ABEIPA ta nama chô liata nama ku hriapa zydua liata zy, chhiesana zy, tymâna zy, rana zy, vaw tuah aw ta, nawh aw eichi ta, thlai nama leidia aw, nama hmotaopa zy moleipa ta eina pathluapa vâ eichi ta.

21 Hnei awpa ta namâ ngiahna râh tawhtapa cha a cha pahleipadia khai hlâ lei cha ABEIPA ta hri a cha pavaosa aw ei.

22 ABEIPA ta chaohna zy, chasipa zy, thlohna zy, palona zy, zaozi zy, chawhkaraina zy, hmyna zy ta cha hri aw ei ta, nama leidia khai hlâ lei cha a châ chadai lymâ aw ei.

23 Nama chô lâta nama avâ cha dawh châ aw ta; nama ry lâta alei cha thua a châ aw.

24 Nama râh vâsua cha doh lei nata meichado lâta ABEIPA ta pachâsa aw ta; nama leidia khai hlâ lei cha, avâ tawhta nama chô liata a za tla aw.

25 ABEIPA ta nama khakhaipa zy hmiakô liata pahniepa ta cha paysa aw ei ta; âmo a dyu awpa ta lâpi miakha liata pua aw eichi ta, lâpi miasari ta a râpai aw eichi ta; leilô khihnarâh zydua hry liata pasichhihpa ta nama y aw.

26 Nama ri cha avâ pavaw zydua nata lyurâhpa sa zydua niepa châ aw ta; a totuhpa y chachei aw veih ei.

27 Patlâh thei leipa Izi kheihlu zy, sa thlohna zy, riatha zy ta ABEIPA ta a cha hrie aw ei.

28 Hruna zy, mochaona zy, riahchhiena zy ta ABEIPA ta cha hrie aw ta;

29 mochaopa ta a zopa liata a pathâ ngâpa hawhta nohchhôh pavâhpa liata chhao pathâ ngâ aw eichi ta nama khihsana kyh liana chata thlao a chhi aw veih eichi; chatawhcha pasaipa-ina chata nata hraona châta nama châ ngâthlâh ha aw, cha pachha awpa ta ahyma y aw veih ei.

30 Lahpinô a pahawh aw eichi ta, chyhsa hropa ta amâ ziakhei aw; o sa aw eichi ta pahrâ aw veih eichi; kresadô tao aw eichi ta, a theilâpa nie aw veih eichi.

31 Nama mohmô liata nama viahchao tôhpa zy cha thiepa châ aw ta, a sapa cha nie aw veih eichi; nama alâzy cha cha lapa raruah aw ei ta, cha pie khao aw veih ei; nama mietahkupa zy cha nama khakhaipa zy lâta piepa a châ aw, cha pachhatuhpa ahyhmah hnei aw veih eichi.

32 Nama sawchapaw zy, nama sawchanô zy pho hropa lâta piepa châ aw ei ta, no y ta âmo vâpa ta nama sai thlâh ha tyh aw, nama saina lâta nama mo zy a bâ aw; khâpahmah ta tao theipa hnei tlôh leipa aw eichi ta.

33 Nama chhaohlei patheipa zy nata nama hriapasapa theizy cha nama pahno leipa pho ta nie khai aw ei ta, pasaipa-ipa nata riepatheipa ta nama ch aw;

34 chatanachata cha hmozy cha nama hmô nata nama hrupâ aw.

35 ABEIPA ta nama pakhuh liata zy, nama phei liata zy, patlâh thei leipa kheihlu pasapa chi cha pathlasa aw ei ta, nama pheipazah tawhta nama laki taihta.

36 Nâmo nata nama abeipa chhaota, nama mahpaw zy taihta nama pahno beih leipa phopi hnohta ABEIPA chata châ chhi aw ei ta; cha liana chata khazoh hropa tho nata alô nama chakao aw.

37 Chatanachata ABEIPA chata a châ chhina awpa pho zydua hry liana chata noâhpa nata rapa nata a chhiena lâta pakhona nama châ aw.

38 Lyu liata sa chi a hluhpi puakhei aw eichi ta, a chyhta deita nama hria aw; khawsu ta a nie khai aw.

39 Kresadô tao aw eichi ta, mohôh aw eichi ta, chârahsala a kresawti cha doh leipa aw eichi ta, kre cha lyu hra aw veih ei chi; châkariepa ta a nie khai aw.

40 Nama râh zydua liata ôli tho loh aw eichi ta, châhrasala a thaw cha a thu aw veih eichi; nama ôli theizy cha a zô khai aw.

41 Sawchapaw zy, sawchanô zy sa aw eichi ta, châhrasala nâmo eih châ aw veih ei; sei ta amâ chhi aw.

42 Nama theilâpa kô zydua nata nama chhaolei patheipa cha khawsu châta a châ aw.

43 Râh hropa chyhsa nama hry liata a ypa zy chata a sapa ta cha khoh lymâ aw ei ta; nâmo cha namâ hnai laih lymâ aw.

44 Dyu cha pacheisa aw ei ta, nâmo ta dyu pacheisa aw veih eichi; âmo cha luh châ aw ei ta, nâmo cha chaolahmei nama châ aw.

45 He chhiesana zydua he nama chô liata y aw ta, châ chadai aw ei ta, a cha pha aw ei, a cha pahleipadia khaina taihta a biepiepa zy nata a ryhpa a cha piepa zyh awpa ta ABEIPA nama Khazohpa ao cha nama nahthlie leipa vâta.

46 Nama chô liata nata nama pathlazy chô liata chhâzaw ta pahnona noâh tahna chata a y aw.

47 Hmo a to liata nama vaw hneirôhpa chhaota ABEIPA nama Khazohpa cha palôhrupa aly ngaitapa nata thapha ngaitapa ta nama chakao leipa vâta,

48 nâmo châ dyuh awpa ta ABEIPA ta a vaw tuah awpa nama khakhaipa zy cha nodina chôta zy, dâhphina chôta zy, thluahruana chôta zy, hmo a to a phahlana chôta zy ta chakao aw eichi ta; ama cha pahleipadia khai hlâ lei ta cha nama rao liata thua raopaky ama cha paky aw.

49 Lâhlapi tawhta kaokih tawhtapa nâmo châ dyuh awpa pho ABEIPA ta pahmôpi a pathlôpa hawhta a vaw tuah aw, ama reih nama pahno leipa pho,

50 machâzy chhao a papeisa leipa nata satliazy chhao a khokhei hlei leipa pho a hrâh ngaitapa cha,

51 chatawhcha nama sahroh zaw pôhna zy nama chhaolei patheipa zy, ama leidia khai hlâ lei cha nie aw ei ta; sâh zy, kresawti zy, thaw zy, nama viahchao pôhna zy, nama mietahkupa zaw tawzy cha pahlôhpa aw veih ei, nama leidiana ama cha tlôkheipa awpa ta.

52 Nama zydua liata nama ngâpa, nama kuh a sâhpa zy a chona taihta, nama kuh chhikao zydua liata cha dôh aw ei ta; ABEIPA nama Khazohpa ta a cha piepa, nama râh zydua liata, nama kuh chhikao zydua liata a cha dôh aw ei.

53 Nama khakhaipa zy ta ama cha dôhna vâta ama cha padôna nata ama cha dôhna liana chata nama saw ABEIPA ta a cha piepa nama sawchapawzy nata nama sawchanô zy sa nama nie aw.

54 Nama hry liata chyhsa nôphapa, chyhsa pha ngaitapa zy chhaota, ama unawhpa zy, ama lahpinô kho ngaitapa zy, ama sawnawhzy dâhdei chhao moh thei aw veih ei;

55 khâpahmah ama hnei khao leipa vâta nata ahyhmah ta ama pie eipa tâtâh, ama sawzy sa ama nie aw; ama cha dôhna nata ama cha padôna, nama khakhaipa zy ta nama kuh chhikao liata ama cha padôpa vâta.

56 Nama hry liata chanô a panyusapa nata chiehleipa zy, ama chieh leina nata ama panyusapa vâta alei chhao a tly khoh leipa zy chata ama vahpa kho ngaitapa zy, ama sawchapawpa zy, ama sawchanônô zy,

57 amâ pyh haipa hawsaihpa zy nata ama saw a pih awpa zy chhao, moh thei leipa aw ei ta, a to amâ phahla hawpa vâta a ru lâta ama nie aw, ama cha dôna nata ama cha padôna nama khakhaipa zy ta nama kuh chhikao liata ama cha padôna vâta.

58 ABEIPA nama Khazohpa moh rôhnah ngaitapa nata chichhih ngaitapa he, nama chi thei nawpa ta he châbu liata â rohpa bie zydua he a chado ngaitapa ta nama zyh vei khiahtala,

59 ABEIPA ta nâmo nata nama pathlazy chô liata hriena noâhchhih ngaitapa, hri ru ngaitapa a y thlâh hapa, pasana rietheichhi ngaitapa a y thlâh hapa a chareisa aw.

60 Nama chi kaw tyhpa, Izi râh hrizy kha nama chô liata chareisa heih aw ta; khâchâ a cha patu aw ei.

61 He ryhpa châbu liata ro leipa pasana nata hri to chhao, nama leidia hlâlei cha ABEIPA ta nama chô liata a chareisa aw.

62 Avâ liata awhsi zie a châ tyhpa zy kha a chyhta deita nama vaw châ ha aw; ABEIPA nama Khazohpa ao nama zyh leipa vâta.

63 Chatawhcha a phapa ta a cha tao awpa nata a cha papôh awpa ta ABEIPA cha alypa hawhna khata a cha pahleipadia awpa nata a cha parao awpa ta ABEIPA cha aly aw ta; nama hnei awpa ta namâ ngiapa râh tawhtapa cha phiapa ta nama châ aw.

64 Chatawhcha ABEIPA ta kaokih taihta kaokih hiakha lâ taihta chi to hry liata cha papai aw ei ta; cha liana chata tho nata alô nama mahpaw zy taihta nama pahno beih leipa khazoh hropa zy nama chakao aw.

65 Cha pho hry liana chata huhnona rai hmô leipa aw eichi ta, nama phei chata a pahâna rai y leipa aw ta; cha liana chata ABEIPA ta a chalyuna palôhrupa zy, mo bâna zy, panaona palôhrupa zy, tlao a cha pie aw ei;

66 nama hrona cha chichhih ngaitapa ta y aw ta; chhô nata zâ chi ngâthlâh hâpa ta y aw eichi ta, nama hrona ta chhôhmo ngaitapa ta yna hnei aw vei.

67 Myta cha, ‘Zâlâ a châ bâ mawh la,’ tah aw eichi ta, zâlâ ta, ‘My a châ bâ mawh la.’ nama tah aw, hmo chichhihpa nama pathipalôh ta a chi awpa vâta nata nama mo ta nama hmô awpa vâna chata.

68 Hmô beih khao aw veih eichi, nama hnohta ei tahpa lâpi liana chata balyh ta Izi râh lâta ABEIPA ta a châ chhi heih aw ei; cha liana chata nama khakhaipa zy, seichapaw châta zy, seichanô châta zy, nâmosasyh ta a zuah aw eichi ta, ahyhmah ta cha khoh aw veih ei,” tahpa ta. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34

Ryhpa Chaneina Bo 27

Ryhpa Chaneina Bo 27

Ebal Tlâh liata ryhpa roh awpa

1 Mawsi nata Izarel machâ zy chata zawpi zy hnohta, “Biepiepa zydua atanoh ta ei cha piepa ei he, a pyh teh u.

2 ABEIPA nama Khazohpa ta râh a cha piepa liata sie awpa ta Zawdâh nama chakah noh liata alô lai ngaitapa zy bô aw eichi ta, alô baina nama hnia awpa a ch;

3 nama chakah tawhta a chô liana chata he ryhpa bie zydua he nama roh awpa a châ, chatanachata ABEIPA nama mahpaw zy Khazohpa ta bi a cha vaw taihpa hawhna khata sâhpiti nata kheihti lona râh ABEIPA nama Khazohpa ta a cha piepa râh liana chata nama sie thei aw.

4 Chatawhcha Zawdâh nama chakah khai tawhna chata atanoh ta bie ei cha piepa hawhna heta Ebal Tlâh liata alô zy bô aw eichi ta, alô baina nama hnia awpa a châ.

5 Cha liana chata ABEIPA nama Khazohpa chata maisâh, alô maisâh nama tao awpa châ ta, thua chaihrai nama hmâh awpa châ vei.

6 ABEIPA nama Khazohpa maisâh cha alô daipa châ leipa ta nama tao awpa a châ; cha liana chata ABEIPA nama Khazohpa châta raopa hlâna zy hlâ aw eichi ta;

7 adyhna hlâna zy ta a thei aw eichi ta, cha liana chata nie aw eichi ta; ABEIPA nama Khazohpa hmiakô liana chata thapha ngaitapa ta nama y awpa a châ.

8 Chatawhcha alô zy chô liana chata he ryhpa bie zydua he a sia ngaitapa ta nama roh awpa a châ,” tahpa ta, bie pie ei ta.

9 Mawsi nata theihthaipa Livai sahlao zy chata Izarel chyhsa zydua cha chho ei ta. “Hy Izarel mozy saih u, pakhâta ta nahthlie teh u; atanoh he, ABEIPA nama Khazohpa chyhsa zy châ haw eichi ta.

10 Chavâta ABEIPA nama Khazohpa bie cha nama zyh awpa châ ta, atanoh bie ei cha piepa, a biepiepa zy nata a ryhpa zy cha nama zyh awpa a châ,” tahpa ta.

Ebal Tlâh liata chhiesana

11 Cha noh liana chata Mawsi ta zawpi zy bie pie ta,

12 Zawdâh nama chaka khai tawhta zawpi zy byhnâ chata Kerizi Tlâh liata he sahlao he amâ duah awpa a châ, Simeona pho zy, Livai pho zy, Zudah pho zy, Iskara pho zy, Zawsi pho zy, Benzami pho zy hih.

13 Chatawhcha chhiesana châta he sahlao he Ebal Tlâh liata amâ duah awpa a châ: Rubena pho zy, Kada pho zy, Asera pho zy, Zebulawna pho zy, Dana pho zy, Nathalai pho zy hih.

14 Chatawhcha Livai sahlaozy chata reih pathao aw ei ta, Izarel mo zydua hnohna chata ao paro ngaitapa ta:

15 Zôthaipa zy taopa ABEIPA châta pasichhihpa nohthlahpa taopa tlyma. leihpa tlyma, a ru lâta a vaopa maih cha chhiesapa ta y mawh sy,’ tah aw ei ta. Chatawhcha zawpi zydua chata, ‘Amen’ vaw tah aw ei ta, amâ vaw chhy awpa a châ.

16  A nô tlyma, a paw tlyma a za leipa maih cha chhiesapa ta y mawh sy,’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

17 A vaih râhri a pasietuhpa cha chhiesapa ta y mawh sy,’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

18 Lâpi tawhtapa mochaopa lâpi leipa lâ a pasiesatuhpa cha chhiesapa ta y mawh sy,’ tah aw ei ta. Chatawhcha zawpi zydua cha ta, ‘Amen’ ama vaw tah awpa a châ.

19 Râh hropa chyhsa zy, paw hnei leipa zy, nôhmei zy â do lei ngaitapa ta a ryurei patuhpa cha chhiesapa ta y mawh sy,’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

20 A paw lahpinô a ziakheituhpa cha chhiesapa ta y mawh sy, a paw no a pazasapa a châpa vâta,’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

21 Sahroh kheihawhpa rai a ykheituhpa cha chhiesapa ta y mawh sy’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

22 A sietanô, a paw sawchanônô tlyma, a nô sawchanônô tlyma a ziakheituhpa cha chhiesapa ta y mawh sy,’ tah aw ei ta. Chatawhcha zawpi zydua chata, Amen ama vaw tah awpa a châ.

23 A lahpinô nô a ziakheituhpa cha chhiesapa ta y mawh sy,’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

24 A vaih a ru lâta a thietuhpa cha chhiesapa ta y mawh sy,’ tah aw ei ta. Chatawhcha zawpi zydua chata, ‘Amen’ ama vaw tah awpa a châ.

25 Mosiapa thie nawpa ta a ty a latuhpa cha chhiesapa ta y mawh sy,’ tah aw ei ta. Chatawhcha zawpi zydua chata, Amen’ ama vaw tah awpa a châ.

26 He ryhpa bie tao awpa ta a pyh leituhpa cha chhiesapa ta y mawh sy,’ tah aw ei ta. Chatawhcha zawpi zydua chata ‘Amen’ ama vaw tah awpa a châ. 

Ryhpachaneina (Deuteronomy)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34