Biepiepa rôhnahpa
1 Chatawhcha hnei awpa ta nama kei siena râh liata nama zyh awpa nata nâmo nata nama sawchapawpazy nata nama samohzy ta ABEIPA nama Khazohpa cha chipa ta, nama hro chhôhta a ryhpa zydua nata a biepiepa ei cha piepa ei he,
2 nama zyh awpa nata bohpi nama pahrâ thei nawpa ta ABEIPA nama Khazohpa ta nama pachâ awpa ta bie eina piepa, biepiepazy, ryhpazy, pachianazy cha hezy he a châ.
3 Chavâta Izarel mo saih u, thlao a chhipa ta, ABEIPA nama mahpawzy Khazohpa ta bie a châ taihpa hawhta, sâhpiti nata kheihti lona râh liata thata nama pôh thei nawpa ta nahthlie ula, zy awpa ta a chado teh u.
4 Hy Izarel mo saih u, nahthlie teh u; ABEIPA eima Khazohpa cha ABEIPA pakha châ ta;
5 ABEIPA nama Khazohpa cha nama pathipalôh tlokhuh ta, nama palôhrupa tlokhuh ta, nama thatlôna tlokhuh ta, kyh nama pachâ awpa a châ.
6 Chatawhcha he biezy atanoh ta ei cha piepa ei he nama pathipalôh liata y thlâh ha aw ta;
7 nama sawzy phahnai khoh ngaitapa ta pachu aw eichi ta, nama o liata namâ tyu nota zy, lâpi liata nama sie nota zy, namâ zia nota zy, nama thyu daihti ta zyta nama reih tyh awpa a châ.
8 Chatawhcha pahnona châta nama ku liata chahry aw eichi ta, nama mo nata mo likawh ta khiriena châta a y hraw awpa a châ.
9 Chatawhcha nama o chhikao tôhzy liata nama ochhi liatazy nama roh awpa a châ.
Reingiah leina kyh zikyurâna
10 ABEIPA nama Khazohpa ta nama mahpaw Abaraha zy, Aisika zy, Zakaw zy hnohta chhiesapa ta a cha piepa râh, nâmo taopa a châ chachei leipa khih rôhnahpa nata a ngia ngaitapa zy,
11 nâmo pabiepa a châ chachei leipa hmo phapa tota a biepa o zy, nâmo chaopa a châ chachei leipa tikhaoh chao chiehpa zy, nâmo lopa a châ chachei leipa kresadô nata ôli thozy yna liata cha chhitha ei ta, niepa ta, lôhrâtlôpa ta nama y nona chata,
12 a chado ngaita teh u, chata leipa ta la Izi râh seichâna tawhta cha chhihthatuhpa, ABEIPA cha nama my pathlei aw na.
13 ABEIPA nama Khazohpa cha chi aw eichi ta; ano cha chakao aw eichi ta, a moh reipa ta chhie nama sa awpa a châ.
14 Khazohpa hropa nama chheipâh liata chyhsazy khazohzy cha, namâ chhy awpa châ vei;
15 nama hry liata a ypa ABEIPA nama Khazohpa cha Khazohpa hiatlia hmâhpa a châ; ABEIPA nama Khazohpa pathi cha nama chô liata ia aw ta, leilô hmia tawhtapa he a cha pahleipadia pathlei aw ei na.
16 Masah liata nama pasiapa hawhna khata ABEIPA nama Khazohpa cha nama pasia awpa châ vei.
17 ABEIPA nama Khazohpa ta a cha piepa ei, biepiepazy, a biepahnosapa zy, a ryhpa zy he a chado ngaitapa ta nama zyh awpa a châ.
18 Thlao namâ chhi nawpa nata ABEIPA ta a rei hawpa hawhta nama khakhaipa zydua papua awpa ta ABEIPA ta nama mahpawzy hnohta chhie a vaw sa hawpa râh pha ngaitapa cha nama hnei thei nawpa ta,
19 ABEIPA mohmô liata â dopa nata a phapa cha nama tao awpa a châ.
20 Nama sawzy ta, ‘ABEIPA eima Khazohpa ta bie a cha piepa pahnosapa zy, ryhpa zy, pachiana zy he kheihta zie ta e?’ tahpa ta, noh hro ta ama cha hiahri tina chata,
21 nâmo ta, nama sawzy hnohta, ‘Izi râh liata Phirao sei châ pi ta; ABEIPA ta Izi râh tawhtapa cha ku thatlô ngaitapa ta maniah chhihtha ta;
22 ABEIPA ta eima mohmô liata Izi râh chô liata zy, Phirao chô liata zy, a chhôhkha zydua chô liata zy, pahnona nata hmo noâh ngaitapa nata nôpo a chhih ngaitapa zy pamosa ta;
23 keimo deikua cha maniah pie awpa ta eima mahpawzy hnohta chhie a vaw sapa râh cha maniah a pie thei nawpa ta, cha tawhtapa cha maniah chhihtha ta.
24 Chatanachata he ryhpa zydua he zyh awpa nata eima pha nawpa ta ABEIPA eima Khazohpa cha chi awpa ta ABEIPA chata bie maniah pie ta, atanoh hawhta a hrohpa ta maniah a pahlôh thei nawpa ta.
25 A bie maniah a piepa hawhta ABEIPA hmiakô liata a biepiepa zydua zyh awpa ta eimâ chado khiahtala eima châta siana a châ aw, nama tah awpa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |