Adyuhna kyh ryhpa
1 Nama khakhaipa zy adyuh awpa ta nama pua nota, arâ zy, talaili zy, zawpi zy, nâmo hlâta a hluhpa nama hmô nota, âmo nama chi awpa châ vei; Izi râh tawhta cha chhihthatuhpa ABEIPA nama Khazohpa cha nama hnohta y tlôh ta.
2 Chatawhcha namâ dyuh chy ta cha theihthaipa chata zawpi zy pangai sala, bie chho sala,
3 ama hnohta, ‘Hy Izarel zy saih u, thei teh u, atanoh cha nama khakhaipa zy namâ dyuh awpa châ ta; riahchhiepa ta y khah ula, chi khah ula, a chalyu hra khah u, âmo cha chi hra khah u;
4 nâmo pachha awpa ta nama khakhaipa zy châ dyuhpa awpa ta nama hnohta a y lymâpa cha ABEIPA nama Khazohpa châ tlôh ta,’ tah mawh sy.
5 Chatawhcha hyutuhpazy chata zawpi hnohta, ‘O thiehpa sapa ta a hlâ leipa nama y ma? A o lâ a di heih mawh sy, adyuhna liata thi pathlei aw ta, chyhsa hropa ta ama hlâ pathlei aw na.
6 Chatawhcha kresadô taopa ta a theilâpa a nie leipa nama y ma? A o lâ a di heih mawh sy, adyuhna liata thi pathlei aw ta, chyhsa hropa ta ama nie pathlei aw na.
7 Chatawhcha a lahpinô a pahawhpa ta a hnei leipa nama y ma? A o lâ a di heih mawh sy, adyuhna liata thi pathlei aw ta, chyhsa hropa ta ama hnei pathlei aw na,’ tahpa ta reih mawh sy.
8 Chatawhcha hyutuhpa zy chata zawpi zy hnohta, ‘Chipa nata riahchhiepa nama y ma? A o lâ a di heih mawh sy, a unawhpa zy pathipalôh cha a pathipalôh hawhta a zao pathlei aw na,’ tah lymâ mawh sy.
9 Chatawhcha hyutuhpa zy ta zawpi zy hnohta bie ama reih khai tawhta zawpi zy a chhituh awpa pheisaih hyutuhpazy ama rao awpa a châ.
10 Adyuh awpa ta khih namâ hnia tina chata aryhna bie reih tua ula.
11 Chatawhcha châ vaw ryh ei sala, âmosasyh ta ama cha vaw pie khiahtala, cha liata a ypa zydua cha raihriapa châta nama hmâh awpa châ ta, ama cha chakao aw.
12 Châhrasala châ aryh khoh leipa ta amâ châ dyuh awpa khiahtala, dô aw eichi ta;
13 ABEIPA nama Khazohpa ta nama ku liata a cha pie tina chata cha liata chapaw zydua cha zaozi ta nama thie khai awpa a châ,
14 chanô nata ama sawnawh chyhpa ta zy, sahroh zy nata khih liata hmo a ypa zy deikua cha cha liata a hraona sôh zydua chhao taih nama châta nama la awpa a châ; ABEIPA nama Khazohpa ta a cha piepa nama khakhaipa zy tawhta hraona hmo cha nama nie awpa a châ.
15 He pho sahlao khihzy a châ leipa, nama yna tawhta khih â hlapa zydua cha cha hawhna chata nama tao lymâ awpa a châ.
16 ABEIPA nama Khazohpa ta hnei awpa ta a cha piepa he pho khihzy deikua he ABEIPA nama Khazohpa ta bie a cha piepa hawhta a hrona a hneipa maih cha khâpa hmah nama pahlôh awpa châ leipa ta,
17 Hiti mozy, Amawri mozy, Kana mozy, Periza mozy, Hivi mozy. Zebu mozy cha nama pahleipadia khai awpa a châ;
18 ama khazohzy chô liata ama tao tyhpa hmo pasichhihpa zydua cha ama cha pachu lei nawpa ta, chata leipa ta cha ABEIPA nama Khazohpa chô liata hmo nama parao pathlei aw na.
19 La a chhuahpa ta, adyuhpa ta, khih cha bohpi nama chadôpa chhaota, chazy liata thozy cha ahrei ta nama thlu awpa châ leipa ta; nama niepa châta châ ta, nama thlu awpa châ vei. Tho cha chyhsapa ma châ ta, nama chadô tly?
20 A theilâpa nie leipa tho a châ tahpa nama pahnopa zy deikua paraopa ta thlu aw eichi ta, châ dyuhtuhpa khih cha a rao hlâ lei cha kuh ta nama dôh awpa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |