Thei hmiatuapa zy nata su hrawh su kha piezie
1 ABEIPA nama Khazohpa ta ryuto nata hnei awpa ta râh a cha piepa namâ kei ngia nahta nama kei y tina chata,
2 ABEIPA nama Khazohpa ta a cha piepa nama râh chhaolei patheipa kô a veih tua chaipa zy cha vaw cheih aw eichi ta, hrâbyh liata soh aw eichi ta, ABEIPA nama Khazohpa ta â mo paysana awpa ta a rao awpa lâna chata nama sie awpa a châ.
3 Cha daihti cha theihthaipa lâna chata sie aw eichi ta, a hnohta, ‘Maniah pie awpa ta eima mahpaw zy hnohta chhie a vaw sapa râh lâta eimâ vy haw tahpa atanoh he ABEIPA nama Khazohpa hnohta eima palâsa,’ tah aw eichi ta.
4 Chatawhcha theihthaipa chata nama ku tawhtapa hrâbyh cha la aw ta, ABEIPA nama Khazohpa maisâh thaby liata a patyuh aw.
5 Chatawhcha nâmo ta ABEIPA nama Khazohpa hmiakô liana chata, ‘Eima mahpaw Suria chyhsa viavipa châ ta; Izi râ lâta zu ta, za pahrâ ta, a chyhta châ ei ta; cha liana chata phopi rôhnah ngaitapa, hmotaothei ngaitapa a hluhpi vaw châ haw ei ta.
6 Chatawhcha Izi mozy chata maniah taola ei ta, rie maniah pathei ei ta, rai ru ngaitapa maniah pahriasa ei ta.
7 Chatanachata ABEIPA eima mahpaw zy Khazohpa châ aw pi ta, ABEIPA chata eima aw pa vaw thei ta, eima riethei zie zy, eima hriapasa zie zy, pasaipa-ipa eima châna zie zy cha pahno ta;
8 ABEIPA cha Izi râh tawhtapa cha ku thatlô ngaitapa zy, bâh pazawhpa zy, hmo chichhi ngaitapa zy, pahnona zy, hmonoâhpa zy ta maniah chhihtha ta;
9 he su liana heta maniah pangiasa ta, he râh sâhpiti nata kheihti lona râh he maniah pie ta.
10 Hy ABEIPA y, nâma ta maniah na piepa chhaohlei theilâpa hmiatua chaipa zy eima vaw cheih’, nama tah awpa a châ. Chatawhcha ABEIPA nama Khazohpa hmiakô liata a naohpa ta a bôh aw eichi ta;
11 ABEIPA nama Khazohpa chata nama chhôhkha zy, hmo phapa a cha piepa zydua liana chata thapha ngaitapa ta nama y awpa a châ.
12 Kô thôh kô, su hrawh liata su kha piena kô liata, nama paveihpa zydua su hrawh liata su kha nama pie khai tawhta, Livai mozy, râh hropa chyhsa zy, paw hnei leipa zy, nôhmei zy ta nama yna liana chata niepa ta ama pahra thei hra nawpa ta nama pie awpa a châ,
13 ABEIPA nama Khazohpa hmiakô liata, ‘Na bie maniah na piepa, na biepiepa zydua hawhta eima o tawhtapa hmo pathaihpa zy cha soh pi ta, Livai mozy, râh hropa chyhsa zy, paw hnei leipa zy, nôhmei zy, pie haw pi ta; na biepiepa cha a khâpa liata hmahta parao leipa pi ta, my hra ma pi; mâchhie eima sa nota, cha liatahpa cha nie leipa pi ta, eima pathaih vei nota, hmâh hra leipa pi ta, athihpa châta pie hra ma pi; ABEIPA eima Khazohpa ao cha nahthlie pi ta, na bie maniah na piepa zydua hawhna chata eima tao.
15 Na yna pathaihpa avâ tawhta za moh la sâhpiti nata kheihti lona râh eima mahpaw zy pie awpa ta chhie na sa hawpa hawhna khata na chyhsa Izarel zy nata na chhaohlei maniah na piepa he byhnâ pie mah y,’ nama tah aw.
Abeipa châta chyhsa pathaihpa
16 Atanoh he ABEIPA nama Khazohpa chata he ryhpa zy nata pachiana zy he tao awpa ta bie a cha pie ei; chavâta nama pathipalôh zydua nata nama palôhrupa zydua ta a pyhpa ta nama tao awpa a châ.
17 Atanoh he ABEIPA cha a lâpi zy a chhihpa ta a ryhpa zy nata a biepiepa zy nata a pachiana zy taopa ta a aozy nahthlie a chhuahpa ta nama Khazohpa ta a tlyh haw eichi ta;
18 chatawhcha atanoh liana heta bie a châ taihpa hawhna khata, a biepiepa zydua taopa ta ano eih châ awpa nata a vawh rei hawpa hawhta,
19 ABEIPA nama Khazohpa châta chyhsa pathaihpa nama châ thei nawpa nata phopi a taopa zydua hlâta reithaina zy, moh phana zy, palyupalihna zy to awpa ta ABEIPA ta a châ tlyh ei,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |