Amana ryhpa
1 Chyhsa ta lahpinô hneipa ta, a chô liata hmo a ngia leipa khâpa tlyma a pahnopa vâta a mo tloh leipa a châ khiahtala, amana châ ro pa aw ta, pie aw ta, a o tawhta a papua awpa a châ.
2 Chatawhcha a o tawhta a pua tawhna chata mo hropa a hnei thei aw,
3 a vahpa a hnôhlâ tahpa chata a haopa ta amana châ ropa ta, piepa ta, a o tawhta a papua tlyma, a vahpa hnôhlâ tahpa lahpinô ta a hneituhpa cha a thi tlyma, a châ khiahtala,
4 a vahpa hmiatuapa, ano a pasiesatuhpa khata, a papuapalei hawpa châ ta, hnei thei khao aw vei; ABEIPA pachâ ta pasichhihpa a châ, ABEIPA ta hnei awpa ta a cha piepa râh liana chata moleina nama pangiasa awpa châ vei.
5 Chyhsa lahpinô a hnei dyupa cha pheisaih lâta a sie awpa châ leipa ta, khâpa raihria ta hmahta â hnaw awpa châ vei; a o lâta kô kha cha a khopa hawhta y aw ta, a lahpinô nata thapha ngaitapa ta ama y awpa a châ.
Ryhpa nanopa zy
6 Sâh chariena tlyma, a chô lâta sâh chariena alô tlyma, ahyhmah ta sôka ta nama la awpa châ vei, chyhsa hrona lapa châ tlôh aw ta.
7 Ahyrai Izarel pathla a unawhpa zy hry liatahpa parupa ta sei hawhta a hmâhpa tlyma, a zuahpa tlyma pahnopa ama châ khiahtala, cha a parutuhpa cha thie awpa a châ; cha hawhna chata nama hry tawhtapa cha hmo pha leipa cha nama pahlei awpa a châ.
8 Phawhpa hri kyh liana chata, pakhâta ta pachâpa ta theihthaipa Livai sahlaozy pachuna zie lyma hawhta tao awpa ta a chado teh u; âmo bie ei piepa hawhta a chado ngaitapa ta nama tao awpa a châ.
9 Izi râh tawhtapa nama vaw puana lâpi liata ABEIPA nama Khazohpa ta Miria chô liata a taozie kha a thei thlâh ha teh u.
10 Khâparai nama vaih nama pacheisa nahta a sôhka la awpa ta a o liata namâ ngia awpa châ vei.
11 Khôtho liata a duah aw eichi ta, nama pacheisapa chata sôka cha khôtho lâta a cha vaw cheipa awpa ei a châ.
12 Sipasapa a châ khiahtala a sôka cha nama mokhei awpa châ vei;
13 a chysia liana chata a môpa ta, a cha reithai thei nawpa ta a sôka cha noh tla ta nama pie heih thlyu awpa a châ; chatanachata ABEIPA nama Khazohpa pachâ ta nama châta hmo siapa a châ aw.
14 “Nama chyhsa hmâpa sipasapa nata phahlapa zy cha nama unawhpa tlyma, nama râh nama yna liata a ypa, râh hropa chyhsa tlyma rai châ sala, nama pasaipa-i awpa châ vei;
15 a hria noh liana chata a hlao nama pie awpa châ ta, noh ta a tla khâh awpa châ vei, sipasapa châ ta, cha liana chata a palôhrupa a soh tyh; chata leipa ta cha nâmo kyh liata ABEIPA aw aw ta, nama châta moleipa a châ pathlei aw na.
16 Sawzy vâta pawzy thie awpa châ leipa ta, paw zy vâta saw zy thie awpa châ hra vei; chyhsa to âmo moleipa vâ chyuhta thie awpa a châ.
17 Râh hropa chyhsa zy nata paw a hnei leipa zy cha â do lei ngaitapa ta nama pachiapa awpa châ leipa ta, nôhmei poh cha sôka ta nama lapa awpa châ hra vei;
18 nâmo chhao Izi râh liana khata sei châ haw eichi ta, ABEIPA nama Khazohpa ta cha tawhtapa cha a cha chatlai ei; tahpa namâ thei thlâh ha awpa a châ; chavâta he hmozy he nama tao awpa ta bie ei cha pie ei.
19 Nama lyu liata sâh nama hria nahta sapiah nama my khiahtala, nama la heih awpa châ vei; râh hropa chyhsa zy, paw hnei leipa zy, nôhmei zy châta a châ aw; chatanachata ABEIPA nama Khazohpa chata nama ku hriapa zydua liata byhnâ a cha pie aw ei.
20 Nama ôli tho nama chhei nahta a chiahzy cha nama chhei awpa châ vei; râh hropa chyhsa zy, paw hnei leipa zy, nôhmei zy châta a châ aw.
21 Nama kresadô liatahpa nama lyu nata akâmo tho awpa châ vei, râh hropa chyhsa zy, paw a hnei leipa zy, nôhmei zy châta a châ aw.
22 Izi râh liana khata sei nama châ haw tahpa namâ thei thlâh ha awpa a châ; chavâta he hmo he tao awpa ta bie ei cha pie ei.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |