Kana râh phopizy Abeipa ta a parao aw
1 Hy Izarel mo saih u, nahthli teh u; Anaki mo cha, ‘Ahy e a patu thei aw pi?’ ama tah tyhpa nâmo hlâta a rôhnahpa nata hmo tao thei viapa pho,
2 khihpi avâ taihta kuh a hneipa nata rôhnah ngaitapa chyhsa pahreihpa nata doseihpapi nama pahno chiehpa Anaki pathlazy râh cha hnei awpa ta atahmâ cha Zawdâh chaka ha aw eichi ta.
3 Chavâta ABEIPA nama Khazohpa cha mei a kâ patlôpa hawhta nama hmiakô liata a sie tyhpa cha a châ tahpa atahmâ he pahno teh u; ano chata âmo cha pahleipadia aw ta, cha panawhpa aw ei ta; ABEIPA ta nama hnohta a rei hawpa hawhna khata âmo cha papua awh eichi ta, thlai nama pahleipadia aw.
4 ABEIPA nama Khazohpa ta a cha papuapa tina chata, ‘Eima siana vâta he râh he hnei awpa ta ABEIPA ta maniah a chhihtha,’ nama palôhrupa ta tah chacheih ta khah u; he phozy he ama moleipa vâta ABEIPA ta nama hmiakô tawhtapa a cha papuapa aw ei.
5 Nama siapa vâta tlyma, nama palôhrupa â dopa vâta tlyma ta ama râh cha nama hnei awpa cha leipa ta; he phozy moleipa vâta nata ABEIPA ta nama mahpaw Abaraha zy, Aisika zy, Zakaw zy hnohta a chhiesapa bie pa-i awpa ta ABEIPA nama Khazohpa ta ano cha tlao a cha papuapa ei.
6 Chavâta he râh pha ngaitapa he, nama siapa vâta hnei awpa ta ABEIPA ta a cha piepa ei châ vei, tahpa pahno teh u; pho chhoru ngaitapa châ tlôh eichi ta.
Hôriba liata Izarel adyuhna(Pu 31: 18-32: 25)
7 Râhpathohpa liata ABEIPA pathi nama pa-ia tyhna ziezy kha a thei thlâh ha ula, my khah u; Izi râh tawhtapa nama pua no tawhta he su nama tlôna taih heta ABEIPA chô liata atyhmâhpa châ eichi ta.
8 Hôriba liana chhao khata ABEIPA pathi pa-ia eichi ta, cha pahleipadia awpa taihta ABEIPA a pathi-ia ta.
9 Alô phiapa nama hnohta ABEIPA ta bie a hraina lôphiapa la awpa ta tlâh lâ ei khy nona khata noh sypalih nata zâ sypalih tlâh liana chata kaw y na ta; viahchhâ chhao nie leipa na ta, ti chhao doh hra va na.
10 “Chatawhcha ABEIPA chata lôphia miano Khazohpa kudy ta ropa cha na pie ta; cha liana chata namâ pôhpakhy noh liata tlâh chô liata mei tawhta ABEIPA ta nama hnohta bie a reipa zydua kha y ta.
11 Chatawhcha noh sypalih nata zâ sypalih hnôh lâna chata lôphia miano biehraina lôphia cha na pie ta.
12 ABEIPA chata ei hnohta, ‘Thyu la, he tawhtapa he zu parah teh; Izi râh tawhtapa na chhihthapa na chyhsazy cha hmo noza chhihpa ama tao khai ha khu; a chhih awpa ta a bie ei piepa, lâpi tawhtapa cha thlai tlei parah haw ei ta; nohthlapa ama tao ha khu,’ tah ta.
13 Chatawhcha ABEIPA chata, “He chyhsazy he moh ngâ na ta, pho chhoru ngaitapa ama châ!
14 Âmo pahleipadia awpa nata avâ ry tawhtapa ama moh pahlei awpa ta keima ta ei tao aw; chatawhcha nâma he âmo hlâta pho hmotao theipa nata rôhnah viapa ta ei cha tao aw na,’ tahpa ta na chho hra ta.
15 Chatanachata a heih na ta, tlâh tawhtapa cha chô na ta, tlâh cha mei ta kâ ngâ ta; biehraina lôphia miano cha ei ku kara no ta chaba na ta.
16 Chatawhcha kaw sai na ta, ABEIPA nama Khazohpa chô liata vaw molei haw eichi ta; viahchao taw nohthlapa pathaihpa nâmo châta a tao eichi ta; ABEIPA ta bie a cha piepa lâpi tawhtapa cha thlai tlei haw eichi ta.
17 Chatawhcha lôphia miano cha chalo na ta, ei ku kara no tawhtapa cha thy na ta, nama mohmô liata pakei na ta.
18 Chatawhcha eikhano ta ei tahpa hawhna khata noh sypalih nata zâ sypalih ABEIPA hmiakô liata pao na ta; a pathi pa-ia awpa ta ABEIPA mohmô liata nama hmo taopa molei ngaitapa, nama moleina zydua vâta viahchhâ chhao nie leipa na ta, ti chhao doh hra va na.
19 Nâmo pahleipadia awpa ta ABEIPA pathi-iana, a hiehâhna nata palôh châ leina ru ngaitapa cha chi tlôh na ta. Châhrasala cha nona chata ABEIPA ta ei bie cha na nahthliepa ta.
20 ABEIPA cha Arawna cha pahleipadia khohna taihta a pathi-ia ta; châhrasala cha nona chata Arawna châta chhao thlahchhâ pâ hra na ta.
21 Nama moleina hmo, nama taopa viahchao taw nohthlapa cha la na ta, mei liata rao na ta, parao khai na ta, buchâh hawhta charo na ta; a paohpa cha tlâh tawhta chavah a lohpa liana chata thy na ta.
22 Taberah liata zy, Masah liata zy, Kibrôhatava liata zy chhao ABEIPA cha a pathi pa-ia eichi ta.
23 Chatawhcha ABEIPA ta, ‘Râh ei cha piepa ei cha hnei teh u,’ tahpa ta Kadesabania tawhta a cha tuah nona ei khata, ABEIPA nama Khazohpa biepiepa cha aty sai eichi ta; ano cha ngâ leipa eichi ta, a ao nahthlie hra veih eichi.
24 Ei cha pahno tua no tawhtapa ABEIPA chô liata atyhmâhpa chyhsa châ eichi ta.
25 Chatanachata ABEIPA ta ei pahleipadia aw a cha tahpa vâna khata ABEIPA hmiakô liata pao na ta, noh sypalih nata zâ sypalih ei paopa kha.
26 Chatawhcha ABEIPA hnohna chata thlahchhâ na ta, ‘Hy ABEIPA Khazohpa y, na rôhnahna ta na chatlaina ku thatlô ngaitapa ta Izi râh tawhta na chatlaipa, na chyhsazy nata na ryutozy cha pahleipadia khah y.
27 Châ chakaotuhpa Abaraha zy, Aisika zy, Zakaw zy cha a thei thlâh ha la; he sahlao he ama chhoru zie zy ama hmoparao zie zy, ama molei zie zy, moh khah y,
28 chata leipa ta la maniah na papuana râh liata chyhsa zy chata, “ABEIPA ta a râh taipa liana chata a chhihtha thei leipa vâta nata â haopa vâta râhpathohpa liata thie awpa ta a chhihtha,” ama tah pathlei aw na.
29 Na hmotaotheina rôhnah ngaitapa nata na bâh pazawhpa ta na chhihthapa, na chyhsazy nata na ryuto zy châ tlôh ei ta,’ tah na ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |