Mawsi ta Izarel sawzy reingiah awpa ta a chhoreina
1 Cha vâna chata atahmâ Izarel mozy saih u, nama hroh thei nawpa nata ABEIPA nama mahpawzy Khazohpa ta râh a cha piepa cha a ngiapa ta nama hnei thei nawpa ta namâ pyh awpa ta ei cha pachu tyhpa ei, ryhpazy nata pachianazy cha nahthlie teh u.
2 ABEIPA nama Khazohpa biepiepa ei cha piepa ei he namâ pyh thei nawpa ta bie ei cha piepa ei he nama baichha awpa châ leipa ta, nama thy bâ awpa châ hra vei.
3 Baal-peôr vâta ABEIPA hmotaopa cha nama mo ta hmô ta, Baal-peôr achhytuhpa zydua cha ABEIPA nama Khazohpa ta nama hry tawhtapa pahleipadia ta;
4 ABEIPA nama Khazohpa a patutuhpa maih deikua cha atahmâ taihta hroh chyu eichi ta.
5 Pachâ teh u, hnei nawpa ta namâ kei ngiana râh liata chhao nama zyh lymâ nawpa ta ABEIPA ei Khazohpa ta bie eina piepa hawh tlaita ryhpazy nata pachianazy cha cha pachu ei na ta.
6 A pyh ula, zyh teh u; cha tlai cha he ryhpa zydua he theipa ta, ‘He phopi rôhnah ngaitapa he chyhsa so ngaitapa nata novâh ngaitapa ama châ tlai na,’ a tahtuhpa phozy mohmô liana chata nama sona nata novâhna a hneipa chyhsa nama châna a châ aw.
7 Eima padona maihta ABEIPA eima Khazohpa ta maniah â hniapa hawhta, âmo a hnia tyhpa khazoh a hneipa phopi rôhnahpa ahy e y hra?
8 He tlatlu ta a siapa ryhpazy nata pachianazy atahmâ nama hmiakô liata ei paysapa zydua hawhpa, ryhpa a hneipa he phopi rôhnahpa hropa ahy e a y hra?
Hôriba liata Izarel sawzy ta ama hmôpa a thei thlâhna
9 Khâparai châ sala a sohsi ula, pakhâta ta a vao pathao teh u, chata leipa ta la nama mo ta hmo a hmôpazy cha my aw eichi ta, nama hro chhôhta nama pathipalôh tawhtapa a lei pathlei aw na; nama sawzy nata nama samohzy pachu teh u;
10 Hôriba liata ABEIPA nama Khazohpa hmiakô liata namâ dua no kha my pathlei la eichi, ABEIPA ta ei hnohta, ‘Zawpizy cha na aw pa teh, ei biezy ei pahnosa aw ei, leilô liata ama y chhôh zydua ta eina china awpa zie amâ chu thei nawpa nata ama sawzy pachu awpa ta,” tah ta.
11 Chatanachata a vaw hnia eichi ta, tlâh kiapâh liana chata a vaw duah eichi ta, tlâh liana chata mei paleih thata a duahpa ta ameih nata meidoh zohkaluhpa hry liana cha.
12 ABEIPA chata mei tawhna chata bie reih ta; a bie reipa cha thei eichi ta, châhrasala pôhpa khâpahmah hmô leipa eichi ta; ao deita nama thei.
13 A biehrai zyh awpa ta bie a cha piepa ei, Biehrawh Piepa cha nama hnohta phuah ta; lôphia miano liata roh ta.
14 Cha nona chata hnei awpa ta nama siena râh liata nama zyh awpa ta ryhpazy nata pachianazy pachu awpa ta ABEIPA ta bie na pie ta.
Nohthlapa achhyna kyh zikyurâna
15 Chavâta a chado kaw teh u.
16 Nohthlapazy nama châta ataopa ta, chapaw alyupa ta tlyma, chanô alyupa ta tlyma,
17 alei liata sahroh alyupa ta tlyma, aruapa liata azaw tyhpa pavaw mathlaw a hneipa alyupa ta tlyma,
18 alei liata alyhthaipa alyupa ta tlyma, alei ry ti liata nga hry liatahpa alyupa ta tlyma zy taopa ta nâmosasyh ta namâ parao pathlei aw na. Hôriba liata mei tawhta ABEIPA ta a cha vaw chho no khata pôhpa khâpahma hmô tlôh leipa eichi ta.
19 Cha vei khiahta avâ lâ a heihpa ta noh zy, thlâpâ zy, awhsi zy, avâ liatahpa zydua chhao nama hmô nahta, ABEIPA nama Khazohpa ta avâ ry liatahpa zydua a rao pâpazy chata cha sy aw ei ta, a chhy aw eichi ta, nama chakao pathlei aw na.
20 ABEIPA chata a chyhsazy a ryu châ awpa ta thua patisana tawhtapa, Izi râh tawhtapa cha tlao a cha chhihtha ei, atahmâ ta nama châpa hawhna heta.
21 Chata dei chhao châ leipa ta, nâmo vâta ABEIPA cha ei chô liata pathi-ia ta, Zawdâh cha chaka leipa nata nama ryutopa châta râh pha ngaitapa ABEIPA nama Khazohpa ta a cha piepa liana chata, ei ngia lei nawpa ta chhie sa hra ta.
22 Kei cha he liata a thi awpa châ na ta, Zawdâh cha ei chaka awpa châ vei; nâmo deikua cha chaka aw eichi ta, cha râh pha ngaitapa cha nama to aw.
23 A chado ngaita teh u, ABEIPA nama Khazohpa biehrai nâmo liata a hraihpa cha mypa ta, ABEIPA nama Khazohpa ta khâpa a lyupa hmahta tao a pasaih leipa nohthlapazy nama tao pathlei aw na.
24 ABEIPA nama Khazohpa cha a tlô khaina taih kâ a hmâhpa mei, hiatlia a hmâh ngaitapa Khazohpa châ tlôh ta.
25 Saw nata samohzy hneipa ta, cha râh liata bohpi nama y tawhta, nâmosasyh ta a paraopa ta khâpa tlyma alyupa zy ta, nohthlapa taopa zy, taopa ta a pathi pa-ia nawpa ta ABEIPA nama Khazohpa mohmô liata hmo pha leipa nama tao tlai khiahtala,
26 Zawdâh chakapa ta nama to awpa râh tawhtapa cha thlai nama leidia aw tahpa nâmo kyh liata na pahnokheituhpa châta atahmâ he alei nata avâ ei hrua; bohpi ta pahrâ leipa aw eichi ta, nama leidia khai aw.
27 ABEIPA chata pho to hry liata cha papai aw ei ta, ABEIPA ta a cha papaina phozy hry liana chata a chyhta deita ta siesaipa ta nama y aw.
28 Cha liana chata khazoh, tho nata alô ta chyhsapa taopa, a hmô thei leipa, a thei thei leipa, a nie thei leipa, roh theina chhao a hnei leipazy, achhy aw eichi ta.
29 Châhrasala cha liana chhao chata ABEIPA nama Khazohpa cha tluapa ta nama pathipalôh tlokhuh nata nama palôhrupa tlokhuh ta nama tlua khiahtala, nama hmô heih aw.
30 Rietheipa ta ypa ta nama chô liata cha hmo zydua cha a vaw tlô tita; a chhâna lâta cha ABEIPA nama Khazohpa lâta a vaw heih aw eichi ta, a bie cha namâ pyh ha aw,
31 ABEIPA nama Khazohpa cha zawngiah thei ngaitapa Khazohpa châ tlôh ta; cha pathlua leipa aw ei ta, cha pahleipadia leipa aw ei ta, nama mahpawzy hnohta chhiesapa ta a biehraipa cha my hra aw vei.
32 Nama y hlâta, hlâno daihti cha a laichadai ula, aleilô liata Khazohpa ta chyhsapa a tao tawhta avâ ry liata he hawhpa hmo rôhnahpa he a y beihpa ta pahnopa a châ rai mâ?
33 Mei tawhta bie a vaw reihpa theipa ta, nama hroh thlâh hana khazoh ao chyhsa ta pahnopa ta a y beih ma?
34 Pho hropa hry tawhtapa pasiana zy, pahnona zy, hmonoâhpa zy, adyuhna zy, ku thatlô ngaitapa zy, bâh pazawhpa zy, hmo rarôh ypa zy ta, ABEIPA nama Khazohpa ta nama mohmô liata Izi râh liata a taopa zydua hawhta phopi a chhihtha ngâpa khazoh ama y beih ma?
35 ABEIPA cha Khazohpa a châ tahpa nama pahno thei nawpa ta nama hnohta paluahsapa châ ta; ano leipa ta cha, a hrohpa rai y veih ei.
36 A cha pachu thei nawpa ei ta, avâ tawhta a ao cha, cha patheisa ei ta; alei chô liana heta amei cha cha pahmôsa ei ta, mei tawhta a bie cha thei eichi ta.
37 Nama mahpawzy kyh a pachâpa vâta ama hnôh lâta ama pathlazy cha châ tlyh ei ta, ano a hlaopa ta a hmotao theina rôhnah ngaitapa ta pho hropa nama hlâta a rôhnahpa nata hmo a tao thei viapa cha papua pa ei ta,
38 ama râh cha to awpa ta cha pangiasa awpa ta Izi râh tawhtapa cha cha chhihtha ei ta, atahmâ ta nama châpa hawhna heta;
39 chavâta atahmâ he nama pathipalôh liata a vao ula, a chô lâ avâ liata nata a ry lâ alei liana heta, ABEIPA cha Khazohpa a châ tahpa pahno teh u; a hropa rai y veih ei.
40 Chhâzaw châta ABEIPA nama Khazohpa ta a cha piepa râh liana chata nâmo nata nama pathlazy châta a pha awpa nata bohpi nama pahrâ thei nawpa ta a ryhpazy nata a biepiepazy atahmâ ta ei cha piepa ei he, nama zyh awpa a châ,” tahpa hih.
Zawdâh nochhi lâ a bohna khihpizy
41 Chatawhcha Mawsi chata lianycheihtuhpa, a vaih, cha hlâ chhaota â hao leipa a thie pathleituhpa
42 abohna châta Zawdâh haosâ nochhi lâchhâh ta khih mia thôh rao ta, cha khihzy a kheihawhpa liata rai â râ khiahtala a boh aw ta;
43 chazy cha Rubena sahlao chata râhpathohpa liata tlâh bypa liata Beza zy, Kada sahlao châta Kilia liata Ramo zy, Manase sahlao châta Basana o liata Kôla zy châ ta.
Ryhpa tao pathina biehmia tahpa
44 He he Mawsi ta Izarel pathlazy ryhpa a piepa cha a châ;
45 hezy he Izi râh tawhtapa ama pua nota, Izarel pathlazy hnohta Mawsi ta Zawdâh haosâ liata Mawsi nata Izarel pathlazy ta Izi râh tawhta ama vaw pua nota
46 ama thiepa Hesbaw liata a ypa Amawna mo beipa Sihaw râh liata Bepeôr dady saikao liata a reipa pahnosanazy, ryhpazy. pachianazy a châ.
47 A râh nata Basana beipa Ôka râh Zawdâh haosâ nohchhina lâta Amawri mo beipa pano râh cha pahrâ ei ta;
48 Arnaw saikao kiah liata Arôera tawhta Sirio Tlâh (Hamaw ama tah hrapa) taih nahta,
49 Zawdâh haosâ nochhi lâchhâh Arabah zydua Piska tlâh ry liata Arabah Tilaipi taihta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |