Lianycheihpa pahno leina kyh paryhna
1 ABEIPA nama Khazohpa ta hnei awpa ta a cha piepa râh liana heta lyurâhpa liata chyhsa thiepa ta vaw y sala, a thietuhpa pahnopa châ tlôh leipa sala,
2 nama machâzy nata nama ryureituhpa zy a vy aw ei ta, ama thiena chheipâh liata khih tawhna chata thlie aw ei ta;
3 chatawhcha a ri tawhta khih a hnia chaipa, cha khih machâzy chata viahchao hri hry liata viahchao zeinô hmâ mâh leipa, raopaky paky mâh leipa, a chhi aw ei ta.
4 Cha khih machâzy chata viahchao zeinô cha ti lona, alei palie mâh leipa nata khâpahmah chichei mâh leina saikao lâta a chhi aw ei ta, saikao liana chata viahchao zeinô rao cha tai aw ei ta.
5 Chatawhcha Livai sawchapawpa theihthaipazy cha a vy aw ei ta, âmo cha ABEIPA nama Khazohpa ta ano a chakaotuhpa nata ABEIPA moh ta byhnâ a awtuhpa chata a raopa zy châ tlôh ei ta, biepeipa nata atuna kyh cha ama pachiana zie hawhta a châ aw.
6 Chatawhcha ri a hnia chaipa khih machâ zydua chata saikao liata viahchao zeinô rao ama âpa chô liana chata ama ku a si aw ei ta;
7 ‘Eima ku ta he thisaih he palo leipa ta, eima mo ta hmô hra vei.
8 Hy ABEIPA y, na chatlaipa râh chyhsa Izarel sahlaozy he, a ngiahthai la, na chyhsa Izarel sahlaozy hry liana heta mosiapa thisaih palona he a y awpa ta pasai khah y,’ tah aw ei ta, ama reih awpa a châ; chatanachata thisaih kyh liana chata angiahthaipa ama châ aw.
9 Chatanachata ABEIPA mohmô liata hmo phapa taopa ta mosiapa thisaih palona cha nama papai awpa a châ.
Adyuhna liata chanô ama patupa mohôhzie
10 Nama khakhaipa zy hrao awpa ta nama sie nahta, ABEIPA nama Khazohpa ta nama ku liata a cha pie nahta, sei ta a chhipa ta,
11 sei hry liata chanô liata chanô hmi pha ngaitapa, nama kho kawpa, lahpinô châta nama kho kawpa nama hmô khiahtala,
12 nama o lâta a chhi aw eichi ta, ama luh a ngyu aw ei ta, ama patoh tai aw ei ta.
13 Ama sei viahpakao pahluh aw ei ta, nama o liata y aw ei ta, thla kha tlai ama nô nata ama paw mâchhiesa aw ei ta; cha hnôh lâna chata hnei aw eichi ta, ama vahpa châ aw eichi ta, nama lahpinô ama châ aw.
14 Chatawhcha nama palôh a pahâh vei khiahtala ama khona lâta ama sie awpa nama pasaih awpa a châ; sôh nata piah lâta nama zuah awpa châ leipa ta, sei hawhta nama tao awpa châ vei, ama moh pachhie haw tlôh eichi ta.
Pih tuapa châta ryhpa
15 Chyhsa ta lahpinô pano hnei sala, pakha cha khohpa ta pakha cha a hao sala, a khopa nata a haopa chata saw sapa rairieh ei sala, chatawhcha sawchapaw uhthei chaipa cha a haopa saw châ sala,
16 a ryu hneipa cha a sawchapawpa zy a pakhysa tina chata a khopa sawchapawpa cha a sawchapawpa uhtheipa a haopa saw hlâta uhtheipa ta a tao awpa châ leipa ta,
17 a haopa saw, a saw uhthei chaipa a hneipa zydua liata tovyuh su no a topa ta a tao awpa a châ, a thatlôna thabypa châ ta; saw tuapa châna cha ano eih a châ.
Saw chhorupa
18 Chyhsa ta sawchapawpa chhoru ngaitapa aty hmâh ngaitapa hnei sala, a nô nata a paw bie a ngiah leipa ta ama chhoreina a pyh khoh leipa sala,
19 a nô nata a paw chata a chhi aw ei ta, ama khih machâzy hnohta ama khih kuh chhikao thaby lâta amâ chhi awpa a châ.
20 Chatawhcha ama khih machâzy hnohna chata, ‘He he ta eima bie rai a ngiah khoh leipa ta, rihkawhpa nata sahhma pari a hmâhpa a châ,’ ama tah awpa a châ.
21 Chatanachata khih liata chyhsa zydua chata alô ta ama vawh sao awpa a châ; cha hawhna chata nama hry tawhtapa cha hmo pha leipa cha nama pahlei awpa a châ; Izarel mo zydua ta thei aw ei ta, ama chi aw.
Ryhpa nanopa zy
22 Chyhsa ta thina taihta moleina taopa ta, thiepa a châ nahta tho liata nama bangie khiahtala,
23 a ri cha tho liana chata azozâkhidei ta a y awpa châ leipa ta, cha noh liana tlai nama pabu awpa a châ; tho liata bangiepa maih cha Khazohpa chhiesapa châ tlôh ta; ABEIPA nama Khazohpa ta hnei awpa ta a cha piepa, nama râh cha nama papua lei nawpa ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |