Izarel ta Basana beipa Ôka a pahnie
1 Chatanachata a pasie pi ta, Basana lâpi liata khy pi ta; Basana beipa Ôka nata a chyhsa zydua cha Edrei liata maniah adyuh awpa ta vaw pua ei ta.
2 ABEIPA ta ei hnohta, ‘Ano cha chi khâ; ano nata a chyhsa zydua nata a râh cha na ku liata ei cha pie haw; Hesbaw liata a ypa Amawri mo beipa Sihaw chô liata na taopa hawhna khata a chô liata na tao aw,’ tah ta.
3 Chatanachata ABEIPA eima Khazohpa chata Basana beipa Ôka chhao a chyhsa zydua chhaota, eima ku liata pie haw ta; pakha hmahta pahlôh leipa ta thie khai haw pi ta.
4 Cha nona chata a khih zydua cha la khai pi ta, eima lapa leipa khih miakha hmah y vei.
5 He khih zydua he kuh a sâh ngaitapa, ochhi nata hraina a hneipa sai châ ta, kuh a hnei leipa khih hluhpi rei leipa chhaota.
6 Hesbaw beipa Sihaw chô liata eima taopa hawhna khata pahleipadia khai pi ta, khih liata chyhsa zydua cha pahleipadia khai pi ta, chanô nata ama sawnawh chyhpa ta zy chhao taih.
7 Anodeikuacha sahroh zydua nata khih liata hraona ta eima lapa hmozy cha eima châta la pi ta.
8 Cha nona chata Zawdâh haosâ liata a ypa Amawri mo beipa pano ku tawhtapa cha Arnaw saikao tawhta Hamaw lâ taihta râh cha la pi ta,
9 (cha Hamaw cha Sidawna mo chata Siriô tah ei ta, Amawri mo chata Seni ama tah),
10 bypi râh khih zydua nata Kilia râh zydua nata Basana râh zydua chhaota, Basana râh liata Ôka râh khih Saleka nata Edrei taihta.
11 (Basana beipa Ôka deita Rephai mo hry liata a ypa cha a châ; a rakhô cha thua châ ta; Amawna pathlazy khih Rabatha liana chata y thlâh ha vei mâ? Chyhsapa dy ta thliepa ta a doh lâ dy chaki, a hâ lâ dy palih châ ta).
Rubena, Kada nata Manase pho khophie cha Zawdâh nochhi lâ ama pahrâ(Mar 32: 1-42)
12 Cha nona chata cha râh cha pahrâ pi ta, Arnaw saikao kiapâh liata Arôera tawhta Kilia tlâh râh khophie taihta, cha liata khih a ypazy chhaota Rubena sahlao nata Kada sahlao pie na ta;
13 Kilia râh a ypa nata Ôka râh Basana zydua cha Manase pho khophiezy pie na ta, Arkawba râh zydua nata Basana râh zydua cha. (He he Rephai mo râh ama tah tyh hra.
14 Manase sawchapawpa Zaira chata Arkawba râh zydua nata Kesuri mo nata Makathai mo râh taihta la ta, chazy cha Basana cha ano moh bi hnâpa ta Havôzaira tah ta, atahmâ taihta ama tah thlâh haw).
15 Kilia cha Makira pie na ta.
16 Rubena sahlao nata Kada sahlao cha Kilia tawhta Arnaw saikao liahliah taihta ama râh châta pie na ta Amawna pathla sahlao râhri Zabaw chavah taihta;
17 Arabah nata Zawdâh chhao râhri châta Chinere tawhta Piska chho lâchhâh baikhaihpa ry liata Tilaipi Iahpa Arabah tilaipi taihta.
18 Cha nona chata, ‘ABEIPA nama Khazohpa ta he râh he nama hnei awpa ta a cha pie ei; Izarel pathla nama unawhpazy hmiakô liata nama chyhsa riahphapa zydua zy cha chariah chhaichhi a tobipa ta sie hra ei se.
19 Anodeikuacha nâmo hawhta nama unawhpazy cha ABEIPA ta thlahlôhpa ta a tao hlâ heih nahta, ABEIPA nama Khazohpa ta Zawdâh haosâ liata a piepa cha ama pahrâ hlâ lei cha,
20 nama lahpinôzy nata nama sawnawh chyhpata zy nata nama sahrohzy cha (sahroh nama hnei tahpa pahno na ta) nama khih ei cha pie hawpa liana heta vaw y ei sala; nama châ chyu awpa ta ei cha piepa liana heta namâ vaw di heih aw,’ tahpa ta bie cha pie ei na ta.
21 Cha nona hra chata Zawsua cha bie pie na ta, ‘ABEIPA nama Khazohpa ta cha abeizy pano chô liata hmo a taopa zydua cha na mo ta hmô khai ta; cha hawhna tlai hra chata nâ ngiana awpa râh zydua, cha liata ABEIPA ta a tao aw.
22 Âmo cha chi aw veih ei chi; châ dyuhkheituhpa cha ABEIPA nama Khazohpa châ tlôh ta,’ tahpa ta.
Mawsi cha Kana râh a ngia awpa ta pasaipa châ vei
23 “Cha no lilaw chata,
24 ‘Hy ABEIPA Khazohpa y, na chakaotuhpa hnohna heta na rôhnahzie nata na ku thatlô ngaitapa cha na paluahsa pathaopa châ ta; avâ liata tlyma, alei liata tlyma heta na hmotaopa hawhpa nata na hmotaopa rôhnah ngaitapa hawhta a tao theipa khazoh he ahy e a y?
25 Na pasiesa la, Zawdâh haosâ lâ râh pha ngaitapa, cha tlâh a ngia ngaitapa nata Lebanaw cha na pahmôsa tua,’ tahpa ta ABEIPA cha a haw chaih mâh na ta.
26 Châhrasala nâmo vâta ei chô liata ABEIPA cha a pathi-ia ta, ei bie a pyh leipa ta; ABEIPA chata, ‘Â daih bâ se; he kyh liana heta na chho khao khâ.
27 Piska tlâh laki lâ kiah la, notla lâ zy, maw lâ zy, chho lâ zy, nochhi lâ zy, mohmia pasaih la, sai teh; Zawdâh he chaka aw va chi.
28 Anodeikuacha Zawsua he bie pie la, a phapa ta pasyu la, thapatlô teh; he zawpizy he chhihtha aw ta, na kaw hmô awpa râh cha a patosa aw,’ na tah ta.
29 Chatanachata Bepeôr ria-aipa saikao liana chata eima y hawpa kha.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | Bo 32 | Bo 33 | Bo 34 |