Mara Holy Bible: 1 Samuel

Showing posts with label 1 Samuel. Show all posts

1 Samuel Bo 1

Samuel pina

1 Ephrai tlâh râh Ramathai-zôphi khih liana chata chyhsa pakha y ta, a moh cha Elkanah châ ta, cha chyhsa cha Zerôha sawchapawpa châ ta, cha cha Elihu sawchapawpa châ ta, cha cha Tohu sawchapawpa châ ta, cha cha Ephrai chyhsa Zupha sawchapawpa a châ.

2 Ano cha lahpinô pano hnei ta a pakhapa moh cha Hanah châ ta, pakhapa moh cha Peninah a châ. Peninah chata sawzy hnei ta, Hanah deikua chata saw hnei leipa ta.

3 Cha chyhsa cha ama khih tawhta Shiloh khih liata Pheisaihzy ABEIPA a chhy awpa nata atheih awpa ta kô chareih sie tyh ta, cha liana chata Eli sawchapawpa pano Hôphani nata Phineha, ABEIPA theihthaipa zy y ei ta.

4 Elkanah atheihna noh a vaw tlô nahta, a lahpinô Peninah nata a sawchapaw zy nata a sawchanô zydua cha tovyuh taopa ta;

5 Hanah cha tovyuh miano tao pa ta, Hanah cha a kyh pachâ ngaita tlôh ta, châhrasala ABEIPA ta a chhi khaw ta.

6 ABEIPA ta a chhi a khawpa vâta a pachâ parôhsa a chhuahpa ta pakha nô chata eilaw tyh ta.

7 Cha hawhta kô chareih a taopa vâta ABEIPA o lâ a siena maihta a pachârôhna pacha cha rôh tyh ta. Chatanachata thata cha ta, pati chhao nie leipa ta.

8 A vahpa Elkanah chata a hnohta, “Hanah y, khazia na cha? Khazia pati na nie vei? Khazia na pachâ a rôh? Sawchapawpa pahrawh hlâta na châta pha via va na ma?” tah ta.

9 Shilôh khih liata pati niepa ta ama do khai nahta Hanah cha thyu ta. Theihthaipa Eli cha ABEIPA achhyna-o chhikao tô thaby liata a tyuna liana chata a tyuh ta.

10 Hanah cha a palôhrupa nôpo ngaita ta ABEIPA lâta thlahchhâ ta, palôh pasa ngaitapa ta cha ta.

11 Chatawhcha bie a taih ta, “Hy Pheisaih zy ABEIPA y, na seichanônô nawhna zie he na pahnokhei ngaita chi ta, nâ thei thlâh ha chi ta, na seichanônô he na my leipa chi ta, na seichanônô he sawchapawpa na pie khiahtala a hro chhôh zydua ta ABEIPA pie lilaw aw na ta, a luh chhao ngyupa châ aw vei, tah ta.

12 ABEIPA hmiakô liata thlah a chhâ ngâ nona chata Eli chata a hmao papiepa cha vaw ngia ta.

13 Hanah chata a palôhrupa ta reih ta; a hmao deita ta papie ta, a ao cha theipa châ leipa ta; Eli chata sahhma a paripa a châpa ta pangiasa ta.

14 Eli chata a hnohta, Khachâ ma paripa ta na y aw tly? Na kresawti cha soh teh, tah ta.

15 Hanah chata, Pari va na, ei beipa y, chanô palôhrupa pachârôh chhâna châ na ta; kresawti chhao, sahhma chhao doh leipa na ta, ABEIPA hmiakô liata ei palôhrupa tlao ei palâhâh.

16 Na seichanônô he chanô moleipa ta bai chachei ta khâ, ei palôhrupa liata a bie pakhopa, ei palôh châ leina nata ei pachârôhna ei reih hih, tahpa ta a chhy ta.

17 Eli chata, Palôhtlâhpa ta sie teh, Izarel zy Khazohpa chata na hmo hiapa cha cha pie mawh sy, tahpa ta a chhy ta.

18 Ano chata, Na seichanônô heta na modypa ta y mawh sy, tah ta. Chatanachata chanô cha sie ha ta, pati zy nie ta, pachârôhna hmia phaoh khao leipa ta.

19 Mydi ta thyu ei ta, ABEIPA cha achhy ei ta; kua ei ta, Ramah khih lâta ama o cha tlô haw heih ei ta. Elkanah chata a lahpinô Hanah cha a zialâh ta, ABEIPA chata ano cha a thei thlâh ha ta;

20 Hanah cha saw phaoh ta; chatawhcha a daihti a vaw tlô nahta sawchapaw sa ta, ABEIPA ei hiapa a châ, tahpa ta a moh Samuel bi ta.

21 Elkanah nata a chhôhkha zydua cha ABEIPA lâta kô chareih ta amâ theihna cha hlâ awpa nata a bietai patlô awpa ta khy ei ta.

22 Hanah deikua cha khy hra leipa ta, a vahpa hnohna chata, Keima cha hawsaih ta sâhpi pazy a bâh hlâ lei cha a khy aw vana, cha tawhna chata ABEIPA hmiakô liata â luah thei nawpa ta a chhi aw na ta, cha liana chata a y ngâthlâh ha aw, tah ta.

23 A vahpa Elkanah chata a hnohta, A pha na tahpa maih tao teh, a sâhpi pazy na pabâsana taihta y teh; ABEIPA chata a bie cha pa-i tlai mawh sy, tah ta. Chatanachata a sâhpi a pazypa bâ hlâ lei cha chanô cha y haw ta, a sawchapawpa cha sâhpi pazysa ta.

24 Sâhpi pazypa a pabâsa nahta, viahdie ephah miakha nata kresawti chhihrô-ô kha cheipa ta, viahchao tôhpa pô thôh chhao a chhi ta; Shilôh khih liata ABEIPA o lâna chata siekhei ta; hawti cha hawti kaw ta.

25 Viahchao tôhpa cha thie ei ta, hawti cha Eli lâta a chhi ei ta.

26 Ano chata, Hy ei beipa y! Na hrona reipa ta ei reih, kei cha ei beipa y, he su liata na kiapâh liata a duahpa ta ABEIPA lâta thlah a chhâtuhpa chanô kha châ na ta.

27 He hawti hiapa ta thlahchhâ na ta; ABEIPA chata ei hiapa cha na pie haw ta.

28 Chavâta kei chhaota ABEIPA lâta ei hlâ; a hro chhôhta ABEIPA châta hlapa a châ, tah ta. Cha liana chata ABEIPA cha a chhy ei ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 2

Hanah hla

1 Hanah chata thlahchhâ ta, reih ta, ABEIPA chôta ei pathipalôh aly ngaita ta; ei tha cha ABEIPA liata palyupalihpa ta a y. Ei khakhaipa zy chôta ei pakah pakawhpa ta y ta, na pachhana liata ei ly ngaita vâta.

2 ABEIPA hawhta pathaihpa y veih ei, nâma hawhpa rai y veih ei; eima Khazohpa hawhpa lôpanô rai y hra vei.

3 Cha tlatlu ta a palaipa ta bie reih kha u la, nama pakah tawhta sâlâna bie rai pua kha se; ABEIPA cha sona Khazohpa châ tlôh ta, ano ta hmotaopa zy a siapa ta kho a pathliah tyh.

4 Chyhsa thatlôpa libaw zy thlie ta, a chapiapa zy chai cha thatlôna ta saipa ta y ta.

5 Rihbie tyhpa zy cha niepa tlua awpa ta hlao ei ta, nodi tyhpa zy cha amâ pahâ haw. Saw leipa chata pasari a sa haw,saw hluhpi a hneipa nô cha thazeipa ta a y.

6 ABEIPA chata thie tyh ta, a pahro tyh hra; thla lâ pazusa tyh ta, a kaw chhi tyh.

7 ABEIPA chata si pasasa tyh ta, a pahneirôhsa tyh hra; panawhsa tyh ta, a pasasa tyh hra.

8 Dolei tawhtapa sipasapa cha pathyu tyh ta, dyhchhiepa cha buhchado tawhta a chalo tyh, Abei sawzy hnohta paysa thei ta, rôhnahna abeidyuchhai ama to thei nawpa ta. Leilô bôna cha ABEIPA eih châ ta, khizaw cha a chô liata pahnie haw tlôh ta.

9 A mopathaihpa zy phei cha vaih aw ta; moleipazy deikua cha zohna hry liata chalihsapa ta ama y aw; thatlôna chata ahyhmah ta ngâ tlôh leipa aw ei ta.

10 ABEIPA a dyuhtuhpa zy cha ama zaokhai aw; avâ tawhta tôkalôpa ta a dyuh aw ta. ABEIPA ta kaoki taihta pachia aw ta; a beipa cha thatlôna pie aw ta, a sathaw thupa ki cha a palyupalih aw, tah ta.

11 Chatanachata Elkanah cha Ramah khih liata a o lâna chata a di haw ta. Hawtipa chata theihthaipa Eli hmiakô liata ABEIPA chakao ta.

Eli chhôhkha vâchhiena chho chhieliena

12 Eli sawchapawpa zy cha molei ngaitapa châ ei ta, ABEIPA cha pahno leipa ei ta.

13 Zawpi zy liata theihthaipa zy taonazie cha chyhsa ta atheihna ama vaw hlâ nahta sa chho hai nota, theihthaipa chakaotuhpa he sa thaona thuaku, pazaohpa miathôh a hneipa chabapa ta a vy tyh ta,

14 bei pakah kawhpa tlyma, keli tlyma, ukâ tlyma, beih tlyma chhôh cha za dy ta; cha sa thaona pazaohpa ta a thaopa zydua cha theihthaipa ta la tyh ta. Cha hawhna chata Izarel chyhsa cha liata a vypa zydua tawhtapa cha Shilôh khih liata vaw tao pa tyh ei ta.

15 Cha tawhna hra chata a thaw cha ama rao hlâta theihthaipa chakaotuhpa cha a vy ta, atheihpa hnohna cha ta, Theihthaipa châta rao awpa sa na pie teh; na sa chhopa cha khoh leipa ta, a heipa a khoh,” tah tyh ta.

16 Chyhsa chata a hnohta, A thaw cha rao tua sala, cha khai tawhna chata na khona zie ta na la aw, ama vaw tah nahta ano chata, Châ vei, thlai eina pie awpa chi na a châ. Eina pie vei chi khiahtala tha chahra ta ei la aw, tah tyh ta.

17 Satliapa zy moleina cha ABEIPA mohmô ta thata châ ta, chyhsa zy chata ABEIPA lâta atheihna hlâpa zy cha khâpahrao leipa ta rei pa tlô ei ta.

18 Samuel cha hawtipa hmahta châ sala lini theihthaipa viahpakao a ky ta ABEIPA hmiakô liata chakao ta.

19 Cha leipa chhao cha a no ta viahpakao pasihpa ta bie pa ta a kô chareih atheihna hlâ awpa ta a vahpa hnohta a sie nota, kô chareih a phao pa tyh.

20 Eli chata Elkanah nata a lahpinô cha byhnâ awpa ta, ABEIPA chata nama hmohlâpa, nama hlapa he, he chanô pathla heta ABEIPA ta cha thô ei se, tah ta; chatanachata ama o lâ a di haw ei ta.

21 ABEIPA chata Hanah cha vaw tly ta, saw phaoh ta, sawchapaw pathôh nata sawchanô pano sa ta. Cha chhôhna chata hawti Samuel cha ABEIPA hmiakô liana chata vaw laiseih haw ta.

22 Eli cha machâ kaw ha ta, Izarel chyhsa zydua chô liata a sawzy hmotaopa zydua nata achhyna poh-o chhikao kiapâh liata chakaotuhpa chanô zy amâ ziakhei tyhpa kyh zy vaw thei ta.

23 Chatanachata ama hnohta, Khazia he hawhpa hmo nama tao tly? He chyhsa zydua tawhna heta nama hmotaopa pha leipa ei thei.

24 Châ vei, ei sawchapaw zy saih u, nama thâtih ei theipa cha, a pha leina lâ sai a châ, ABEIPA chyhsa zy cha hmo nama paraosa.

25 Chyhsa pakha mo hropa chô liata a molei khiahtala Khazohpa ta pachia pa aw ta; anodeikuacha chyhsa ABEIPA chô liata a molei khiahtala ahy e a hawkhei aw? tah ta. Cha chôna chhao chata ama paw bie cha angiah khoh leipa ei ta; ABEIPA chata âmo cha thie tlai tlôh aw ta.

26 Hawti Samuel cha laiseih rili ta, Khazohpa nata chyhsapa khona zie ta y ta.

27 Eli lâna chata Khazohpa chyhsa pakha a vy ta, a hnohta, “ABEIPA chata he tana heta a tah, ‘Izi râh liata Phirao sei ta, nama y nona khata nama pathlatuhpa zy hnohta a luah va na ma?

28 Izarel pho zydua hry tawhtapa ei maisâh lâ a vypa ta rohpahâhpa raopa ta, ei hmiakô liata theihthaipa viah pakao a kyh awpa ta ei theihthaipa chata ano cha rao va na mâ? Na pathlatuhpa zy cha Izarel chyhsa zy raopa hlâna zydua pie va na ma?

29 Khâpa vâta e, ei yna liata hlâ awpa ta ei raopa, kei lâta atheihna nata kei vyuh châta hmohlâpa cha tly pâpa ta, keima vyuhpa ta na sawzy palyupalih viapa ta nâmo a pathaw nawpa ta ei chyhsa Izarel zy atheihna a phapa maih nama hmâh?’ tahpa ta.

30 Chavâta ABEIPA Izarel zy Khazohpa chata, ‘Kei châta na chhôhkha zy nata na paw chhôhkha zy cha chhâzaw ta ei hmiakô liata nama y aw,’ tah tlai na ta, tah ta. Châhrasala atahmâ he ABEIPA chata, ‘Y chachei ta aw veih eichi, na palyupalihpa maih cha palyupalih aw na ta, na mohnaopa maih cha khâpasawta reih tlôh leipa aw na ta.

31 Na bâhzy na paw chhôhkhapa bâh zy ei taina noh cha a vaw tlô aw, na o liata pakhu kâhbipa ta a hropa rai y aw veih ei.

32 Izarel chyhsa zy Khazohpa ta hneirôhna a pie tina chata nâmo ta rietheina chôta uavapa ta moh aw eichi ta; na o liata chhâzaw ta pakhu kâhbiepa ta a hrohpa rai y aw veih ei.

33 Na chyhsa ei maisâh tawhtapa ei pahlei lei awpa cha na moh, cha paba awpa nata na palôhrupa pachâ châ parôhsa awpa châ aw ta; na o liata a pihpa maih cha amâ khoh locho ta ama thi lymâ aw.

34 He he na sawchapaw pano, Hôphani nata Phineha chô liata hmo a vaw tlô awpa cha na châta pahnona a châ aw; noh kha ta ama pano ta ama thi rairieh aw.

35 Theihthaipa ngâchhih ngaitapa ei châta padua pathi aw na ta, cha chata ei pathipalôh nata ei palôhrupa ryhna zie ta tao aw ta; chhôhkha a i ngaitapa ta padua aw na ta, chhâzaw ta ei sathaw thupa hmiakô liana chata a y aw.

36 Na o liata a ypa zydua cha tâkâ nata viahchhâ hiapa ta sie aw ei ta, a naoh aw ei ta, Viahchhâ a chyhta chhâ niepa ei hmô thei nawpa ta theihthaipa raihria kheihawhpa ma na pahriasa mah y, ama tah aw,’ a tah, tah ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 3

Abeipa ta Samuel a awna

1 Chatawhcha hawti Samuel chata Eli hmiakô liata ABEIPA chakao ta. Cha nona chata ABEIPA bie cha sôh ngaita ta; a lâ hâh ta aluana zy y leipa ta.

2 Cha nona chata Eli cha ano yna liata â zia no ta, a mo zoh pâ ha ta, a pavâhpa hmô thei kaw khao leipa ta;

3 Khazohpa meiôh chhao a thi mâh hlâta, Khazohpa Byh yna ABEIPA achhyna-o liata Samuel cha a zia ta.

4 ABEIPA ta, “Samuel; Samuel!” tahpa ta aw ta, ano chata, “He liata ei y,” tah ta,

5 Eli lâta a kei râ ta, a hnohta, “He liata ei y, na aw chi ta,” tah ta. Eli chata, “Cha aw va na; va zia heih teh,” tah ta. Chatanachata vawh ta, a kei zia ha heih ta.

6 ABEIPA chata “Samuel!” tahpa ta aw heih ta, Samuel cha thyu ta, Eli lâna chata vawh ta, “He liata ei y, na aw chi ta,” tah ta. Ano chata a chhy ta, “Cha aw va na, ei sawchapawpa y; vâ zia ha heih teh,” tah ta.

7 Cha nona chata Samuel chata ABEIPA cha pahno mâh leipa ta, ABEIPA bie ano liata phuahpa châ mâh hra leipa ta.

8 ABEIPA chata Samuel cha a ei thôhna ta a aw heih nona chata thyu ta, Eli lâna chata vawh ta, “He liata ei y, na aw chi ta,” tah ta. Chatawhcha Eli chata hawti cha ABEIPA ta a aw tahpa pahno haw ta.

9 Chavâta Eli chata Samuel hnohta, “Vawh la, a kei zia ha heih la; a cha aw heih khiahtala, ‘ABEIPA y, bie reih teh, cha chakaotuhpa ta a nahthlie na,’ tah la vâ chi,” tah ta. Samuel cha a yna lâna chata a kei zia ha hei ta.

10 ABEIPA cha a vy ta, a vaw duah ta, hmia lâta a awpa hawhna chata, “Samuel, Samuel!” tahpa ta aw heih ta. Samuel chata, “Bie reih teh, na chakaotuhpa ta a nahthlie na,” tah ta.

11 ABEIPA ta Samuel hnohta, “Izarel râh liana heta a theipa maihta nah karâ no khai ngaitapa ta hmo ei tao aw.

12 Cha noh liana chata chhôhkha kyh ei reipa zydua cha a thaby tawhta a chhâna taihta Eli chô liata ei tao aw.

13 A sawzy ta Khazohpa ama reipachhiena moleipa cha a pahno thlâh hapa chhaota, a pakhâ leipa vâta a chhôhkha cha chhâzaw châta ei pachia aw tahpa chho haw tlôh na ta.

14 Chavâta Eli chhôhkha hnohna chata Eli chhôhkha zy paraona cha atheihna ta tlyma, hmohlâpa ta tlyma, khatita hmahta papai theipa châ aw vei, tahpa ta chhie ei sa haw,” tah ta.

15 Samuel cha my taihta a mô ta; ABEIPA o ochhi zy cha pahy ta. Samuel chata cha aluahna cha Eli pahnosa awpa chi ta.

16 Châhrasala Eli chata Samuel cha aw ta, “Samuel, ei saw y,” tah ta. Ano chata, “He liata ei y,” tah ta.

17 Eli chata, “Khâpa hmo e ABEIPA ta na hnohta a reih? Keima liata khâpahmah phih kha y. Na hnohta a reipa zydua cha kei liata phihpa na hnei khiahtala na chô liata Khazohpa ta a taona zie hawhta tao sala, cha hlâta a hluh via chhaota,” tah ta.

18 Samuel chata ato chho khai ta, ano liata khâpahmah phih leipa ta. Eli chata, “ABEIPA a châ mâ tâh, a pha a tahna zie lymâ hawhta tao mawh sy,” tah ta.

19 Samuel cha vaw laiseih rili ta, a hnohta ABEIPA y lymâ ta, a bie cha leilô liata pahlei leipa ta.

20 Dana tawhta Besheba taihta Izarel chyhsa zydua chata Samuel cha ABEIPA hrohsopa châta pa-ipa a châ tahpa pahno haw ei ta.

21 ABEIPA cha Shilôh liana chata a luah heih ta; ABEIPA cha bie ta Samuel lâna chata Shilôh liata a luah tlôh ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 4

1 Chatawhcha Samuel bie cha Izarel mo zydua hry liata pathâh ta.

Philistina mo ta Khazohpa Byh ama la

Izarel mozy cha Philistina mozy adyuh awpa ta pua ei ta; Ebeneza kiapâh liata yna su tao ei ta, Philistina mozy chata Aphe liata yna su tao ei ta.

2 Philistina mozy cha Izarel mozy a byhkhâh awpa ta a parai ei ta, chatawhcha amâ dyuh nata Philistina mozy hmiakô liana chata Izarel mozy cha nawh haw ei ta, adyuhna su liana chata pheisaih sâh palih thie ei ta.

3 Pheisaizy amâ riena su lâta ama vawh nata, Izarel machâ zy chata, “Khâpa vâta ma atanoh he Philistina mozy hmiakô liata ABEIPA ta maniah a panawh vâ i? Eima hnohta ypa ta eima khakhaipa zy ku tawhtapa maniah pachha awpa ta Shilôh tawhtapa ABEIPA Biehraina Byh cha la ei suh u,” tah ei ta.

4 Chatanachata zawpi zy chata Shilôh lâta chyhsa tuah ei ta, cha tawhtapa cha cherubi chô liata atyuhpa Pheisaih zy ABEIPA Biehraina Byh cha kei la haw ei ta; Khazohpa Biehraina Byh ama lana liana chata Eli sawchapawpa pano Hôphani nata Phineha a hlao hra ei ta.

5 ABEIPA Biehraina Byh amâ riena su a vaw tlô nata, Izarel mo zydua cha thata awh ei ta, alei taih chhao a chalyu ta.

6 Philistina mozy ta ama awh pa pyu ama thei nahta, “Hebrai mo riehmo liata awh na pyu a paro ngâpa cha kheihtazie ta tlyma?” tah ei ta. Amâ riehmo liata ABEIPA Byh a vaw tlô tahpa pahno haw na ta,

7 Philistina mozy chata chi ei ta, “Riehmo lâta khazoh a vy haw chu,” tah ei ta. “Eima hu a po na! Cha hlâta cha hawhpa y beih tlôh lei khâh ta.

8 Eima hu a po na! Cha khazoh zy ku thatlô ngaitapa tawhtapa cha ahy e maniah a pachha aw? Cha khazoh zy cha Izi mozy râhpathohpa liata hri tota a thietuhpa kha a châ.

9 Hy, nâmo Philistina mozy saih u, nama chakaotuhpa ta ama ypa hawhna khata Hebrai mozy chakaotuhpa ta nama y lei nawpa ta thatlô ngaitapa ta y ula, riahpha ngaitapa ta y teh u; riahphapa ta y ula adyuh lymâ teh u,” tah ei ta.

10 Philistina mo chata adyuh ei ta, Izarel mozy cha nawh ei ta, ama poh-o chyu lâta a râ khai ei ta; thata thie ei ta, Izarel mo hry liata pheisaih thy thôh ama thi.

11 Khazohpa Byh cha lapa ei ta; Eli sawchapawpa pano Hôphani nata Phineha cha thi hra ei ta.

12 Pheisai hry liata Benzami pathla chyhsa pakha a râ ta, a poh zy a hriepa ta a luh alei a hlaopa ta cha noh liana chata Shilôh kei tlô ta.

13 A kei tlô nahta? Eli chata lâpi kiah liata a tyuna liata a tyuhpa ta vaw sai thlâh ha ta, Khazohpa Byh vâna khata a palôhrupa ta a chalyu ngâ ta. Cha chyhsa chata khih tlôpa ta thâtih a reih nata a khihpi dua ta thata sâh ei ta.

14 Eli ta ama sâpa pyu cha a thei nahta, “Cha paro ngâpa cha kheihta zie ta tlyma?” tah ta. Cha chyhsa cha a parah ngaitapa ta sie ta, Eli cha kei chho ta.

15 Eli cha kô sychaki nata kô chariepa châ ta, a mo zoh ha ta, a pavâhpa hmô thei khao leipa ta.

16 Chyhsa chata Eli hnohta, “Pheisaih hry tawhta a vypa ei châ; atanoh he pheisaih hry tawhta a vaw râpa ei châ,” tah ta. Ano chata, “Ei sawchapawpa y, kheihawhta e hmo a y tly?” tah ta.

17 Thâtih a vaw tlôkheituhpa chata a chhy ta, “Izarel mozy Philistina mozy hmiakô liana chata a râpai ei ta, zawpizy hry liata a thiena thata y hra ta; na sawchapawpa pano, Hôphani nata Phineha chhao thi ei ta, Khazohpa Byh chhao ama la pâ haw,” tah ta.

18 Cha hawhta Khazohpa Byh kyh a rei pata nahta chhikao thaby liata dyuchhai tawhtapa cha a die lâta pao ta; a rao thlie ta, thi haw ta, ano he pawpi haw ta, a pahnie khao vei. Izarel chô liata kô sypalih ryurei haw ta.

19 A myuhnô Phineha lahpinô chata saw phaoh ta, a sana daihti a hnia haw ta. Khazohpa Byh ama lapa kyh thei ta, a parâhpa nata a vahpa ama thi tahpa a pahno nahta a bôh ta, saw sa haw ta; a pasapa chata vaw pachhai haw tlôh ta.

20 Thi daihmâpa ta y ta, a kiapâh liata a duahpa chanô zy chata a hnohta, “Chi khâ, sawchapaw na sa haw hih,” tah ei ta. Châhrasala a chhy leipa ta pachâ hra vei.

21 Rôhnahna chata Izarel cha a puasai haw!” tahpa ta hawti moh châta Ikhabaw bi ta, Khazohpa Byh cha la pa haw ei ta, a parâhpa nata a vahpa vâna chhao cha.

22 Ano chata, “Rôhnahna chata Izarel zy cha a puasai haw, Khazohpa Byh cha lapa haw tlôh ei ta,” tah ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 5

Philistina râh liata Khazohpa Byh a y

1 Philistina mozy chata Khazohpa Byh cha ama la na ta, Ebeneza tawhtapa cha Asadô khih lâta siekhei ei ta;

2 Philistina mozy chata Khazohpa Byh cha la ei ta, Dakaw achhyna-o liata angiakhei ei ta, Dakaw kiapâh liata soh ei ta.

3 Asadô liata chyhsa zy cha a mylâ my ta ama thyu nahta, ABEIPA Byh hmiakô liana chata Dakaw cha â khu lâta vaw pao thlâh ha ta. Dakaw cha la ei ta, a yna su liata soh heih ei ta.

4 A mylâ heihpa mydi ta ama thyu nahta, ABEIPA Byh hmiakô liana chata Dakaw a khu lâta vaw pao thlâh ha ta, Dakaw luh nata a ku pazah miano a tai pachhôpa cha chhikao thaby liata a vaw thy thlâh ha ta; Dakaw pôhpa deita cha vaw y thlâh ha ta.

5 Cha vâna chata Dakaw theihthaipa tlyma, Dakaw achhyna-o liata a vy tyhpa zy chhaota, Asadô liata Dakaw chhikao thaby cha atanoh taihta tly ngâh veih ei.

6 ABEIPA ku chata Asadô liata chyhsa zy cha vi ta, raona tlôkhei ta, Asadô nata a chheipâh zy cha kheihluh ta hrie ta.

7 Asadô liata chyhsa zy ta cha hawhpa cha a châ tahpa ama thei nahta, “Izarel Khazohpa Byh cha eima hnohta y khao khah se; eima chô nata eima khazoh Dakaw chô liata a tuna a pasa ngaita na,” tah ei ta.

8 Chatanachata Philistina abei zydua cha ama hnohta aw pakhy ei ta, “Izarel zy Khazohpa Byh cha kheihta e eima tao aw?” tah ei ta. Âmo chata, “Izarel zy Khazohpa Byh cha Katha khih lâta siekhei teh u,” tahpa ta a chhy ei ta. Izarel zy Khazohpa Byh cha cha lâna chata siekhei haw ei ta.

9 Cha hawhta ama siekhei nona chata ABEIPA ku chata khih cha thata patypamâ ta, khih liata chyhsa zy cha a lai a chyh ta hrie ta, kheihluh hri ama chô liata chareisa ta.

10 Khazohpa Byh cha Ekraw lâta pasiesa ei ta. Ekraw a kei tlô nahta Ekraw liata chyhsa zy cha, “Izarel zy Khazohpa Byh cha keimo nata eima chyhsa zy thie awpa ta keimo lâta ama vaw cheih haw,” tahpa ta awh chaimâh ei ta.

11 Chavâta Philistina abei zydua cha aw pakhy ei ta, “Izarel zy Khazohpa Byh he paliesa ula, keimo nata eima chyhsa zy maniah a thie lei nawpa ta a yna su parohpa lâta sie heih mawh sy,” tah ei ta. Khihpi liana chata thina taih atymâna y ta. Khazohpa ku chata cha khih cha vi tlôh ta;

12 a thi leipa zy cha kheihluh thla ei ta, cha khih awh pa pyu chata avâ tlô ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 6

Philistina mo ta Khazohpa Byh ama pakhâ

1 ABEIPA Byh cha Philistina mozy râh liana chata thla sari y ta.

2 Philistina mozy chata, “ABEIPA Byh cha kheihta e eima tao aw? A yna tyhpa lâta pasiesa heihna zie maniah chho teh u,” tahpa ta theihthaipa zy nata pachao thaipa zy aw ei ta.

3 Âmo chata, “Izarel zy Khazohpa Byh he nama pasiesa awpa khiahtala, a ruapa ta pasiesa cheita khah u, a hnohta paraona atheihna hlâ thlyu teh u. Chatanachata patlâpa ta y aw eichi ta, kheihta zie ta a ku cha a pasie leipa a châ tahpa nama pahno aw,” tah ei ta.

4 Âmo chata, “A hnohta eima hmoparaona atheihna hlâ awpa cha khâpa a châ aw?” tah ei ta. Âmo chata, “Philistina beipa hluhna zie hawhta ngôh kheihluh nohthlahpa miapangawh nata ngôh siahloh nohthlahpa miapangawh; nama zydua chô liata hri a chareipa nata nama abei zy chô liata a chareipa cha miakhapa châ tlôh ta.

5 Chavâta nama kheihluh nohthlahpa zy nata nama râh paraotuhpa siahloh nohthlahpa zy tao ula; chatanachata Izarel zy Khazohpa cha palyupalih ula, a ku cha nama chô liata zy, nama khazoh nata nama râh chô liata zy a hua khoh ngyu aw na.

6 Izi mozy nata Phirao ta palôhrupa kuhchhapa ta ama ypa hawhna khata, khazia e nama palôhrupa kuh nama pachha tly? Ama hry liata hmonoâh ngaitapa ta a tao nona khata chyhsa zy cha pasiesa ei ta, ama pua hawpa châ vei mâ?

7 Chavâta atahmâ he talaili thiehpa a chhuahnoh ula, viahchao panô pô no, a sâhpi saoh haipa, raopaky beih leipa, cha viahchao pano zy cha talaili liana chata paky ula, a tawzy cha o lâta a vaw chhi pa teh u.

8 ABEIPA Byh cha la ula, talaili liana chata soh ula, hmoparaona atheih nawpa ta nama hlâpa ngôh hmo sôhpa cha thoby liata khôpa ta, a kâ lâta soh ula, pasiesa ula, pathlie thlâh ha teh u.

9 Ano ta râhri lâchhâ lâpi a chhihpa ta Besheme lâta a sie tlyma, moh teh u, a sie khiahtala eima chô liata hmo pha lei ngaitapa he ano a taopa châ aw ta; a sie vei khiahtala maniah ahrietuhpa cha ano ku châ vei tahpa pahno aw pi ta, eima chô liata a vaw y hmâ hmâpa a châ aw,” tah ei ta.

10 Chyhsa zy chata cha hawhna chata tao ei ta, viahchao panô sâhpi saoh haipa pô no a chhi ei ta, talaili liana chata paky ei ta, a tawzy cha o lâta khô ei ta.

11 ABEIPA Byh cha talaili liana chata soh ei ta, ngôh siahloh nohthlahpa nata kheihluh nohthlahpa sona thobyh chhaota.

12 Viahchao panô zy chata Besheme lâ pangaipa ta lâpi cha a chhih lymâ ei ta, a ao lymâna chôta lâpi cha a chhih ei ta; chachâh lâ tlyma, chavei lâ tlyma tlei chachei leipa ta, Phlistina abeizy chata Besheme râhri taihta zi ei ta.

13 Besheme khih liata chyhsa zy chata saikao liata ama sâh vaw hria ei ta; a kaw heih ei ta, Byh cha hmô ei ta, a ly kaw ei ta.

14 Talaili cha Besheme khihpa Zawsua lyu liana chata a vaw ngia ta lôpanô lai ngaitapa yna liana chata aduah thlâh ha ta. Talaili tho cha patlaw ei ta, ABEIPA a chhy nawpa ta viahchao panô zy cha raopa hlâna ta hmâh haw ei ta.

15 Livai chizy chata ABEIPA Byh cha ngôh hmo sôhpa yna thobyh chhao chata la ei ta, lôpanô chô liata soh ei ta; Besheme liata chyhsa zy chata cha noh tlai chata raopa hlâna zy nata atheihna zy ABEIPA lâta hlâ ei ta.

16 Cha cha Philistina abei papangawh zy chata ama hmô khai nata Ekraw lâna chata adi haw heih ei ta.

17 Philistina mozy chata ngôh kheihluh nohthlahpa ABEIPA lâta hmoparaona atheih nawpa ta ama hlâpa cha he hluhna zie he a châ; Asadô vyuhpa ta miakha, Kaza vyuhpa ta miakha, Askelaw vyuhpa ta miakha, Katha vyuhpa ta miakha, Ekraw vyuhpa ta miakha,

18 ngôh siahloh nohthlahpa cha khih zydua kuh a hneipa khih nata tlâh râh lâ khih chhao rei khaipa ta abei papangawh zy chata Philistina mozy khih hluhna zie châ ta. ABEIPA Byh ama patyuna lôpanô tlai cha Besheme khihpa Zawsua lyu liana chata atahmâ taihta a y thlâh haw.

19 ABEIPA Byh cha Besheme chyhsa zy ta a chhôh ama mopa vâta chyhsa zy cha thi ta; ama hry liata chyhsa thy pangawh nata sysari tlai ama thi, ABEIPA ta thata a thiepa vâna chata chyhsa zy cha cha ei ta.

20 Besheme khih chyhsa zy chata, “He Khazohpa pathaihpa ABEIPA hmiakô liana heta ahy e a duah thei aw ta? Keimo tawhtapa he ahy hnohta e a khy aw tly?” tah ei ta.

21 Kiriaziari khih chyhsa zy lâna chata, “Philistina mozy chata ABEI Byh cha vaw soh haw heih ei ta. Zu ula, nâmo lâta cheih teh u,” tahpa chho awpa ta chyhsa zy tuah ei ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 7

1 Chatanachata Kiriaziari khih chyhsa zy cha zu ei ta, ABEIPA Byh cha a khykhei ei ta, tlâh liata Abinada o liana chata tlôkhei ei ta; a sawchapawpa Eliaza cha ABEIPA Byh mokhâhtuhpa châta panano ei ta.

Samuel ta Izarel chôta ryu a reih

2 Kiriaziari liata Byh a y chhôh cha bohpi châ ta, kô syno tlai a châ, chatawhcha Izarel chhôhkha zydua ta ABEIPA vâiapa ta y ei ta.

3 Samuel chata Izarel chhôhkha zydua hnohna chata, “Nama pathipalôh hmeihseihpa ta ABEIPA lâ a vaw heihpa nama châ tlai khiahtala, râh hropa khazoh zy nata Astarô cha nama hry tawhtapa pahlei teh u, nama pathipalôh cha ABEIPA châta a chhuady ula, ano deita chakao teh u, chatanachata Philistina mozy ku tawhtapa he a cha pachha aw ei,” tahpa ta reih ta.

4 Izarel mozy chata Baal zy nata Astarô zy cha pahlei haw ei ta, ABEIPA deita chakao haw ei ta.

5 Samuel chata, “Izarel mo zydua cha Mizpah liata aw pakhy khai ula, ABEIPA lâta thlah ei cha chhâpa aw ei,” tah ta.

6 Mizpah lâta sie pakhy khai haw ei ta, ti thaih ei ta, ABEIPA hmiakô liana chata patlai ei ta, cha noh liana chata nie leipa ta y ei ta, cha liana chata, “ABEIPA chô liata eima molei ha na,” tah ei ta. Samuel ta Mizpah liana chata Izarel mozy pachiapa ta.

7 Philistina mozy chata Izarel mozy Mizpah liata ama y pakhy tahpa ama thei nahta, Izarel mozy adyuh awpa ta Philistina mo abei sahlao zy cha pua ei ta. Cha cha Izarel mozy ta ama pahno nata Philistina mozy cha chi ei ta.

8 Izarel mozy chata Samuel hnohta, “Philistina mozy ku tawhtapa maniah pachha awpa ta, ABEIPA eima Khazohpa maniah na aw papa cha bâh khâ,” tah ei ta.

9 Samuel chata mietahkupa taw sâhpi a pazy haipa cha la ta, a pôhpa dua ta raopa hlâna châta ABEIPA lâta hlâ ta; Izarel mozy châta Samuel chata ABEIPA cha aw ta, ABEIPA chata achhy ta.

10 Samuel ta raopa hlâna a hlâ hai nona tlai chata Philistina mozy chata Izarel mozy adyuh awpa ta a vaw hnia ei ta; châhrasala cha noh liana chata ABEIPA ta Philistina mozy chô liata tôkalôpa thata vaw pathuasa ta, patypamâ ta; Izarel mozy hmiakô liata panawhsapa ta y haw ei ta.

11 Izarel mozy cha Mizpah tawhta pua ei ta, Philistina mozy a chadai ei ta, Beka ry ama tlôna taihta thie lymâ ei ta.

12 Samuel chata alô la ta, Mizpah nata Zehanah likawh liana chata bô ta, “He taih heta ABEIPA ta maniah a bao,” tahpa ta, a moh ta Ebeneza bi ta.

13 Chatanachata Philistina mozy cha nawh haw ei ta, Izarel mozy râh lâna chata sie khao leipa ei ta. ABEIPA ku chata Philistina mozy cha Samuel hro chhôh ta adyuh ta.

14 Philistina mozy ta Izarel mozy khih ama lapa zy cha Ekraw tawhta Katha taihta Izarel mozy pakua haw heih ei ta; a râh cha Izarel mo ta Philistina mozy ku tawhtapa pachha ei ta. Izarel mozy nata Amawri mozy cha adyhpa ta y ei ta.

15 Samuel chata a hro chhôhta Izarel mozy chata ryureih ta.

16 Kô chareih ta Bethel nata Kilkal nata Mizpah he tly tyh ta, chazy liana chata Izarel mozy ryureipa tyh ta.

17 A o yna a châpa vâta Ramah khih lâta a di tyh ta, cha liana chata Izarel mozy ryureipa ta. Cha liana chata ABEIPA châta maisâh tao ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 8

Izarel ta abei hnei awpa ta a hawna

1 Samuel cha machâ haw ta, a sawchapawpa zy cha Izarel mozy chô liata ryureituhpa ta tao ta.

2 A saw uhtheipa moh cha Zoel châ ta, a pazipa moh cha Abizah châ ta; Besheba liata ryureituhpa châ ei ta.

3 Châhrasala a sawzy chata a yzie cha la leipa ei ta, sôh nata piah lâta a chadai ei ta; a naopana hmo zy la ei ta, a do lei ngaitapa ta ryureih ei ta.

4 Izarel mozy machâ zydua a pakhy ei ta, Ramah khih liata Samuel lâta sie ei ta,

5 a hnohta, “Pachâ teh, machâ kaw ha chi ta, na sawchapawpa zy hra chata na yzie cha lyu tlôh lei khâh ei ta; pho hropa zydua hawhta eima chô liata ryurei awpa ta abei maniah taopa teh,” tah ei ta.

6 Châhrasala a hnohta, “Ryu maniah a reituh awpa abei maniah pie teh,” ama tahpa kyh chata Samuel cha palysa leipa ta. Chatanachata Samuel chata ABEIPA lâta thlahchhâ ta.

7 ABEIPA ta Samuel hnohta, “Zawpizy ta na hnohta ama reipa zydua cha nahthlie teh; nâma cha khoh leipa châ leipa ei ta, ama chô liata abei châta keima na khoh leipa tlao ama châ.

8 Izi râh tawhtapa ei chhihtha no tawhta atahmâ taihta ama hmotaopa yzie zydua nâ heisaipa ta, khazoh hropa zy eina chakaosai tyhpa hawhna heta na chô liata ama tao hih.

9 Chavâta ama bie cha nahthlie teh; anodeikuacha â i ngaitapa ta bie taipa ta ama chô liata ryureituhpa abei yzie awpa cha a siapa ta pahmô teh,” tah ta.

10 Samuel chata ABEIPA bie zydua cha abei a hiahtuhpa zawpizy cha chho khai ta.

11 Nama chô liata ryureituh awpa abei yzie cha he hawhna heta a châ aw: nama sawchapawpa zy cha arâ nata talaili kialâhpa ta rao aw ta, a talaili hmiakô liata a râpa zy y aw ei ta;

12 a pheisaih sâh kha hyutuhpa ta zy, sypangawh hyutuhpa ta zy rao aw ta, chatawhcha thokha zy cha a alei palietuhpa châta zy, a sâh a hriatuhpa châta zy, a adyuhna chhaichhi taotuhpa châta zy, a talaili chhaichhi taotuhpa châta zy hmâh aw ta.

13 Nama sawchanô zy cha rohpahâhpa a taotuhpa ta zy, beih a chhotuhpa ta zy, viahchhâ a taotuhpa ta zy a hmâh aw.

14 Nama lyuzy, kre sahdô zy, ôli sahdô zy a phapa maih cha chhu aw ei ta, a chakaotuhpa zy a pie aw.

15 Nama chikao nata nama kresahdô liatahpa su hrawh liata su kha cha lapa aw ei ta, a hyutuhpa zy nata chakaotuhpa zy a pie aw.

16 Nama chakaotuhpa chapaw zy nama chakaotuhpa chanô zy, nama satlia phapa maih zy, nama alâ zy cha chhu aw ei ta, a raihriatuhpa ta a tao aw.

17 Nama mietahkupa zaw liatahpa su hrawh liata su kha cha lapa aw ei ta, nâmo cha a chakaotuhpa zy nama cha aw.

18 Cha tina chata nama tlyh awpa abei vâna chata a rôh pathla aw eichi ta; châhrasala cha tina chata ABEIPA ta châ chhy aw veih ei,” tah ta.

19 Châhrasala zawpi zy chata Samuel bie cha a pyh khoh leipa ei ta, “Châ vei, abei eima hnei tlai awpa na a châ,

20 chatanachata pho hropa zydua hawhta vaw châ aw pi ta, eima abeipa chata ryu maniah reipa aw ta, eima phozy chhihthapa ta chariah zy a dyuh khei aw,” tah ei ta.

21 Samuel chata zawpi zy bie reipa zydua cha thei ta, ABEIPA nahkhao liata chho pachhuah ta.

22 ABEIPA chata Samuel hnohta, “Ama bie cha a pyh la, abei taopa teh, tah ta. Samuel chata Izarel mozy hnohta, “Chyhsa to nâmo khih lâ chyu ta a di teh u, tah ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

1 Samuel Bo 9

Sawla abeipa ta a tlyhpa a châ

1 Benzami râh liata Benzami pathla chyhsa pakha, chyhsa thatlôpa, riahpha ngaitapa y ta, a moh cha Kisa châ ta, cha chyhsa cha Abiel sawchapawpa châ ta, cha cha Zerô sawchapawpa châ ta; cha cha Bekôra sawchapawpa châ ta, cha cha Aphia sawchapawpa châ ta;

2 ano chata sawchapawpa hnei ta, a moh cha Sawla châ ta, satlia pôhraoh a tlai ngaitapa châ ta. Izarel mozy hry liata ano hlâta pôhraoh pha viapa rai y leipa ei ta, ahyhmah a ngiatlâh a khopa chhao y veih ei.

3 Chatawhcha Sawla paw Kisa alâzy cha lei ta, Kisa chata a sawchapawpa Sawla hnohta, “Thyu la, chakaotuhpa pakha a chhi la, alâ kei tlua tua,” tah ta.

4 Ephrai tlâh râh zy chahry ta, Shalisa râh zy chhao chahry ta, châhrasala hmô leipa ei ta. Chatanachata Shali râh chahry heih ei ta, cha liana chhao chata y leipa ei ta. Chatawhcha Benzami mozy râh chahry heih ta, châhrasala hmô hlei leipa ei ta.

5 Zupha râh ama tlô nahta, Sawla chata a hnohta a ypa a chakaotuhpa hnohna chata, “A vy tua, kua thlâh ha heih ei si, chata leipa ta la ei pâ ta alâ pachâ leipa ta keimo maniah a pachâ pathlei aw na,” tah ta.

6 Châhrasala ano chata a hnohta, “Pachâ teh, he khih liana heta Khazohpa chyhsa y ta, chyhsa zachhih ngaitapa châ ta, a reipa maih a tlô lymâ tyh. A vy tua, cha lâna chata sie tua ei si eima siena awpa zy he maniah a chho thei ngyu aw la,” tah ta.

7 Sawla chata a chakaotuhpa hnohta, “A vawhpa châ ei sih la, cha chyhsa cha khâpa e eima phaopa aw? Eima sahria liata viahchhâ hra cha y khao tlôh va, Khazohpa chyhsa lymâ chei pa awpa y vei. Khâpama eima hnei tly?” tah ta.

8 Chakaotuhpa chata Sawla cha a chhy heih ta, “Pachâ teh, tâkâ sekel su palih ta pachhaih ta su kha cha a chakaih na ta, cha cha eima siena awpa maniah a chhona ty ta Khazohpa chyhsa cha eima pie aw,” tah ta.

9 (Cha hlâta cha Izarel sahlao zy hry liata chyhsa ta Khazohpa chhohia ama khoh no ta, “A vy teh, a hmôtheituhpa lâta vawh tua ei si,” tah tyh ei ta. Atahmâ hlâta hrohsopa ama tah tyhpa he cha hlâta cha hmôtheituhpa ama tah tyh).

10 Sawla chata a chakaotuhpa hnohta, “A pha kaw chuh; vawh tua ei si,” tah ta. Chatanachata Khazohpa chyhsa yna khih lâna chata sie haw ei ta.

11 Khih pangaina khyna liata ama khy nona cha laihsa ti thai awpa ta a vaw puapa zy hmô ei ta, ama hnohta, “He liana heta hmôtheituhpa cha a y ma? tah ei ta.

12 Âmo chata a chhy ei ta, “A y cha; nama hmiakô liata â vy mâ tâh. Chatlie teh u, atanoh he khih lâna cha â vy, atanoh he su a sâhpa liata chyhsa zy amâ theih.

13 Khih namâ ngia pata nahta, su a sâhpa liata pati nie awpa ta a vaw hlâta thlai nama hmô aw, atheihna cha byhnâ aw tuh awpa a châpa vâta a tlô hlâ lei cha zawpi chata pati nie aw veih ei, cha tawhna chata ama chyhsa hruapa zy chata ama nie tyh. Chavâta khy parah ula, thlai nama hmô aw,” tah ei ta.

14 Chatanachata khih lâna chata khy ei ta. Khih amâ ngia nahta, Samuel su sâhpa lâta a vaw awpa nah chata a tyh ei ta.

15 Sawla a vy hlâ noh khapa liana chata ABEIPA ta Samuel cha pahnosa ta:

16 “Mylâ he daihti liana heta Benzami râh tawhta nâ lâta chyhsa pakha vaw pasiesa aw na ta, ei chyhsa Izarel zy chô liata hyutuhpa châ awpa ta sathaw thu aw chi ta. Ano chata Philistina mozy ku tawhtapa ei chyhsa zy a pachha aw; ama awh pa pyu chata kei lâta a vaw tlô hawpa vâta ei chyhsa zy cha ei pachâ na,” tahpa ta.

17 Samuel ta Sawla a hmô nahta ABEIPA ta a hnohta, “Mo tua, na hnohta ei reipa chyhsa kha! Ano heta ei chyhsa zy chô liata bie a hnei aw,” tah ta.

18 Sawla chata kuh chhikao liata Samuel cha a kei hnia ta, “Hmôtheituhpa o cha khataih liata a y? Na chho tua,” tah ta.

19 Samuel chata Sawla cha a chhy ta, “Keima he hmôtheituhpa cha ei châ; ei hmiakô liana heta su a sâhpa lâ pangaipa ta sie la, atanoh he ei hnohta pati na nie aw, mylâ my ta cha pasiesa aw na ta, na palôhrupa liata a ypa zydua chhao ei cha chho aw.

20 Na alâ nô thôh a lei hawpa zy kyh cha pachâchhie khâ, ama hmô haw. Izarel zy hry liata rôhnahna zydua cha ahy châta e a châ. Na châta nata na paw o liata chyhsa zydua châ vei mâ?” tah ta.

21 Sawla chata a chhy ta, “Izarel pho hry liata a chyh chaipa Benzami pho châ vana ma? Eima chhôhkhapa chhao Benzami pho chhôhkha zydua hry liata a chyh chaipa châ vei mâ? Kheihta zie ta he hawhta ei hnohta reipa ma na châ tly?” tah ta.

22 Samuel chata Sawla nata a chakaotuhpa cha a chhi ta, khichhai chhôhpadâhpa lâta a chhi ta, ama chyhsa hruapa sythôh hry liana chata su rôhnah chaipa liata patyu sa ta.

23 Samuel chata beihchhotuhpa hnohta, ‘Panano mah y,’ ei tahpa tovyuh ei cha piepa kha vaw cheih teh,” tah ta.

24 Chatanachata beihchhotuhpa chata a byhpi nata a chô liata a ypa cha vaw cheih ta, Sawla hmiakô liata kei soh ta; Samuel chata, “Mo tua, â nano ta ei sopa cha doh la, nie teh; a daihti chata he he na châta eima raopa a châ, chyhsa zy ei hrua, tah haw tlôh na ta,” tah ta. Cha noh liana chata Sawla cha Samuel zy nata hmaohkha ta pati dôh ei ta.

25 Su a sâhpa tawhta khih lâ amâ zu nahta, a chô liata Sawla chata â ziana tao pa ei ta, a mô haw ta.

26 Mydi ta thyu ta, noh chhi chy ta Samuel ta o chhôh liata a ypa Sawla cha aw ta, “Thyu la, ei cha pasiesa bâ aw,” tah ta. Sawla cha thyu ta, ama pano ta pua ei ta, ano nata Samuel cha pua haw ei ta.

27 Khih chhâna lâ ama za tlô nahta, Samuel chata Sawla hnohta, “Chakaotuhpa he eima hmia lâta pasiesa la, ano cha a khô nahta, nâ deikua cha a duah chy la, Khazohpa bie ei cha chho tua aw,” tah ta.

1 Samuel (1 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31