Philistina mo nata adyuhna
1 Sawla cha ko sypangawhpa* a châ nota abei pathao ta; Izarel mozy chô liata kô syno liata kô no ryu reih ta.
2 Sawla chata Izarel mo hry liata chyhsa sâh thôh a tlyh ta; sâh no cha Mikmasa liata nata Bethel tlâh râh liata Sawla hnohta y ei ta, sâh kha cha Benzami râh liata Kibia liata Zawnatha hnohta y ei ta; a hropa zydua cha âmo poh-o lâta padisa khai ta.
3 Zawnatha chata Keba liata Philistina riah vaihtuhpa pheisaih sahlao pahnie ta; cha cha Philistina mozy chata vaw thei ei ta. Sawla chata, “Hebrai mozy khata vaw thei mawh sy,” tahpa ta ama khihnarâh zydua liata chiahmie patosa ta.
4 Chatawhcha Izarel mo zydua chata Sawla ta Philistina riahvaihtuhpa pheisaih sahlao a pahnie tahpa nata Izarel mozy chhaota Philistina mozy amâ hao tahpa kyh vaw thei haw ei ta. Chatanachata zawpi zy cha Sawla lâta Kilkal liata a hmaohpakhy ei ta.
5 Philistina mozy cha Izarel mo adyuh awpa ta a pahmaoh ei ta, talaili thy thôh, arâ a kiapa sâh charu, chyhsa tilaipi raphyu liata leisadi zie tlaita a hluhpa ama châ; chatawhcha khy ei ta, Bethave nochhi lâchhâh ta Mikmasa liana chata riehmo tao ei ta.
6 Izarel mozy chata noraihpa ta ama y tahpa âmosasyh ta ama pahno nahta (chyhsa zy cha ama nôpo kaw ta), chyhsa zy cha lôpu liata zy, a popa liata zy, lôpanô liata zy, kuh liata zy, khaotlô liata zy a nyu ei ta;
7 thokha zy cha Zawdâh haosâ lâ Kada nata Kilia râh lâta a râ ei ta. Sawla deikua cha Kilkal liata y thlâh ha ta, zawpi zy chata a chalyu ngâna chôta zi ei ta.
8 Samuel ta noh a raopa hawhta noh sari Sawla ta hâ ta; châhrasala Samuel cha Kilkal lâna chata sie khao leipa ta, chatanachata ano tawhtapa zawpi chata paisai haw ei ta.
9 Sawla chata, “Raopa hlâna hlâ awpa nata adyhna hlâna zy hlâ awpa cha keima lâta vaw cheih teh u,” tah ta. Chatanachata raopa hlâna cha hlâ ta.
10 Raopa hlâna a hlâ khai pata nahta, Samuel cha vaw tlô haw ta; chatawhcha Sawla cha anaoh awpa ta ano dypa ta sie ta. “Samuel chata, “Khâpama na vaw tah?” tah ta. Sawla chata,
11 Zawpizy chata na siesai haw ei ta, nâma hra ta, noh raopa noh liata vaw tlô khao leipa chi ta. Philistina mozy hra cha Mikmasa liata amâ pahmaohpakhy haw tahpa thei tlôh na ta,
12 ‘Chavâta Philistina mozy chata Kilkal liata nâ vaw dyuh daihma tlôh ei ta, ABEIPA khokheina hra cha hmô tlôh leipa nata chavâta raopa hlâna cha ahla lei thei awpa châ va na,” tah ta.
13 Samuel ta Sawla hnohta, “Na hmo taona zie he hruna kyh châ ta, ABEIPA chata Izarel zy chô liata na beina he chhâzaw ta pa-i a chhuahpa châ taraw ta.
14 Châhrasala abei patlô aw va chi; ABEIPA bie a cha piepa na zyh leipa vâta, ABEIPA chata ano pathipalôh hawhta a phaohpa chyhsa tlua ta, chyhsa zy chô liata abei awpa ta ABEIPA a rao haw,” tah ta.
15 Chatawhcha Samuel cha thyu ta. Kilkal tawhtapa cha Benzami râh lâ Kibia khih lâta sie haw ta. Sawla chata a hnohta chyhsa a ypa zy cha reih ta, za charu châ ei ta.
16 Sawla nata a sawchapawpa Zawnatha nata ama hnohta chyhsa a ypa zy cha Benzami râh liata Kibia khih liana chata y ei ta; châhrasala Philistina mozy chata Mikmasa liana chata riehmo liata y ei ta.
17 Hraotuhpa sahlao cha Philistina mozy riehmo tawhta py thôh ta vaw pua ei ta; py kha chata Shual râh liata Ôphra pangaina lâpi cha a chhih ei ta,
18 hlao kha chata Behôrô lâ a ‘pangaipa lâpi a chhih ei ta, hlao kha chata râhpathohpa a daih lâ Zebô saikao lâ a heihpa râhri lâpi cha a chhih ei ta.
19 Izarel sahlao râh pôhpalôhpa liana chata syudaihpa rai y leipa ei ta; Philistina mozy chata, “Hebrai mozy heta zaozi zy tlyma, asei zy tlyma ama tao pathlei aw na,” ama tah;
20 châhrasala Izarel mo zydua cha tupi zy, aleipaliena zy, ahrei zy, alôtu zy, chatah nawpa ta Philistina mozy lâta ama zu tyh; alôtu zy, aleipaliena thua ku zy nata ahrei zy châta deikua cha sarai ama hnei;
21 ama leipaliena thuaku zy nata ahrei zy chata sekel su thôh pachhaih ta su no châ ta, alôtu zy nata tupi zy chata sekel su thôh pachhaih ta su kha a châ.
22 Chatanachata amâ dyuh nota cha Sawla nata Zawnatha hnohta chyhsa a ypa zy cha zaozi tlyma, asei tlyma a hneipa rai y leipa ei ta; Sawla nata a sawchapawpa Zawnatha deikua chata hnei ei ta.
23 Philistina riahvaihtuhpa pheisaih sahlao cha Mikmasa saikao lâta sie haw ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |