Zawnatha nata Davi ama keina
1 Sawla hnohta bie a rei khai nahta, Zawnatha hrona nata Davi hrona cha phie apazao ha ta, Zawnatha chata ano hrona kyh a pachâpa hawh tlaita a kyh pachâ ta.
2 Sawla ta cha noh liana chata paysa pâ haw ta, a paw o lâta padisa pasaih khao leipa ta.
3 Zawnatha nata Davi chata bie hraih ei ta, ano hrona hawh tlaita a kyh a pachâpa vâta.
4 Zawnatha chata a poh a bu haipa hlai ta, Davi pie ta, adyuhna chhaichhi nata a zaozi nata a libaw nata a chaisaihna taihta pie ta.
5 Sawla ta a tuana maihta Davi cha sie tyh ta, a sia ngaitapa ta y tyh ta; Sawla chata chariah adyuhpa zy hyutuhpa châta tao ta. Cha cha chyhsa zydua pachâna liata nata Sawla chakaotuhpa zy pachâna liata chhao pha ngaita ta.
Sawla, Davi chôta a hiatliana
6 Ama vaw kua nata, Davi Philistina chyhsa thiepa a vaw tlô nahta Izarel khi to liata chanô zy hla sapa nata lâna chôta khoh zy nata paropasyupa zy chhaota thapha ngaitapa ta beipa Sawla dy awpa ta vaw pua ei ta.
7 Chanô zy chata lâna chôta hla ta a chhy ei ta, “Sawla ta a sâh a sâh ta a thie. Davi ta a thy a thy ta,” tah ei ta.
8 Sawla cha a pathi-ia kaw ta, cha biezy chata palysa leipa ta; “Davi cha a thy a thy ta a thiepa ta a ngiah ei ta, kei deikua cha a sâh a sâh deita ta a thiepa ta nâ ngiah ei ta; khihnarâh dei leipa ta cha a hnei awpa hropa khâpa a y khao,” tah ta.
9 Sawla chata cha no tawhna chata Davi cha mo pahro haw ta.
10 A mylâ ta cha Sawla chô liana chata Khazohpa tuapa ahripa vaw tlô chaimâh ta, ochhôh liana chata a chia ngâ kaw ta, chatawhcha Davi chata noh hro ta a taopa hawhta totâ tô ta. Sawla chata a asei chaba thlâh ha ta,
11 Sawla ta asei cha chakhao ta, “Pâchhô na haota Davi ei chakhao pâ tua aw,” tah ta. Davi chata ei no a hneisai ta.
12 Davi hnohta ABEIPA a ypa vâta nata ABEIPA ta Sawla a siesaipa vâta Sawla chata Davi cha chi ta.
13 Chavâta Sawla chata ano tawhta pasiesa ta, sâh kha chô liata a pheisaih hyutuhpa ta tao ta; zawpi hry liana chata a ngia ta, pua tyh ta.
14 Davi cha a hmotaopa maih liata a sia ngaitapa ta y tyh ta; ABEIPA cha a hnohta y ta.
15 Sawla chata a sia ngaitapa ta a y tyh tahpa a hmô nahta chi kaw ta.
16 Châhrasala Izarel sahlao nata Zudah sahlao zydua chata Davi cha pasô ngaita ei ta; ama hry liata a ngia tyhpa nata a pua tyhpa châ tlôh ta.
17 Sawla chata Davi hnohta, “Pachâ teh, ei sawchanônô uhtheipa Meraba he lahpinô ta ei cha pahneisa aw; riahpha ngaitapa ta na châkhei la ABEIPA adyuhna zy cha adyuh mah y,” tah ta. Sawla chata, “Kei ta a chô liata ku pathla leipa ta Philistina mozy ta a chô liata ku tlao pathla ei se,” a tahpa châ ta.
18 Davi chata Sawla hnohta, ”Ahyma châ na ta, ei hrona nata Izarel zy hry liata ei paw chhôhkha zy chhao khâpa ma châ ei ta, abei piahpa ei châ awpa cha?” tah ta.
19 Châhrasala Sawla sawchanônô Meraba cha Davi pahneisa a daih tina chata Mehôla chyhsa Adriel lahpinô châta pie ha ta.
20 Sawla sawchanônô Mikhal chata Davi cha a kyhpachâ ta; Sawla cha chho ei ta, cha chata palysa ta.
21 Sawla chata, “A aona khohei a vaw châ thei nawpa nata Philistina mozy ta a chô liata ku ama pathla nawpa ta ano he ei pie tua aw,” tah ta. Chavâta Sawla chata Davi hnohta, “Atanoh he ei piahpa na châ chanei heih aw,” tah ta.
22 Sawla chata a chakaotuhpa zy cha bie pie ta, “A ru lâta Davi chho ula, beipa cha na chô liata a ly kaw ta, a chakaotuhpa zydua ta kyh ama cha pachâ; chatanachata abeipa piahpa ta y mah y, tah teh u,” tah ta.
23 Sawla chakaotuhpa zy chata cha kyh cha Davi nahkhao theina liata reih ei ta, Davi chata sipasapa nata ahyhmah pasâhsa leipa, keimo hawhpa châna heta abei piahpa châpa cha a naopa ta nama pachâ mâ?” tah ta.
24 Sawla chakaotuhpa zy chata, “Davi chata cha hawhta a tah,” tahpa ta chho ei ta.
25 Sawla chata, “Davi hnohta he tana heta reih teh u, ‘Beipa chata, abeipa khakhaipa phuh la nawpa ta Philistina mozy chopaw vo za kha dei leipa ta cha khâpahmah khoh vei a tah,’ tah teh u,” tah ta. Sawla chata Davi cha Philistina mozy ku liata thi awpa ta pachâ ta.
26 A chakaotuhpa zy ta cha biezy cha Davi ama chho nahta abei piahpa a châ awpa cha Davi cha aly kaw ta. Chatawhcha a noh taipa zy cha tlô mâh leipa ta;
27 Davi nata a chyhsa zy cha thyu ei ta, Philistina mozy za no kei thie ei ta; Davi chata ama chopaw vo vaw cheipa ta, chatanachata abei piahpa a châ thei nawpa ta abeipa cha a kipata ta pie ei ta. Sawla chata a sawchanônô Mikhal cha a lahpinô ta pahneisa haw ta.
28 Sawla chata Davi hnohta Khazohpa a y tahpa pahno pasia haw ta, Sawla sawchanônô Mikhal chata ano kyh cha pachâ ta,
29 Sawla chata Davi cha chi via heih ta. Sawla cha Davi khakhaipa châ lymâ haw ta.
30 Philistina mo sahlao molaipa zy cha pua tyh ei ta, Davi cha Sawla chakaotuhpa zydua hlâ ta thai via tyh ta; chatanachata a moh cha pasâhsa kaw ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |