1 Samuel Bo 31
Sawla nata a sawchapawpazy ama thiena (1Tr 10:1-12)
1 Philistina mozy chata Izarel sahlao zy cha adyuh ei ta; Izarel chyhsa zy cha Philistina mo tawhna chata a râpai ei ta, Kilbô Tlâh liana chata thiepa ta y haw ei ta.
2 Philistina mo chata Sawla nata a sawchapawpa zy cha a chadai lymâ ei ta; Philistina mo chata Sawla sawchapawpa zy, Zawnatha nata Abinada nata Melkhisua cha thie ei ta.
3 Sawla cha thata adyuh ei ta, châtai a kapa chyhsa zy chata pha haw ei ta; châtai a kapa chyhsa zy vâna chata a nôpo kaw ta.
4 Sawla chata a chariah chhaichhi a chabatuhpa liana chata, “Na zaozi phia la, na vaw chô teh, chata leipa khiahtala he chopawtai leipa sahlao zy he a vy aw ei ta, na vaw chô aw ei ta, einâ palai thlu aw ei na,” tah ta. Châhrasala a chariah chhaichhi chabatuhpa chata tao khoh leipa ta, chi ngaita kaw tlôh ta, chavâta Sawla chata a zaozi cha la ta, pao thlu ta.
5 A chariah chhaichhi a chabatuhpa chata Sawla a thi tahpa a pahno nahta ano chhao cha a zaozi cha pao thlu hra ta, thi rairieh ei ta.
6 Sawla chhao, a sawchapawpa zy pathôh chhao,” a charia chhaichhi a chabatuhpa chhao, a chyhsa zydua chhao ta, cha noh liana tlaita ama zydua ta thi khai haw ei ta.
7 Saikao haosâ lâta Izarel chyhsa a ypa zy nata Zawdâh haosâ lâta a ypa zy ta Izarel mozy amâ râpai tahpa nata Sawla nata a sawchapawpa zy ama thi tahpa ama pahno nahta, khih cha puasaipa ta a râ haw ei ta; Philistina mo chata kei pahrâ haw ei ta.
8 A mylâpa chata Philistina mozy chata ama chariah thiepa zy chysia kei pahluhpa awpa ta ama vaw nahta Sawla nata a sawchapawpa zy pathôh Kilbô Tlâh liata ama thiepa cha kei hmô ei ta. A luh tai ei ta, a charia chhaichhi zy la ei ta, a thâtih cha ama nohthlapa achhyna-o liata nata chyhsa zy pahno awpa châta Philistia râh zydua liata paphao ei ta.
10 A chariah chhaichhi cha Astarô o liata soh ei ta; a ri deikua cha Besa kuh liata chahrypa ei ta.
11 Zabesakilia lâta a ypa zy chata Sawla ama taochhie zie ama vaw pahno nahta,
12 chyhsa riahphapa zydua pua ei ta, zâkhihdei ta sie ei ta, Sawla ri nata a sawchapawpa zy ri Besa kuh liata ama chahrypapa cha la ei ta; Zabesa vaw tlôkhei ei ta, cha liana cha ama rao haw.
13 Ama rupa zy cha la ei ta, Zabesa liata tamaris tho ry liana cha pabu ei ta, chatawhcha noh sari pati nie leipa ta y ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |