1 Samuel chata sathaw byh pachhi ta, a luh liana chata hry ta, sy ta, “ABEIPA chata a ryuto zy chô liata hyutuhpa cha awpa ta sathaw a cha thupa châ vei mâ?
2 Atanoh eina puasai tawhna chi heta Zelzah liata Benzami râhri liata Rakheli thlâ kiapâh liata chyhsa pano hmô aw chi ta, âmo chata na hnohta, “Alâ zy na tluapa cha ama hmô haw, na paw chata alâ cha pachâ khao leipa ta nâma sai cha pachâ ta, ‘Ei sawchapawpa cha kheihta ma ei tao aw tly? a tah ngâthlâh haw,” tah aw ei ta.
3 Cha tawhna chata sie lymâ la, Tabaw oaka thokô cha tlô aw chi ta; cha liana chata chyhsa pathôh Bethel liata Khazohpa lâta a khy awpa zy cha aw ei ta, pakha chata mie taw pô thôh phaoh aw ta, pakha chata viahchhâ tlâ thôh phaoh aw ta, pakha chata kresawti titheih a phaoh aw.
4 Châ naoh aw ei ta, viahchha tlâ no cha pie aw ei ta, cha cha la aw chi ta.
5 Cha khai tawhna chata Philistina mo pheisaih sahlao yna Khazohpa tlâh cha tlô aw chi ta; cha liata khih na kei tlô nahta hrohsopa sahlao tota zy, khoh zy, ramo zy, totâ chabapa zy, a chhipa ta su sâhpa tawhta a zupa a tyh aw chi ta, chatawhcha bie chho chhielie aw ei ta.
6 ABEIPA thlahpa thata na chô liata tlô aw ta, nâ chhao bie ama chho ngâna liana chata a hlao aw chi ta, chyhsa nano ngaitapa lâta na vaw châ aw.
7 He ngiana zy he na chô liata a vaw y tita, hmo a vaw tuazie lymâ hawhta na tao awpa a châ, Khazohpa na hnohta y lymâ tlôh ta.
8 Ei sie hlâta Kilkal lâta zu aw chi ta; kei chhao raopa hlana zy nata adyhna atheihna hlâ awpa ta na lâta a zu aw na ta. Na hnohta a vypa ta na tao awpa ei cha chho hlâta cha noh sari na vaw y awpa a châ aw,” tah ta.
9 Samuel a chhai awpa ta a siesai pata nahta, Khazohpa ta pathipalôh nano ngaitapa pie haw ta; cha pahnona zydua cha cha noh liana chata vaw tlô khai ta.
10 Tlâh cha ama tlô nahta, hrohsopa sahlao ta a vaw tyh ei ta; ABEIPA thlahpa ano chô liata thata vaw tlô ta, âmo hry liata bie chho pata a hlao haw hra ta.
11 Cha hlâta ano a vaw pahno hawpa zy ta, hrohsopa zy bie chho ngâna liata a hlao hra tahpa ama pahno nahta, chyhsa zy cha bie a chho ei ta, “Kisa sawchapawpa chô liata hmo a vaw ypa he khâpa e a châ? Sawla chhao cha hrohsopa hry liata a hlao ha hra khiah?” tah ei ta.
12 A yna khih liata chyhsa pakha ta achhy ta, “Ama paw zy cha khâpama ama cha hlei tly?” tah ta. Chatanachata, “Sawla chhao cha hrohsopa châ haw hra khiah?” tahpa cha bieso lâta vaw châ ha ta.
13 Sawla cha bie a chho chhielie khai nahta su a sâhpa cha tlô haw ta.
14 Sawla puhpa chata a hnohta nata a chakaotuhpa hnohta, “Khataih lâ nama sie?” tah ta. Sawla ta, “Alâ tlua pita, eima hmô leipa vâta Samuel lâta eima sie,” tah ta.
15 Sawla puhpa chata, “Samuel ta na hnohta khâpa a reih? Na chho tua,” tah ta.
16 Sawla chata a puhpa hnohta, “Alâ zy ama hmô haw tahpa, eina chho tlai tah ta. Anodeikuacha a bei nawpa kyh Samuel ta a reipa cha chho vei.
17 Samuel chata zawpi zy cha Mizpah liata ABEIPA lâta awpakhy ta;
18 Izarel pathlazy hnohna chata, “ABEIPA Izarel zy Khazohpa chata he tana heta a tah, ‘Izarel sahlao cha Izi tawhta papua na ta, Izi mozy ku tawhtapa nata cha pasaipa-ituhpa khihnarâh zydua tawhtapa cha pachha ei na ta,’ tahpa ta,
19 Châhrasala atanoh he nama nôpona zydua nata nama hriena zydua tawhtapa cha pachhatuhpa, nama Khazohpa tlai cha khoh leipa eichi ta, a hnohta, ‘Châ vei, abei maniah taopa teh,’ tah eichi ta, chavâta atahmâ he a pho a pho nata a chi a chi ta ABEIPA hmiakô liata a vaw luah teh u,” tah ta.
20 Samuel ta Izarel chi zydua cha vaw paluahsa ta, chatawhcha Benzami chi cha pachaopa ta a tlypa vaw châ ta.
21 Benzami chi sahlao cha chhôhkha ta vaw paluahsa ta, Matari chhôhkhapa cha a tlypa vaw châ ta; Kisa sawchapawpa Sawla cha a tlypa a vaw châ haw. Châhrasala ano tlua ei ta, hmô leipa ei ta.
22 ABEIPA cha hiahri heih ei ta, “Chyhsa a vy awpa ama y khao ma? tah ei ta. ABEIPA ta a chhy ta, “Hmobaoh hry liata a nyu thlâh haw,” tah ta.
23 Chatanachata a râ ei ta, a vaw chhi ei ta; zawpi hry liata a vaw duah nahta chysa hry liana chata a sâh chai ta, ahyhmah ta a ngiatlâh a khopa chhao y veih ei.
24 Samuel chata chyhsa zydua hnohta, “ABEIPA chyhsa raopa he nama hmô ma? Zawpi zydua hry liata ano hawhpa rai y veih ei,” tah ta. Zawpi zy cha aw ei ta,” Khazohpa ta abei chaipa hrôbie mawh sy! tah ei ta.
25 Samuel chata zawpi zy cha khihnarâh yzie awpa chho ta; a châbu liata roh ta, ABEIPA hmiakô liata soh ta. Samuel chata zawpi zy cha ama o chyu lâta padisa haw ta.
26 Sawla chhao Kibia khih liata ano o lâta a di haw hra ta, chyhsa riahphapa sahlao ama pathipalôh Khazohpa ta a hriapa zy cha a hnohta sie hra ei ta.
27 Châhrasala thokha moleipa ahyzy tlyma chata, “He chyhsa heta kheihta e maniah a pachha thei aw?” tah ei ta. Chatanachata ano cha khâpasaw ta reih leipa ei ta, lymâ rai pie khoh leipa ei ta. Châhrasala ano cha a thlih thlâh ha ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |