Sawla a chipa vâta Davi a râna
1 Davi cha Nôba khih liata theihthaipa Ahimele lâta sie ta; Ahimele chata achalyuna chôta Davi cha vaw dy ta, a hnohta, “Kheihta zie ta e, nâ deita dia, ahyhmah sielâh hnei chi va?” tah ta.
2 Davi chata theihthaipa Ahimele hnohta, ‘Hmo pataosa ei châ chhuahpa maih nata bie ei cha piepa he ahyhmah ta pahno khah se,’ khâchâ tah ha ta, chatawhcha satlia sahlao zy vaw y nawpa suzy rao na ta.
3 Khâpa zy e, na ku liata a y? Viahchhâ tlâ pangawh na pie la, a châ vei khiahtala na hneipa hawhpa maih rai,” tah ta.
4 Theihthaipa chata Davi cha a chhy ta, “Viahchhâ thlathiehpa cha hnei leipa na ta, viahchhâ pathaihpa deikua cha hnei na ta; satlia zy cha chanô liata ama pathaihpa ta a châ khiahtala,” tah ta.
5 Davi chata theihthaipa cha a chhy ta a hnohta,” Atahmâ noh thôh chhôh cha chanô liata eimâ pathaisa khai hmeihseihpa a châ; ei vaw pua chy chhao khata satlia zy hmobaoh cha a pathaih; a sie chakhypa eima châ tarawpa ta; atanoh chhochhi cha eima hmobaoh a pathaih pachai heih aw dia!” tah ta.
6 Chatanachata theihthaipa chata viahchhâ pathaihpa cha pie ta; cha liana chata viahchhâ sopa ama la nota, viahchhâ sahpa ta ri awpa ta ABEIPA hmiakô tawhtapa ama lapa dei leipa ta cha viahchhâ hropa y tlôh lei khâh ta.
7 Cha noh liana chata Sawla chakaotuhpa hry liata chyhsa pakha ABEIPA hmiakô liata thlyupa ta y ta; a moh cha Dôeka châ ta, Edôma chyhsa Sawla sahroh a vaihtuhpa hry liata hyutuh chaipa châ ta.
8 Davi cha Ahimele hnohta, “Asei tlyma, zaozi tlyma a chakaih va chi mâ? ABEIPA hmiakô liata a parah a byuhpa vâta zaozi nata ei chaihraih khâpahmah vaw cheih hmâ va na,” tah ta.
9 Theihthaipa chata Philistina mo Kôliatha, Elah saikao liata na thiepa zaozi cha, theihthaipa viahpakao hnôh lâta poh ta pahlypa ta a y thlâh haw, cha cha na la khoh khiahtala la teh, cha dei leipa ta a hropa y vei,” tah ta. Davi chata, “Cha hlei khô; na pie teh,” tah ta.
10 Davi cha thyu ta, cha noh liana chata Sawla riahchi ta a râ ta, Katha beipa Akisa lâta sie ta.
11 Akisa chakaotuhpa zy chata a hnohta, “He chyhsa he, ama râh beipa Davi châ vei ma khâ? ‘Sawla ta a sâh a sâh thie ta,Davi ta a thy a thy, tahpa ta lâna chôta a kyh, hla ta ama sa ngâpa châ vei mâ?” tah ei ta.
12 Davi chata cha biezy cha a palôh liata a khô thlâh ha ta, Katha beipa Akisa cha chi ngaita ta.
13 A hmiakô liata a yzie panano ta, ama mohmô liana chata a pahrusa ta, ochhi zy cha thata chaphy ta, a kâhmi zy liana chata a pachih pathlao ta.
14 Akisa chata a chakaotuhpa zy hnohta, “Moh teh u, ahrupa a châpa pahno thlâh ha eichi ta; khazia e kei lâta namâ vaw chhi?
15 Ahrupa ei phahlapa vâta ma he chyhsa he a hruzie palâsa awpa ta ei hmiakô liata namâ vaw chhi tly? He chyhsa he ei o liata a vaw ngia bao hra aw ma?” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |