Davi abeipa châ awpa ta sathaw thupa a châ
1 ABEIPA ta Samuel hnohta, “Izarel mozy abei châta ei khoh khao vei tawhta Sawla vâna heta khachâ e pachârôhpa ta na y aw tly? Na ki liata sathaw pabie la, sie teh; Bethlehe chyhsa Zese lâta ei cha tuah aw, a sawchapawpa zy hry liatahpa abei châta ei rao haw,” tah ta.
2 Samuel chata, “Kheihta e, ei sie thei aw, Sawla ta a vaw thei khiahta cha ei na thie aw mâ tâh,” tah ta. ABEIPA chata, “Viahchao zeinô a chhi la, ABEIPA lâta atheih awpa ta ei vy,’ tah mah y.
3 Atheihna liana chata Zese cha aw la, na tao awpa cha cha chho aw na ta; a moh ei cha chho awpa cha sathaw na thupa mah y,” tah ta.
4 Samuel chata ABEIPA reipa hawhta tao ta, Bethlehe lâna chata sie haw ta. Khih liata machâ zy chata a chalyuna chôta ano vaw dy ei ta, “A phana kyh ta a vypa ma na châ?” tah ei ta.
5 Ano chata, “Phana kyh lâta a châ; ABEIPA lâta atheih awpa ta a vypa ei châ; a pathai ula, atheihna lâ a vy teh u,” tah ta. Chatawhcha Zese nata a sawchapawpa zy cha pathai ta, atheihna lâta aw ta.
6 Amâ vy nahta, Samuel ta Eliaba cha vaw moh ta, “ABEIPA sathaw thupa cha a hmiakô liata a ypa he a châ tlai na,” tah ta.
7 Châhrasala ABEIPA chata Samuel hnohta, “A hmisâ tlyma, a pôhraoh lâ tlyma moh khâ, ano he cha khoh va na; ABEIPA chata chyhsapa mona zie hawhta moh tlôh leipa ta; chyhsa chata khôtho lâ â lâna zie moh tyh ei ta, ABEIPA deikua chata pathipalôh lâta tlao a moh tyh,” tah ta.
8 Chatawhcha Zese chata Abinada aw ta, Samuel hmiakô lâta pavawsa ta, ano chata, “He chhao he ABEIPA a tlyhpa châ vei,” tah ta.
9 Chatawhcha Zese chata Samah pavawsa heih ta. Ano chata, “He chhao he ABEIPA a tlyhpa châ vei,” tah ta.
10 Zese chata a sawchapawpa zy pasari cha Samuel hmiakô lâta pavawsa ta. Samuel chata Zese hnohta, “ABEIPA ta he sahlao he a tlyh vei,” tah ta.
11 Samuel chata Zese hnohta, “He liana heta na sawchapawpa zy ama y paki khai ma?” tah ta. Ano chata, “A seihnai chaipa y heih ta, mietahkupa a vaih,” tah ta. Samuel chata Zese hnohta, “Kei pa-awsa teh, a vaw tlô hlâ lei cha pati dôh aw ma pi,” tah ta.
12 Chatanachata kei pa-aw sa ta, a vaw chhi ta. Ano cha a sia kawpa, mopadei a ngia ngaitapa, hmi pha ngaitapa châ ta. ABEIPA chata, “Thyu la, sathaw thu teh; he tlai he a châ na,” tah ta.
13 Samuel chata sathaw ôh ki cha la ta, a unawhpa zy hry liana chata ano cha sathaw thu ta; chatanachata ABEIPA Thlahpa cha cha noh tawhna chata Davi chô liata thata vaw tlô ta. Samuel thyu ta Ramah khih lâta sie haw ta.
14 ABEIPA Thlahpa chata Sawla puasai ta, ABEIPA tuapa ahripa ta ano patypamâ ta.
15 Sawla chakaotuhpa zy chata a hnohta, “Pachâ teh, Khazohpa tuapa ahripa ta cha patypamâ ta.
16 Eima zibeipa chata na chakaotuhpa na hmiako liata a ypa zy he, totâ a tô thai ngaitapa tlua awpa ta bie maniah pie teh; chatanachata Khazohpa a tuapa ahripa ta a cha patu tita, tô aw ta, na pha thlâh ha aw,” tah ei ta.
17 Sawla chata a chakaotuhpa zy hnohna chata, “A tô thai ngaitapa cha na tluapa ula, kei lâta a vaw chhi teh u,” tah ta.
18 Satlia pakha chata a chhy ta a hnohta, “Bethlehe chyhsa Zese sawchapawpa pakha hmô haw na ta, cha chyhsa cha a tô thai ngaitapa, chyhsa riahpha ngaitapa, adyuhpa chyhsa, bih rei thai ngaitapa, hmi pha ngaitapa châ ta; a hnohta ABEIPA chhao a y,” tah ta.
19 Sawla chata Zese lâta chyhsa tuah ta, “Na sawchachapawpa Davi, mietahkupa vaihpa ta a ypa cha kei lâta vaw pasiesa teh,” tah ta.
20 Zese chata alâ, viahchhâ nata kresawti ô kha a phaopa nata mie taw la ta, a sawchapawpa Davi cha Sawla pie awpa ta pacheisa ta.
21 Davi chata Sawla lâta kei tlô ta, a hmiakô liata a kei duah ta, ano chata vaw pasô kaw ta, a chariah chhaichhi a chabatuhpa ta y ta.
22 Sawla chata Zese hnohta, “Davi he ei hnohta y mawh sy, ei mo einâ dy kaw na,” tahpa ta chho awpa ta chyhsa tuah ta.
23 Khazohpa tuapa ahripa ta Sawla a patuna maih ta Davi chata totâ la ta, tô tyh ta; chatanachata Sawla cha vaw tlâ ta, pha ha heih tyh ta, ahripa chata puasai tyh ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |