2 Sawla cha Kibia râh pai lâ syulyu liata Mikron liata pawmikranat thei kô ry liata y ta: a hnohta chyhsa a ypa zy cha za charu tlyma châ ei ta.
3 Shilôh khih liata ABEIPA theihthaipa Eli sawchapawpa Phineha sawchapawpa Ikhabaw unawhpa Ahitu sawchapawpa Ahizah cha theihthaipa viahpakao a kypa ta y hra ta. Zawnatha cha a sie tahpa zawpi zy ta pahno leipa ei ta.
4 Zawnatha ta Philistina mo riahvaihtuhpa pheisaih sahlao yna lâ sie a chhuahna, saikao nata saikao likawh liana chata a hiakha lâ a hiakha lâ liana chata lôpanô pazaopa y ta, a miakhapa moh cha Bôzeza châ ta, a miakhapa moh cha Seneh châ ta.
5 Alô pazaopa miakha cha Mikmasa dady maw lâchhâh ta y ta, a hropa miakha cha Keba dady chho lâchhâh ta a y.
6 Zawnatha chata a chariah chhaichhi a chabatuhpa satlia hnohna chata, “A vy teh, chopawtai leipa sahlao pheisaih zy yna lâna haota vaw tua ei si; ABEIPA chata hmo maniah a taopa ngyu aw la; ABEIPA chata cha a hluh tlyma, a chyh tlyma pachhapa cha khâpahmah tao thei leina y hlei tlôh lei khâh ta,” tah ta.
7 A chariah chhaichhi a chabatuhpa chata a hnohta, “Na palôhrupa liata a ypa hawhta tao teh; na palôhrupa hawhna tlai cha ei palôhrupa a châ,” tah ta.
8 Zawnatha chata, “A vy tua, âmo lâna haota vawh aw pi ta, a kei luah aw pi ta.
9 Âmo ta eima hnohta, ‘Nâmo lâta eima y hlâ lei cha vaw y thlâh ha teh u,’ maniah ama tah khiahtala eima su liata a duah thlâh ha aw pi ta, âmo lâta khy leipa aw pi ta.
10 ‘Keimo lâta a khy teh u,’ ama tah khiahta deikua cha khy aw pi ta, ABEIPA ta eima ku liata maniah a pie haw tahpa eima châta pahnona a châ aw,” tah ta.
11 Chatawhcha âmo chata a luah ei ta; Philistina mozy chata, “Moh teh u, Hebrai mozy amâ nyuna khaotlôpa tawhtapa ama vaw pua haw,” tah ei ta.
12 Riahvaihtuhpa pheisaih sahlao yna liata chyhsa zy chata Zawnatha nata a chariah chhaichhi a chabatuhpa cha, “A khy ula, hmo khâpa tlyma eima cha pamosa aw,” tahpa ta aw ei ta. Zawnatha chata a chariah chhaichhi a chabatuhpa hnohta, ”Na kaw zi teh; ABEIPA chata âmo cha Izarel mozy ku liata a pie haw,” tah ta.
13 Zawnatha cha a ku nata a phei ta kiah ta, a chariah chhaichhi a chabatuhpa chata zi ta. Philistina mo cha Zawnatha hmiakô liana chata thata pao ei ta, a chariah chhaichhi a chabatuhpa chata a vaw thie lymâ hra;
14 Zawnatha nata a chariah chhaichhi a chabatuhpa chata ama thie tua chai noh liana chata bai khophie tuna tlyma awpa liana heta chyhsa syno ama thie.
15 Riehmo liata chyhsa zy sibiepa su liata chyhsa zy, zawpi zydua cha a chalyu ei ta; riahvaihtuhpa pheisaih zy nata hraotuhpa sahlao zy chhao cha a chalyu hra ei ta, chatawhcha alo a sih ta, thata a chalyuna vaw y ta.
16 Benzami râh Kibia liata Sawla riahvaihtuhpa zy chata mohmia pasaih ei ta, zawpi zy cha pai ei ta, pai pathlahpa ta ama viavi chakhy hôlô.
17 Sawla ta a hnohta zawpi a ypa zy hnohna chata, “Atahmâ he maluh a reih ula, ahyzy ma a ki leipa moh teh u,” tah ta. Chatawhcha a reih ei ta, Zawnatha nata a chariah chhaichhi a chabatuhpa cha y leipa ei ta.
18 Sawla chata Ahizah hnohta, “Khazohpa Byh cha vaw cheih teh u,” tah ta. Cha nona chata Khazohpa Byh cha Izarel pathlazy hnohta y ta.
19 Sawla ta theihthaipa bie a chho hai nona chata; Philistina mozy riehmo lâta tymana cha thata y ta; Sawla chata theihthaipa hnohta. “Na ku la teh,” tah ta.
20 Chatanachata Sawla nata a hnohta zawpi a ypa zydua cha a pahmaohpakhy ei ta, adyuhna lâ sie ei ta, âmo nata âmo zaozi ta thata a dyuh ei ta, atymâ ngaita ei ta.
21 Cha râh chhôh liata chyhsa riehmo lâta a sie hrapa, cha hlâ ta Philistina mo chhâh a châpa Hebrai mozy chhao cha Sawla nata Zawnatha hnohta a ypa Izarel mozy lâna chata a vaw palie haw ei ta.
22 Cha hawhna hra chata Ephrai tlâh râh liata Izarel mo a nyupa zydua chhao khata Philistina mozy amâ râpai tahpa vaw thei ei ta, âmo chhao chata adyuhna liata a hlao hrapa ta thata a chadai hra ei ta.
23 ABEIPA ta cha noh liana chata Izarel mozy cha pachha ta; chatawhcha Bethave taih tlaita adyuh ei ta.
24 Cha noh liana chata Izarel mozy cha ama nôpo ta; châhrasala Sawla chata, “Eima khakhaipa zy chô liata phuh lapa ta a zâlâ hlâta ahyrai ta pati a nie khiahtala chhiesapa ta y mawh sy,” tahpa ta zawpi chho ta. Chatanachata ahyhmah ta pati rai, a padi chhao padi leipa ei ta.
25 Zawpi zydua chata râhmâhpa kei tlô ei ta; a lei liata kheihti zy vaw y ta.
26 Zawpi ta râhmâhpa ama tlô nahta, kheihti zy vaw loh ta, châhrasala ahyhmah ta palie veih ei; chhiesana cha zawpi zy ta chi ei ta.
27 Châhrasala Zawnatha chata a paw ta zawpi zy chho ha ta chhiesapa ta bie a piepa cha pahno leipa ta, a chôhchahrei chabapa pawhmao cha kheihthlaw liata dy ta, palie ta; chatanachata a mo padei vaw sia ha ta.
28 Zawpi hry liata chyhsa pakha chata bie a chho ta, “Na paw ta, ‘Zawpi sahlao he atanoh ta pati a niepa maih cha chhiesapa ta y mawh sy,’ tahpa ta khâchâ maniah chho ta, zawpi zy chhao panao kaw ei ta,” tah ta.
29 Zawnatha chata, “Ei pâ heta, chyhsa zy nô tlâ a papo he tlyma; moh teh u, kheihti a chyhta ei padipa vâta ei mo padei a vaw siazie hih.
30 Zawpi heta ama hraopa hmo he ama hmôpa maih atanoh he ama khopa hawhta nih thei chhochhi ei sala thata a châ aw; cha vâna chata Philistina mozy cha thata eima thie thei leina a châ hih,” tah ta.
31 Cha noh liana chata Mikmasa tawhta Aizalô taihta Philistina mozy cha adyuh ei ta. Chatawhcha zawpi zy cha panao kaw ei ta;
32 zawpi zy chata ama hraona hmo cha a zaw hnao ei ta, mietahkupa zy, viahchao tôhpa zy, viahchao taw zy, patu ei ta, alei liata thie ei ta; a thisaih chhaota nie ei ta.
33 Thokha zy ta, “Zawpi zy chata thisaih chhaota niepa ta ABEIPA chô liata hmo ama parao haw,” tahpa ta Sawla cha chho ei ta. Ano chata, “Piepie ngaitapa ta hmo nama tao; atanoh he alô lai ngaitapa na vaw pahluapa teh u,” tah ta.
34 Sawla chata, “Zawpi hry liata a khie ula, ama hnohta, ‘Chyhsa to ta, a viahchao nata a mietahkupa kei lâta vaw cheih sala, he liana heta vaw thie sala, nie mawh sy; thisaih chhaota niepa ta ABEIPA chô liata hmo parao leipa ta,’ a tah na, kei tah teh u,” tah ta. Cha zâ liana chata chyhsa zydua ta ama viahchao tôhpa a vaw chhi chyu ei ta, cha liana chata thie ei ta.
35 Sawla chata ABEIPA châta maisâh tao ta; cha cha ABEIPA châta a maisa tao tua chaipa a châ.
36 Sawla chata, “Zâ ta Philistina mozy a zâ dyuh ei sila, my khih a pavâhna taihta hrao ei suh u; ahyhmah pahlôh kha ei suh u.” tah ta. Âmo chata, “A pha na tahpa maihta tao teh,” tah ei ta. Theihthaipa deikua chata, “He liana heta Khazohpa a hnia tua ei suh u,” tah ta.
37 Sawla chata Khazohpa a chhohia ta, “Philistina mozy cha ei zâ dyuh aw mâ? Izarel mo ku liata na pie aw mâ?” tah ta. Châhrasala cha noh liana chata a chhy vei.
38 Chatawhcha Sawla chata, “Nâmo zawpi hyutuhpa zydua cha a vaw hnia teh u; atanoh he a kheihhawhpa liata ma hmo eima parao pahno a chhuah teh u.
39 Izarel mozy a pachha tyhtuhpa ABEIPA hrona reipa ta ei reih, ei sawchapawpa Zawnatha hmotaopa liata rai châ sala, a thi thlyu awpa na a châ,” tah ta. Châhrasala zawpi hry liatahpa chata ahyhmah a chhypa rai y leipa ei ta.
40 Chatanachata Izarel sahlao zydua hnohna chata, “Nâmo sahlao he a nano ta y ula, kei nata ei sawchapawpa Zawnatha he a nano ta eima y aw,” tah ta. Zawpi zy chata Sawla hnohta, “A pha na tahpa maih hawhta tao teh,” tah ei ta.
41 Sawla ta, “Hy ABEIPA, Izarel Khazohpa, khazia e atanoh he na chakaotuhpa bie nâ chhy vei? He moleina he keima chô ta tlyma, ei sawchapaw Zawnatha chô lia tlyma rai a choh sala, hy ABEIPA, Izarel Khazohpa y, pachaona cha Urim châ ta, na chyhsa Izarel chô heta a choh khiahta cha Thumim châ mawh sy,” tah ta.
42 Sawla chata, “Kei nata ei sawchapawpa panano nawpa ta pachao teh u,” tah ta. Chatawhcha Zawnatha chô liata tlu ta.
43 Sawla chata Zawnatha hnohta, “Khâpa hmo ma na parao, na chho teh,” tah ta. Zawnatha ta chho ta, “Ei chôhchahrei chabapa pawhmao ta kheihti bâhta ei padi tlai, ei thi thlyu awpa na a châ,” tah ta.
44 Sawla chata, “Khazohpa ta a taopa hawhta tao sala, cha hlâta a tha via chhaota; na thi thlyu awpa na a châ, Zawnatha y,” tah ta.
45 Châhrasala zawpi zy chata Sawla hnohta, “Izarel hry liata he pachhana rôhnah ngaitapa a hriatuhpa Zawnatha he a thi aw ma? Châ bao va! ABEIPA hrona reipa ta eima reih, a sâbu miakha chhao he alei liata tla chachei aw vei; atanoh he Khazohpa a hrialâhpa a châ hih,” tah ei ta. Chatanachata zawpi chata Zawnatha cha thi lei awpa ta pachha haw ei ta.
46 Sawla ta Philistina mozy a chadaipa cha kuasai haw ta; Philistina mozy cha âmo yna su lâta sie haw ei ta.
47 Sawla Izarel mo chô liata ryureituhpa ta a châ nahta, su to liata a khakhaipa Môaba mozy, Amawna pathla zy, Edôma mozy, Zôba abei sahlao zy Philistina mozy cha adyuh ta, â heina lâ maihta pahnie lymâ ta.
48 Riahpha ngaitapa ta adyuh ta, pahnie lymâ ta, Amale mozy pahnie ta, Izarel sahlao cha âmo a hraotuhpa zy ku tawhtapa a pachha.
49 Sawla sawchapawpa zy cha Zawnatha zy, Isavi zy, Melkhisua zy châ ei ta; a sawchanônô zy pano moh cha, a uhtheipa Meraba châ ta, a seihnaipa Mikhal a châ;
50 Sawla lahpinô moh cha Ahinô, Ahimaza sawchanônô a châ. A pheisaih zy hyutuhpa moh cha Abne, Sawla puhpa Nera sawchapawpa a châ;
51 Kisa cha Sawla paw châ ta, Abne paw Nera cha Abiel sawchapawpa châ ta.
52 Sawla hro chhôh zydua cha Philistina mozy nata thata adyuh tyh ei ta; Sawla chata chyhsa thatlôpa tlyma, riahphapa tlyma a hmôpa maih la lymâ tyh ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 |