Davi ta achhyna-o patlô awpa ta Sawlawmaw liata a pahnieh
1 Davi ta Izarel hyutuhpa zydua pho pawhrâhpa zy abei chakaotuhpa ta a thla tyhpa py hyutuhpa zy, pheisaih sâh kha hyutuhpa zy, abei nata a sawchapaw zy, sôh nata hmo hneipa zydua chô liata hyutuhpa zy, chyhsa laipa nata chyhsa thatlôpa, riahphapa zydua chhaota Zerusale liata awpakhy ta.
2 Chatanachata Abei Davi cha a duah ta; “Ei unawhzy nata ei chyhsa zy saih u, ei bie he vaw nahthlie teh u, kei chata ABEIPA Biehraina Byh sona nata eima Khazohpa phei tlyna awpa o sa awpa ta pachâ tyh na ta, sana awpa chhao a hluhpi hnei haw na ta.
3 Châhrasala Khazohpa ta ei hnohta, ‘Nâma la adyuhpa chyhsa, thisaih a palopa chyhsa na châpa vâta, ei moh châta o sa aw va chi,’ tah ta.
4 Anodeikuacha ABEIPA Izarelzy Khazohpa ta ei paw chhôhkha zydua hry tawhtapa, Izarelzy abei ta chhâzaw ta y awpa ta nâ tlyh haw ta; Zudah pho cha pawhrâhpa châta a tlyh haw ta, Zudah phozy hry liata ei paw chhôhkha zy, ei paw sawchapawpa zy hry tawhtapa Izarel zydua abei ta nâ tlyh haw ta.
5 Chatawhcha ei sawchapaw zydua hry liana chata, (ABEIPA ta sawchapaw hluhpi na pie ta) Izarel zy abei chata ABEIPA khihnarâh abeidyuchhai liata atyuh awpa ta ei sawchapawpa Sawlawmaw he a tlyh haw ta.
6 Chatanachata ei hnohta, ‘Na sawchapawpa Sawlawmaw ta ei o nata ei tlyhmia zy cha a padua aw, ei sawchapaw chata a tlyh haw na ta, chatanachata a paw ei châ aw.
7 Ei biepiepa zy nata ei pachiana zy a pyh thlâh ha khiahtala, atahmâ nama taopa hawhna heta a khihnarâh cha chhâzaw châta ei pa-i aw,’ tah ta.
8 Chatanachata ABEIPA zawpi Izarel sahlao zydua mohmô liata nata eima Khazohpa theina liana heta ABEIPA nama Khazohpa biepiepa zydua he a pyh awpa nata pachâ awpa ta ei cha pasyu ei. Chatanachata he râh pha ngaitapa he pahrâ aw eichi ta, nama hnôh lâta nama pathlazy chhâzaw châta nama patosa pachhuah lymâ aw.
9 “Chatawhcha nâ, ei sawchapawpa y, na paw Khazohpa he pahno la, pathipalôh pha pakipa nata palôhrupa aly ngaitapa ta chakao mah y; ABEIPA chata pathipalôh moh tyh ta, palôhrupa liata pachâpa zydua he a pahno khai. Ano na tlua khiahtala, hmô aw chi ta; nâ heisai khiahta deikua cha chhâzaw ta a cha thy aw.
10 A chado teh, supathaihpa châta o sa awpa ta ABEIPA ta a cha rao haw hih; thatlô ngaitapa y la, hria teh,” tah ta.
11 Chatanachata Davi chata a sawchapawpa Sawlawmaw cha achhyna-o aikah nohthlahpa zy, a o nohthlahpa zy, sôh sopakhyna o nohthlahpa zy, a chhôhpadâhpa chô chaipa nohthlahpa zy, a chhôh chhôhpadâhpa chô chaipa nohthlahpa zy, a chhôh chhôhpadâhpa nohthlahpa zy, zawngiahna dyuchhai nohthlahpa zy,
12 a palôhrupa ta a pachâpa hawhpa zydua, ABEIPA o dôhpachhôh tlyhmia nohthlahpa zy, a chheipâh chhôhpadâhpa zydua nohthlahpa zy, Khazohpa o liata sôh sopakhyna o nohthlahpa zy, hmo pananopa sopakhyna o nohthlahpa zy cha pie ta;
13 theihthaipa zy nata Livai sahlao zy a hlao a hlao ta ama yna awpa nohthlahpa zy, ABEIPA o liata chakaona la awpa zydua nohthlahpa zy, ABEIPA o liata chakaona awpa hmobaoh zydua nohthlahpa zy chhao,
14 chakaona châta hmobaoh chi to, ngôh hmobaoh awpa, ngôh hmâna hluh zie awpa zy, chakaona lâ châta tâkâri hmobaoh awpa, tâkâri hmâna hluh zie awpa zy;
15 ngôh meiôh sona nata a meiôh awpa hmâna hluh zie awpa zy, mei sona nata a meiôh châta hmâna hluhzie awpa zy, meiôh sona liata hmâ byuhna chyu lymâ hawhta tâkâri meiôh sona awpa châta hmâpa hluh zie awpa zy chhao,
16 viahchhâ sona tlâhkhai awpa miakha lymâ châta ngôh hmâna hluhzie awpa zy, tâkâri tlâhkhai zy châta tâkâri hmâna hluhzie awpa zy,
17 ngôh suapa sa thaona thua a kohpa zy, rahô zy, nyu zy châta chhaota; ngôh biebuh awpa miakha lymâ châta hmâna hluhzie awpa zy; tâkâri biebuh awpa biebu miakha lymâ châta hmâna hluhzie awpa zy;
18 ngôh suapa rohpahâhpa raona maisâh awpa hluhzie zy; cherubi zy, ama mathlaw pakaipa ta ABEIPA Biehraina Byh khupa nohthlahpa hawhta taona awpa ngôh zy chhaota.
19 Davi cha he zydua he ABEIPA ta ano ku tlaita roh ta, he a nohthlahpa zydua he a pahnosapa ta a pahno.
20 Davi ta a sawchapawpa Sawlawmaw hnohta, “Thatlô ngaitapa ta nata riahpha ngaitapa ta y la, hria teh. Chi kha la, palôh duapa ta y hra khâ; ABEIPA Khazohpa, ei Khazohpa he na hnohta a y na. ABEIPA o raihria zydua he paloh khaipa a châ hlâ lei cha cha siesaipa ta cha pathlua aw vei.
21 Chatawhcha Khazohpa o raihria to a hriatuhpa py theihthaipa zy, Livai sahlaozy y ei ta, khâpa raihria liata rai kyh to liata raihria thaipa khoh ngaitapa chyu ta cha baotuh awpa na hnohta y lymâ aw ei ta; hyutuhpa zy nata zawpi zydua chhaota na bipipa maih cha ama zyh lymâ hra aw,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 |