Khazohpa nata Davi likawh ta biehraina (2 Sm 7: 1-29)
1 Chatawhcha Davi cha a o liata a y nota hrohsopa Natha hnohta Davi chata, “Keima cha sidy tho o liata y na ta, châhrasala ABEIPA Biehraina Byh cha poh raipa ry liata y ta,” tah ta.
2 Natha chata Davi hnohta, “Na palôhrupa ta na pachâpa hawhna tlai chata tao teh, Khazohpa na hnohta a y mâ tâh.” tah ta.
3 Cha zâ liana tlai chata Natha hnohta Khazohpa bie vaw tlô ta,
4 Ei chakaotuhpa Davi cha kei chho teh, ABEIPA chata he tana heta a tah: ‘Ei pahrâna awpa ta nâma ta o eina sapa awpa chi châ vei.
5 Izarel pathlazy Izi râh tawhtapa ei chhihtha tawhta atanoh taihta o liata pahrâ leipa na ta, poh-o nata achhyna byureih liata tlao pahrâ tyh na ta.
6 Izarel sahlao zydua nata eima siena maih liata chhao ei chyhsa zy pasa awpa ta bie ei piepa Izarel sahlao ryureitupazy hnota, “Khazia e, sidy thota o eina sa pa vei ei chi.”ei tah bei rai ma?
7 Chavâta ei chakaotuhpa Davi hnohta he tana heta reih teh, ‘Pheisaihzy ABEIPA chata mietahkupa pabâsana su tawhtapa na mietahkupa vaih hai nona cha, ei chyhsa Izarel zy chô liata abei awpa ta cha la na ta;
8 na siena maih liata na hnohta y lymâ na ta, na khakhaipazy na hmiakô tawhtapa cha pahleipa lymâ na ta; alei liata chyhsa rôhnah ngaitapa zy hawhta moh rona ngaitapa ei cha taopa aw.
9 Chatawhcha ei chyhsa Izarel zy chata su rao aw na ta, a pasie khao leipa ta âmo tovyuh su liata ama pahrâ lymâ thei nawpa ta âmo cha lo aw na ta;
10 cha hlâta ei chyhsa Izarelzy chô liata ryureituhpa zy ei rao nota moleina sawzy ta ama tao tyhpa hawhna khata ama rie pathei khao leipa aw ei ta, na khakhaipa zydua chhao ei panawhsa hra aw. Cha leipa chhao cha ABEIPA chata chhôhkha a cha paduapa aw tahpa ei cha chho.
11 Na noh tlôpa ta na mahpaw zy lâta na sie tina chata na hnôh lâta na pathla na sawzy hry liatahpa cha padua aw na ta, a khihnarâh cha ei pa-i aw.
12 Ano chata o na sapa aw ta, a abeidyuchhai cha chhâzaw ta ei pa-i aw.
13 Chatanachata a paw châ aw na ta, ano cha ei sawchapawpa châ aw ta; ei zawngiahna na hmialâ tahpa ei lapa hawhna khata ano la lapa aw va na,
14 ei o liata nata ei khihnarâh liata ano cha chhâzaw ta â ipa ta padua aw na ta, a abeidyuchhai cha chhâzaw ta pa-ipa a châ aw.’ tahpa ta,” tah ta.
15 Cha bie zydua nata cha aluahna hawh tlaita Natha chata Davi hnohta reih ta.
16 Chatanachata abeipa Davi cha a ngia ta, ABEIPA hmiakô liata atyuh ta, “Hy ABEIPA Khazohpa y, ahyma châ na ta, ei chhôhkha zy chhao ahyma châ ei ta, he taih heta einâ chhi chi?
17 Hy Khazohpa y, chazy chhao cha nâma mohmô liana chata hmo chyhpa ta dei châ ta; châhrasala hy ABEIPA Khazohpa y, na chakaotuhpa chhôhkha yzie awpa kyh cha kô hluhpi chhôh châta reih haw chi ta, chyhsa laipa hawhta na pachâ hra chi ta, hy ABEIPA Khazohpa y!
18 Na chakaotuhpa palyupalihpa ta a ypa kyh liana heta Davi ta khâpa e a reih khao aw? Na chakaotuhpa he a siapa ta pahno tlôh chi ta.
19 Hy ABEIPA y, na chakaotuhpa vâta nama palôhrupa liata a puapa lymâ hawhta he hmo rôhnah ngaitapa zy he pahnosa awpa ta hmo rôhnah ngaitapa zy tao haw chi ta.
20 Hy ABEIPA y, eima nah ta eima theipa ta cha nâma hawhpa rai y leipa ei ta, nâma leipa ta cha Khazohpa rai y hra veih ei.
21 Izi râh tawhtapa chatlaipa ta na chyhsa zy hmiakô liata pho hropa zy panawhpa ta, hmo rôhnah ngaitapa nata chichhih ngaitapa taopa ta, moh rôhnah ngaitapa cha taopa awpa ta Khazohpa ta ano chyhsa zy cha a vaw chatlaipa, na chyhsa Izarel zy hawhna rai he khizaw liata pho hropa ahy e a y?
22 Na chyhsa Izarel zy cha chhâzaw ta na chyhsa zy châta tao haw tlôh chi ta; na ABEIPA cha ama Khazohpa châ haw chi ta.
23 Chatanachata hy ABEIPA y, na chakaotuhpa kyh nata a chhôhkha zy kyh na reipa cha chhâzaw châta pa-i la, na rei hawhpa hawhna khata tao mah y;
24 Pheisaih zy Khazohpa cha, Izarel zy Khazohpa, Izarel châ tlaita Khazohpa a châ; tahpa ta na moh cha chhâzaw ta paipa ta, palyupalihpa ta y sala, na chakaotuhpa Davi chhôhkha zy cha na hmiakô liata pa-ipa ta y mawh sy.
25 Hy nâ, ei Khazohpa y, na chakaotuhpa hnohta chhôhkha na paduapa aw tahpa phuah haw tlôh chi ta; chavâta na chakaotuhpa heta na hnohta thlah ei chhâ ngâ.
26 Hy ABEIPA y, nâ cha Khazohpa châ chi ta, he hmo phapa he na chakaotuhpa cha bie vaw taih haw chi ta;".
27 na chakaotuhpa chhôhkha zy cha na hmiako liata chhâzaw ta ama y thei nawpa ta byhnâ pie haw chi ta; hy ABEIPA nâma ta byhnâ na piepa cha chhâzaw byhnâ a châ,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 |