Davi ta Izarel nata Zudah maluh a reih
1 Sâtâ ta Izarelzy cha adyuh haw ta, Davi cha Izarelzy maluh reih khohna pahneisa ta.
2 Davi chata Zôaba nata ama molaipa zy hnohta, “Sie ula, Besheba tawhta Dana taihta Izarel chyhsa zy maluh reih ula, a hluhzie ei pahno thei nawpa ta na vaw chho heih teh u,” tah ta.
3 Zôaba ta abeipa hnohta, “ABEIPA ta a chyhsa zy he a lie za kha raita papôh sala! Abeipa ei zibeipa, ei zibeipa chyhsa zy sai châ veih ei ma? Ei zibeipa ta cha cha khazia ma pahno a byuh tly? Khâpawpa ma Izarelzy thai châna a châ aw tly?” tah ta.
4 Châhrasala abeipa bie chata Zôaba cha pahnie haw ta. Chatanachata Zôaba cha pua ta. Izarel râh zydua liana chata sie ta, Zerusale lâta a di haw heih ta.
5 Zôaba chata chyhsa a ypa hluhzie cha Davi chho ta. Izarel râh liata zaozi a chabapa zydua cha thy za kha nata thy sy kha châ ei ta. Zudah râh liata zaozi a chabapa cha thy sy palih nata thy sari ama châ.
6 Livai mo nata Benzami mo deikua cha rei pa vei, abeipa bie cha Zôaba a hao ngaitana zie châ tlôh ta.
7 Cha kyh liana chata Khazohpa a ly leipa ta, chatanachata Izarel mo cha hrie haw ta.
8 Davi ta Khazohpa hnohta, “He ei hmotaopa liana heta thata ei molei haw. Châhrasala na chakaotuhpa hmoparaona he ngiachhiepa ta a ngiahthai mah y, hru ngaitapa ta ei vaw tao haw,” tah ta.
9 ABEIPA ta hrohsopa Kada hnohta,
10 Sie la, Davi hnohta, ‘ABEIPA ta he tana heta a tah, hmo kyh thôh ei cha raopa, na chô liata ei tao awpa ta miakha cha a tlyh teh,’ a tah na,” tahpa ta reih ta.
11 Chatanachata Kada cha Davi lâta vawh ta a hnohta, “ABEIPA ta he tana heta a tah, ‘A kheihawhpa ma na khopa a tlyh teh:
12 kô thôh chakâhna ma? Na khakhaipa zy zaozi ta a chadaipa ta ypa ma? Noh thôh chhôh potlana, ABEIPA zaozi ta ABEIPA vâlyuhchâpa ta Izarel râh zydua liatahpa pahleipadiapa ma?’ tahpa ta. Nâ tuahtuhpa cha kheihta e ei chhy aw, a pachâ la na chho teh,” tah ta.
13 Davi chata Kada hnohta, “Ei nôpo kaw ta; ABEIPA ku liata athy thlu aw sala, a zawngiahna he thata châ tlôh ta; chyhsapa ku liata cha rie na thy thlu cheita kha y,” tah ta.
14 Chatanachata ABEIPA ta Izarelzy hry liana chata hri chareisa ta; Izarel mozy cha thy sari thi ei ta.
15 Zerusale parao awpa ta Khazohpa ta vâlyuhchâpa tuah ta; a parao chyta ta ABEIPA ta vaw mo ta, hmo pha leipa tao a chhuahpa cha a ngiapachhi ta; chyhsa zy pahleipadia tuhpa vâlyuhchâpa hnohta, “A daih ha na; na ku hy khao khâ,” tah ta. Chatawhcha ABEIPA vâlyuhchâpa cha Zebu chyhsa Ôrana sawhri kiapâh liata a duah ta.
16 Davi cha mo hmia pasaih ta, ABEIPA vâlyuhchâpa zaozi phia chiehpa ta Zerusale chô liata pazawhpa ta alei nata avâ likawh ta a duahpa hmô ta. Chatanachata Davi lâta machâ sahlao chata latho poh abupa ta alei liata a khu haw ei ta.
17 Davi ta Khazohpa hnohta, “Keima he zawpizy maluh reih awpa bie a pietuhpa châ va na ma? Keima he hmo paraopa ta molei ngaitapa ta hmo a tao tyhpa cha ei châ. He mietahkupa zy heta khâpa hmo e ama tao? Hy ABEIPA ei Khazohpa y, keima nata ei paw chhôhkha zy chô liata na ku tlao pathla la; na chyhsa zy heta hri he pasa tao khao khah ei se,” tah ta.
18 Chatanachata ABEIPA vâlyuhchâpa ta Kada hnohta, Davi cha khypa ta Zebu chyhsa Ôrana sawhri liata ABEIPA châta maisâh tao awpa ta Davi chho awpa ta bie pie ta.
19 Kada ta ABEIPA moh ta a siepa hawhna chata Davi cha khy ta.
20 Ôrana cha a vaw heih ta, vâlyuhchôpa hmô ta, a sawchapawpa papalih a hnohta a ypa zy cha anyu haw ei ta. Ôrana cha sâh a tly nota châ ta.
21 Davi ta Ôrana lâta a kei tlô nahta, Ôrana cha a vaw heih ta, Davi cha hmô ta, sawhri tawhtapa cha pua ta, a hmia alei lâ a khupa ta Davi hmiakô liata pao ta.
22 Chatanachata Davi ta Ôrana hnohta, “He sawhri he ABEIPA chôta maisâh ei tao nawpa ta na pie teh, a mâ a tlohpa ta na pasai teh, zawpi zy tawhtapa hri a pai thei nawpa ta,” tah ta.
23 Ôrana ta Davi hnohta, “La thlâh ha teh; abeipa ei zibeipa chata a ryh a tahpa hawhta tao se; moh teh, raopa hlâna châta viahchao tôhpa zy, tho chata sawhri chhaichhi zy, niepa hlâna châta sâh zy ei cha pie aw. Ei châ tôh khai aw,” tah ta.
24 Châhrasala abeipa Davi ta Ôrana hnohta, “Châ bao va, a mâ a tlohpa ta ei chalei aw na; a mâ leipa ta nâma eih cha ABEIPA châta la leipa aw na ta, a raopa hlâna chhao hlâ aw va na,” tah ta.
25 Chatanachata Davi ta cha su chaleina châta Ôrana cha kho pathliahpa ta ngôh sekel za charu pie ta.
26 Davi ta cha liana chata ABEIPA châta maisâh tao ta, raopa hlâna zy nata adyhna hlâna zy hlâ ta ABEIPA cha pado ta, ano cha maisâh chô liata mei ta avâ tawhta a zâ chhy ta.
27 Chatawhcha ABEIPA ta vâlyuhchâpa cha bie pie ta; a zaozi cha a paih liata khô haw heih ta.
Achhyna-o sa nawpa su
28 Davi ta Zebu chyhsa Ôrana sawhri liata ABEIPA ta a vaw chhy tahpa a pahno nahta, cha liana chata atheih ta.
29 Cha nona chata Mawsi ta râhpathohpa liata ABEIPA a chhyna byureih nata raopa hlâna maisâh a taopa kha Kibia khih liata su a sâhpa liata a y;
30 châhrasala Davi cha ABEIPA vâlyuhchâpa zaozi a chipa vâta Khazohpa a chhohia awpa ta cha lâna chata sie thei vei.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 |