Abeipa Byh Zerusale liata sopa a châ
1 Davi chata Davi khihpi liana chata ano châta ozy sa ta; Khazohpa Byh yna su a chhuanoh ta, poh-o rai pa ta.
2 Chatanachata Davi ta, “Khazohpa Byh he Livai mozy dei leipa ta cha ahyhmah ta amâ sy awpa châ vei, Khazohpa Byh he chhâzaw ta a sytuhpa nata a chakaotuhpa châta ABEIPA a tlyhpa ama châ na,” tah ta.
3 Davi ta ABEIPA Byh sona awpa su a chhuahnohna liata soh awpa ta Zerusale liata Izarel sahlao zydua cha pakhy ta.
4 Davi ta Arawna sawzy nata Livai mo pakhy ta;
5 Kôha pathlazy hry tahpa, pawhrâh chaipa Uriel a unawhpa zy chhaota za kha nata syno;
6 Merari pathlazy hry tahpa, pawhrâh chaipa Asaiah, a unawhpa zy chhaota za no nata syno;
7 Kasao pathlazy hry tahpa pawhrâh chaipa Zôel a unawhpa zy chhaota za kha nata sythôh;
8 Elizapha pathlazy hry tahpa pawhrâh chaipa Shemaiah, a unawhpa zy chhaota za no;
9 Hebraw pathlazy hry tahpa pawhrâh chaipa Eliel a unawhpa zy chhaota sycharie;
10 Uziel pathlazy hry tahpa, pawhrâh chaipa Aminada a unawhpa zy chhaota za kha nata pahrawhleino.
11 Chatawhcha Davi ta theihthaipa Zadôka nata Abiatha nata Livai mo Uriel zy, Asaiahzy, Zôel zy, Shemaiah zy, Eliel zy, Aminada zy aw ta,
12 ama hnohta, “Nâmo he Livai mo pawhrâh chaipa zy châ eichi ta; Izarel zy Khazohpa ABEIPA Byh cha a su ei chhuahnohpa lâta namâ sy thei nawpa ta, nâmo he nama unawhpa zy chhaota a pathai teh u.
13 Cha hlâna chhao khata nâmo ta namâ sy leipa vâta ABEIPA eima Khazohpa cha eima chô liata a pathi a ia, biepiepa hawhta eima tao khao vei,” tah ta.
14 Chatanachata Izarel zy Khazohpa ABEIPA Byh a sy awpa châta theihthaipa zy nata Izarel mozy cha a pathai ei ta.
15 ABEIPA biepiepa Mawsi ta a reipa hawhna khata Livai pathlazy chata Byh cha a lâ ta a sy haw ei ta.
16 Davi ta Livai mo pawhrâhpa zy cha ama unawhpa zy hry tahpa hlasapa zy, paropasyupa tlaipi zy, totâ zy, paotlâ zy chhaota, a paro ngaitapa nata thapha ngaitapa ta hla sa awpa ta paraosa ta.
17 Chatanachata Livai mo chata Zôel sawchapawpa Hima zy, a unawhpa zy hry tahpa Berekhi sawchapawpa Asapha zy; ama unawhpa Merari sawchapawpa zy hry tahpa Kusai sawchapawpa Etha zy rao ei ta;
18 chatawhcha ama unawhpa zy py nona hry tahpa Zekaria zy, Behi zy, Shemiramo zy, Zahiel zy, Uni zy, Eliaba zy, Benai zy, Maasei zy, Matithiah zy, Eliphelehu zy, Mikneiah zy, ochhivaihtuhpa Ôbededôma nata Zeiel zy chhaota rao hra ei ta.
19 Hla satuhpa sahlao Hima zy, Asapha zy, Etha zy cha dawh paotlâ paro ngaitapa ta tô awpa ta raopa châ ei ta;
20 Zekaria zy, Aziel zy, Shemiramô zy, Zehiel zy, Uni zy, Eliaba zy, Maasei zy, Benai zy, cha tlaipi chhaota Alamaw sa awpa ta raopa châ ei ta;
21 Matithiah zy, Eliphelahu zy, Mikneiah zy, Ôbededôma zy, Zeiel zy, Azariah zy cha totâ zy chhaota Shemini sapa ta hmia a sah awpa ta raopa ama châ.
22 Livai mo pawhrâhpa Khenaniah cha hla sa hyutuhpa a châ, a thaipa vâta hla sana kyh liata chhithatuh chaipa a châ.
23 Berekhi nata Elkanah cha Byh châta ochhi a vaihtuhpa ama châ.
24 Theihthaipa sahlao Shebaniah zy, Zehôsapha zy, Nethanel zy, Amasai zy, Zekaria zy, Benai zy, Eliaza zy ta Khazohpa Byh hmiakô liata chiahmie tô ei ta. Ôbedadôma nata Zehia cha Byh châta ochhi a vaihtuhpa ama châ hra.
25 Chatanachata Davi nata Izarel machâ sahlao nata pheisaih sâh kha hyutuhpa zy cha Ôbedadôma o liatahpa ABEIPA Biehraina Byh cha za la awpa ta thapha ngaitapa ta zu haw ei ta.
26 Chatawhcha ABEIPA Biehraina Byh a sytuhpa Livai mozy cha Khazohpa ta bao ta. Viahchao tôhpa pô sari nata mietahkupa tôhpa pô sari ta atheih ei ta.
27 Davi nata Byh a sytuhpa Livai mo zydua nata hla satuhpa zy nata hla sa hyutuhpa Khenaniah zy cha lini poh rihdipa ta a tobipa ta; Davi chata lini poh ephod a ky hra ta.
28 Chatanachata Izarel mo zydua chata thata awh na chô nata chiahmie pyu nata chiahmie tô ngâpa nata paotlâ zy, tlaipi zy, totâ zy chhaota paro ngâpa ta ABEIPA Biehraina Byh cha khykhei haw ei ta.
29 Chatawhcha ABEIPA Biehraina Byh Davi khih liata a ngia nona chata Sawla sawchanônô Mikhal chata opy tawhta vaw sai ta, Beipa Davi lâpa nata a sualiepa cha vaw hmô ta; a palôhrupa ta mohnao kaw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 |