1 Thâtihzy Rona 18
Davi ta râh a pakawh
1 Cha hnôh lâna chata Davi ta Philistina mozy cha adyuh ta, pahnie ta, Katha khih nata a khichapeizy cha Philistina mozy tawhta la ta.
2 Môaba mo adyuh heih ta, Môaba mozy cha Davi chakaotuhpa vaw châ haw ei ta, chhiezy cheih tyh ei ta.
3 Davi chata Euphrate chavah liata a khihnarâh padua awpa ta a sie nota, Zôbah beipa Hadadeza chhao Hama kiapâh liata adyuh heih ta.
4 Chatanachata Davi chata talaili sâh kha nata arâ a kiahpa chyhsa sâh charie nata pheisaih thy no patu ta; Davi chata talaili a daophipa arâ zydua cha ama chazaw chhawh ta, talaili za kha a daophi awpa deikua cha pahlôh ta.
5 Damaska liata Suria mozy Zôbah beipa Hadadeza pachha awpa ta a vy ei ta, Davi ta Suria chyhsa thy no nata sâh no thie ta.
6 Chatanachata Davi chata Damaska liata Suria mozy hry liana chata pheisaih soh ta; Suria mozy cha Davi chakaotuhpa vaw châ haw ei ta, chhiezy vaw cheih tyh ei ta, ABEIPA chata Davi cha a siena maih liana chata pahniesa lymâ ta.
7 Davi chata Hadadeza sahlao zy ngôh vyhphao zy lapa ta, Zerusale lâta cheih ta.
8 Hadadeza khih Tibha nata Kuna liatahpa Davi chata dawh a hluhpi vaw cheih ta; chazy chata Sawlawmaw ta dawh tilaipi zy, a patyuna zy, dawh hmobaoh zy tao ta.
9 Hama beipa To-u chata Zôbah beipa Hadadeza pheisaih zydua cha Davi ta a pahnie tahpa a vaw thei nahta,
10 Hadadeza cha adyuh ta a pahniepa vâta a naoh awpa nata alykhei awpa ta a sawchapawpa Hadawra cha Davi lâta tuah ta; Hadadeza nata To-u cha adyuh tyhpa châ tlôh ei ta. Ngôh nata tâkâri nata dawh hmobaoh to cheipa hra ta;
11 chazy chhao cha râh hropa a pahniepa zydua liatahpa tâkâri nata ngôh a lapa zy chhao chata Davi ta ABEIPA lâta hlâ ta, Edôma mo tawhtapa zy, Môaba mo tawhtapa zy, Amawna pathla tawhtapa zy, Philistina mo tawhtapa zy, Amale mo tawhtapa zy.
12 Chatawhcha cha leipa chhao Zeruia sawchapawpa Abisai ta Edôma mo thy kha nata sâh charie Alôh Saikao liata thie ta.
13 Edôma râh liata pheisaih zy soh ta; chatanachata Edôma mo zydua cha Davi chakaotuhpa vaw châ haw ei ta. ABEIPA ta Davi cha a siena maih liata pahniesa lymâ ta.
Davi chakaotuhpa zy
14 Chatanachata Davi chata Izarel mo zydua chô liata ryu reih ta; a chyhsa zydua chô liana chata a sia ngaitapa ta ryu reih ta.
15 Zeruia sawchapawpa Zôaba cha pheisaih hyutuh chaipa châ ta, Ahilu sawchapawpa Zehôsapha cha thâti rohtuhpa a châ;
16 Ahitu sawchapawpa Zadôka nata Abiatha sawchapawpa Abimeleka cha theihthaipa châ ei ta, Savesa cha chârohtuhpa a châ;
17 Zehôiada sawchapawpa Benai cha Khere mo nata Pele mozy hyutuhpa châ ta, Davi sawchapawpa cha abeipa a chakaotuhpa hyutuh chaipa zy ama châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 |