1 Chatanachata Davi ta, “He he ABEIPA Khazohpa o vaw châ ta, he he Izarel zy raopa hlâna maisâh a vaw châ he zaw”, tah ta.
Achhyna-o châta Davi a chhuahnohna
2 Davi ta Izarel râh liata pho hropa a ypa zy cha awpakhy awpa ta bie pie ta, Khazohpa o sa nawpa ta alô daihtuhpa zy cha alô padaisa ta.
3 Davi ta dôhna ochhi nata a patu nawpa ta a khaina awpa thua hluhpi a chhuahnoh ta, dawh a hluhpi a hriana zie reitiah leipa chhaota,
4 sidy tho reitiah lei chhaota, Sidaw mo nata Tyre mozy ta Davi lâna chata tho hluhpi vaw cheih ei ta.
5 Davi ta, “Ei sawchapawpa Sawlawmaw he hawtipa châ ta, khâpahmah pahno mâh leipa ta, ABEIPA o sa awpa cha a rôhnah ngaitapa, a moh nata a rôhnahna cha râh to ta a pathâh awpa châ ta, chavâta ei chhuahnoh chhielie aw,” tah ta. Chatanachata Davi ta a thi hlâta thata a vaw chhuahnoh ta.
6 Chatanachata a sawchapawpa Sawlawmaw aw ta, ABEIPA Izarel zy Khazohpa o sa awpa ta bie pie ta.
7 Davi ta a sawchapawpa Sawlawmaw hnohta, “ABEIPA ei Khazohpa moh châta o sa a chhuah tyh na ta.
8 Châhrasala,‘Nâma la thisaih thata palo chi ta, adyuh khoh ngaitapa châ chi ta; alei chô liana heta ei mohmô ta thisaih thata na palopa vâta ei moh châta o sa aw va chi.
9 Sawchapawpa sa aw chi ta; ano cha adyhna akhohpa châ aw ta, a chheipâh râh liata a khakhaipa zydua tawhna chata thlahlôhna nata pa dyhryhna ei pie aw.
10 Ano chata ei moh châta o sa aw ta. Ano cha ei sawchapawpa châ aw ta, kei a paw ei châ aw. Izarelzy chô liata a khihnarâh abeidyuchhai cha chhâzaw châta ei pa-i aw,’ tahpa ta ABEIPA bie ei hnohta a vaw tlô.
11 Chatanachata ei sawchapawpa y, ABEIPA cha na hnohta y sala, thlaochhipa ta y lymâ la, nâma kyh a vaw rei chhielie hawpa hawhna khata, ABEIPA na Khazohpa o cha sa mah y.
12 ABEIPA ta sona nata novâhna zy cha pahneisa sala, Izarelzy chô liata biehneina cha pie mawh sy, chatanachata ABEIPA na Khazohpa ryhpa cha na zyh thei aw.
13 Chatanachata Izarelzy kyh liata bieraopa zy nata pachiana zy ABEIPA ta Mawsi a piepa kha na zyh khiahtala, thlaochhipa ta na y lymâ aw. Thatlô ngaitapa ta y la, riahpha ngaitapata y teh. Chi khâ; palôhduapa ta y hra kha.
14 Ei nôpo nota ABEIPA o châta ngôh talent thy sy kha nata tâkâri talent thy za kha a chhuahnoh haw na ta, dawh zy, thua zy chhao, a hrizie kho pathlia tiah lei, a hluhpi a châ, tho nata alô chhao a chhuahnoh haw na ta, chazy cha na pazao thei ha aw.
15 Chatawhcha raihriatuhpa thoâtuhpa zy nata alô adaituhpa zy nata zôthaipa rai to a hria theipa a hluhpi hnei hra chi ta,
16 reitiah lei ngôh zy, tâkâ zy, dawh zy, thua zy chhao. Thlai athao pâ thlâh ha teh! ABEIPA cha na hnohta y mawh sy!” tah ta.
17 Davi chata Izarel sahlao pawhrâhpa zydua cha a sawchapawpa Sawlawmaw bao awpa ta bie pie ta,
18 “ABEIPA nama Khazohpa cha nama hnohta y vei ma? Su to liata thlahlôhna cha pie veih ei ma? He râh liata chyhsa zy he ei ku liata vaw pie haw ta; râh cha ABEIPA hmiakô liata nata a chyhsa zy hmiakô liata panawhpa châ haw ta.
19 Chatanachata nama pathipalôh nata nama palôhrupa ta ABEIPA nama Khazohpa lâ aheih ula, thlai a thao ula, ABEIPA Biehraina Byh nata Khazohpa hmobaoh pathaihpa zy cha ABEIPA moh chata o sa awpa liata angiakhei nawpa ta ABEIPA Khazohpa su pathaihpa cha sa teh u,” tahpa ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 |