Mara Holy Bible: Zawsua

Showing posts with label Zawsua. Show all posts

Zawsua Bo 1

Kana râh pahniepa ta a chhuahdyna

1 ABEIPA chakaotuhpa Mawsi a thi tawhna chata Mawsi chakaotuhpa Nuna sawchapawpa Zawsua hnohta ABEIPA ta,

2 Ei chakaotuhpa Mawsi cha thi haw ta; thyu la, nâma nata he zawpi sahlao zydua chhao heta Zawdâh he chaka ula, âmo Izarel pathlazy ei piepa râh liana chata sie teh u.

3 Mawsi hnohta ei rei hawpa hawhna khata nama phei ta nama tlypa maih cha ei cha pie khai ei.

4 Râhpathohpa tawhta nata he Lebanaw tawhta chavah laipa Euphrate chavah taihta, Hiti mo râh zydua, notlana lâ Tilaipi Rôhnahpa taihta nama râhri a châ aw.

5 Na hro chhôhta la ahyhmah ta cha pahnie aw veih ei; Mawsi hnohta ei ypa hawhna khata, na hnohta chhao ei y hra aw na; cha pathlua leipa aw na ta, cha siesai chachei aw va na.

6 Thatlô ngaitapa nata riahpha ngaitapa ta y teh; ama pathlatuhpa zy chhiesapa ta pie bie ei taih hawpa râh kha he sahlao he patosa tlôh aw chi ta.

7 Na chakaotuhpa Mawsi ta ryhpa zydua zyh awpa ta bie a cha piepa kha khâchâ zyh awpa ta thatlô ngaitapa nata riahpha ngaitapa ta y thlâh ha teh; na siena maihta thlaochhipa ta na y lymâ thei nawpa ta na chachâh lâ tlyma, na chavei lâ tlyma tlei sai chachei khâ.

8 He ryhpa châbu heta na pakah cha puasai chachei khah se, cha bie ropa zydua cha khâchâ na zyh thei nawpa ta chhô nata zâ ta tlao na pachâ awpa a châ; chatanachata na lâpi zy cha patlâh lymâ aw ta, thlaochhipa ta na y aw.

9 Bie cha pie va na mâ? Thatlô ngaitapa nata riahpha ngaitapa ta y teh; chi khâ, riahchhiepa ta y hra khâ; ABEIPA na Khazohpa cha na siena maihta na hnohta a y lymâ aw mâ tâh,” tahpa ta reih ta.

10 Chatanachata Zawsua ta zawpi hyutuhpa zy hnohta,

11 A riena su lâ vawh ula, zawpi zy hnohta, ‘Nie awpa zy a chhuahdy teh u; noh thôh chhôhta ABEIPA nama Khazohpa ta râh hnei awpa ta a cha piepa he, hnei awpa ta Zawdâh he nama chakah aw na,’ tahpa ta bie pie teh u,” tahpa ta bie pie ta.

12 Chatawhcha Rubena mozy, Kada mozy nata Manase pho khophie zy hnohna chata Zawsua ta,

13 ABEIPA nama Khazohpa ta pahâna cha pie ei ta he râh he a cha pie aw ei,’ tahpa ta ABEIPA chakaotuhpa Mawsi ta bie a cha piepa ei he a thei thlâh ha teh u.

14 Nama lahpinô zy, nama sawnawh chyjpa ta zy nata nama sahroh zawzy he cha Zawdâh haosâ lâ Mawsi ta râh a cha piepa liana chata y aw ei ta; nâmo chyhsa thatlôpa riahphapa sahlao deikua cha chariah chhaichhi a tobipa ta vaw chakah tua aw eichi ta, nama unawhpa zy bao aw eichi ta,

15 ABEIPA ta nama unawhpa zy cha nâmo hawh hra ta pahâna piepa ta, ABEIPA nama Khazohpa ta râh a piepa cha âmo chhaota ama to hlâ lei cha; chatanachata ABEIPA chakaotuhpa Mawsi ta Zawdâh haosâ, noh chhina lâ râh nama châta a cha piepa lâna chata kua aw eichi ta, nama to aw,” tahpa ta reih ta.

16 Chatawhcha âmo chata, “Tao awpa ta bie maniah na piepa zydua cha eima tao lymâ aw na, maniah na tuana maihta chhao eima sie lymâ aw.

17 Kyh to liata Mawsi bie eima zyh lymâ tyhpa hawhna khata, na bie chhao eima zyh lymâ aw na; ABEIPA na Khazohpa cha Mawsi hnohta a y tyhpa hawhna khata na hnohta y mawh sy!

18 Ahyrai na biepiepa chôta a typa ta bie na piepa maih a zyh khoh leipa cha thie awpa ama châ aw. Thatlô ngaitapa nahta riahpha ngaitapa ta y teh,” tahpa ta Zawsua cha a chhy ei ta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 2

Mohparutuhpa zy Zerikô lâta tuapa ama châ

1 Chatawhcha Nuna sawchapawpa Zawsua chata, “A râ nata Zerikô khih zy cha kaw moh teh u,” tahpa ta chyhsa pano Shiti su tawhta a ru lâta mohparu awpa ta tuah ta. Chatawhcha sie ei ta, sihryhpa pakha, a moh Rahabi o liata a ngia ei ta, cha liana chata tlô ei ta.

2 Chatawhcha chyhsa ta, “Atazâ he râh mohparu awpa ta Izarel pathlazy amâ vy na,” tahpa ta Zerikô khih abeipa cha chho ei ta.

3 Zerikô khih abeipa chata, “Na o liata a vaw tlôpa khichhai zy kha a vaw chhi teh; râh pôhpalôhpa mohparu awpa ta a vypa ama châ na,” tahpa chho awpa ta Rahabi lâta chyhsa tuah ta.

4 Châhrasala chanô chata chyhsa pano cha a chhi ta, nyu ta; ama hnohta, “A châ na, chyhsa zy cha ei hnohta a vy tlai ei ta, châhrasala khataih lâ tawhta a vypa ma ama châ pahno va na;

5 a zoh nahta kuh chhikao khaw daihti chy nona khata cha chyhsa zy cha pua haw heih ei ta; khataih lâ ama sie haw pahno va na; a chadai parah ula, nama pha aw na,” tah ta.

6 Châhrasala vâphuh chô lâta a chhi ta, vâphuh chô liata pala kô a pachopa hry liata nyu ta.

7 Chatawhcha chyhsa zy chata Zawdâh chakahna su lâ taihta a cha dai ei ta; a chadaituhpa zy cha ama pua pata nahta kuh chhikao cha khaw haw ei ta.

8 Ama moh hlâta vâphuh lâta ama hnohta khy ta,

9 cha chyhsa zy hnohna chata, “He râh he ABEIPA ta cha pie haw ei ta, nama chi chhihna zie heta maniah vi haw ta, he râh liata a pahrâpa zydua he nama hmiakô liata ama zao khai haw tahpa ei pahno.

10 Izi tawhta nama vaw pua nona khata ABEIPA ta Tilaipi Saihpa kha cha pakua pa ei ta, Zawdâh haosâ Amawri mo beipa pano Sihaw nata Ôka zy chô liata nama taonazie zy, kha hawhta nama pahleipadiana zie zy kha pahno tlôh pi ta.

11 Cha cha eima pahno pata nahta, eima pathipalôh zy cha zao khai ta, nâmo vâna heta riahphapa rai y veih ei; ABEIPA nama Khazohpa cha chô lâ avâ liata nata a ry lâ alei liata Khazohpa châ tlôh ta.

12 Chatanachata nama chô liata ngiachhiena palâsa na ta, nâmo chhaota ei paw chhôhkhapa zy chô liata nama ngiachhiena cha vaw palâsa hra ula,

13 ei nô nata ei paw zy, ei rihlâhpa zy, ei narônô zy nata ama hneipa maih cha pahlôh ula, thina tawhtapa cha ei hrona he na pabohsapa awpa ta ABEIPA moh reipa ta ngiachhie ngaitapa ta ei hnohta chhie sa ula, pahnona tlai ta na taopa teh u,” tah ta.

14 Chatawhcha chyhsa zy chata a hnohta, “Eima hmotaopa he na reih lei awpa khiahtala, nama thi vyuhpa ta eima thi aw. ABEIPA ta râh he maniah a pie tita, cha ngiachhie aw pi ta, na chô liata ngâchhih ngaitapa ta eima tao aw,” tah ei ta.

15 Chatanachata opy liata khawhri ta bangie ta, a o cha khihpi kuh tlâh liata a ypa châ tlôh ta.

16 Chatawhcha ama hnohta, “Tlâh lâ pangaipa ta sie teh u, chata leipa ta la châ chadaituhpa zy khata ama cha hmô pathlei aw na; cha liana chata noh thôh a nyu muh vy, cha chadaituhpa zy ama kua heih hlâ lei cha; cha khai tawhna deikua chata nama sie heih aw,” tah ta.

17 Chyhsa zy chata a hnohta, “Chhie maniah na pasasapa deita heta la thai lei maniah pachâsa aw vei.

18 Nahthlie teh, he râh liata eimâ vaw ngia tita, he pala saihpa he maniah na bangiena opy liana heta khâchâ vaw chahry mah y; chatawhcha o chhôh liata na hnohta, na paw zy, na rihlâhpa zy nata na paw chhôhkhapa zydua cha a ngiakhei khai mah y.

19 Ahyrai na o chhikao tawhta khiliah lâ a puapa maih cha na o luh chô liata a thisaih cha y aw ta, keimo lâ thai lei châpa ta y aw ma pi; châhrasala ahyrai o chhôh liata na hnohta a ypa maih cha ama chô liata ku ama pathla khiahtala, eima luh chô liata a thisaih a y aw.

20 Anodeikuacha eima hmotaopa he na reih khiahtala, chhie maniah na pasasana liana heta thai lei châpa ta y aw ma pi,” tah ei ta.

21 Chatawcha ano chata, “Nama bie lymâ hawhta châ la vâ,” tah ta. Chatanachata âmo cha pasiesa ta, sie haw ei ta; opy liana chata pala saihpa cha chahry ta.

22 Âmo cha sie haw ei ta, tlâh cha tlô ei ta, cha liana chata noh thôh a chadaituhpa zy cha ama kua heih hlâ lei cha y ei ta; a chadaituhpa zy chata lâpi tlykha ta tlua ei ta, châhrasala hmô thei leipa ei ta.

23 Chatanachata chyhsa panopa zy cha kua heih ei ta, tlâh tawhtapa cha zu ei ta, chaka ei ta, Nuna sawchapawpa Zawsua lâna cha kei tlô ei ta; ama chô liata hmo a tlôpa zydua cha chho ei ta.

24 Zawsua hnohna chata, “ABEIPA ta a râh thokha cha eima ku liata a vaw pie haw tlai na; cha dei châ leipa ta, cha râh liata a pahrâpa zydua cha eima hmiakô liata ama zao lymâ,” tah ei ta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 3

Izarel sawzy ta Zawdâh ama chakana

1 Zawsua cha mydi ta thyu ta, Izarel pathla zydua chhaota Shiti su tawhtapa cha a pasie ei ta; Zawdâh tlô ei ta, ama chaka hlâta cha liana chata a rie ei ta.

2 Noh thôh rakha tawhta hyutuhpa zy chata ariena su cha chahry ei ta,

3 ABEIPA nama Khazohpa Biehrai Byh nata theihthaipa sahlao Livai chizy ta amâ sypa nama hmô tina chata nama yna su tawhtapa he a pasie ula, zi muh vy,

4 anodeikuacha nâmo nata Byh likawh cha thliepa ta dy sâh no tlyma a châ awpa a châ; a hnia khah u. Chatanachata nama siena awpa lâpi cha nama pahno thei aw, cha hlâta he lâpi he a chhih beih tlôh lei khâh eichi ta,” tahpa ta zawpi zy cha bie pie ei ta.

5 Chatanachata Zawsua ta zawpi zy hnohta, “A pathai teh u; mylâ ABEIPA ta nama hry liata hmonoâh ngaitapa a tao aw na,” tah ta.

6 Zawsua ta theihthaipa zy hnohna chata, “Biehrai Byh he a sy ula, zawpi zy hmiakô liata chaka teh u,” tahpa ta reih ta. Chatanachata Biehrai Byh cha a sy ei ta, zawpi zy hmia a sah pa ei ta.

7 ABEIPA ta Zawsua hnohta, “Mawsi hnohta ei ypa hawhta na hnohta chhao ei y aw tahpa ama pahno thei nawpa ta atanoh he Izarel sahlao zydua mohmô liata ei cha palyupalih pathao aw.

8 Chatawhcha Biehrai Byh a sytuhpa theihthaipa sahlao zy cha, ‘Zawdâh chavah ngiakâh cha nama tlô tita, Zawdâh liana chata a duah thlâh ha muh vy,’ tahpa ta bie pie mah y,” tah ta.

9 Zawsua ta Izarel pathlazy hnohna chata, “A vy ula, ABEIPA nama Khazohpa biezy he vaw nahthlie teh u,” tah ta.

10 Chatawhcha Zawsua chata, “He liana heta Khazohpa hropa cha nama hry liata y ta, nama hmiakô liana heta Kana mozy, Hiti mozy, Hivi mozy, Periza mozy, Kirkasi mozy, Amawri mozy, Zebu mozy he a papua tlai aw tahpa nama pahno aw.

11 Aleilô zydua ABEIPA Biehrai Byh châta nama hmiakô liata Zawdâh a chaka na.

12 Chatanachata Izarel phozy hry liatahpa he pahrawhleino, pho to vyuhpa ta chyhsa pakha lymâ a tlyh muh vy.

13 Chatawhcha aleilô zydua ABEIPA Byh a sytuhpa theihthaipa zy pheipazah cha Zawdâh ti liata a pahnieh pata nahta, Zawdâh ti nochhi lâ tawhta ti a vaw lohpa zy cha chie pachhô aw ta, chatanachata a pahlypa ta a duah thlâh ha aw,” tah ta.

14 Chatawhcha zawpi zy cha Zawdâh chaka awpa ta ama poh-o tawhta ama pua nahta, Biehrai Byh a sytuhpa theihthaipa sahlao zy cha zawpi zy hmiakô liana chata sie ei ta,

15 Byh a sytuhpa zy cha Zawdâh tlôpa ta, Byh a sytuhpa theihthaipa zy phei chata ngiakâ ti a tly pata nahta, (sâh hria chhôh heta cha Zawdâh he a kao zydua bie thlâh ha tyh ta),

16 nochhi lâ tawhta ti a loh ngâpa cha a duah haw ta, lâhlapi liata Zaretha râh kiapâh ta Adâh khih liana chata a pahlyhpa ta a duah thlâh ha ta, Arabah tilaipi, Tilaipi Iahpa lâta a lohpa cha chie pachhô haw ta; chatanachata zawpi zy cha Zerikô khih dady ta liana chata sie haw ei ta.

17 ABEIPA Biehrai Byh a sytuhpa theihthaipa zy cha Zawdâh liah liahta alei hipa liata a duah thlâh haw ei ta, zawpi sahlao zydua nata ama chi zydua ta Zawdâh ama chaka khaina taihta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 4

Zawdâh tawhta alô sâhrawhleino lapa a châ

1 A pho zydua ta Zawdâh ama chaka khai nahta, ABEIPA ta Zawsua hnohta,

2 Zawpi zy hry liatahpa he chyhsa pahrawhleino pho to liata chyhsa pakha lymâ a tlyh la,

3 ama hnohta, ‘Zawdâh liahliah theihthaipa sahlao a duana liatahpa, alô miahrawleino la ula, cheih ula, ariena su atazâ ta namâ riena awpa liata soh muh vy’, tahpa ta bie pie mah y,” tahpa ta reih ta.

4 Zawsua chata Izarel pathlazy hry liata chyhsa pahrawhleino, pho to liata chyhsa pakha lymâ a tlyhpa zy cha aw ta;

5 ama hnohta, “ABEIPA nama Khazohpa Byh hmiakô liana khata, Zawdâh liah liata chaka ula, Izarel pathlazy a pho hluhna zie lymâ ta chyhsa tota alô miakha chyu a pia muh vy,

6 chatanachata hezy he nama hry liata pahnona a châ aw, a noh hro ta nama sawzy ta, ‘He alô zy he khâpa tahna ma a châ tly?’ tahpa ta ama cha hiahri tita,

7 nâmo ta ama hnohta, ABEIPA Biehrai Byh hmiakô liata Zawdâh tizy cha a chie pachhô hawpa vâta a châ; Zawdâh a chaka nota Zawdâh tizy cha a chie pachhô haw. Chatanachata he alô zy he Izarel pathlazy ta chhâzaw ta amâ thei thlâh ha nawpa ta a châ hih, nama tah aw,” tah ta.

8 Izarel pathlazy chata Zawsua ta bie a piepa hawhna chata tao ei ta, Izarel pathlazy a pho hluhna zie lymâ hawhta Zawdâh liah liatahpa alô miahrawhleino la ei ta, amâ riena su lâta cheih ei ta, cha liana chata soh ei ta.

9 Chatawhcha Biehrai Byh a sytuhpa theihthaipa sahlao a duana lia tlaita, Zawdâh liah liana chata Zawsua ta alô miahrawhleino bô ta; chazy cha atanoh taihta a y thlâh haw.

10 Mawsi ta Zawsua bie a pie hawpa zydua hawhta ABEIPA ta zawpi zy hnohta tao awpa ta Zawsua bie a piepa cha ama tao khai hlâ lei cha theihthaipa Byh a sytuhpa zy cha Zawdâh liah liana chata a duah thlâh ha ei ta. Zawpi zy cha a parah ei ta, chaka haw ei ta;

11 zawpi zydua ama chaka khai tawhta ABEIPA Byh nata theihthaipa zy cha zawpi zy mohmô liana chata chaka haw hra ei ta.

12 Rubena pathlazy, Kada pathlazy nata Manase pho khophie zy cha Mawsi ta ama hnohta a rei hawpa hawhna khata Izarel pathlazy hmiakô liata chariah chhaichhi tobipa ta chaka ei ta;

13 chariah chhaichhi ta a tobipa chyhsa thy palih a dyuh awpa ta Zerikô by zy liana chata ABEIPA hmiakô liata ama chaka.

14 Cha noh liana chata ABEIPA ta Zawsua cha Izarel sahlao zydua mohmô liata palyupalih ta; Mawsi ama chipa hawhna khata a hroh chhôh zydua cha chi ei ta.

15 ABEIPA ta Zawsua hnohta,

16 “Theihthaipa sahlao Bie pahnosana Byh a sytuhpa zy kha Zawdâh tawhta vaw pua awpa bie pie teh,” tahpa ta reih ta.

17 Zawsua ta theihthaipa sahlao zy cha, “Zawdâh tawhtapa kha vaw pua teh u,” tahpa ta bie pie ta.

18 Chatawhcha theihthaipa sahlao ABEIPA Biehrai Byh a sytuhpa zy cha Zawdâh lialiah tawhtapa puapa ta, theihthaipa sahlao phei zy chata alei hipa a tly pata nahta Zawdâh tizy cha a loh tyhpa hawhta vaw loh ha heih ta, hmialâ tahpa hawhna khata a kao zydua cha khô ngâ kaw ta.

19 Zawpi zy cha thla khana, noh hrawh noh ta Zawdâh tawhtapa cha pua ei ta, Zerikô nochhi lâchhâh Kilkal liata ariena su tao ei ta.

20 Chatawhcha cha alô miahrawhleino Zawdâh tawhtapa ama lapa cha Zawsua ta Kilkal liata bô ta.

21 Izarel pathlazy hnohna chata, “Noh hro ta nama pathlazy ta ama pawzy hnohta, ‘He alô zy he khâpa tahna ma a châ tly?’ tahpa ta amâ hiahri tita,

22 ‘Izarel sahlao zy chata Zawdâh he alei hipa ta ama chaka,’ tahpa ta nama pathlazy cha nama pahnosa aw.

23 ABEIPA nama Khazohpa ta eikhano Tilaipi Saihpa cha eima chaka hlâ lei ta eima hmiakô liata a pakuapa hawhna khata ABEIPA nama Khazohpa ta Zawdâh tizy he nama chaka hlâ lei

24 leilô liata pho to ta ABEIPA ku he a tha a tlô tahpa pahnopa ta ABEIPA nama Khazohpa cha chhâzaw ta ama chi thei nawpa ta,” tahpa ta reih ta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 5

Chopawtaina nata Zawpakhô kyhchhi Kilkal liata

1 Zawdâh khô lâ notla lâta a ypa Amawri abei zydua nata tilaipi kiah liata a ypa Kana râh abei zydua chata ama chaka hlâ lei ABEIPA ta Zawdâh tizy cha Izarel pathlazy hmiakô liata a pakua tahpa ama thei nahta, Izarel pathlazy vâna chata ama pathipalôh zy cha lei khai haw ta, a chi leipa rai y veih ei.

2 Cha nona chata ABEIPA ta Zawsua hnohta, “Meilô chaizôh tao la, Izarel pathlazy he ama chopaw a ei nona ta taipa heih teh,” tah ta.

3 Zawsua ta meilô chaizôh zy cha tao ta, Izarel pathlazy cha vo pawhmao tlâh liata ama chopaw taipa ta.

4 Zawsua ta âmo chopaw a tai chhâpa cha he he a châ: Izi tawhta a puapa sahlao zydua, chapaw chariah adyuhpa zydua kha Izi râh tawhta ama pua tawhna khata râhpathohpa liata ama thi khai haw.

5 Izi râh tawhta a puapa sahlao zydua kha chopaw tai chiehpa sai cha ei ta, anodeikuacha Izi râh tawhta puapa ta râhpathohpa lâpi liata a pihpa zydua kha cha chopawtaipa châ veih ei.

6 ABEIPA ao ama nahthlie khoh leipa vâta zawpi sahlao zydua, Izi râh tawhtapa a vaw puapa, chariah adyuhpa zy taihta pahleipadiapa ta ama y khaina taihta Izarel pathlazy cha râhpathohpa liata kô sypalih tlai viavi ei ta; ABEIPA ta ama pathlatuhpa zy hnohta sâhpiti nata kheihti lona râh chhiesapa ta pie maniah a taihpa kha, cha râh cha hmô lei awpa ta ABEIPA ta ama hnohta chhie a sa.

7 Chatanachata ama pathlazy âmo vyuhpa ta a paduapa zy cha Zawsua ta ama chopaw taipa ta; lâpi liana khata ama chopaw taipa a châ leipa vâta chopawtai leipa châ thlâh ha tlôh ei ta.

8 Zawpi sahlao zydua ama chopaw ama tai khai tawhna chata, ama tlâh hlâ lei cha amâ riena su, ama yna chyu liana chata y ei ta.

9 ABEIPA ta Zawsua hnohta, “Atanoh he Izi mo ama cha mohnaona he nâmo tawhtapa ei pahlei haw,” tah ta. Chatanachata cha su cha atahmâ taihta Kilkal ama bi haw.

10 Izarel pathlazy chata Kilkal liata ariena su tao ei ta, Zerikô bypi zy liana chata cha thla noh hrawhleipalih noh zâ lâna chata zawpakhô a ô ei ta.

11 Chatawhcha zawpakhô a mylâpa chata cha râh liata sâh viahchhâ thinô pahlao leipa nata sa raopa nie ei ta.

12 Chatawhcha cha râh liatahpa sâh ama nie mylâpa tawhna chata mâna kha tla khao leipa ta; Izarel pathlazy cha mâna cha hnei khao hra veih ei. Cha kô chata Kana râh liata sâh cha tlao ama nie haw.

Zawsua nata chyhsa pakha zaozi paih a phiapa

13 Zawsua cha Zerikô khih kiapâh liata a y nona chata, mohmia pasaih ta, moh ta, a dady ta liana chata chyhsa pakha zaozi phia chiehpa chabapa ta a vaw duah thlâh ha ta; Zawsua ta pangai ta, a hnohta, “Keima chhâh a châpa ma na châ, eima khakhaipa zy chhâh a châpa chi maw?” tah ta.

14 Chatawhcha ano chata, “Châ bao va, ABEIPA pheisaih zy hyutuhpa ta a vypa na ei châ,” tah ta. Zawsua cha alei liata â khu lâta pao ta, a chhy ta, a hnohta, “Ei beipa ta a chakaotuhpa hnohna heta khâpahmah reih awpa a hnei tly? tah ta.

15 ABEIPA pheisaih zy hyutuhpa chata Zawsua hnohta, “Na phei tawhtapa na pheiky kha pahluh teh; nâ duana su kha a pathaih na,” tah ta. Chatanachata Zawsua chata pahluh haw ta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 6

Zerikô paona

1 Zerikô khih Izarel pathlazy vâta khâchâ khawpa ta y ta, ahyhmah pua leipa ei ta, ahyhmah a ngia hra veih ei.

2 ABEIPA ta Zawsua hnohta, “Moh teh, Zerikô nata ama abei nata chyhsa thatlôpa riahphapa zy he na ku liata ei pie haw.

3 Chariah adyuhpa zydua heta khihpi he padôpa ta ei kha cha padô tua aw eichi ta, cha hawhna chata noh charu nama tao awpa a châ.

4 Chatawhcha theihthaipa pasari ta Byh hmialâta mietahkupa tôhpa ki chiahmie miasari chaba aw ei ta; a noh sari noh liana chata khihpi cha ei sari padô aw eichi ta, theihthaipa zy ta chiahmie cha ama tô aw.

5 Chatawhcha mietahkupa tôhpa ki ama tô tita, chiahmie pyu nama thei khiahtala, zawpi zydua cha ao paro ngaitapa ta awh ei se; chatanachata khihpi kuh cha cho aw ta, zawpi cha âmo dady chyu liana chata ama kiah aw,” tah ta.

6 Nuna sawchapawpa Zawsua chata theihthaipa sahlao zy aw ta, ama hnohta, “Biehrai Byh he a sy ula, theihthaipa pasari ta ABEIPA Byh hmialâna chata mietahkupa tôhpa ki chiahmie miasari chaba mawh sy,” tah ta.

7 Chatawhcha ano chata zawpi sahlao hnohna chata, “Sie lymâ ula; khihpi cha padô teh u, chariah chhaichhi a tobipa sahlao kha ABEIPA Byh hmia lâna chata sie lymâ ei se,” tah ta.

8 Zawsua ta zawpi sahlao zy hnohta bie a rei khai tawhna chata ABEIPA hmiakô liata mietahkupa tôhpa ki chiahmie miasari a chabapa theihthaipa pasarizy cha sie lymâ ei ta, chiahmie cha tô ei ta, ABEIPA Biehrai Byh chata pazi ta.

9 Chatawhcha chariah chhaichhi a tobipa sahlao cha chiahmie a tôpa theihthaipa zy hmiakô liana chata sie ei ta, hnôhlâ a vaihtuhpa zy chata Byh cha pazi ei ta, theihthaipa sahlao chata ama sie hai nota chiahmie zy tô lymâ ei ta.

10 Zawsua ta zawpi zy cha, “Awh leipa ula, nama ao chhao theipa châ kha sala, awh awpa ta bie ei cha piepa noh a tlô hlâ lei cha nama pakah tawhta bie rai pua hra kha se; cha tina chata awh muh vy,” tahpa ta bie pie ta.

11 Chatanachata ABEIPA Byh cha khihpi ei kha padôsa ta; chatawhcha ariena su lâna chata a di ei ta, ariena su liana chata a rie haw ei ta.

12 Zawsua cha mydi ta thyu ta, theihthaipa zy chata ABEIPA Byh cha a sy ei ta.

13 ABEIPA By hmiakô liata mietahkupa tôhpa ki chiahmie miasari a chabapa theihthaipa pasari zy kha sie lymâ ei ta, chiahmie tô lymâ ei ta; chatawhcha chariah chhaichhi a tobipa zy cha ama hmiakô liata sie ei ta, hnolâ cha a vaihtuhpa zy chata ABEIPA Byh pazi ei ta, theihthaipa zy chata ama sie hai nota chiahmie zy tô lymâ ei ta.

14 A noh nona liana chata khihpi cha ei kha padô heih ei ta, ariena su lâna chata kua heih ti ta. Cha hawhna chata noh charu tao ei ta.

15 A noh sari noh liana chata mydi ta, khih a deih hai nota thyu ei ta, ama tao tyhpa hawhta khihpi cha ei sari padô ei ta; cha noh deita chata khihpi cha ei sari padô ei ta,

16 Chatawhcha ei sarina liata theihthaipa sahlao zy ta chiahmie ama tô nona chata Zawsua chata zawpi sahlao hnohta, “Awh teh u; ABEIPA ta khihpi he a cha pie ei mâ tâh.

17 Khihpi he a chhôh liata hmo a ypa zydua chhaota ABEIPA chata panano khai awpa a châ; Rahabi sihrypa deita, ano nata a o chhôh liata a ypa zydua deikua cha eima tuapa chyhsa zy kha a vaw nyupa vâta pahlôh awpa a châ.

18 Nâmo cha cha hmo pananopa tawhna chata a panano teh u, chata leipa ta la nama panano hawpa chata hmo pananopa cha nama la pathlei aw na, Izarel sahlao riena su he chhiesapa ta tao aw eichi ta, nôpona nama patlôsa pathlei aw na.

19 Tâkâri zy, ngôh zy, dawh nata thua hmobaoh zy deikua cha ABEIPA châta châ khai ta; ABEIPA sôh o liata soh awpa a châ aw,” tah ta.

20 chatanachata zawpi zy cha aw ei ta, theihthaipa zy ta chiahmie zy tô ei ta. Zawpi zy ta chiahmie pyu ama thei pata nahta, zawpi sahlao cha thata awh ei ta, kuh cha cho haw ta, zawpi zy cha âmo dady chyu liana chata kiah ei ta, khihpi liana chata a ngia ei ta, khihpi cha la haw ei ta.

21 Chatawhcha khihpi chhôh liata chyhsa zydua, a chapaw, a chanô, a hawti machâ ta, viahchao tôhpa zy, mietahkupa zy, alâ zy chhaota zaozi ta thie khai ei ta.

22 Zawsua chata chyhsa pano râh mohparutuhpa zy hnohna khata, “Sihrypa o liana hao ta a kei ngia ula, a hnohta chhie nama sa hawpa hawhna khata cha chanô cha a hneipa zydua chhaota puakhei teh u,” tah ta.

23 Chatawhcha mohparutuhpa satlia zy cha a kei ngia ei ta, Rahabi, a paw nata a nô zy, a rihlâhpa zy chhao, a hneipa zydua chhaota, puakhei ei ta, a chiheih zydua chhao puakhei ei ta, Izarel sahlao ariena su khôtho lâta paysa haw ei ta.

24 Chatawhcha khihpi cha a chhôh liata hmo a ypa zydua chhaota, mei ta rao khai ei ta; tâkâri zy, ngôh zy, dawh nata thua hmobao zy deita cha ABEIPA sôh o liata soh ei ta.

25 Anodeikuacha Rahabi sihryhpa nata a hneipa zydua nata a paw chhôhkha cha Zawsua ta pahlôh khai ta; Izarel sahlao zy hry liana chata he noh taihta a hlao haw ei ta, Zawsua ta Zerikô khih mohparu awpa ta a tuapa chyhsa zy kha a nyupa vâta.

26 Cha nona chata Zawsua ta, “He Zerikô khihpi he a vaw paduapa maih cha ABEIPA hmiakô liata chhiesapa ta y mawh sy.A saw tuapa a chhaipa ta a lôbô cha bô aw ta,a saw seihnaipa a chhaihpa ta a kuh chhikao zy cha a padua aw,” tahpa ta âmo chhorei ta.

27 Chatanachata ABEIPA cha Zawsua hnohta y ta; râh zydua liana chata a moh vaw pathâh haw ta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 7

Âkhâ moleina

1 Anodeikuacha Izarel pathlazy chata hmo pananopa liana chata hmo parao haw ei ta; Zudah pho liatahpa Zerah sawchapawpa Zabidi, cha sawchapawpa Kami, cha sawchapawpa Âkhâ chata hmo pananopa liatahpa cha vaw la haw ta; chatanachata Izarel pathlazy chô liana chata ABEIPA pathi-ia haw ta.

2 Zawsua ta Zerikô khih tawhta Bethel nochhi lâ Bethave daih lâ Ai khih liana chata chyhsa tuah ta, ama hnohta, “Sie ula, râh moh paru teh u,” tahpa ta reih ta. Chatawhcha chyhsa zy cha sie ei ta, Ai khih cha mohparu ei ta.

3 Zawsua lâta kua heih ei ta, a hnohta, “Chyhsa zydua cha a khy khah ei se, chyhsa sâ no tlyma, sâ thôh tlyma khy ei sala, Ai khih adyuh mawh sy; chyhsa zydua rie pathei awpa châ vei a chyhta dei châ tlôh ei ta,” tah ei ta.

4 Chatanachata zawpi hry liatahpa chyhsa sâ thôh tlyma, cha liana chata sie ei ta; Ai mozy hmiakô liana chata a râpai haw ei ta,

5 Ai mozy chata chyhsa sythôh nata pacharu tlyma thie ei ta, kuh chhikao kiapâh tawhta Shebari taihta a vaw chadai ei ta, ama khô pathlana liana chata thie ei ta, chyhsa zy pathipalôh cha lei khai ha ta, ti hawhta cha haw ei ta.

6 Zawsua chata a poh zy hrie ta, ABEIPA Byh hmiakô liata ano nata Izarel sahlao machâ zy cha ama hmia alei lâ a bôhpa ta zâlâ taihta a bôh ei ta; ama luh liata buhchâh mia ei ta. ama pacharôhna palâsa ei ta.

7 Chatawhcha Zawsua ta, “ABEIPA Khazohpa! Khazia e, Zawdâh maniah na vaw kiakhei rai? Amawri mozy ta maniah thyuhnao ei ta, maniah ama pahlei khai aw mâ? Khazia Zawdâh haosâ liana khata tlâ maniah na pahrâsa thlâh ha vei.

8 Hy ABEIPA, khâpa e, reih awpa ei hnei, Izarel cha riethei a tao heih awpa a châ ma?

9 Kana mozy nata a chheipâh râh zydua ta vaw thei aw ei ta. Maniah dô aw ei ta, alei tawhtapa he eima mo ama pahlei haw hih, kheihta e, na moh zachhihpa ta a châ thei aw?” tah ta.

10 ABEIPA chata Zawsua hnohta, “Thyu teh, khazia nâ khu thlâh haw?

11 Izarel chata molei haw tlôh ta; ei biehraina paraopa ta ei biepiepa hawhta tao veih ei. Ama hry ta thokha ta hmo pananopa la ei ta, leidiana ama tlôkhei he. Paru ei ta, âmo eih hryta nyu ei ta, hnei amâ chhuah.

12 Chavâta Izarel saw zy cha ama khakhaipa zy hmiakô liata thiepa ta ama y, âmo ta hmo moleipa ama taopa vâta a châ. Cha hmo doleipa nama la papua leipa khiahtala, nama hnohta pahrâ khao aw vana!

13 Thyu la, a pathaisa awpa ta chho teh. Zawpi zy cha ei hmia hmô awpa ta amâ ei se. ‘Kei Izarel Khazohpa chata ama hnohta biereipa ei hnei, mylâ ei hmia hmô awpa ta amâ mâ khaipa ta chho teh. “Izarel, nama pahleipa dia awpa hmo bie ei cha pie ei chu! He hmozy he nama pahlei leipa khiahtala, nama khakhaipa zy hmiakô liana cha a duah thei aw veih eichi,”

14 Myta a pho pho ta ei hmiakô liata namâ vaw chhi awpa a châ; cha pho ABEIPA ta a chakhipa maih cha a chi chi ta a vy aw eichi ta; cha chi ABEIPA ta a chakhipa maih cha a chhôhkha chhôhkha ta a vy aw eichi ta; cha chhôhkha ABEIPA ta a chakhipa maih cha mo pakha pakha ta a a vy aw eichi ta.

15 Ahyrai a moleina hmôpa ta a ypa cha meita rao awpa châ ta, a chhôhkha nata a hneipa zydua chhao. Ano cha hmo rarôh y ngaitapa a tao hapa vâta, ei chyhsa zy ta biehraina ama taopa a parao hapa vâta a tahna’ tah mah y,” tah ta.

16 Chatanachata Zawsua cha mydi ta thyu ta, Izarel sahlao zy cha a chi a chi ta a vaw luah ei ta, Zudah chizy cha patupa cha haw ei ta;

17 Zudah phozy cha vaw paluahsa heih ta, Zerah phozy cha vaw patu ta; Zerah chhôhkha zy cha pakha pakha ta paluahsa heih ta, Zabidi cha patupa châ ta;

18 Zibidi chhôhkha zy sahlao cha pakha pakha ta vaw paluasa heih ta, chatanachata Zudah chi liatahpa Zerah sawchapawpa Zabidi, cha sawchapawpa Kami, cha sawchapawpa Âkhâ cha patupa châ haw ta.

19 Zawsua ta Âkhâ hnohna chata, “Ei sawchapawpa y, ABEIPA Izarel zy Khazohpa cha reithai mah y, a hnohta a phuah teh; na hmotaopa cha na chho tua; kei liata phih khâ,” tah ta.

20 Âkhâ ta Zawsua cha a chhy ta, a hnohta, “ABEIPA Izarel Khazohpa chô liana chata hmo ei parao ha tlai na, he hawhna heta ei tao haw:

21 hraona hry liatahpa Babylaw râh poh pha ngaitapa nata tâkâ sekel za no nata ngôh tlo sekel sypangawh a hripa hmô na ta, ei hia na tlia ngaita ta ei la haw; chatawhcha ei poh-o chhôh liata alei liata nyupa châ ta, tâkâ cha cha ry liana chata a y,” tah ta.

22 Chatanachata Zawsua ta chyhsa zy tuah ta, poh-o lâna chata a râ ei ta; a poh-o liana chata nyupa châ ta, a ry liana chata tâkâ a y.

23 Chatanachata poh-o chhôh tawhtapa cha la ei ta, Zawsua nata Izarel pathla sahlao zydua hnohna chata vaw cheih ei ta; âmo chata ABEIPA hmiakô liata soh ei ta.

24 Zawsua nata Izarel sahlao zydua chata Zerah sawchapawpa Âkhâ cha tâkâ zy, poh zy, ngôh tlo zy, a sawchapawpa zy, a sawchanônô zy, a viahchao tôhpa zy, a alâ zy, a mietahkupa zy, a poh-o zy nata a hneipa zydua chhaota a chhi ei ta; Akhôra Saikao lâta khykhei ei ta.

25 Zawsua ta, “Khazia e eima nô maniah na papo! ABEIPA ta atanoh he nâ chhao na nô a cha papo aw hih,” tah ta. Chatanachata Izarel sahlao zydua chata ano cha alô ta a thina taihta vawh ei ta; âmo cha mei ta rao ei ta.

26 Chatawhcha a chô liana chata alô thata pacho ei ta, atahmâ taihta a y thlâh haw. Chatawhcha ABEIPA ta a pathi-iana ru ngaitapa cha pakua haw ta, cha su moh ta atahmâ taihta Akhôra Saikao ama tah.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 8

Ai khih chhona nata paraona

1 ABEIPA ta Zawsua hnohta, “Chi leipa la, riahchhiepa ta y hra khâ; chariah adyuhpa chyhsa zydua na hnohta a chhi la, thyu la, Ai khih lâta sie teh; Ai khih bei nata a chyhsa zy nata a khihnarâh cha na ku liata ei pie haw;

2 Zerikô nata ama abei chô liata na taopa hawhna khata, Ai khih nata ama abei chô liata chhao na tao aw; hraona nata sahroh zy deita cha nâmo châta la muh vy; khihpi a ru lâta a bytuh awpa a hnôh lâta soh mah y,” tah ta.

3 Chatanachata Zawsua nata a dyuhpa chyhsa zydua cha Ai khih lâta sie awpa ta pua ei ta; Zawsua ta chyhsa thatlôpa riahphapa thy thôh a tlyh ta, zâ ta pasiesa ta.

4 Ama hnohta, “Khihpi hnôh lâta khihpi adyuh awpa ta a ru lâta a byh teh u; khihpi tawhta a hlapi liana chata sie leipa ula, amâ chiehpa ta y thlâh ha teh u;

5 kei nata ei hnohta a ypa zydua chata khihpi cha a vaw hnia aw pi ta. Chatawhcha eikhano hawhna khata maniah adyuh awpa ta ama vaw pua pata nahta, ama hmiakô liata a râpai aw pi ta;

6 maniah a chadai awpa ta pua ei ta, khih tawhta â hlapi ta’ ama puakheina taihta; âmo chata, ‘Eikhano hawhna khata eima hmiakô liata amâ râpai haw he,’ ama tah aw. Chatanachata ama hmiakô liata a râpai aw pi ta;

7 a ru lâta a byhna tawhta vaw pua aw eichi ta, khihpi cha nama la aw; ABEIPA nama Khazohpa ta nama ku liata a pie aw na.

8 Chatawhcha khihpi nama la pata nahta, khihpi cha mei ta rao teh u, ABEIPA bie lymâ hawhta nama tao awpa a châ; bie ei cha pie haw ei hih,” tahpa ta bie pie ta.

9 Chatawhcha Zawsua chata pasiesa haw ta; chatanachata a ru lâta a byhna su lâna chata sie ei ta, Ai notla lâta Bethel nata Ai likawh liana chata y ei ta; Zawsua deikuacha cha zâ cha zawpi zy hry liata a rie ta.

10 Zawsua cha mydi ta thyu ta, zawpi zy cha pakhy ta, chatawhcha ano nata lzarel sahlao machâ zy cha zawpi sahlao hmiakô liana chata Ai khih lâta sie ei ta.

11 Chatawhcha zawpi sahlao zydua a hnohta chariah a dyuhpa chyhsa a ypa zy cha sie ei ta, a hnia ei ta, khihpi kiapâh lâna chata sie ei ta, Ai maw lâchhâh ta a rie ei ta, Ai nata ama likawh liana chata saikao a y.

12 chatawhcha chyhsa sâh pangawh a chhi ta, khihpi notla lâchhâh Bethel nata Ai likawh liana chata a ru lâta pabyhsa ta.

13 Chatanachata zawpi khihpi maw lâchhâh ta pheisaih sahlao zy yna su cha a siapa ta rao ei ta. Châhrasala Zawsua cha cha zâ cha saikao lialiah liata sie ta.

14 Ai khih beipa ta cha cha a hmôpata nahta, a parah ngaitapa ta mydi ta thyu ta, cha khih liata chyhsa zy cha ano nata a sahlao zydua chhaota, a su raopa Arabah dady liana chata Izarel sahlao zy cha adyuh awpa ta pua haw ei ta; châhrasala khih hnôh lâna chata ano adyuh awpa ta a ru lâta amâ byh tahpa pahno leipa ta.

15 Zawsua nata Izarel sahlao zydua cha pahnie hawpa hawhta y ei ta, râhpathohpa lâpi lâta a râ ei ta.

16 Chatawhcha khihpi liata a ypa zydua cha âmo a chadai awpa ta awpakhy ei ta, chatanachata Zawsua cha a chadai ei ta, khihpi tawhtapa cha a hlapi a rakheipa ta y haw ei ta.

17 Ai liata nata Bethel liana chata Izarel sahlao zy a chadai leipa cha pakha hmah y khao leipa ei ta, khihpi cha khaw leipa ta puasai haw ei ta, Izarel sahlao zy cha a chadai haw ei ta.

18 Chatawhcha ABEIPA ta Zawsua hnohta, “Asei nâ chabapa kha Ai lâ a heihpa ta chalo teh; na ku liata ei cha pie aw,” tah ta. Chatanachata Zawsua chata a sei chabapa cha khihpi lâ a heihpa ta chalo haw ta.

19 Chatawhcha a ru lâta a byhtuhpa zy kha ama yna tawhtapa kha vaw pua parah ei ta, a ku a pazawh pata nahta, a râ ei ta, khihpi liana chata a ngia ei ta, la haw ei ta; chatawhcha khih cha mei ta thlai rao ei ta.

20 Ai mozy chata ama hnoh lâ ama vaw sai nahta, khihpi cha a vâ lâta a khu a charih ngâpa ta hmô ei ta; khataih lâ hmahta a râ theina rai hnei khao leipa ei ta, chatanachata râhpathohpa lâta a râpa zy khata a chadaituhpa zy lâna cha tlao a vaw lie ei ta.

21 Chatawhcha Zawsua nata Izarel sahlao zydua chata a ru lâta a byhtuhpa zy ta khihpi lapa ta, khihpi khu cha a charih ngâpa ta ama hmô nahta kua heih ei ta. Ai mozy cha thie haw ei ta.

22 Chatawhcha chyhsa hropa zy cha adyuh awpa ta khih chhôh tawhta vaw pua ei ta, Izarel sahlao zy chata chadô haw ei ta, thokha hiakha lâ y ei ta, thokha hiakha lâ, chatanachata thie ei ta, pakha hmah pahlôhpa nata papuapa rai hnei veih ei.

23 Chatawhcha Ai khih abei cha a hrohpa ta patu ei ta, Zawsua lâta â chhi ei.

24 Izarel sahlao zy chata Ai liatahpa sibiepa su liata a ypa zydua cha râhpathohpa lâta amâ chadaina su liata ama thie khai nahta, ama zydua ta zaozi ta ama thie khai tawhna chata Izarel sahlao zydua cha Ai lâta kua heih ei ta, zaozi ta a dyuh ei ta.

25 Cha noh liata thiepa zydua cha a chapaw a chanô ta thy kha nata sâh no ama châ, Ai liata chyhsa zydua cha

26 Zawsua ta asei a hmâna ku cha Ai a pahrâpa zydua a pahleipadia khai hlâ lei cha a sy tlôh lei khâh ta.

27 ABEIPA ta Zawsua bie piepa ta, tao awpa a tahpa hawhna tlai khata cha khihpi liata sahroh zy nata hraona zy deita cha Izarel sahlao chata âmo châta hraona ta la ei ta.

28 Chatanachata Zawsua ta Ai cha mei ta rao ta, chhâzaw châta alei byuhpa ta tao ta, atahmâ taihta roryhrapa a châ haw.

29 Chatawhcha Ai khih abei cha zâlâ taihta thokô liata bangie ta; noh tla chyta Zawsua ta bie pie ta, a ri cha thokô tawhta la ei ta, khihpi kuh chhikao a ngiana liata thy ei ta, a chô liata alô thata pacho ei ta, atanoh taihta a y.

Ebal Tlâh liata ryhpa ropa ta a y

30 Chatawhcha Mawsi ryhpa châbu liata ro hawpa hawhta ABEIPA chakaotuhpa Mawsi ta Izarel pathlazy bie a pie hawpa hawhna khata,

31 Zawsua ta Ebal Tlâh liata ABEIPA Izarel zy Khazohpa chata maisâh alô daih leipa, ahyhmah ta thua ta ama dai beih leipa, maisâh tao ta; cha liana chata ABEIPA chata raopa hlâna zy hlâ ei ta, adyhna atheihna ta a theih ei ta.

32 Cha liana chata Izarel pathlazy hmiakô liana tlai chata Mawsi ta ryhpa a ropa kha alô zy liana chata roh pachhuah ta.

33 Izarel sahlao zydua ama machâ zy nata hyutuhpa zy nata ama ryureituhpa zy chhaota, Livai chi theihthaipa sahlao ABEIPA Biehrai Byh a sytuhpa zy hmiakô liata, Byh hiakha lâ nata hiakha lâ liana chata pho hropa chhao, cha râh liata a pihpa chhao hmaokha ta a duah ei ta, a khophie cha Kerizi Tlâh hiakha lâta y ei ta, a khophie cha Ebal Tlâh hiakha lâta y ei ta, ABEIPA chakaotuhpa Mawsi ta Izarel sahlao zy cha byhnâ a aw pa tua awpa a châ, tahpa bie a pie hawpa hawhna khata.

34 Cha khai tawhna chata ryhpa bie zydua, byhnâ awna bie nata chhiesana bie cha reih ta, ryhpa châbu liata a ropa zydua hawhpa kha. 35 Mawsi biepiepa zydua kha Izarel pôhpakhypa zydua nata chanô zy nata hawti chyhpata zy nata, ama hry liata pho hropa a ypa zy nahkhao theina liata Zawsua ta a rei leipa rai y vei.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 9

Kibia mo dôveina

1 Zawdâh haosâ liata abei sahlao zydua tlâh liatahpa zy, bypi liatahpa zy, tilaipi kawh ngaitapa ngiakâh zydua liata Lebanaw taihta a ypa zydua, Hiti mozy, Amawri mozy, Kana mozy, Periza mo zy, Hivi mozy, Zebu mozy ta ama vaw thei nata Zawsua nata,

2 Izarel sahlao cha bie a paraopa ta adyuh a chhuahpa ta a pôhpakhy ei ta.

3 Châhrasala Kibia khih liata a ypa zy chata Zawsua ta Zerikô nata Ai a taonazie ama thei nahta,

4 so piehpie ngaitapa ta tao ei ta, lyuhchâpa hawhta a tao ei ta, sykhaoparoh ngaitapa ama alâ paphaosa ei ta, kresawti savo byh paroh ngaitapa baithlapa zy chhaota,

5 pheiky chykaraopa a ky ei ta, poh parohpa a bu ei ta; ama nie awpa ta ama phaopa viahchhâ zy cha a chawhkaraipa a maohpa châ ta.

6 Zawsua hnohta Kilkal liata amâ riena su lâna chata vawh ei ta, a hnohta nata Izarel sahlao zy hnohna chata, “Râh hlapa pi tawhta a vypa châpi ta; chatanachata eima hnohna heta bie hraih teh u,” tah ei ta.

7 Châhrasala Izarel sahlao zy chata Hivi mozy hnohna chata, “Eima hry liata a pahrâ hrapa nama châ thlâh ha ngyu aw na; kheihta e, nama hnohta bie eima hraih thei aw?” tah ei ta.

8 Âmo chata Zawsua hnohta, “Na chakaotuhpa zy eima châ hih,” tah ei ta. Zawsua chata ama hnohta, “Ahyzy ma nama châ tly? Khataih lâ tawhta a vypa e nama châ?” tah ta.

9 Âmo chata a hnohta,” ABEIPA na Khazohpa moh vâta, na chakaotuhpa zy he râh hlapa pi tawhta a vypa eima châ, a moh pathâhna zie zy, Izi râh liata a hmotaopa zydua,

10 Zawdâh haosâ liata Amawri mo abeizy pano Hesbaw râh abeipa Sihaw zy, Basana râh abeipa Astarô khih liata a ypa Ôka zy chô liata a hmotaopa zydua kha a thei thlâh ha tlôh pi ta.

11 Chatawhcha eima machâ zy nata eima râh liata a pahrâpa sahlao zydua ta eima hnohta, ‘Lâpi liata nie awpa zy a phao ula, âmo bie kei chho teh u, ama hnohta, “Nama chakaotuhpa eima châ hih, eima hnohta bie hraih teh u,” tah teh u, tahpa ta reih ei ta.

12 He eima nie awpa ta, eima viahchhâ zy he; nâmo lâta a vy awpa ta eima vaw pua nota eima o tawhta a sah hôlôpa ta eima vaw phaopa châ ta, châhrasala atahmâ la, moh tua rai u, chawhkarai haw ta, a maohpâ khai ha hih;

13 he kresawti savo byh eima ryna zy chhao he a thiehpa châ ta, moh tua rai u, a pyu khai ha hi; chatawhcha he eima pohzy nata eima pheiky zy chhao he eima vaw siena pasih kaw ta, a paroh khai ha hih,” tah ei ta.

14 Izarel sawzy chata ama niepa ama phaopa cha nie ei ta, ABEIPA pakah chhosiena rai hiahri tua leipa ei ta.

15 Chatanachata Zawsua chata âmo nata aryhna tao ta, âmo cha pahlôh awpa ta ama hnohta bie hraih haw ta; pôhpakhypa sahlao chhihthatuhpa zy chhao chata ama hnohta chhie sa ei ta.

16 Ama hnohta bie a hraih tawhta noh thôh hnoh lâna chata ama khih chheipâ pa, âmo hry liata a pahrâ hrapa ama châ tahpa pahno haw ei ta.

17 Chatawhcha Izarel pathlazy cha sie lymâ ei ta, a noh thôh noh ta ama khihpi zy cha kei tlô ei ta. Ama khihpi zy cha Kibia zy, Kephira zy, Berô zy, Kiriaziari zy a châ.

18 Pôhpakhypa sahlao chhihthatuhpa zy chata ABEIPA Izarel zy Khazohpa reipa ta ama hnohta chhie ama vaw sa hawpa vâta Izarel pathlazy chata thie veih ei. Chatanachata pôhpakhypa sahlao zydua cha chhihthatuhpa sahlao chô liana chata paphôh haw ei ta.

19 Châhrasala chhihthatuhpa sahlao zydua chata pôhpakhypa sahlao zydua hnohna chata, “ABEIPA Izarel zy Khazohpa reipa ta ama hnohta chhie sa haw tlôh pi ta, chavâta âmo cha hria hrao ma pi.

20 He hawhna heta ama chô liata tao ei sihla, pahlôh thlâh ha ei suh u, chata leipa ta la ama hnohta chhie eima sa haw tlôh vâta eima chô liana heta pathi-iana a vaw tlô thlâh ha aw mâ tâh,” tah ei ta.

21 Chatawhcha chhihthatuhpa sahlao chata ama hnohta, “Pahlôhpa ta y mawh sy,” tah ei ta. Chatanachata pôhpakhypa sahlao zydua tho a pakhytuhpa nata ti a thaihtuhpa ta vaw y haw ei ta, chhihthatuhpa zy ta ama chhopa hawhna chata.

22 Zawsua ta âmo cha pa-awsa ta, ama hnohta, “Khazia e, ‘Râh hlapapi tawhta a vypa eima châ,’ tahpa ta, maniah nama dô tly? Eima hry liata a pahrâ hrapa cha thlâh ha tlôh eichi ta.

23 Chavâta chhiesapa nama châ haw hih, khati no raita nama hry liatahpa thokha he sei châ ngathlâh ha aw ei ta, ei Khazohpa o châta tho a pakhytuhpa nata ti a thaihtuhpa ta nama y lymâ aw,” tahpa ta reih ta.

24 Âmo chata Zawsua cha a chhy ei ta, “ABEIPA na Khazohpa ta a chakaotuhpa Mawsi hnohta râh zydua he cha piepa ta, râh a pahrâtuhpa zydua he nama hmiakô tawhtapa pahleipadia lymâ awpa a châ tahpa bie a vaw piepa kha a sia ngaitapa ta pahno pi ta; chavâta nâmo vâna heta eima hrona he pahlei awpa chi ngaita pi ta, he tana heta eima vaw tao thlâh haw.

25 Atahmâ he na ku liata a ypa châ pi ta: na pachâna zie ta a phapa nata â dopa ta na pahnopa lymâ hawhna chata eima chô liata tao mah y,” tah ei ta.

26 Chatanachata ama chô liata cha hawhna chata tao ta, Izarel pathlazy tawhtapa cha pachha ta, âmo cha thie khao leipa ei ta.

27 Chatawhcha Zawsua ta cha noh liana chata a raona su maih liata pôhpakhypa sahlao zy o nata ABEIPA maisâh châta tho a pakhytuhpa nata ti a thaihtuhpa ta rao ta, atanoh taihna heta.

Zawsua (Joshua)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Zawsua Bo 10

Amawri mo pahniena

1 Zerusale khih abei Adônizede ta, Zawsua ta Ai la ta, liahsa parao ta, Zerikô nata ama abei a paraopa hawhta, Ai khih nata ama abei chhao liahsa parao ta, Kibia liata chyhsa zy chata Izarel sahlao zy nata aryhna tao ei ta, ama hry liata ama pahrâ haw hra tahpa a thei na ta,

2 chi ngaita kaw ta, Kibia cha khih lai ngaitapa abei khihpi hawhpa châ tlôh ta, Ai khih hlâta rônah via ta, a chyhsapa zydua chhao cha thatlô ngaitapa châ tlôh ei ta.

3 Chatanachata Zerusale abeipa Adonizede chata Hebraw khih abei Hôha zy, Zaramu khih abei Pira zy, Lakisa khih abei Zaphia zy, Eklaw khih abei Debi zy sahlao cha,

4 “A vy ula, maniah bao teh u, Kibia adyuh ei suh u; Zawsua nata Izarel pathlazy chhaota aryhna tao haw tlôh ei ta,” tahpa ta bie tah ta.

5 Chatanachata Amawri mo abeizy papangawh, Zerusale abei zy, Hebraw abei zy, Zaramu abei zy, Lakisa abei zy, Eklaw abei zy cha a pahmaoh ei ta, ama pheisaih sahlao zydua chhaota khy ei ta, Kibia khih ria-ai liata a pahmaoh ei ta, adyuh haw ei ta.

6 Kibia mozy chata amâ riena su Kilkal liata Zawsua lâta chyhsa tuah ei ta, “Cha chakaotuhpa zy he, pachâ leipa ta y khah y; a chatlie ngaitapa ta keimo lâta a khy la, maniah pachha la, maniah bao teh; tlâh râh liata a pahrâpa sahlao Amawri abei zydua maniah adyuh awpa ta ama pôhpakhy,” tahpa ta.

7 Chatanachata Zawsua nata a hnohta adyuhpa chyhsa zydua nata chyhsa thatlôpa riahphapa sahlao zydua cha, Kilkal tawhna chata khy ei ta.

8 ABEIPA ta Zawsua hnohta, “Âmo cha chi cheita khâ, na ku liata ei pie khai haw, ama hry liata ahyhmah ta cha pahnie awpa rai y veih ei,” tah ta.

9 Zawsua chata sôkhata chho ta, a zo a vâ ta Kilkal tawhta a vy haw tlôh ta.

10 ABEIPA ta Izarel sahlao hmiakô liana chata âmo cha patypamâpa hawhta, Kilkal liana chata a hluhpi thie ta, Behôrô khyna lâ lâpi lâta a chadai ta, Azekah nata Makedah khih taihta thie lymâ ta.

11 Chatawhcha Izarel sahlao hmiakô liata a râpaipa ta Behôrô tawhta khô pathlana su liata ama y nona chata ABEIPA ta avâ tawhta pareih laipapi ta Azekah nata Makedah taihta padaisa lymâ ta, thie ei ta; Izarel pathlazy ta zaozi ta ama chhawhsaopa zy hlâta pareih ta a daihsaopa cha ama hluh via.

12 Chatanachata ABEIPA ta Amawri mozy cha Izarel pathlazy a pie noh liana chata Zawsua ta ABEIPA lâta bie reih ta; Izarel sahlaozy mohmô liata,No y, Kibia khih chô liata a duah thlâh ha teh, Thlâpâ y, Aizalô saikao liana heta y thlâh ha teh,”tah ta.

13 Chatanachata chyhsa zy chata ama khakhaipa zy chô liata, phuh ama la hlâlei cha, noh cha a duah thlâh ha ta, thlâpâ chhao cha y thlâh ha ta.He biezy he Zasa châbu liata ropa châ vei mâ? Noh cha avâ lialiah ta y thlâh ha ta, noh kha bohlo tlai tla a chhuah vei.

14 ABEIPA ta cha hawhta chyhsapa ao a nahthlie no hawhna chata cha hlâta noh rai y beih leipa ta, a hnoh lâ chhao y beih hra vei; ABEIPA ta Izarel sahlaozy cha a dyukheipa châ tlôh ta.

15 Chatawhcha Zawsua nata Izarel sahlao zydua cha amâ riena su Kilkal lâta kua khai haw heih ei ta.

16 Cha abei papangawh zy cha a râ syulyu ha ei ta, Makedah lôpu liata a nyu ei ta.

17 “Abei papangawh zy cha ama hmô haw, Makedah lôpu liata amâ nyu,” tahpa ta Zawsua chhopa châ ta.

18 Zawsua ta, “Lôpu paka liana chata alô laipapi zy pahluah ula, a vaihtuhpa zy chhao paysa teh u;

19 nâmo deikua cha y khah u, nama khakhaipa zy cha a chadai ula, hnoh lâ a vaihtuhpa zy kha thie ula, ama khih liata rai pangiasa khah u; ABEIPA nama Khazohpa ta nama ku liata âmo cha pie haw tlôh ta,” tah ta.

20 Zawsua nata Izarel pathlazy ta ama pamo hlâ lei ta ama thie khai nahta a y chhôhpa zy cha kuh a hneipa khih liata zy amâ râ tawhna chata,

21 chyhsa zydua cha Zawsua lâta Makedah lâna chata thlalôh ngaitapa ta vaw kua haw ei ta, ahyhmah ta Izarel pathlazy lâta ama paleih papie veih ei.

22 Chatawhcha Zawsua ta, “Lôpu paka kha pahy ula, abei papangawh zy kha ei hnohta a vaw chhi teh u,” tah ta.

23 Cha hawhna chata tao ei ta, cha abei papangawh Zerusale abei zy, Hebraw abei zy, Zaramu abei zy, Lakisa abei zy, Eklaw abei zy cha lôpu tawhtapa ano lâta a vaw chhi ei ta.

24 Cha abeizy cha Zawsua lâta amâ vaw chhi nahta, Zawsua ta Izarel sahlao zydua cha aw pakhy ta, a hnohta a sie hrapa adyuhpa chyhsazy hry liata pawhrâh viapa zy hnohna chata, “A vaw hnia ula, he abei sahlao rao he vaw tly teh u,” tah ta. Chatanachata a vaw hnia ei ta, ama rao cha tly ei ta.

25 Zawsua ta ama hnohta, “Chi leipa ula, riahchhiepa ta y hra khah u; thatlô ngaitapa nata riahpha ngaitapa ta y teh u; nama khakhaipa zydua namâ dyuhpa chô liata ABEIPA ta he hawhna heta a tao lymâ aw,” tah ta.

26 Cha khai tawhta Zawsua ta tusao ta, thie ta, thokô miapangawh liata bangie ta. Chatanachata zâlâ taihta thokô liata a bangie ei ta;

27 chatawhcha noh tla chyta Zawsua ta bie pie ta, thokô tawhtapa cha la ei ta, amâ nyuna lôpu liana khata thy ei ta, lôpu paka cha alô lai ngaitapazy ta phiehru ei ta, atanoh taih tlai heta a y thlâh haw.

28 Zawsua ta cha noh liana chata Makedah khih cha la ta, ama abei chhaota zaozi ta chhawhsao ta, cha khih liata a ypa zydua chhaota thie khai ta, pakha hmah pahlôhpa rai hnei vei; chatanachata Zerikô abei chô liata a taopa hawhna khata Makedah abei chô liata chhao tao ta.

29 Zawsua cha Izarel sahlao zydua chhaota Makedah tawhta Libnah lâta sie ei ta, Libnah khih cha a dyuh ei ta;

30 ABEIPA ta cha khih cha ama abei chhaota, Izarel zy ku liata pie heih ta; cha khih cha adyuhpa ta, a chhôh liata a ypa zydua cha zaozi ta thie khai ta; a chhôh liata chyhsa pakha hmah pahlôhpa y vei; Zerikô abei chô liata a taopa hawhna khata, cha khih abei chô liata chhao tao ta.

31 Zawsua cha Izarel sahlao zydua chhaota, Libnah tawhta Lakisa lâta sie ei ta, a rie pâ ei ta, adyuh ei ta:

32 ABEIPA ta Lakisa cha Izarel zy ku liata pie ta, a noh nona liata la ei ta, cha khih cha adyuhpa ta, a chhôh liata a ypa zydua cha zaozi ta thie khai ei ta, Libnah chô liata a taopa hawhna khata.

33 Chatanachata Keza khih abei Hôra cha Lakisa khih bao awpa ta khy ta; Zawsua chata ano nata a sahlaozy chhaota pakha hmah pahlôh leipa ta vaw thie khai ha ta.

34 Zawsua cha Izarel sahlao zydua chhaota, Lakisa tawhta Eklaw lâta sie ei ta; a rie pâ ei ta, adyuh ei ta;

35 cha noh liana chata la ei ta, cha noh lilaw liana chata khih cha dyuhpa ta, a chhôh liata a ypa zydua cha zaozi ta thie khai ta, Lakisa chô liata a taopa hawhna khata.

36 Zawsua cha Izarel sahlao zydua chhaota, Eklaw tawhta Hebraw lâta khy ei ta; adyuh ei ta,

37 la ei ta, cha khih nata ama abei nata a khih chheipâh zydua nata a chhôh liata a ypa zydua cha zaozi ta thie khai ta; Eklaw chô liata a taopa hawhna khata pakha hmah pahlôh leipa ta, a khih taihta parao khaipa ta a chhôh liata a ypa zydua cha thie khai ha ta.

38 Zawsua nata Izarel sahlao zydua cha Debi khih lâta kua heih ei ta,

39 adyuh ei ta, cha khih nata ama abei nata a khih chheipâh zydua la ta; chatawhcha zaozi ta a dyuh ei ta, a chhôh liata a ypa zydua cha thie khai ta; pakha hmah pahlôh vei; Hebraw chô liata a taopa hawhna khata, Debi khih nata ama abei chô liata chhao tao ta, Libnah khih nata ama abei chô liata a taopa hawhna hra khata.

40 Chatanachata Zawsua ta a râh zydua, tlâh râh zy, Neke râh zy, bypi râh zy, pâdawhpa râh zy pahnie khaipa ta ama abei zydua cha thie khai ta; pakha hmah pahlôh vei, ABEIPA Izarel zy Khazohpa bie a piepa hawhta, a hrohpa maih cha tlao pamo khai haw ta.

41 Zawsua chata Kadesabania tawhta Kaza taihta Kose râh zydua chhaota Kibia taihta pahnie khai ta.

42 Cha abei sahlao zydua nata ama râhzy cha ABEIPA Izarel zy Khazohpa ta Izarel sahlao cha a dyuhkheipa vâta Zawsua chata ei kha ta a patu khaipa ama châ.

43 Chatawhcha Zawsua nata Izarel sahlao zydua cha amâ riena su Kilkal lâta kua khai haw heih ei ta.