Pachaona ta Kana râh cha pachhaihpa a châ
1 Hezy he Izarel pathlazy ta Kana râh liata ama lapa theihthaipa Eliaza zy, Nuna sawchapawpa Zawsua zy, Izarel pathlazy pho chhôhkha pawhrâhpa zy ta ama ryuto châta ama vaw rai hawpa zy cha
2 Pho chaki zy nata pho khophie zy tovyuh châta ABEIPA ta Mawsi hmâpa ta bie a vaw pie hawpa hawhna khata a châ.
3 Mawsi chata pho no nata khophiezy cha Zawdâh haosâ liana khata ama ryuto awpa pie haw tlôh ta; Livai chizy deikua cha ama hry liata ryuto pie vei.
4 Zawsi pathlazy cha pho no ama châ, Manase nata Ephrai cha; Livai chizy cha cha râh liana chata tovyuh pie veih ei, ama yna awpa khihpi zy nata a chheipâh sahroh pabâsana awpa su nata âmo o sana dei leipa ta cha.
5 ABEIPA ta Mawsi bie a piepa hawhna khata Izarel pathlazy chata tao ei ta; râh cha pachhaih ei ta.
Hebraw cha Kaleba hnohta piepa a châ
6 Chatanachata Zudah pathlazy cha Kilkal liata Zawsua lâta vawh ei ta; Keniza chyhsa Zephune sawchapawpa Kaleba chata a hnohta, “Kadesabania su liata Khazohpa chyhsa Mawsi hnohta, ABEIPA ta ei thâtih nata namâ kyh liata a bie reipa kha thei chi ta.
7 ABEIPA chakaotuhpa Mawsi ta Kadesabania su taawhta râh mohparu awpa ta eina tuah nona khata kô sypalihpa châ na ta, ei palôhrupa liata a ypa hawhna tlai cha a hnohta, tlôkhei na ta.
8 Anodeikuacha ei unawhpa ei hnohta a sie hrapa zy khata zawpi zy pathipalôh pahlei pa ei ta, kei deikua chata ABEIPA ei Khazohpa cha khâchâ a pyh na ta.
9 Chatanachata Mawsi ta cha noh liana chata, ‘ABEIPA ei Khazohpa cha khâchâ nâ pyhpa vâta na phei ta na tly hawpa râh cha chhâzaw ta nâma nata na pathlazy ryuto awpa a châ tlai aw tahpa ta chhie sa ta.
10 Chatanachata ABEIPA ta Mawsi hnohta cha biezy cha a reih rakha tawhta Izarel sahlaozy râhpathohpa liata amâ khie ngâ chhôh liana khata ABEIPA ta a rei hawpa hawhna khata kô sypalih nata kô pangawh tlai na pahro ta, chatanachata atahmâ he kô sycharie nata kô pangawh cha hawh na ta.
11 Chata chôna chhaota atahmâ taih chhaota, Mawsi eina tua no hawhna khata ei tha tlô ta; eikhano ta adyuhna nata pua-ei nawpa ta ei tha ei hneipa hawhta atahmâ chhao ei hnei thlâh haw.
12 Chatanachata he tlâh râh he ABEIPA ta kha noh liata a vaw rei hawpa kha na pie mah y; kha hawhta Anaki mozy y ei ta, ama khihpi zy chhao rôhnahpa ta kuh ta padôpa a châ tahpa kha noh liana khata na pahnopa kha; ABEIPA chata na ypâpa ta, âmo cha papua thei ngyu aw ta, ABEIPA ta a rei hawpa hawhna khata,” tah ta.
13 Chatanachata Zawsua chata byhnâ aw ta, Zephune sawchapawpa Kaleba cha a ryuto châta Hebraw cha pi haw ta.
14 Chatanachata Hebraw cha he noh taihta Keniza chyhsa Zephune sawchapawpa Kaleba ryuto a vaw châ haw, ABEIPA Izarel zy Khazohpa cha khâchâ a pyhpa vâta.
15 Chatawhcha Hebraw mo cha cha hlâta cha Kiriathaba a châ; Araba cha Anaki mo hry liata chyhsa lai chaipa a châ. Chatanachata râh cha thlahlôhpa ta y haw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 |