Zawdâh maisâh
1 Chatanachata Zawsua ta Rubena mozy, Kada mozy nata Manase pho khophie cha aw ta,
2 ama hnohta, “ABEIPA chakaotuhpa Mawsi ta bie a cha piepa maih a pyh lymâ eichi ta, bie ei cha piepa maih chhao, a pyh lymâ hra eichi ta;
3 noh hluhpi atanoh taihta nama unawhpa zy cha pathlua leipa eichi ta, ABEIPA nama Khazohpa ta tao awpa ta bie a cha piepa zy tao eichi ta.
4 Chatawhcha ABEIPA nama Khazohpa ta ama hnohta a vaw rei hawpa hawhna khata, nama unawhpa zy he thlalôhna a pie haw hih; chavâta ABEIPA chakaotuhpa Mawsi ta Zawdâh haosâ liata nama tovyuh châta râh a cha pie hawpa liana khata nama poh-o zy lâna chata a di heih teh u.
5 ABEIPA chakaotuhpa Mawsi ta ABEIPA nama Khazohpa cha a kyh pachâ ta, a lâpi zydua cha a chhihpa ta, a biepiepa zy a pyhpa ta, ano cha khâchâ patupa ta, nama pathipalôh tlokhuh nata nama thlahpa tlokhu ta, liahsa chakao awpa ta liahsa patu a chhuah tua tlai teh u,” tah ta.
6 Chatanachata Zawsua ta âmo cha byhnâ aw pa ta, pasiesa haw ta; chatanachata ama poh-ozy lâta a di haw ei ta.
7 Manase pho khophie zy kha Mawsi ta Basana râh liata tovyuh pie ta; a khophie a hropa zy deikua cha Zawsua ta notla lâchhâh Zawdâh haosâ liata ama unawhpa zy hry liata tovyuh tlao pie ta. Chatawhcha Zawsua ta ama o lâta a padisa chyna khata byhnâ aw pa ta,
8 ama hnohta, “Nama poh-o zy lâna chata tâkâ zy, ngôh zy nata dawh zy chhaota, thua zy nata chysia hluhpi zy chhaota, nama khakhaipa zy tawhtapa nama hraona zy kha, nama unawhpa zy nata a rai teh u,” tahpa ta reih ta.
9 Chatawhcha Rubena pathlazy nata Kada pathlazy nata Manase pho khophie cha kua heih ei ta, Kana râh Shilôh khih tawhtapa cha Izarel pathlazy tawhna chata Kilia râh ABEIPA ta Mawsi hmâpa ta bie a vaw pie hawpa hawhna khata ama tovyuh ta rao hawpa râh lâta sie awpa ta pua haw ei ta.
10 Chatawhcha Kana râh liata Zawdâh râh ama tlô nata, Rubena pathlazy nata Kada pathlazy nata Manase pho khophie chata Zawdâh kiah liana chata maisâh tao ei ta, maisâh laipapi cha.
11 Chatawhcha Izarel pathlazy chata, “Rubena pathlazy nata Kada pathlazy nata Manase pho khophie zy chata Kana râh kiapâh Zawdâh râh, Izarel pathlazy râh lâchhâh ta maisâh ama tao,” tahpa ta chyhsa reipa thei ei ta.
12 Cha cha Izarel pathlazy chata ama thei nata Izarel pathla zawpi zydua cha âmo dyuh a chhuahpa ta Shilôh khih liata a pahmaohpakhy ei ta.
13 Chatawhcha Izarel pathlazy chata Kilia râh liata Rubena pathlazy nata Kada pathlazy nata Manase pho khophie hnohna chata theihthaipa Eliaza sawchapawpa Phineha tuah ei ta,
14 a hnohta chhihthatuhpa pahrawh, Izarel sahlao pho hry liata chhôhkha pawhrâh chaipa pakha lymâ ta, chazy cha Izarel sahlao pho hry liata ama chhôhkha pawhrâh chaipa lymâ ama châ.
15 Chatawhcha Rubena pathlazy nata Kada pathlazy nata Manase pho khophie hnohta, Kilia râh lâna chata sie haw ei ta, ama hnohta,
16 ABEIPA zawpi sahlao zydua ta ‘Izarel zy Khazohpa chô liata khâpa ma nama parao tly? ABEIPA chô liata atanoh he aty a chhuahpa ta maisâh taopa ta, atanoh he ABEIPA cha namâ heisai tly?
17 Peôr su liata paraona zy kha eima châta a chyh tupa ta pachâ theipa a châ mâ? Atahmâ taih chhao heta khâ eima moleina zy kha a pathai khai ma pi, ABEIPA zawpi sahlao hry liana khata,
18 hri kha a chareina chôta atanoh he ABEIPA cha a heisaih namâ chhuah tly? Atanoh ta ABEIPA chô liata namâ tyhpa he mylâ la Izarel zawpi sahlao zydua chô liata a pathi a ia tlai aw.
19 Anodeikuacha nama râh topa he a pathaih vei khiahtala ABEIPA râh chhôh, ABEIPA achhyna byureih yna su lâta a vy ula, eima hry ta pahrâ hra teh u; anodeikuacha ABEIPA eima Khazohpa maisâh dei leipa ta maisâh hropa taopa ta ABEIPA chô liata aty leipa ula, eima chô liata chhao a ty hra khah u.
20 Zerah sawchapawpa Âkhâ khata pananopa hmo a paraona liana khata hiehâhna tlô vei ma khâ? Kha kha a hmo paraona liata ano deita ta leidia vei, ama tah mâ tâh,” tahpa ta reih ei ta.
21 Chatanachata Rubena pathlazy nata Kada pathlazy nata Manase pho khophie chata Izarel sahlao pho pawhrâhpa zy cha a chhy ei ta, ama hnohta,
22 ABEIPA, khazoh zy Khazohpa! ABEIPA khazoh zy Khazohpa chata pahno ta; Izarel sahlao chhaota ama pahno aw! Eima maisâh taopa he ABEIPA a heisaih a chhuahpa ta, aty a chhuahna tlyma hmoparao a chhuahna tlyma ta, a taopa eima châ khiahtala, atanoh chhao heta maniah pahlôh kha u,
23 raopa hlâna châta tlyma niepa hlâna châta tlyma, aryhna hlâna châta tlyma, a châ khiahtala ano ABEIPA tlaita vaw pachâ mawh sy.
24 A noh hro ta nama pathlazy ta eima pathlazy hnohta, ‘Nâmo ta Izarel zy Khazohpa he khâpa châta nama hmâna ma a y tly?
25 Nâmo Rubena pathlazy nata Kada pathlazy saih u, ABEIPA ta keimo nata nâmo châta Zawdâh he râhri rakha ta a taopa a châ mâ tâh. ABEIPA liana heta tovyuh hnei hra veih eichi,’ ama vaw tah pathlei aw na, tahpa ta a chadôpa vâta taona chhâpa hnei ngaitapa ta a tahpa eima châ mâ tâh. Nama pathlazy sahlao ta eima pathlazy cha ABEIPA china cha pahno leipa ta ama tao thei mâ tâh.
26 Chavâta, ‘Maisâh tao ei suh u, raopa hlâna châta nata atheihna châta deikua châ leipa ta,
27 keimo nata nâmo nata eima hnôh lâta eima pathlazy sahlao likaw liata a pahnona châ aw ta, chatanachata eima raopa hlâna zy nata eima atheihna zy nata eima aryhna hlâpa zy heta ABEIPA eima atheihna zy nata eima aryhna hlâpa zy heta ABEIPA eima chakao thei nawpa ta nata ama pathlazy chhaota; nohhro ta eima pathlazy hnohta, “ABEIPA liata tovyuh hnei veih eichi,” ama tah lei nawpa ta,’ eima tah.
28 Chavâta he hawhta eima pachâ, nohhro zy ta eima hnohta tlyma, eima pathlazy hnohta tlyma, cha hawhta ama tah tita, keimo ta, ‘Moh teh u, mania pathlatuhpa zy ta ABEIPA maisâh yzie ama taopa he raopa hlâna awpa nata atheihna awpa châ vei, keimo nata nâmo likawh ta pahnona tlao a châ,’ eima tah nawpa ta, eima tah mâ tâh.
29 ABEIPA chô liana chata atypa ta atanoh he ABEIPA aheisaipa ta ABEIPA eima Khazohpa maisâh achhyna byureih kiapâh liata maisâh dei leipa he, raopa hlâna châta tlyma, niepa hlâna châta tlyma, a theihna châta tlyma ta, maisâh a taopa eima châ leizie cha,” tah ei ta.
30 Theihthaipa Phineha nata a hnohta a ypa zawpi sahlao chhihthatuhpa Izarel sahlao pho pawhrâhpa zy chata Rubena pathlazy nata Kada pathlazy nata Manase pathlazy bie reipa ama thei nahta palysa kaw ta.
31 Chatawhcha theihthaipa Eliaza sawchapawpa Phineha chata Rubena pathlazy nata Kada pathlazy nata Manase pathlazy hnohta, “ABEIPA chô liata hmo nama parao leipa vâta atahmâ la ABEIPA cha eima hry liata a y tlai, tahpa eima pahno haw mâ tâh; chatanachata Izarel pathlazy he ABEIPA ku tawhtapa nama pachha haw hih,” tah ta.
32 Chatanachata theihthaipa Eliaza sawchapawpa Phineha nata chhihthatuhpa sahlao cha Rubena pathla nata Kada pathlazy tawhna chata Kilia râh tawhtapa cha Kana râh liata Izarel pathlazy lâna chata a di haw heih ei ta, bie cha kei tlôkhei ei ta.
33 Cha biezy chata Izarel pathlazy cha palysa kaw ta; chatawhcha Izarel pathlazy chata Khazohpa cha reithai haw ei ta, chatanachata Rubena pathlazy nata Kada pathlazy cha adyuhpa ta ama yna râh paraopa awpa kyh zy cha reih khao leipa ei ta.
34 Rubena pathlazy nata Kada pathlazy châta cha maisâh cha “Pahnona” tah ei ta, ABEIPA cha Khazohpa a châ tlai na, tahpa eima likaw liana heta “Pahnona a châ hih,” ama tah.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 |