Mara Holy Bible: Rawma Mozy

Showing posts with label Rawma Mozy. Show all posts

Rawma Mozy 1

Rawma Mozy 1

Anaona

1 Pawla, Zisu Krista sei. Khazohpa ta apôstôl châ awpa ta a awpa nata Thâtihpha chho awpa ta a pananopa chata he châ paphaopa he a roh.

2 Cha Thâtihpha cha hlâno ta Khazohpa ta a hrohsopazy hmâpata bie â taih ha chiehpa, Châropa Pathaihpa liata â rohpazy cha.

3 Cha cha a Sawchapawpa, eima Beipa Zisu Krista thâtih châ ta; a sapa kyh lâta cha Davi pathla ta a pihpa châ ta;

4 a thlahpa pathaihna kyh lâta deikua athihpa hry tawhta a thyuheina chata ano cha Khazohpa Sawchapawpa a chânazie thata palâsa ta.

5 Ano zawzi ta Khazohpa ta ngiachhiena chôta apôstôl châna maniah patosa ta, cha chata â chhuahpa cha pho to chyhsa ano bie pazyhsa ta pangiapâsa awpa he a châ.

6 Cha chata nâmo Rawma khih liata a ypa zydua chhao a cha pahly ei, Khazohpa ta Zisu Krista eih châ awpa ta a awpa nama châ.

7 Kei, Pawla heta Rawma khih liata Khazohpa kyhpachâpazy nata ano chyhsa châta a awpazy cha ei châ naoh ei. Khazohpa eima Paw nata Abeipa Zisu Krista tawhtapa ngiachhiena nata thlahlôhna nama hnohta y mawh sy.

Pawla ta Rawma a tly khona

8 Khizaw zydua liata namâ ngiapâna kyh a pathâhpa vâta, nama zydua chôta ei lyna bie Zisu Krista zawzi ta ei khazohpa lâta ei reih tua.

9 Ei thlahchhânazy liana chata bâh leipa ta nama moh reih tyh na ta, atahmâ chhao he nâmo lâta ei vy nawpa ta Khazohpa ta âryh a tah khiahtala

10 tlyna daihti rypaohpa ei hmô thei nawpa ta ei hiah tyh, a Sawchapawpa Thâtihpha liata ei thlahpa ta ei chakao tyhpa, Khazohpa cha a pahnotuhpa châ tlôh ta.

11 Nama pachyu nawpa ta thlahpa lâ hmopiepa kheihawhpa tlyma ei cha pie thei nawpa ta hmô cha byuh kaw tlôh ei na ta,

12 cha cha namâ ngiapâna nata ei ngiapâna ta thlah eimâ palôh rairieh thei nawpa ta ei tah.

13 Unawh saih u, “Zenitai hropazy lâta ei hriapasana theilâpa ei hmô hawpa hawh hra ta, nama hry liata chhao theilâpazy ei hmô thei hra nawpa ta, nâmo lâ ei hluhpi a vy ei chhuah haw tahpa nama pahno lei awpa khoh leipa na ta, châhrasala cha hlâ zydua khata pakhâpa ta y tyh na ta.

14 Krika mozy nata râh hropa chyhsazy lâta abâhpa ei hnei, chyhsa sopa nata a so leipazy lâta chhao:

15 nâmo Rawma khih liata a ypazy hnohta chhao Thâtihpha thata chho awpa ta ei mâ thlâh haw.

Thâtihpha hmotaotheina

16 Thâtihpha cha zakhei tlôh lei khâh na ta: ahyrai a ngiapâpa maih châta pachha nawpa ta Khazohpa hmotaotheina châ tlôh ta, a hmiatua ta Zu chyhsa châta châ ta, Krika mo châta chhao châ heih ta.

17 Cha liana chata ngiapâ pachai nawpa ta ngiapâna ta Khazohpa siazie cha â vaw luah ta, “A ngiapâ vâta thaipachâsapa chyhsa chata hrona a hnei aw,” tahpa ta ropa hawhna khata.

Chyhsa thailei pachâsana

18 Ama moleinazy ta bie hmeiseihpa a pakhâtuhpazy, Khazohpa pachâ leina nata sia leina zydua chô liata avâ tawhta Khazohpa hiehâhna â vaw luah.

19 Khazohpa thâtih a pahno awpa chyhsa cha, ama palôhrupa liata pahnosapa ta y tlôh ta.

20 A hmo hmô thei leipa, a chhâzaw hmotaotheina nata a khazohnazie cha khizaw tao tua no tawhta a siapa ta hmôpa ta y ta, hmotaopa liata â lâ. Chatanachata rei nawpa hnei veih ei;

21 Khazohpa pahno tlôhpa ta Khazohpa hawhta palyupalih leipa ei ta, alyna bie chhao reih hra veih ei, hmo hrao leipa tlao pachâ via ei ta, ama pathipalôh hrupa cha vaw zoh haw ta.

22 Sopa ta a pachâpa ta, a hrupa lâta vaw châ ei ta,

23 thi thei leipa Khazohpa rônahpa cha thi theipa chyhsazy nata pavawzy, phei palihpa sazy, alyh theipazy nohthlahpa hawhta pachâsa haw ei ta.

24 Chavâta ama pôhpa nozachhih ngaitapa ta, a tao rairieh awpa ta ama pathipalôh piepie-aohraona hawhta hmo puapa tao pasaipa ta Khazohpa ta â heisai haw.

25 Khazohpa bie hmeiseihpa cha haipa ta pachâsapa ta, a Taotuhpa a chhypa hlâta a taopa cha a chhypa ta tlao chakao tlôh ei ta, Taotuhpa cha chhâzaw ta reithai tlâh a châ! Amen.

26 Cha vâna chata Khazohpa ta nozachhih ngaitapa ta sihry pasaipa ta a heisai ta. Ama chanôzy tlai chhaota ama yzie pikheipa yzie leipa hawhta y awpa ta a panano tlôh ei ta,

27 chapawzy chhaota chanô hmâzie tyhpa bâsaipa ta sihrypa ta y ei ta, chapaw nata chapaw a chhie ngaitapa ta a tao ei ta, ama moleina ty hmô awpa cha âmo liata hmô ei ta.

28 Khazohpa ama pahno khoh leipa vâta, hmo a ngia leipazy tao awpa ta a khoh leipa palôhrupa phaoh pasaipa ta Khazohpa ta â heisai haw.

29 Chatanachata sia leina zydua zy, moleina zydua zy, karâyna zydua zy, kiaphaona zydua zy ta bie ei ta. Hnâchhaona zy, lianycheina zy, ahryuna zy, dôna zy, nôchâ pha leina zy ta bie ei ta, hohiahpa zy,

30 kyh rei hmâhpa zy, Khazohpa ahaopa zy, a tahsapa zy, a palaipa zy, a pahôpahâhpa zy, hmo moleipa hmo chhiepa a papuatuhpa zy, nôpaw rei a ngiah leipa zy,

31 palôhrupa a hnei leipa zy, bietai a paraotuhpa zy, kyhpachâna a pikhei leipa zy, zawngiahna a hnei leipa zy châ ei ta.

32 Cha hawhta hmo a taotuhpazy cha a thi awpa tla rai ama châ tahpa Khazohpa raopa cha pahno thlâh hapa ta, âmo deita â tahpa chhao châ leipa ta, mo hropa a tao tyhpazy chô liana chata amâ ly tyh hra.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 2

Khazohpa pachiana siazie

1 Chavâta hy chyhsapa, a seituhpa, ahyrai châ hra la, rei nawpa rai hnei va chi; mo hropa na seina liana tlai khata, nâmasasyh ta thai lei na pachâsa mâ tâh, nâ a seituhpa chhao chita cha hawhpa hmozy cha tao tyh hra tlôh chi ta.

2 Cha hawhpa hmo a tao tyhpazy chô liana chata Khazohpa ta a seina cha bie do ngaitapa lâ a châ lymâ tahpa pahno tlôh pi ta.

3 Hy chyhsapa, cha hawhpa hmo a tao tyhpazy a seituhpa y, nâma ta cha hawhta tao hra tlôh chi ta, Khazohpa ta a seina cha khôkhâh awpa na pangiasa ma?

4 A châ vei khiahta, Khazohpa phana ta ro nawpa ta a cha chhi tyh tahpa pahno leipa ta a phana hluhzie nata a chhy thaizie nata a nôphaziezy cha khâpahrao leipa ta na pachâsa ma?

5 Na pathipalôh kuhchhapa nata ro leipa vâta hiehâhna nata Khazohpa pachiana sia ngaitapa a vaw luah no chata, na chô liata pathi-iana na pachôpakhy.

6 Khazohpa chata chyhsa to ama hmotaopa lymâ hawhta a pachia aw:

7 hmophapa tao hualuapa ta rônahna nata palyupalihna nata leidia thei leina a tluatuhpazy hnohna chata, chhâzaw hrona a pie aw;

8 châhrasala chhorupa ta bie hmeiseihpa zyh leipa ta, sia leina tlao a zyhtuhpazy chô liana chata hiehâna nata pathi-ianazy y aw ta.

9 Rietheipasana nata pachârôh ngaitanazy chyhsapa hmo a paraopa maih chô liata a y aw, Zu mo chô liata y tua aw ta, Krika mo chô liata a y heih aw.

10 Châhrasala hmophapa a taotuhpa maih hnohna chata rônahna zy, palyupalihna zy, thlahlôhna zy piepa a châ aw, Zu mo hnohta pie tuapa châ aw ta, Krika mo hnohta a châ heih aw.

11 Khazohpa ta chyhsa khokheipa hlei hnei tlôh leipa ta.

12 Ahyrai ryhpa hnei leipa ta hmo a paraopa cha ryhpa leipa ta a leidia aw, ahyrai ryhpa hnei ta hmo a paraopa cha ryhpa ta pachiapa ta a y aw.

13 Ryhpa a pahnotuhpazy cha Khazohpa mohmô ta a siapa châ leipa ei ta,

14 Khazohpa ta ei Thâtihpha reipa hawhta chyhsapazy bieparu Zisu Krista hmâpa ta a pachia noh liana chata ryhpa hawhta a taotuhpazy cha a siapa ta reipa ta tlao ama y aw.

15 Ryhpa a hnei leipa Zenitaizy ta ama pathipalôh pikheipa ta ryhpa hmotaopazy cha taopa ta, chazy chata ryhpa hnei vei hra ei sala, ama pathipalôh liata ryhpa hmotaopa ropa a châ tahpa pamosa ei ta.

16 Cha cha ama ngiaryhna ryh leina phapa pahnona ta pahnokhei ta, ama palôhrupazy cha a ei ta, thai lei a pachâsa nota y ta, thai a pachâsa nota y ta.

Zuzy nata ryhpa

17 Châhrasala nâ Zu moh a phaohpa châ tlôh chi ta, ryhpa cha a ngâchhâ chi ta, Khazohpa a palaikhei chi ta,

18 a khopa pahnopa ta, ryhpa bie liata pachupa ta na ypa vâta hmophapa cha a pha tah chi ta,

19 ryhpa liana chata sona nata bie hmeiseihpa yzie na hneipa vâta,

20 mochaopazy chhihthatuhpa, zohna hryta a ypazy a khaihtuhpa, chyhsa so leipazy a pasotuhpa, hawsaizy a pachutuhpa a chapa ta a nga chi ta,

21 cha hawhpa na châ hnokua cha, nâ, mohropazy a pachutuhpa, nâma a pachu va chi mâ? Nâ, chyhsa paru lei awpa ta chhotuhpa, nâ ta na paru tyh ma?

22 Nâ, a phei lei awpa ta a chhotuhpa, nâ ta nâ phei tyh mâ? Nâ, khazoh nohthlahpa a haotuhpa, nâ ta khazoh nohthlahpa achhyna-o liata hmozy na paru tyh mâ?

23 Nâ, ryhpa a palaikheityhpa, nâ ta ryhpa na paraopa vâta Khazohpa moh na pachhie tyh mâ?

24 Ama ropa hawhna tlai khata, “Khazohpa moh cha nâmo vâta Zenitaizy hry liata reipachhiepa ta a y haw hih,” tah ta.

25 Ryhpa a zyhtuhpa na châ khiahtala chopawtaipa cha a phahnai; ryhpa a paraotuhpa na châ khiahta deikua cha, na chopawtaipa cha tai leipa hawhta a châ haw.

26 Chopawtai leipa chyhsa ta ryhpa bieraopazy â vao khiahtala, a chopawtai leipa cha taipa hawhta pachâpa châ aw vei mâ?

27 Âmo pihnazie ta chopawtai leipa ta ryhpa cha a zyh paki khiahtala, nâ, cha bie nata chopawtai ryhpa hnei tlôh ta ryhpa a paraotuhpa, cha sei aw vei ma’.

28 Chôpho deita Zu moh a châpa cha Zu mo hmeiseih châ leipa ta, chôpho ta sapa dei chopawtaipa cha chopawtai hmeiseihpa châ hra vei.

29 Chôpho dei châ leipa ta Zu moh a châpa cha Zu mo hmeiseipa tlao a châ* Chopawtai hmeiseihpa cha palôhrupa lâta taipa a châ, cha bie liata dei châ leipa ta, thlahpa liata a châ. Cha chata chyhsapa reithaipa hlao leipa ta Khazohpa reithaipa tlao a hlao.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 3

1 Cha khiahtala Zu mo chata phahnaina khâpa a hnei hlei? Chopawtaipa chhao khâpa a phahnai?

2 Kyh to liata a phahnai kaw. Khazohpa biezy ama hnohta pavaosapa ta a ypa vâta a châ chai.

3 Chyhsa thokhazy ta ngiapâna hnei vei hra ei sala khâpama a tah hlei aw? Amâ ngiapâ leina chata Khazohpa ngâchhihzie khâpahrao leipa ta a tao hlei mâ?

4 Châ bao va! Khazohpa cha a do ngaitapa châ sala, chyhsa to deikua cha a haihpa tlao châ ei se.“Nâ ta na bie reipa ta thai châ thei chi ta,"pachiapa ta na ypa chhaota na pahnie thei nawpa ta, ”tahpa ta ropa hawhna khata.

5 Châhrasala eima sia leina heta Khazohpa siana cha â ngia viapa ta a palâsa khiahtala, khâpa eima reih aw? Khazohpa ta chyhsa a hrie nona heta a sia leipa a châ ma? (Chyhsapa yzie hawhta ei reih.)

6 Châ bao va! Chata a châ khiahtala Khazohpa ta kheihta e khizaw a pachia thei aw?

7 Châhrasala ei haipa bie reipa vâta Khazohpa bie a dozie ano parônahsana taihta a lâ tlôh khiahta cha. khazia kei chhao moleipa hawhta thai lei pachâpa ta ei y?

8 Khazia hmophapa a vaw tlô thei nawpa ta hmo moleipa tlao eima tao vei? tahpa ta chyhsa thokha ta rei leipa na pareisa pâ ei ta, na leih ei ta. Cha hawhpa chyhsazy chata thai lei ama châpa cha a sia.

Ahyhmah ta a siapa y veih ei.

9 Cha khiahtala, âmo hlâta eima pha via hlei ma? Châ bao va! Zuzy nata Krikazy cha moleina sei ta a y khaipa ta châ hlâ chhaota eima bai hawpa kha,

10 “Ahyhmah a siapa rai y veih ei;"pakhahmah y chachei veih ei.

11 ahyhmah a pahno thaipa rai y veih ei, ahyhmah Khazohpa a tluapa rai y veih ei.

12 Ano leipa lâta tlei khai haw ei ta, khâpahmah phahnai leipa ta y khai haw ei ta; ahyhma hmophapa a taopa rai y veih ei, pakhata hma y veih ei,”

13 ‘Ama rao cha thlâ a pahypa châ ta, ama paleih ta dôna bie reih ei ta.” “Ama hmao liata parih châmaih y ta.”

14 “Ama pakah cha chhiesana nata bie khapa ta bie ta.”

15 “Ama phei cha thisaih palo nawpa ta chakâ ta,

16 ama lâpi liana chata leidiana nata rietheina y ta,

17 thlahlôhna lâpi chhao pahno veih ei.”

18 Ama mohmô liata Khazohpa china rai y vei,” tahpa ropa hawhna khata.

19 Ryhpa ta khâpa rai a reihpa maih cha ryhpa reisai ta a ypazy hnohta a reih tahpa pahno pi ta, pakah to rai hmao mopa ta a y thei nawpa ta nata khizaw liata chyhsa zydua Khazohpa ryurei ta ama y thei nawpa ta.

20 Chatanachata ryhpa hmotaopa vâta chyhsa ahyhma a mohmô ta thai châpa ta y aw veih ei, ryhpa vâta moleina pahno pakina a vaw ypa châ tlôh ta.

Ahyhma ta a siapa y veih ei

21 Châhrasala atahmâ ryhpa nata hrohsopazy pahnosapa hawhta ryhpa leipa ta Khazohpa siana cha paluahsapa ta a y haw,

22 cha cha Khazohpa siana Zisu Krista ngiapâpa vâta a ngiapâpa maih hnohta paluahsapa ta a ypa cha a châ. Ananona rai y leipa ta;

23 chyhsazy duata molei khai haw ei ta, Khazohpa rônahna to thei khao veih ei,

24 cha ngiapâtuhpazy cha Krista Zisu chatlaina a ypa vâna chata, a ngiachhiena ta a saipa ta thai pachâsapa ta y ei ta,

25 Khazohpa nôphana ta hlâno ta moleinazy pahno lei pachâpa ta a ypa vâna khata, Khazohpa ta ano siana pamosa nawpa ta Krista Zisu cha a thisaih ta ngiapâna vâta molei reihpha cheina ta rao ta;

26 atahmahlâ ta a sianazie pamosa nawpa ta a châ, ano tlai cha mosiapa a châ thei nawpa nata Zisu ngiapâpa maih thai pachâsatuhpa a châ thei nawpa ta.

27 Apalaina cha khataih liata a y tly? Khôtho lâta khawhlôhpa ta a y haw. Khâpa ryhpa ta a châ tly? Hmotaona ryhpa ta ma? Châ bao va, ngiapâna ryhpa ta tlao a châ.

28 Chavâta ryhpa hmotaopa châ leipa ta, ngiapâna ta chyhsa ta thai châpa ta eima rao.

29 Khazohpa cha Zuzy Khazohpa dei ma a châ? Zenitaizy Khazohpa chhao châ hra vei ma? A châ hra,

30 chopawtaipazy cha amâ ngiapâpa vâta thai a pachâsatuh awpa nata chopawtai leipazy cha amâ ngiapâpa zawhzi ta thai a pachâsatuh awpa cha Khazohpa pakha deita a châ tlôh khiahta cha, Zenitaizy Khazohpa chhao a châ hra aw tlai.

31 Cha khiahtala ngiapâna vâta ryhpa cha khâpahrao leipa ta eima pachâsa ma”. Châ bao va! Ryhpa cha tlao eima pa-i.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 4

Abaraha amopâna

1 Cha khiahtala Abaraha sapa ryhpa ta eima pathlatuhpa chata khâpa a hmô eima tah aw?

2 Abaraha ta hmotaopa vâta thai a châ tlôh khiahta cha, a palai nawpa a hnei, Khazohpa lâ deikua cha hnei vei.

3 Khazohpa chata khâpa a reih? “Abaraha chata Khazohpa a ngiapâ ta, cha ngiapâna cha a siana ta raopa a châ,” tahpa ta a reih.

4 Chatawhcha raihriatuhpa hlao cha ngiachhiena ta raopa châ leipa ta abâhpa ta raopa tlao a châ.

5 Chyhsa rai hria leipa deikua châta cha. Khazohpa pachâ leipa ta thai pachâsatuhpa a ngiapâ viapa ngiapâna cha, ano siana ta raopa a châ.

6 Chyhsa a hmotaopa pachâ leipa ta Khazohpa ta a siapa ta a raopa cha byhnâ a awpa kyh Davi chhaota:

7 “Ama paraonazy a ngiahthaipa ta a ypa nata ama moleinazy khupa ta a ypa cha, ama nohlao na;

8 Abeipa ta moleina hneipa ta a rao leipa cha a nohlao na,” tahpa ta a reipa hawhna khata.

9 Cha khiahtala cha nohlaona cha chopawtaipa sahlao chô liata dei ma a y, chopawtai leipa sahlao chô liata chhao? Abaraha ngiapâna cha a siana ta raopa a châ, tah tlôh pi ta.

10 Cha cha kheihtazie ta raopa ma a châ tly? Chopawtai tawhta ma tai hlâta ma? Chopawtai tawhta châ leipa ta, chopawtai hlâta tlao a châ.

11 Chopawtai leipa ta a y nota ngiapâna ta siana a hmô tahpa, pahnona chopawtaipa ngiana cha hmô ta. Cha siana cha ama châta raopa a châ nawpa ta, chopawtai leipazy hryta ngiapâtuhpa zydua paw a châ thei nawpa ta.

12 chopawtaipa sahlao paw chhao a châ thei hra nawpa ta, chopawtaipa dei paw châ leipa ta, eima paw Abaraha chopawtai leipa ta a y nota ngiapâna a hneipa hawhta a hnei hrapazy paw tlao a châ.

Bietaina cha ngiapâna ta hmôpa a châ

13 Ryhpa vâta Abaraha nata a pathlazy hnohna chata khizaw ryu a totuh awpa a châ aw tahpa bietaipa châ tlôh leipa ta, ngiapâna ta siana vâta tlao a châ via.

14 Ryhpa liata chyhsazy cha ryutotuhpazy ama châ tlôh khiahta cha, ngiapâna khâpahma phahnai leipa ta, bietaipa chhao khâpahma châ khao vei.

15 Ryhpa chata pathi-iana tao tyh tlôh ta, ryhpa y leina deikua chata hmoparaona chhao y hra vei.

16 Chavâta ngiachhiena ta a châ thei nawpa ta ngiapâna vâta a châ hih, pathla zydua châta bietaipa cha ama hmô thlyu nawpa ta, ryhpa a hneipa chyhsazy dei châ leipa ta, Abaraha hneipa hawhta ngiapâna a hneipazy chhaota ama hmô hra aw.

17 Athihpazy a pahrotuhpa nata hmo a y leipazy a ypa hawhta a reituhpa a ngiapâna Khazohpa mohmô liana chata. Abaraha cha eima zydua paw a châ. “Phopi hluhpizy paw ta ei cha tao aw,” tahpa ropa hawhna khata.

18 Hnabeisei a chhih leipa chhaota ano chata hnabeisei ngaitapa ta a ngiapâ ta. Phopi hluhpizy paw a châ thei nawpa ta; “Cha hawhna chata na pathlazy ama y aw,” tahpa ta chhopa hawhna khata.

19 Ngiapâna â i leipa ta, y hlei leipa ta a pôhpa a thi hawpa hawhta a ypa cha pachâ ta, ano cha kô za kha rachhôh châ tlôh ta, Sara saw leipa chhao pachâ hra ta.

20 Châhrasala ngiapâna phahlapa ta Khazohpa bietaipa cha alôhleipa ta y leipa ta Khazohpa palyupalih ta.

21 a bietaipa cha hlao a patlohsa thei tahpa a ngiapâ kaw hra ta, a ngiapâna cha tlao a vaw i haw ta.

22 Chavâta a ngiapâna cha a siana ta raopa’ a vaw châ haw. 23 Angiapana cha a siana ta raopa a châ tahpa he ano vâ deita ta ropa châ leipa ta,

24 keimo vâta chhao a châ. Zisu eima Beipa athihpa hry tawhta a pathyutuhpa cha siana ta raopa a châ aw.

25 cha Zisu cha eima moleina vâta thi awhpa ta patusapa ta y ta, thai eima châ nawpa ta pathyupa ta y hra ta.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 5

Thai pachâsana theilâpa

1 Chavâta ngiapâna vâta thai châpa ta ypa ta eima Beipa Zisu Krista vâta Khazohpa nata aryhpa ta y ei suh u.

2 Ano vâ lilaw chata he ngiachhiena a ipa ta eima châna liana heta ngiapâna ta a ngia haw pi ta, Khazohpa rônahna hnabeiseipa ta alypa ta y hra ei suh u.

3 Chata dei châ leipa ta eima rietheina liata chhao alypa ta y ei suh u, rietheina chata tiamana tao ta,

4 tiamana chata pahnopasiana tao ta. Pahnopasiana chata hnabeiseina a tao tahpa pahno tlôh pi ta.

5 Thlahpa Pathaihpa maniah a piepa khata Khazohpa kyhpachâna cha eima pathipalôh liata a hry hawpa vâta hnabeiseina chata pamaophyu leipa ta.

6 Eima chieh-lei nona khata, a daihtita liata Krista cha moleipazy vyuhpa ta thi haw tlôh ta.

7 Chyhsa siapa vyuhpa ta thi awpa chyhsa ta khoh chhei ha tlôh lei khâh ta, chyhsa phapa vyuhpa ta deikua cha chyhsa ahy tlyma chhâ ta cha a ngâ ngyu ma.

8 Châhrasala Khazohpa chata a kyhpachâna cha reithai tlâhpa ta paluahsa ta, moleipazy eima châ nota Krista eima vyuhpa ta a thipa vâna khata.

9 Chavâta a thisaih ta thai pachâsapa ta eima y tawhna heta, ano vâta Khazohpa hiehâhna tawhtapa cha pachhapa ta eima y tlai aw.

10 Khakhaipa eima châ nota hmahta, a Sawchapawpa thina vâta Khazohpa nata aryhpa ta eima y haw tlôh khiahta cha, aryhpa ta eima y tawhna heta a hrona vâta pachhapa ta eima y tlai aw.

11 Cha dei chhao châ leipa ta, aryhna atahma maniah a pahmôsatuhpa, eima Beipa Zisu Krista vâna chata Khazohpa liata eimâ ly hra.

Adâh nata Krista

12 Chyhsa pakha vâta moleina khizaw liata a ngia ta, moleina vâta thina a ngia hra ta, cha hawhna hra chata chyhsa zydua ta hmo ama paraopa vâta thina ta chyhsa zydua chahry ta.

13 Ryhpa y hlâta khizaw liata moleina y haw tlôh ta, ryhpa a y tlôh vei khiahta cha moleina cha moleipa ta pachâpa châ vei.

14 Châhrasala Adâh y rakha tawhta Mawsi yna taihta Adâh paraona hawhta hmo a parao leipazy chô liata chhao thina chata ryu a reih tyh, Adâh cha a vy awpa nata pakhona a châ.

15 Châhrasala hmosaipiepa cha moleina nata a lyu hra vei. Chyhsa pakha moleina vâta hmahta chyhsa hluhpi cha ama thi tlôh khiahta cha, Khazohpa ngiachhiena nata chyhsa pakha Zisu Krista ngiachhiena vâta hmosaipiepa cha chyhsa hluhpi chô liata vaopa ta a y tlai aw.

16 Hmosaipiepa cha chyhsa pakha moleina vâta hmo a vaw ypa nata a lyu hra vei. Thai lei pachâsana ryureina cha chyhsa pakha vâta vaw y ta, thai pachâsana hmosaipiepa deikua cha moleina hluhpi vâta tlao a vaw ypa châ tlôh ta.

17 Chyhsa pakha moleina vâta thina ta, cha chyhsa pakha vata hmahta ryu a rei tlôh khiahta cha, ngiachhiena hluh ngaitapa nata siana hmosaipiepa a hmôtuhpazy chata chyhsa pakha, Zisu Krista vâta hrona liana chata ryu ama reih tlai aw.

18 Chatanachata moleina miakha vâta thai lei pachâsana ryureina cha chyhsa zydua chô liata vaw y ta, cha hawhna hra chata hmo siapa miakha taopa vâta hrona hmô nawpa ta thai pachâsana hmosaipiepa cha chyhsa zydua chô liata a vaw y.

19 Chyhsa pakha chhorupa vâta chyhsa hluhpi cha moleipa vaw châ haw ei ta, cha hawhna hra chata chyhsa pakha reingiana vâta chyhsa hluhpi cha a siapa ama vaw châ haw.

20 Moleina a lâ pachai thei nawpa ta ryhpa vaw y pâ heih ta; châhrasala moleina a pôhna maih liata ngiachhiena cha a pôh via pachai tyh.

21 Moleina chata thina ta ryu a reipa hawh tlaita, ngiachhiena chata siana ta chhâzaw hrona tona taihta eima Beipa Zisu Krista zawhzi ta ryu a reih thei nawpa ta.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 6

Moleina liata thina nata Krista hrona

1 Khâpa e eima reih khao aw? Ngiachhiena cha a pôh pachai thei nawpa ta moleipa ta eima y thlâh ha aw ma?

2 Châ bao va! Keimo moleina liata a thi hawpa moleina liata kheihta e khâ eima hroh thei aw?

3 Keimo hryta Krista Zisu liata bâti a châpa maih cha a thina liata bâti châpa ta eima y tahpa pahno veih ei chi ma?

4 Chavâta a thina liata bâti châpa ta a hnohta pabu hrapa ta eima y, Paw rônahna ta athihpa hry tawhta Krista a pathyupa hawhna khata, keimo chhao hrona thiehpa ta eima y thei nawpa ta.

5 A thina a lyupa ta ano nata eimâ zao haw tlôh khiahtala, a thyuheina a lyupa chhaota eima zao hra aw.

6 Hezy he eima pahno, eima chyhsa parohpa cha a hnohta khaipâpa ta a y haw hra, molei a phaohpa pôhpa cha pahleipadiapa ta a y thei nawpa ta, atahmâ tawhta moleina sei ta eima y lei nawpa ta. Ahyrai a thi hawpa cha moleina tawhtapa pua haw tlôh ta.

8 Krista hnohta eima thi haw hra khiahta cha, a hnohta eima hroh hra aw tahpa eimâ ngiapâ.

9 Krista cha athihpa hry tawhta pathyupa ta y ta, thi khao aw vei tahpa pahno tlôh pi ta; thina chata ano chô liata bie hnei khao vei.

10 A thina cha moleina lâ kyh liata chhâzaw châta ei kha a thi, a hrona deikua cha Khazohpa lâ kyh liata a hroh.

11 Cha hawhna hra chata nâmo chhao moleina lâ kyh liata athi hawpa ta a rao ula, Khazohpa lâ kyh liata deikua cha Krista Zisu liata ahrohpa ta a rao teh u.

12 Chavâta nama pôhpa khopa nama zyh nawpa ta, nama pôhpa thi theipa liana chata moleina ta ryu reih kha se.

13 Nama pôhpa pachiapazy chhao sia leina chaihrai châta moleina lâta pie pasai hra khah u; châhrasala athihpa hry tawhtapa a hroh heihpa hawhta Khazohpa lâta a pie ula, nama pôhpa pachiahpazy chhao cha siana chaihrai chata Khazohpa lâta pie tlao pasai teh u.

14 Moleina ta nama chô liata bie hnei khao tlôh lei khâh ta, ryhpa ryurei ta a ypa châ leipa eichi ta, ngiachhiena ryurei ta a ypa tlao châ tlôh eichi ta.

Siana seizy

15 Kheihta e a châ aw? Ryhpa ryurei ta a ypa châ leipa pi ta, ngiachhiena ryurei ta a ypa tlao eima châpa vâna heta eima molei awpa ma a châ aw? Châ bao va!

16 Ahy liata rai ama bie zyh awpa ta sei ta namâ ngiah khiahtala thina taihta moleina sei tlyma, siana taihta rei a ngiahpa sei tlyma, a bie nama zyhpa sei cha nama châ tahpa pahno veih eichi mâ?

17 Châhrasala moleina seizy châ hra ula, pachunazie ano lâta nâmosasyh ta nama piena cha palôhrupa hmeiseihpa ta zyhpa ta.

18 moleina tawhta a puapa ta ypa ta siana seizy vaw châ haw eichi ta, chavâta Khazohpa lâta alynabie y mawh sy.

19 Nama sapa thatlô leinazie vâta chyhsapa ryhpa ta bie ei reih. Nama pôhpa pachiahpazy cha a pualeipa lâta nata parao nawpa ta paraona lâta sei ta pie nama pasaipa hawhna khata, atahmâ nama pôhpa pachiahpazy cha pathieh nawpa ta siana lâta sei ta pie pasai teh u.

20 Moleina seizy nama châ nona khata siana ta nama chôta bie hnei vei.

21 Atahmâ nama hmo zakheipazy heta kha nona khata theilâpa khâpa nama hmô tyh? Kha hmozy chhâna kha thina a châ tyh mâ tâh.

22 Atahmâ deikua cha moleina tawhta apahluh haw ei chi ta, Khazohpa seizy châpa ta pathaihna hmôna taihta nama theilâpa nama hnei mâ tâh, cha chhâna chhâzaw hrona chhao.

23 Moleina hlao cha thina châ tlôh ta, Khazohpa hmosaipiepa deikua cha eima Beipa Krista Zisu zawzi ta chhâzaw hrona a châ.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 7

Nôvahna ta a pamosana

1 Cha khiahtala unawh saih u, ryhpa chata chyhsa a hro chhôhta a chô liata ryu a reih tyh tahpa pahno veih eichi mâ? Ryhpa a pahnopazy hnohta ei reih.

2 Chanô, vahpa a hneipa cha a vahpa hro chhôhta ryhpa ta a vahpa liata chahrypa ta a y tyh; châhrasala a vahpa cha a thi khiahtala vahpa kyh liata ryhpa tawhtapa cha pathliepa ta a y.

3 Chatanachata a vahpa hro chhôhta mo hropa a hnei khiahtala apheinô ama tah aw. A vahpa a thi khiahta deikua cha, cha ryhpa tawhtapa cha pathliepa ta y ta, mo hropa hnei hrasala apheipa châ vei.

4 Cha hawhna hra chata, unawh saih u, Krista pôhpa liata ryhpa lâta thi haw eichi ta, mo hropa eih nama châ thei nawpa ta athihpa hry tawhta pathyupa ta a ypa lâta, Khazohpa châta nama pathei thei nawpa ta.

5 Sapa ta eima y nona khata ryhpa vâta moleina nôchâ a vaw puapazy chata, eima pôhpa pachiapazy liata thina taihta pathei awpa ta a hria tyh.

6 Atahmâ deikua cha maniah patutuhpa liata thi hawpa ta ryhpa tawhta pathliepa ta eima y haw, châ ropa parohpa hawhta dei châ leipa ta, thlahpa thiehpa ta eima chakao thei nawpa ta.

Moleina ta chyhsa a chahryna

7 Khâpa e eima reih khao aw? Ryhpa cha moleina ma? Châ bao va! Châhrasala ryhpa vâta pahnopa châ leipa sala moleipa cha ei pahno lei awpa tlai. Ryhpa chata, “Uava khâ,” tah leipa sala, uavapa he ei pahno lei awpa a châ.

8 Châhrasala moleina ta biepiepa vâna chata ryhpaona hmôpa ta uavana to ei chhôh liata paysa ta. Ryhpa leipa ta cha moleina cha a thipa a châ.

9 Eikhanona khata kei ryhpa leipa ta hroh na ta, châhrasala biepiepa cha a vaw y patanahta moleina a vaw hra ta, kei cha thi ha na ta;

10 hro nawpa ta biepiepa cha thi nawpa ta a vaw châ tahpa pahno haw na ta.

11 Biepiepa vâna chata moleina ta rypaohna hmôpa ta, na dô ta, biepiepa cha hmâpa ta eina thie haw.

12 Cha hawhna chata ryhpa cha a pathaih, biepiepa chhao cha pathaih ta, sia ta, a pha.

13 Cha khiahtala, hmophapa cha ei châta thina a châ ma? Châ bao va! Moleina cha ei châta thina tlao a châ. Chatanachata moleina cha moleina a châ tahpa a lâ thei nawpa ta hmophapa cha hmâpa ta eina thie, moleina cha biepiepa vâna khata moleina thata a vaw châ thei nawpa ta.

14 Ryhpa cha thlahpa lâ hmo a châ tahpa pahno tlôh pi ta; kei deikua cha sapa lâ chyhsa, sei ta zua hawpa ei châ.

15 Hmo ei taopa he a pachâna pahno tlôh na va. Ei hmotao tyhpa he ei tao khoh viapa châ tlôh va, ei hmo a hao ngaitapa cha tlao ei tao tyh.

16 Ei tao khoh leipa cha ei tao tlôh khiahtala, ryhpa cha a pha tahpa ta a zyhpa ei châ aw mâ tâh.

17 Chatanachata ei hmotaopa he keima taopa châ khao leipa ta, moleina keima liata a ypa taopa cha tlao a châ.

18 Keima liata, cha cha ei sapa liata tahna a châ, hmophapa rai y vei tahpa ei pahno. Hmopha tao khona cha keima liata y tarawta, hmopha taona deikua cha y tlôh va.

19 Phana tao ei khopa he tao leipa na ta, moleina tao ei kho leipa he tlao tao tyh na ta.

20 Ei kho leipa ei tao tlôh kiahta cha, a taotuhpa cha kei châ leipa na ta, moleina keima liata a ypa cha tlao a châ.

21 Chatanachata he ryhpa he ei vaw pahno haw, hmopha tao ei khoh nahta moleina kei liata a y tyh.

22 Ei palôhrupa hmeiseihpa ta Khazohpa ryhpa chô liata aly tyh tlôh na ta.

23 châhrasala ei pôhpa pachiahpazy liana heta ryhpa nanopa a y tahpa ei pahno. Cha chata ei palôhrupa ryhpa adyuh ta, ei pôhpa pachiahpazy liata moleina ryhpa a ypa lâna chata sei ta nâ chhi tyh ta.

24 Palôh rietheipa ei châ kaw dia! He thina pôhpa tawhtapa he ahyma na pachha aw?

25 Zisu Krista eima Beipa vâta Khazohpa lâta alyna bie ei reih! Chatanachata keima châta ei palôhrupa ta Khazohpa ryhpa ei chakao tyh, ei sapa deikua chata moleina ryhpa ei chakao tyh.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 8

Thlahpa liata hrozie

1 Chavâta atahmâ la Krista Zisu liata a ypazy châta thai lei pachâsana rai y khao vei.

2 Krista Zisu liata hrona Thlahpa ryhpa chata moleina nata thina ryhpa tawhtapa cha na papua haw tlôh ta.

3 Sapa vâta ryhpa cha a thatlô leipa ta a tao thei leipa cha, Khazohpa ta ano Sawchapawpa tlai sapa moleina hawhpa phaohpa ta molei atheih nawpa ta vaw tuapa ta, sapa liata moleina a ypa cha thai lei a pachâsa haw,

4 sapa ryhpa a chhih leipa ta, Thlahpa ryhpa tlao a chhihtuhpa, keimo liana heta ryhpa bie raopa cha patlôpa ta a y thei nawpa ta.

5 Sapa ryhpa ta a ypazy chata sapa lâ hmo zy ama khoh tyh, Thlahpa ryhpa ta a ypazy deikua chata Thlahpa lâ hmozy ama khoh tyh.

6 Sapa lâ hmozy khona cha thina châ tlôh ta, Thlahpa lâ hmo khona deikua cha hrona nata thlahlôhna a châ.

7 Sapa khopa cha Khazohpa adyuhna a châpa vâta; cha cha Khazohpa ryhpa ta y tlôh lei khâh ta, a y chhao y thei hra vei.

8 Sapa ta a ypazy chata Khazohpa palysa thei veih ei.

9 Châhrasala Khazohpa Thlahpa nâma liata a y tlai khiahta cha, sapa ta a ypa châ leipa eichi ta, Thlahpa ta a ypa tlao nama châ. Anodeikuacha ahyrai Krista Thlahpa a hnei leipa cha ano chyhsa châ vei.

10 Krista cha nâmo liata a y tlôh khiahta cha, moleina vâta pôhpa a thi, nama thlahpa deikua cha siana vâta a hroh.

11 Châhrasala athihpa hry tawhtapa Zisu a pathyuheihtuhpa Thlahpa cha nâmo liata a y khiahtala, athihpa hry tawhtapa Krista Zisu a pathyuheituhpa khata nâmo liata a ypa a Thlahpa zawhzi ta nama pôhpa thi theipazy cha a pahro hra aw.

12 Chavâta unawh saih u, abâhpa eima hnei, sapa ryhpa ta y awpa ta sapa liata deikua cha châ vei.

13 sapa ryhpa ta nama y khiahtala nama thi tlai awpa a châ; anodeikuacha sapa hmotaopazy Thlahpa ta nama thie tyh khiahtala nama hroh aw.

14 Khazohpa Thlahpa chhihthapa ta a ypa maih cha Khazohpa sawzy châ tlôh ei ta.

15 Chipa ta y heih awpa ta seichâna Thlahpa nama hmôpa châ tlôh leipa ta, saw châna Thlahpa tlao nama hmô. Cha Thlahpa vâna chata “Abba! Ei paw!” tahpa ta eima aw tyhpa he,

16 Thlahpa tlai chata keimo thlahpa nata Khazohpa sawzy eima châ tahpa maniah a pahnosa tyh,

17 chatawhcha sawzy eima châ khiahta cha, ryutotuhpazy châ pi ta, Khazohpa ryu a totuhpa, Krista a taolatuhpazy eima châ, a hnohta palyupalihpa ta eima y thei hra nawpa ta ano eima taokhei tlai khiahta cha.

18 Atahmâhlâ ta pasa taonazy he noh hro ta eima chôta rônahna palâsa awpa nata pakho khita rao tlôh na va.

19 Hmotaopa zydua chata hnabeisei ngaitapa ta Khazohpa sawzy a vaw luahna cha a ngiatiah leipa ta y chheih ha tlôh ei ta.

20 Hmotaopa zydua cha hmo hrao leina reisai ta paysapa ta ama y haw, ama kho ta a ypa châ leipa ei ta, a paysatuhpa vâta tlao a châ, hnabeiseina hneipa ta;

21 hmotaopa zydua tlai chhao cha thuna sei tawhta papuapa ta y aw ei ta, Khazohpa sawzy khotalaina rônahpa liana chata a ngia tlôh aw ei ta.

22 Hmotaopa zydua cha atahmâ taihta a ropa nata sawzei pasa taopa ta ama y chyu tahpa pahno tlôh pi ta;

23 cha dei châ vei, keimo tlai chhao, Thlahpa hmia a sahpa a hneituhpazy heta, saw eima châna eima pôhpa chatlaina cha hâpa ta, keimo tlai chhao eima palôhrupa ta a rôh hra tlôh pi.

24 Hnabeiseina ta pachhapa ta eima y. Châhrasala hmô theipa hnabeiseina he hnabeiseina châ vei. Chyhsa ta a hmô theipa cha khazia a hnabei a sei tyh?

25 Eima hmô leipa cha eima hnabei a sei khiahta deikua cha, eima hâ lylia tyh.

26 Cha hawhna hra chata Thlahpa chata eima chieh-leinazy bao tyh ta; kheihtazie ta thlahchhâ awpa ma tahpa pahno tlôh lei khâh pi ta, châhrasala Thlahpa chata ahrôna rei hlei thei leipa ta thlah maniah a chhâpa tyh.

27 Chatawhcha Khazohpa kho viapa lymâ hawhta mopathaihpazy cha thlah a chhâpa tyhpa vâta pathipalôh motuhpa chata Thlahpa kho viapa cha a pahno tyh.

Pahnietuhpa hlâta rônah viana

28 Khazohpa kyh a pachâtuhpa, ano raopa hawhta a awpazy châna chata, ama pha nawpa ta ato ta a hriapa tyh tahpa eima pahno.

29 A pahno chhieliepazy cha ano Sawchapawpa hawh tlaita y awpa ta rao chhielie tlôh ta, a Sawchapawpa cha unawh hluhpizy hryta saw tuapa a châ thei nawpa ta.

30 Chatawhcha a rao chhieliepazy cha aw hra ta; a awpazy cha thai pachâsa hra ta; thai a pachâsapazy cha palyupalih hra ta.

31 Cha kyhzy liana chata khâpa eima reih aw? Khazohpa eima chhâh a châ khiahtala, ahy e maniah a dyuh thei aw?

32 Ano Sawchapawpa tlai chhao pahlôh leipa ta, eima zydua vyuhpa ta a pietuhpa chata, hmo zydua chhao a saipa ta maniah pie hra aw vei mâ?

33 Khazohpa a tlypazy cha ahy a lei aw? Thai pachâsatuhpa kha Khazohpa châ tlôh ta;

34 ahy thai lei a pachâsa aw? A thihpa kha Krista Zisu cha châ tlôh ta, thyuheipa ta Khazohpa chachâh lâta ypa ta maniah a reikheituhpa kha a châ.

35 Krista kyhpachâna tawhtapa cha ahy maniah a pachhai thei aw? Rietheina ta tlyma, pachârôhna ta tlyma, taolana ta tlyma, chakâhna ta tlyma, thluahruana ta tlyma, chichhihna ta tlyma, zaozi ta tlyma maniah a pachhaih aw ma?

36 “Nâma vâta noh-y ta thiepa ta eima y tyh; mietahkupa thie awpazy hawhta pachâpa eima châ,” tahpa ropa hawhna khata.

37 Pachhaih bao va! Cha zydua liana chata kyh maniah pachâtuhpa vâna chata rônah ngaitapa ta pahnietuhpa eima châ.

38 Thina zy, hrona zy, vâlyuhchâpa zy, abeina zy, hmo y chiehpa zy, hmo a vaw y awpa zy, hmotaotheina zy,

39 asâhna zy, athuna zy, hmotaopa hropa raizy chhaota, eima Beipa Krista Zisu liata a ypa Khazohpa kyhpachâna tawhtapa cha maniah pachhaih thei aw vei tahpa â dopata ta pahno tlôh na ta.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 9

Khazohpa ta Izarel a tlyna

1 Krista liana chata bie hmeiseihpa ei reih, haih va na; Thlahpa Pathaihpa zawhzi ta ei ngiaryh ryh leina chhao heta na pahnokhei ta,

2 ei pathipalôh liana heta rietheina ru ngaitapa nata pachârôhna lei thei leipa avao tlôh na ta.

3 Ei unawhpazy sapa lâta ei chiheihzy vyuhpa heta, kei he Krista tawhta pananona taihta chhiesapa ta y aw sala tah tlôh na ta.

4 Izarel mo châ tlôh ei ta, saw châna zy, rônahna zy, biehrai zydua zy, ryhpa pina zy, Khazohpa chakaona zy, bietai zydua zy ama eih châ ta;

5 mahpawzy cha ama eih châ hra ta, sapa kyh lâta Krista cha âmo hry tawhta a vaw puapa châ hra ta. Ano cha hmo zydua chôta a ypa Khazohpa cha chhâzaw ta reithaipa ta y mawh sy! Amen.

6 Châhrasala Khazohpa bie cha khâpa hraoleipa ta a ypa châ vei. Izarel pathlazy cha Izarel mo châ khai veih ei.

7 Abaraha pathlazy ama châpa vâta ama zydua ta a sawzy châ khai hra veih ei; “Aisika liana heta na pathlazy ama tah aw,” tahpa tlao a châ.

8 Cha sapa sawzy cha Khazohpa sawzy châ leipa ei ta, bietai sawzy cha Abaraha pathla ta raopa tlao ama châ, tahna a châ.

9 Bietaipa cha he he a châ. ‘Atahmâ ti heta a vy aw na ta, Sara chata sawchapawpa a sa aw,” tahpa hih.

10 Cha dei châ vei, Rebeka chhaota mo pakha, eima mahpaw Aisika liata maphieh a phao nona khata,

11 hawsaih cha ama pi hlâta chhie nata pha ama tao hlâta, hmotaopa vâta châ leipa ta, a awtuhpa khopa vâta a tlyna kyh lâta Khazohpa bieraopa cha â i thei nawpa ta.

12 a hnohna chata, “A uhtheipa ta a seihnaipa a chakao aw,” Khazohpa ta a tahpa kha.

13 “Zakaw kyh pachâ na ta, Esaw deikua cha ei hao,” tahpa ropa hawhna khata.

14 Khâpa e eima reih khao aw? Khazohpa liata sia leina a y ma? Châ bao va!

15 Ano chata, “Ei ngiachhiepa maih cha ngiachhie aw na ta, zawh ei ngiahna chô lia maihta zawh ei ngiah aw,” tahpa ta Mawsi hnohta a reipa kha.

16 Chavâta a khotupa vâta châ leipa ta, a chatlaituhpa vâta châ hra vei, a ngiachhietuhpa Khazohpa vâta tlao a châ.

17 Khazohpa châ bie ta Phirao hnohna chata, “He vâna heta cha padua na ta, nâma liana chata ei hmotaotheina ei pamosa thei nawpa nata khizaw zydua liata ei moh a pathâh thei nawpa ta,” tah tlôh ta.

18 Chatanachata Khazohpa ta a khopa maih ngiachhie tyh ta, a khopa maih chhao a pachhorusa tyh.

19 Nâ chata ei hnohta, “Khazia e a pachhiepahru ngâthlâh haw? A khopa ahyma a dyuh thei?” na tah ualua aw.

20 Châhrasala chyhsapa y, Khazohpa a ei bao hrapa chi cha ahyma na châ tly? Hmotaopa chata a taotuhpa hnohta, “Khazia he hawhta eina tao chi?” a tah aw mâ?

21 Beih-lei tlo kha beih miakha a sopa ta, beih miakha a so leipa ta, tao awpa ta beihvituhpa chata beih-lei chôta bie hnei vei mâ?

22 Ngiachhiena bei a rônah awpa ta a chhuahnoh chhieliepazy chô liana chata a ngiachhiena hnei hluhzie a pamosa thei nawpa ta.

23 hiehâhna beih a leidia tlâhpazy chô liana chata Khazohpa ta a hiehâna nata a hmotaotheina palâsa khoh hrasala, a dao lyliah khiahta cha, khâpa a pei aw?

24 Cha ngiachhiena beizy cha Zuzy hry tawhtapa dei châ leipa ta, Zenitaizy hry tawhtapa chhao, awpazy eima châ.

25 Hôsia châbu liana chata, ‘Ei chyhsazy a châ beih leipa cha,‘Ei chyhsazy,’ ei tah aw, chatawhcha kyhpachâ beih leipa cha Ei kyhpachâpa,’ ei tah aw.”

26 “Chatawhcha ama hnohta, Ei chyhsazy châ veih eichi.’ a tahna su liana tlai chata, ‘Khazohpa hroh sawzy,’ bipa ta ama y aw,” tahpa ropa hawhna khata.

27 Chatawhcha Isai chhaota Izarel mozy kyh tlâh-awkheipa ta: “Izarel mozy cha tilaipi liata sadi zie ta hluh hra ei sala, a laibâhpa deita cha pachhapa ta ama y aw;

28 Abeipa chata achatliepa ta palo khaipa ta alei chô liata a hrie awpa kyh patlô tlôh aw ta,” a tahpa kha.

29 Isai chata, Pheisaihzy Abeipa chata chi pathlatuhpa maniah pahlôhpa leipa sala,Sawdawma hawhta y ha aw pi ta, Kawmawra hawhta taopa ta eima y ha hra aw,” tahpa ta a rei chhieliepa hawhna khata.

Izarel nata Thâtihpha

30 Khâpa e, eima reih khao aw? Zenitai siana a chadai leipazy chata, siana ama vaw pha haw, ngiapâna vâta siana cha;

31 Izarel siana ryhpa a chadaituhpazy deikua chata, siana ryhpa cha pha thei khao veih ei.

32 Khâpavâta e? Ngiapâna ta a chadai leipa ei ta, hmotaopa ta hmô theipa hawhta amâ chadaipa vâta a châ. A hluana lô liana chata a hluah tlôh ei ta,

33 Nahthlie teh, Zaio liata a hluana lô nata pakhâna lôpanô soh na ta; ahyrai ano a ngiapâpa maih cha maophyu aw vei,” tahpa ropa hawhna khata.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 10

1 Unawh saih u, ei pathipalôh khopa nata âmo chata Khazohpa lâta ei thlahchhâna chhâpa he pachhapa ta ama vaw y thei nawpa ta a châ.

2 Khazohpa lâta phahnai amâ ngiah tahpa ei pahnokhei ei, pahno pakina hawhpa deikua cha châ veih ei.

3 Khazohpa siana pahno leipa ta, âmo siana pa-i a chhuahpa ta, Khazohpa siana liata a ngiarih tlôh ei va.

4 Krista cha a ngiapâpa maih chata siana ama hmô thei nawpa ta ryhpa a pabâtuhpa châ tlôh ta.

Pachhana he mo to châta a châ

5 Mawsi chata, “Ryhpa ta siana a zyhpa cha, cha siana vâna chata a hroh aw,” tahpa ta roh ta.

6 Ngiapâna ta siana deikua chata he tana heta a reih, “Ama palôhrupa ta, ‘Chôlâ tawhtapa Krista a zâ chhi awpa ta ahyma avâ lâ a kiah aw,

7 athihpa hry tawhtapa Krista a kaw chhi heih awpa ta ahyma athupa lâ a zu aw?’ tah kha u.” tahpa ta.

8 Cha khiahtala khâpa a reih? “Bie chata a châ hnia, na pakah nata na pathipalôh liata chhao a y, tahpa ta a reih, cha cha ngiapâna bie eima cha chho tyhpa he a châ;

9 na pakah ta Zisu cha Abeipa a châ tahpa a châkhei chi ta, athihpa hry tawhtapa Khazohpa ta a pathyu tahpa na pathipalôh ta nâ ngiapâ khiahtala, pachhapa ta na y aw,” tahpa hih.

10 Chyhsazy ta pathipalôh ta angiapâ ei ta, thai pachâsapa ta y ei ta. pakah ta a châkhei ei ta, pachhana ama hmô hra.

11 Khazohpa châ bie ta, “Ahyrai ano a ngiapâpa maih maophyuh aw veih ei,” a tah.

12 Zu nata Krika mozy khâpa liata hmahta anano hlei tlôh leipa ei ta; Abeipa pakha ama zydua chôta Abeipa châ ta, a padotuhpa maih chô liana chata phana hnei ngaita tlôh ta.

13 “Ahyrai Abeipa moh a padopa maih cha pachhapa ta ama y aw,” tahpa châ ta.

14 Cha khiahtala, amâ ngiapâ leipa cha kheihta e ama pado thei aw? Ano ama pahno beih leipa cha kheihta e amâ ngiapâ thei aw? Biechhotuhpa y leipa ta kheihta e ama thei thei aw.

15 Tuapa ama châ vei khiahta cha kheihta e bie ama chho thei aw? “Hmo phapa thâtih alychhihpa a tlôkheituhpazy phei cha â ngia kaw dia!” tahpa ropa hawhna khata.

16 Châhrasala Thâtihpha cha ama zydua ta zyh khai veih ei, Isai ta, “Abeipa, eima bie reipa ahyma a ngiapâ?” tah tlôh ta.

17 Chatanachata ngiapâna cha theina vâta vaw y tyh ta, chatawhcha theina cha Krista bie vâta a vaw y.

18 Cha khiahtala ama nah ta thei veih ei mâ? Thei cha â. Khazohpa châ bie ta: “Ama pyu cha râh to liata pathâh ta, ama bie cha kaoki taihta a pathâh.” tahpa ta a reipa hawhta.

19 Cha khiahtala, Izarel mozy ta thei veih ei mâ? “Pho ta rei tlâh leipazy cha hmâpa ta nama hia cha patliasa aw ei na ta; pho so leipazy cha hmâpa ta nama hie cha pahâh aw ei na ta.” tahpa ta Mawsi ta a reih tua.

20 Chatawhcha Isai ta riahpha ngaitapa ta “Na tlua leipazy hmôpa ta y na ta; na pado leipazy lâta pahnosapa ta y na ta.” tah ta.

21 Anodeikuacha Izarel mozy kyh liana chata. “Chhorupa nata bie-ei chahrapazy chata noh-y ta ei bâhzy ei pazawh tyhpa kha,” tah ta.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Rawma Mozy 11

Izarel saw laibâhpa

1 Cha khiahtala, Khazohpa ta a chyhsazy cha a thy aw tlyma? Châ bao va! Kei chhao Izarel chyhsa Abaraha pathla, Benzami pho châ tlôh na ta.

2 Khazohpa ta a chyhsa pahno chhieliepazy cha thy aw vei. Khazohpa châ bie ta Elaiza kyh a reipa he pahno veih eichi ma? Ano chata Izarel chyhsazy kyh Khazohpa lâta tlôkhei ta.

3 “Abeipa, na hrohsopazy thie ei ta, na maisâhzy pacho ei ta, keima deita ei y, keima chhao thie einâ chhuah ei,” a tahpa kha.

4 Châhrasala Khazohpa ta kheihta e â chhy? “Baal hmiakô liata pakhu paneih beih leipa, chyhsa sâh sari keima châta ei pahlôh thlâh haw,” tahpa ta a chhy ta.

5 Cha hawhna hra chata atahmâhlâ chhao he ngiachhiepa ta a tlypa hawhta thypa laibâhpa cha ama y.

6 Ngiachhiena vâta a châ khiahtala hmotaopa vâta châ khao aw vei; cha hawhta a châ vei khiahtala ngiachhiena he ngâchhihna châ khao aw vei.

7 Kheihta a châ aw? Izarel mozy chata ama tluapa cha hmô leipa ei ta. Atlypazy deikua chata hmô ei ta. a hropa zydua cha ama kuchha khai haw ta.

8 “Khazohpa ta atanoh taihta ama hnohta amôna thlahpa pie ta, hmô thei leina mozy, thei thei leina nahzy chhao,” tahpa ropa hawhna khata.

9 Chatawhcha Davi chata, “Ama tlâhkhai cha ama châta khohei nata aphy nata ahluana nata viarithôna vaw châ mawh sy;

10 ama hmô thei lei nawpa ta ama mozy vaw zoh mawh sy,"nâ ta ama zôh khâ pakosa mah y,"tah ta.

Zenitaizy pachhana

11 Cha khiahtala, amâ hluana cha ama pao palâh nawpa a châ ma? Châ bao va! Ama paopa vâta Zenitaizy lâna chata pachhana tlao a vaw tlô, Izarel mozy hiapatliasa nawpa ta.

12 Ama paona hmahta khizaw pahneirôhsana châ ta, amâ syna chhao cha Zenitaizy hneirôna a châ hra khiahtala, ama pakina cha ama hneirôna a châ pachai aw dia!

13 Atahmâ nâmo Zenitaizy hnohta ei reih. Kei Zenitaizy apôstôl ei châpa vâta

14 ei chiheizy hia ei patliasa thei nawpa nata ama hryta thokhazy ei pachha thei nawpa ta ei chakaona he ei palyupalih.

15 Âmo thyna hmahta khizaw aviasa heihna a châ khiahtala, âmo aly heihna awpa cha thina tawhta hro heihna leipa ta cha, khâpa a châ aw?

16 Viahchhâ tlâ pahlypa ei chheihpa hmiatuapa cha a pathaih khiahtala a tlâ duata cha hawhna hra chata a châ; tho a thari cha a pathai khiahtala, a chiahzy cha cha hawhna hra chata a châ.

17 Châhrasala a chiah thokhazy cha thliepa ta a y nata, na ôli hmeiseih leipa ama hryta pazaopa ta y chi ta, ôli tho phana thari a hly hrapa na châ khiahtala

18 chiah hropazy lâna chata apalai khâ. Apalai hra la, nâ a thari a pasatuhpa châ leipa chi ta, a thari cha cha pasatuhpa tlao a châ.

19 Nâ ta, “Pazaopa ta ei y thei nawpa ta a chiahzy thliepa ta ama y ha mâ tâh,” na tah aw.

20 A châ na, ngiapâ leina vâta thliepa ta y ei ta, nâ, na ngiapâna vâta nâ duah. Apalai leipa la, tlao chi teh.

21 Khazohpa ta a chiah hmeiseihpazy cha a pahlôh tlôh vei khiahtala, nâ chhao cha pahlôh hlei aw vei.

22 Khazohpa phazie nata chichhihzie cha pachâ teh; a paopazy châta chichhihna a châ, na châta deikua cha a pha, a phana liata na y thlâh ha khiahtala; chata leipa ta la nâ chhao chhaw pathlahpa ta na y aw.

23 Chatawhcha âmo chhao cha angiapâ leipa ta ama y thlâh ha vei khiahtala, pa-aopa ta ama y aw, Khazohpa ta âmo pazao heih thei tlôh ta.

24 Nâ ôli hmeiseih leipa tawhtapa chhaw pathlapa hmahta, pina yzie leipa hawhta, ôli tho phapa liata pazaopa ta na y khiahtala, cha a chiah hmeiseihpazy cha âmo ôli tho tyhpa liana chata pazaopa ama châ ngaita aw dia!

25 Unawh saih u, he biru he nama pahno leipa khoh tlôh na va, chata leipa ta la namâ pasosa aw; Zenitaizy pakina a vaw tlô hlâna chata Izarel mo thokhazy chô liata kuchhana a vaw tlô tua, tahpa hih;

26 chatanachata Izarel mo zydua pachhapa ta ama y aw;"‘Zaio tawhta pachhatuhpa cha vaw pua aw ta,Zakaw liata Khazohpa pachâ leina a pahlei aw;

27 cha cha ama hnohta ei biehrai awpa cha a châ,ama moleinazy ei la tina chata,”tahpa ropa hawhna khata.

28 Thâtihpha lâ pachâ ta cha, nâmo vâta khakhaipa châ ei ta; atlyna kyh lâ pachâ ta deikua cha, pathlatuhpazy vâna khata kho ngaitapazy ama châ.

29 Khazohpa ta a hmosaipiepa liata nata a awna liana chata a palôhrupa pakua beih tlôh lei khâh ta.

30 Eikhano ta cha Khazohpa bie zyh leipa eichi ta, châhrasala atahmâ cha ama zyh leipa vâta ngiachhiena hmô tlôh eichi ta,

31 cha hawhna hra chata atahmâ cha Khazohpa ta a cha ngiachhiepa vâna ei heta, ngiachhiena ama hmô thei hra nawpa ta âmo chhao cha chhorupa ta ama châ.

32 Khazohpa ta a ngiachhie khai thei nawpa ta chyhsa zydua reingiah leina liata khô khai tlôh ta.

33 Khazohpa sona nata pahnona hluhzie cha a thuh kaw dia! A ryureinazy cha pahno thei rimâ awpa nata a lâpizy cha a laichadai thei awpa rimâ châ vei dia!

34 “Abeipa palôhrupa cha ahy e a pahno ahy e a ryhna a rao patuhpa ta a châ?”

35 “A thô heih awpa chhaota a hnohta ahy e hmo a pie tua?”tahpa ta.

36 Ano tawhta nata ano vâta nata ano chata hmo zydua a vaw ypa châ tlôh ta. Ano hnohna chata chhâzaw ta rônahna cha y mawh sy! Amen.

Rawma Mozy (Romans)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16