Rawma Mozy 15
Vaih palysana
1 Keimo thatlôpazy pi heta keimo alyna tlua leipa ta, chieh-leipazy pachyu leinazy cha eima taokhei awpa a châ;
2 eima vaihzy phahnai nawpa ta ama phana awpa ta palysa a chhuah chyu ei suh u.
3 Krista chhao chata ano alyna tlua tlôh va, “Nâma châ ratuhpa rana cha keima chô liata tla haw ta,” tahpa ropa hawhna khata tlao a châ.
4 Khazohpa châ bie liata tiamana nata thlalôhna hmôpa ta hnabeiseihna eima hnei thei nawpa ta, hlâno ta ropa maih cha keimo maniah pachuna awpa ta ropa châ tlôh ta.
5 Eima Beipa Zisu Krista Khazohpa nata a Paw cha palôh miakha nata reih a raohpa ta eima palyupalih thei nawpa ta,
6 tiamana nata thlalôhna Khazohpa chata Krista Zisu reipa hawhta palôhrupa miakha phaoh rairiepa ta cha paysa ei se.
Zenitaizy châta Thâtihpha
7 Chavâta Krista chata Khazohpa parônahsa nawpa ta a châ lypa hawhna hra khata, aly rairie teh u.
8 He he ei reipa cha a châ, pathlatuhpazy hnohta bietaipazy kha pa-i awpa nata a ngiachhiena vâta,
9 Zenitaizy ta Khazohpa ama palyupalih thei nawpa ta Khazohpa bie a do tahpa pahnosa nawpa ta, Krista cha chopawtaipazy chakaotuhpa ta vaw y ta. Khazohpa châ bie ta,“Chavâta Zenitaizy hry liana chata cha reithai aw na ta, na moh palyupalihpa ta hla ei sa aw,”tahpa ropa hawhna khata.
10 Chatawhcha,“Nâmo Zenitai zydua saih u, a chyhsazy nata aly teh u, ”tah heih ta.
11 Chatawhcha, “Nâmo Zenitai zydua saih u, Abeipa cha reithai teh u, chyhsa zydua chhaota, ano reithai ei se,”tah heih ta.
12 Chatawhcha Isai ta, “Zese thari cha y aw ta, Zenitaizy beipa ta y awpa ta a vaw pua awpa cha a y hra aw; ano cha Zenitaizy chata ama hnabeisei chhâpa a châ aw,”tah heih ta.
13 Thlahpa Pathaihpa hmotaoheina zawhzi ta hnabeiseina hluhpi nama hnei thei nawpa ta, hnabeiseina Khazohpa chata nama ngiapâpa vâta alyna nata aryhna to ta cha pabie ei se.
14 Unawh saih u, nâmo kyh cha, nâmo tlai phana ta bie eichi ta, sona to hnei eichi ta, namâ chhorei rairie thei hra tahpa, keima tlai chhaota a dopata ta ei pahno.
15 Châhrasala Zenitaizy hry liata Krista Zisu chakaotuhpa ta ei y thei nawpa ta Khazohpa ta eina piepa ngiachhiena vâna heta cha pahnokhei awpa ta a kyh thokhazy liata riahphapa ta ei roh.
16 Zenitai ei hlâpazy cha Thlahpa Pathaihpa pathaisapa châ ei ta, aly tlâh ama châ thei nawpa ta, Khazohpa thâtihpha kyh liata theihthaipa rai ei hria.
17 Chatanachata Khazohpa lâ kyh liata Krista Zisu liana chata apalai nawpa ei hnei.
18 Krista ta Zenitaizy pazyhsa nawpa ta bie reipa nata hmotaopa ta pahnosana zy nata hmonoâhpa zy hmotaotheina ta Thlahpa Pathaihpa hmotaotheina liana chata keima na hmâpa ta a hmotaopazy leipa ta cha khâpahma reih ngâh tlôh lei khâh na ta,
19 Zerusale khih nata a chheipâh râh tawhta Ilyriku râh taihta Krista Thâtihpha cha râh to liata ei chho paki haw, keima na hmâpa ta a hmotaopa cha cha tlatluna cha a châ.
20 cha hawhna chata mo hropa lôbôpa chôta a paraipa ei châ lei nawpa ta, Thâtihpha Krista moh pado hana su liata chho leipa ta,
21 châhrasala Khazohpa châ bie ta, “A thâtih chho beih leipa chyhsazy chata hmô aw ei ta,"a thei beih leipazy chata ama pahno aw,” tahpa ropa hawhna khata chho ei chhuah tyh.
22 Cha vâna tlai chata nâmo lâ a vy awpa pakhâpa ta khâ ei y tyh.
23 Atahmâ deikua cha, he râh chheipâh liana heta hriana su rai hnei khao leipa na ta, kô hluhpi cha nâmo lâ a vy byuhpa ta y haw hra na ta.
24 Spain râh ei sie chyta ei siepa ta hmôpa ta ei hnabei seih ta, nâmo a pahlaopa ta ei ngiamo via tua sala cha lâta ei siena liata nâmo sahlao eina pathlie hra awpa ei chi ta, ei hnabeisei hra ta.
25 Atahmâ deikua cha mopathaipa sahlao chakaona awpa ta Zerusale lâna chata ei sie chy aw.
26 Masidônia nata Akai râh liata chyhsazy chata palôh châ ngaitapa ta Zerusale liata mopathaipazy hry liata dyhchhiepazy châta sôh thyupakhy ha tlôh ei ta;
27 palôh châ ngaitapa ta ama taopa a châ, âmo liata a bâh ha hra ei ta, Zenitaizy ta ama thlahpa lâ kyhzy amâ hlykhei tlôh khiahta cha, khizaw lâta hmozy ama deichhy hra awpa a byuhpa tlai a châ.
28 Chavâta cha cha tao khaipa ta a theilâpa chhao cha, âmo liata a sia ngaitapa ta ei pahmôsa khai na ta, nâmo tlypa ta Spain râh lâta ei sie lymâ aw.
29 Chatawhcha nama hnohta ei vy tina chata, Krista byhnâ awna pakipa a cheipa ta ei vy aw tahpa ei pahno.
30 Unawh saih u, thlah eina chhânapa lia eichi ta, Zudia râh liata ngiapâ leipazy liata ei boh thei nawpa nata, Zerusale khih châta deichhyna a dopa ta ei chei thei nawpa ta,
31 mopathaipa sahlao a lynazie hmeiseihpa a châ thei nawpa ta, thlah na chhâkhei lyliah awpa ta Abeipa Zisu Krista nata Thlahpa kyhpachâna ta ei châ haw chaimâh ei na.
32 Khazohpa ta a ryh a tahpa hawhta aly ngaitapa ta nama hnohta a vy na ta, eima palôh pahrapa ta a y chyu theina awpa ta.
33 Thlalôhna Khazohpa nama zydua hnohta y mawh sy. Amen.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||