Atheihna hrohpa
1 Chatanachata unawh saih u, Khazohpa ngiachhiena vâna heta, atheihna hrohpa nata pathaih nata Khazohpa aly tlâh châ awpa ta, nama pôhpa cha ahlâ awpa ta ei châ haw ei; cha cha nama chakaonazie awpa rai a châ.
2 He khizaw ryhpa hawhna heta y leipa ula, Khazohpa khopa a pha nata aly tlâh châpa nata pha paki cha nama pahno pasia thei nawpa ta, nama palôhrupa a thiehpa ta ypa ta tlao apanano teh u.
3 Khazohpa ta eina piepa ngiachhiena vâna heta nama hry liata ahyhmah ta nama palaina a daihpa rakha hlâta apalai leipa ta, Khazohpa ta chyhsa to hnohta ngiapâna rakha a piepa lymâ hawhta sia ngaitapa ta tlao pachâ awpa ta ei cha tah chyu ei.
4 Pôhpa miakha liata pachiahpa hluhpi hnei pi ta, pachiahpa zydua hmotaopa deikua cha a lyu vei.
5 cha hawhna hra chata keimo a hluhpi châ hra ei sihla, Krista liana chata pôhpa miakha châ pi ta, a nano chyu ta apachiah rairiepa eima châ.
6 Ngiachhiena maniah a piepa lymâ hawhta hmosaipiepa nanopa hnei chyu pi ta, bie chhochhielie awpa a châ khiahtala, eimâ ngiapâna rakha lymâ hawhta chho chhielie ei suh u;
7 chakao awpa a châ khiahtala khâchâ chakao ei suh u; pachutuhpa chhaota liahsa pachu mawh sy;
8 pasyutuhpa chhaota liahsa pasyu mawh sy; hmopietuhpa chata thlyu leipa ta pie mawh sy; ryureituhpa ta tiama ngaitapa ta reih mawh sy; chyhsa a ngiachhietuhpa ta aly ngaitapa ta ngiachhie mawh sy.
Krizyhpa hrona chhoreina
9 Kyhpachâna cha haiphiana a hlao leipa ta châ mawh sy; moleina lâ a hao ula, a phana lâ cha khâchâ a pyh teh u;
10 unawhzy kyhpachâna kyh liana chata kyhpachâ ngaitapa ta tha a pasa rairie teh u; palyupalihna kyh liana chata a khokhei rairie ula.
11 Tiamana kyh liana chata thathi leipa ula, thlahpa kyh liana chata phahnai khoh ula, Abeipa chakao ula.
12 Hnabeiseina kyh liana chata aly ula, riethei taona kyh liana chata tiama ula, thlahchhâna kyh liana chata thlahchha lylia ula.
13 Mopathaipazy phahlana liana chata deichhy ula, khichhaizy kha patlôsa ula.
14 Cha taolatuhpa cha byhnâ awpa ula; byhnâ awpa teh u, chhie sapa kha u.
15 Alypazy cha alykhei ula, achapazy cha chakhei teh u.
16 Pachâna su khata y chyu teh u; apasâhsa leipa ula, chyhsa nawhpazy tlao a kao teh u; apasosa kha u.
17 Ahy moleipa rai moleina ta viari thô kha u, chyhsa zydua pachâ ta hmo a ngiapa pachâ chhielie teh u.
18 A tah thei khiahtala, nâmo lâ chhâ chyhsa zydua nata a ryhpa ta y teh u.
19 Kho ngaitapa saih u, nama phuh ala leipa ula, Khazohpa pathi-iana tlao tlei teh u; ‘Phuh cha keima la awpa a châ, keima ta viari ei thô aw, Abeipa ta a tah,” tahpa ropa châ tlôh ta.
20 Chavâta, “Na khakhaipa a no a di khiahtala, niepa pie teh; a dâh a phi khiahtala dopa pie teh; cha hawhta na tah khiahtala a luh chô liata mei-ia na pahmaohpa a châ aw.
21 Moleina ta a tiahpa ta y leipa la, phana ta moleina cha tlao tiah teh.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||