Rawma Mozy 16
Mo pakha byhnâ awna
1 Eima sietanô Phôibi, Kenkeria khih liata awnanopa sahlao chakaotuhpa nata
2 nama bao â ngiahna maihta bao awpa ta hmia cha pahnosa awpa ei ta ei khoh, ano tlai chhao chyhsa hluhpi baotuhpa vaw châ tyh ta, keima tlai chhao eina bao.
3 Priska nata Akuila, Krista Zisu liata ei raihrialâhpa,
4 ei hro pabohsa nawpa ta rao a daopazy kha, nâ naohpa muh vy, keima dei châ leipa ta, Zenitai awnanopa sahlao zydua ta, âmo liana chata alynabie reih ei ta;
5 ama o liata awnanopa apakhypa sahlao cha nâ naohpa hra muh vy. Ei kho ngaitapa Epeneta, Asia râh liata Krista a ngiapâ tua chaipa kha, nâ naohpa hra muh vy.
6 Mari, nama châta hriapasa ngaita kawpa kha nâ naohpa hra muh vy.
7 Ei phohei Andrônika nata Zunia ei tâh-lâhpazy kha, nâ naohpa muh vy; âmo cha lyuhchâpazy hry liata mo pathâh kawpa châ ei ta, kei hlâta Krista liata a y tuapazy tlao châ ei ta.
8 Ampliata, Abeipa liata ei kho ngaitapa cha nâ naohpa muh vy.
9 Krista liata ei raihrialâhpa Urbana nata ei kho ngaitapa Staki nâ naohpa muh vy.
10 Krista liata chyhsa hmeiseihpa, Apele kha, nâ naohpa muh vy. Aristôbula chhôhkhazy hry liatahpa kha nâ naohpa muh vy.?
11 Ei phohei Herôdiôna kha, nâ naohpa muh vy. Nakisa chhôhkhazy hry liatahpa Abeipa liata a ypazy kha nâ naohpa muh vy.
12 Truphana nata Trôphôsa, Abeipa liata hriapasa kaw tyhpazy kha, nâ naohpa muh vy. Khongaitapa Pasi, Abeipa liata a hriapasa ngaitapa kha nâ naohpa muh vy.
13 Abeipa liata atlypa Ruta nata a nô, ei nô hra kha nâ naohpa muh vy.
14 Asinkrita zy, Phlekô zy, Hame zy, Patrôba zy, Hame zy ama hnohta unawh a ypazy chhao kha, nâ naohpa muh vy.
15 Philôlôka nata Zulia zy chhao, Neria nata a sietanô chhao, Ôlypa chhao, ama hnohta mopathaihpa a ypa zydua chhao kha, nâ naohpa muh vy.
16 Sy pathaipa ta a nao chyu teh u; Krista awnanopa sahlao zydua ta a châ naoh ei.
17 Unawh saih u, pachuna bie nâmo a chu leina lâta achhaihna nata paona a taotuhpazy cha aphapa ta a vaih awpa nata a heisai awpa ta ei châ haw ei.
18 Cha hawhpa chyhsazy chata eima Beipa Zisu Krista chakao leipa ei ta, âmo py tlao chakao tyh ei ta, ama rei phapa nata ama reithaina sonazy ta a so leipazy ama dô tyh.
19 Nama zyhnazie cha chyhsa zydua hry liata pathâh ha tlôh ta, chavâta nâmo chô liata ei ly na; anodeikuacha phana lâna chata sopa ta, moleina lâta nama so lei awpa ta ei khoh;
20 chatawhcha thlalôhna Khazohpa chata nama pheipazah ry liata Sâtâ cha a patlysaosa aw ei. Eima Beipa Zisu Krista ngiachhiena cha nama hnohta y mawh sy.
21 Ei raihrialâhpa Timawthy nata ei phohei Lukia zy, Zasawna zy, Sôsipata sahlaozy ta a châ naoh ei.
22 Kei Tertia, he châ rohtuhpa heta Abeipa mohta ei châ naoh ei.
23 Keima nata awnanopa sahlao zydua tlôna paw, Kaia chata a châ naoh ei. Khih liata sôh mokhâhtuhpa Erasta nata unawhpa Kuata ta a châ naoh ei. [Eima Beipa Zisu Krista ngiachhiena cha nama hnohta y mawh sy.]
Bie pachhâna
25 Ei Thâtihpha nata Zisu Krista bie chhopa hawhta, bieru phuahna hawhna heta, he bieru he chhâzaw ta a nyupa ta,
26 atahmâ deikua cha palâsapa châ ta, ngiapâna cha ama vaw zo nawpa ta, chhâzaw Khazohpa biepiepa lymâ hawhta hrohsopazy ta châbu bie ta pho to hnohta pahnosapa a châ haw;
27 Khazohpa sona deita liana chata Zisu Krista vâta chhâzaw ta rônahna y mawh sy! Amen.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||