Unawhpa seina
1 Ngiapâna liata chieh-leipa chyhsa cha alôh-leinazy sei leipa ta aly teh u.
2 Chyhsa pakha ta hmo ato nie theipa ta apangiasa ta, chyhsa chieh-leipa deikua chata âhnalasi deita a nie tyh.
3 Ato aniepa chyhsa chata anie leipa chyhsa mohnao khah se, anie leipa chyhsa chhaota aniepa chyhsa cha sei khah se; Khazohpa ta ano cha a ly haw mâ tâh.
4 Mo hropa chakaotuhpa aseituhpa cha ahyma na châ? A duahpa nata a paopa cha ano zibeipa châta a châ. Châhrasala ano cha paduasapa ta a y aw, Abeipa chata paduasa thei tlôh ta.
5 Chyhsa pakha ta noh kha he, noh hropa hlâta pasô via tyh ta, chyhsa hropa ta noh zydua he miakha saita a pachâ tyh. Chyhsa to âmo palôhrupa liata a pahnopasia ei se.
6 Noh a cha-y tuhpa chata Abeipa palyupalih nawpa ta a cha-y tyh. Ato anietuhpa chata Khazohpa lâta alynabie a reipa vâta Abeipa palyupalih nawpa ta a nie tyh; a nie leituhpa chhao chata Khazohpa lâta alynabi reih ta, Abeipa palyupalih nawpa ta nie leipa ta a y tyh.
7 Ahyhma keimosasy châta a hrohpa châ leipa pi ta, ahyhma keimosasy châta a thipa châ hra ma pi.
8 Eima hro khiahta cha Abeipa châta hroh aw pi ta, eima thipa chhaota Abeipa châta a thihpa châ tlôh pi ta; chavâta hroh hra ei sihla, thi hra ei sihla, Abeipa eih eima châ.
9 Krista thina nata a vaw hroh heihna chhâpa cha, athihpa nata ahrohpa Beipa a châ theina he châ tlôh ta.
10 Châhrasala nâ ta khazia na unawhpa na sei? A châ vei khiahtala, nâ ta khazia na unawhpa na mohnao? Khazohpa pachiana dyuchhai hmiakô liata eima zydua ta a duah tlôh aw pi ta;
11 “Abeipa chata chyhsa to ei hmiakô liata pakhu paneih aw ei ta, paleih to chhao Khazohpa lâta a phuah aw tahpa ta chhie ei sa,” tah ta, tahpa ropa châ tlôh ta.
12 Chatanachata eima zydua ta Khazohpa liata keimo thâtih eima reih chyu awpa a châ.
Unawhpa papaosana
13 Cha vâna chata a sei khah u, ahyrai ta ano unawhpa pakhâna tlyma, paona tlyma, tao lei awpa ta tlao a chhuah teh u.
14 Ano liana chata pathaih leipa khâpahma a y leipa tahpa Abeipa Zisu liana chata ei pahno ngaita kaw; khâpahma pathaih leipa ta a pachâtuhpa deikua chata ano châna chata pathaih leipa a châ.
15 Khâpaleipa niepa vâta na unawhpa palôhrupa pasana a châ khiahtala, kyhpachâna ryhpa hawhta nâ chhi khao leipa a châ. A thi vyuhpa ta Krista ta a thipâ pa cha nâ khâpaleipa niepa ta pahleipadia khâ.
16 Chatanachata nâma châta phana cha moleina lâta reipa ta y khah se.
17 Khazohpa Khihnarâh cha nie nata do kyh châ tlôh leipa ta, siana zy, aryhna zy, Thlahpa Pathaihpa liata alynazy tlao a châ;
18 ahyrai cha kyhzy liana chata Krista a chakaopa cha Khazohpa alypa nata chyhsa reithaipa ta a y tyh.
19 Chatanachata aryhna awpa nata a paphahnaisa rairiena awpa hmozy cha a chadai ei suh u.
20 Nâ khâpaleipa niepa vâta Khazohpa raihria parao khâ, hmo zydua a pathaih, châhrasala a khâpaleipa niepa ta chyhsa a papao khiahtala a nietuhpa châta moleina a châ;
21 na unawhpa paona awpa a châ khiahtala, sa nie leipa zy, kresawti doh leipa zy, hmo khâpa rai tao leipa a pha.
22 Ngiapâna hneipa cha, Khazohpa hmiakô liata nâma deita pahnopa ta hnei thlâh ha teh; âmo pha tahpa kyh liata thailei a pachâsa leipa chyhsa cha a nohlao na.
23 Anodeikuacha a lôleituhpa ta a nie khiahtala, ngiapâna ta a nie leipa vâta thai lei a châ; khâpa rai ngiapâna leipa ta taopa cha moleina châ tlôh ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||