Mara Holy Bible: Maka

Showing posts with label Maka. Show all posts

Maka 1

Thâtihpha Maka 1

Bâtituhpa Zawhana ta bie a chho (Mk 3:1-12; Lk 3; 1-9. 15-17; Zh 1:19-28)

1 He he Khazohpa Sawchapawpa, Zisu Krista Thâtihpha a thaona a châ.

2 Hrohsopa Isai ropa hawhta pathaopa châ ta: “Moh teh, ei lyuhchâpa na hmiakô liata tuah na ta,

3 Râhpathohpa liata chyhsa awh pa chata; Abeipa lâthlôh chhuahdy ula, a lâthlôhzy patlâh teh u,” tahpa ta.

4 Bâtituhpa Zawhana râhpathohpa liata vaw pua ta, moleinazy a ngiahthaina awpa ta rona bâtina biechho ta.

5 Zudia râh nata Zerusale khih tawhta chyhsa to ano lâta a vy ei ta; ama moleinazy palâhâhpa ta Zawdâh chavah liata âmo cha bâti pachâsa haw ta.

6 Zawhana cha râraoseipa hmi poh a bu ta, a chai liata savori a saih ta, khawsu nata kheihti a nie tyh.

7 Ano chata zawpi hnohta, “Ei hnôh lâta keima hlâta chyhsa rôhnah viapa a vy hai, a bôh ta a pheiky ri a pathlâ tlâh chhao châ va na.

8 Keima ta ti ta cha bâti ei na ta; ano deikua chata Thlahpa Pathaihpa ta a cha bâti aw ei,” tahpa ta phuah ta.

Zisu bâti châna(Mt 3:13-17; Lk 3:21-22)

9 Cha nohzy liana cha Zisu Kalili râh Nazari khih tawhta a vy ta, Zawdâh chavah liata Zawhana ta bâti pachâsa haw ta.

10 Chatawhcha ti tawhtapa a pua pata nahta, avâ a pahypa nata, Thlahpa vachhuh hawhta a chôta a za chohpa hmô ta;

11 avâ tawhta ao vaw pua ta, “Nâ ei Sawchapawpa kho ngaitapa na châ; na chô liata ei ly ngaita na,” tahpa ta.

Zisu reipasaona â tyh(Mt 4:1-11; Lk 4:1-13)

12 Chatanachata Thlahpa chata ano cha râhpathohpa liata thlai a chhi ta.

13 Râhpathohpa liana chata noh sypalih Sâtâ reipasaopa ta y ta; râhsazy hnohta y ta, vâlyuhchâpazy ta ano deichhy ei ta.

Zisu ta chakaona â thao(Mt 4:12-17; Lk 4:14-15)

14 Zawhana ama patu tawhta, Zisu Kalili lâ a vy ta. Khazohpa Thâtihpha chho ta,

15 “A daihti cha â ki haw, Khazohpa Khihnarâh chhao â hnia haw; ro ula, Thâtihpha cha a ngiapâ teh u,” tahpa ta.

Zisu ta ngapatutuhpa papalih a aw(Mt 4:18-22; Lk 5:1-11)

16 Kalili Tipo kiah liata a sie laih nota, Saimaw nata Saimaw unawhpa Adru cha tipo liata sao ama vaw haipa hmô ta; ngapatutuhpa châ ei ta.

17 Zisu ta ama hnohta, “Na zi teh u, chyhsa patutuhpa ta cha tao vâ ei na,” tah ta.

18 Ama saozy cha siesaipa ta thlai zi haw ei ta.

19 Ano cha bâhta a sie nata, Zebadi sawchapawpa Zami nata a unawhpa Zawhana, balyh liata sao ama thei haipa hmô ta.

20 Âmo cha thlai aw ta; chatanachata ama paw Zebadi nata ama pahlaosapa chyhsazy cha balyh liata siesai ei ta, ano cha ama zi haw.

Thlahpa puapa ta chyhsa a patupa(Lk 4:31-37)

21 Kapynia khih liata a ngia ei ta, pahânoh ta apakhyna-o liata thlai a ngia ta, pachu ha ta.

22 A pachuna cha Ryhpa pachutuhpazy hawhta châ leipa ta, biehnei kawpa hawhta âmo a pachupa vâta ama noâh kaw ta.

23 Ama pakhyna-o liana chata thlahpa puapa a hneipa chyhsa pakha y ta;

24 ano chata, “Nazari Zisu, kheihta tao awpa e maniah na khoh? Maniah pahlei awpa ta ma nâ vy? Khazohpa Moh Pathaihpa, na châ tahpa ei pahno,” tahpa ta awh ta.

25 Zisu ta thlahpa cha bie pie ta, “A chalih la, a chhôh tawhtapa vaw pua teh” tah ta.

26 Thlahpa puapa chata ano cha thata padaosa ta, ao paro ngaitapa ta awh ta, a chhôh tawhtapa a pua haw.

27 Ama zydua ta noâh ngaitapa ta, “He he khâpa ma a châ tly? Pachuna thiehpa a châ he! Thlahpa puapazy chhaota bie hnei ngaita kawpa ta bie pie ta, a bie amâ ngiahpa he,” tahpa ta a ei ei ta.

28 Kalili râh chhôh zydua liata a thâtih thlai pathâh ha ta.

Pity pihnô a patlâh(Mt 8:14-15; Lk 4:38-39)

29 Chatawhcha apakhyna-o tawhtapa ama pua pata nahta, Zami nata Zawhana chhaota, Saimaw nata Adru o liata thlai a ngia ei ta.

30 Saimaw lahpinô nô cha chasipa ta tlâh leipa ta a zia thlâh ha ta, a thâtih cha Zisu thlai chho ei ta.

31 Ano cha a hnohta vawh ta, a ku patupa ta pathyu ta, a chasipa cha pai ta; âmo a chakao haw.

Chyhsa hluhpi zâlâ ta a patlâh ei(Mt 8:16-17; Lk 4:40-41)

32 Zâlâ noh a tla tawhta tlâh leipa zydua nata ahripa ta a patupazy a hnohta a vaw chhi ei ta.

33 Chatawhcha a khihpi ta ochhi thaby liana cha a vaw y pakhy ei ta.

34 Tlâh leipa hluhpi pasana hri-ohpazy cha patlâh ta, ahripa hluhpi papua hra ta; ahripazy chata ano cha ama pahnopasiapa vâta bie ama reipa pasaih vei.

Biechho awpa ta Zisu a pua(Lk 4:42-44)

35 Mydi ta, a pavâh hlâ ta, thyu ta râhpathohpa su lâta sie ta, cha liana chata thlahchhâ ta.

36 Saimaw nata a viasazy chata ano cha tlua ei ta,

37 ano cha ama hmô nahta, a hnohta, “Chyhsa zydua ta ama cha tlua mâ tâh,” tah ei ta.

38 Ano chata ama hnohta, “Khih a hniapa lâzy sie suh vy, cha liana zy chata bie ei chho theina awpa ta; cha cha ei vaw pua chhâna châ tlôh ta,” tah ta.

39 Kalili râh zydua hry ta, ama pakhyna-ozy liata bie pachu ta, ahripazy chhao papua hra ta.

Zisu ta aphawhpa a pathai(Mt 8:1-4; Lk 5:12-16)

40 A hnohta aphawhpa a vy ta, “Na khoh khiahtala eina pathai thei chi na,” tahpa ta a hmiakô liata pakhu paneihpa ta a haw ta,

41 Zisu chata a tha pasa ngaita kaw ta. Kei paza ta hria ta, “Ei khoh na; pathaipa ta y mah y,” tah ta.

42 Chatanachata sôkha ta aphawhpa cha vaw lei ha ta, a pathaih haw.

43 Chatawhcha bie liahsa taih ta, a pasiesa haw,

44 a hnohta, “Ahy hnohta hmahta khâpahmah reih leipa la, sie la, theihthaipa hnohta va pamosa la, zawpizy pahnona awpa ta Mawsi ta bie a piepa hawhna khata na pathaisana châta hlâ teh,” tah ta.

45 Châhrasala ano cha pua ta, cha thâtih cha thata tlâh awhkheipa ta, phuah ta, cha vâna chata Zisu cha a lâhâhpa ta khih liata a ngia thei khao leipa ta, râhpathohpa suzy liata tlao y ta; su to tawhta ano cha ama vaw pangai tyh.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 2

Zisu ta asypa a patlâh (Mt 9:1-8; Lk 5:17-20)

1 Noh khazie rakha tawhta tlyma Kapynia khih lâta vaw kua ta, o liana chata a y tahpa bie vaw pathâh haw ta.

2 Chatanachata chyhsa hluhpi a vy pakhypa ta, o chhao a tlôh leipa ta, ochhi thaby lia taihta yna y leipa ta; ama hnohta bie pachu ta.

3 Chatawhcha asypa pakha chyhsa papalih ta a hnohta a vaw sy ei ta.

4 Zawpi vâna chata ano a hnia thei lei khâh ei ta, Zisu dady ta vâphuh phie ei ta; ama phie khai nahta asypa cha a hmophaw duata za pathlia ei ta.

5 Zisu ta amâ ngiapâna cha a hmô nahta, asypa hnohna chata, “Ei saw, na moleinazy cha a ngiahthaipa a châ haw,” tah ta.

6 Ryhpa pachutuhpa thokhazy cha cha liana chata atyuh ei ta,

7 “Khazia he chyhsa heta cha hawhta bie a reih? Khazohpa a reipachhie he! Khazohpa dei leipa ta, ahy e moleinazy a ngiahthai thei?” tahpa ta pachâ ei ta.

8 Zisu ta ama palôhrupa ta cha hawhta ama pachâ tahpa a palôhrupa ta thlai vaw pahno ha ta, ama hnohta, “Cha bie cha khazia e nama pathipalôh liata nama pachâ tly?

9 Asypa hnohna heta, ‘Na moleinazy a ngiahthaipa a châ haw,’ tahpa nata ‘Thyu la, na hmophaw la la, phei ta sie teh,’ tahpa he a kheihawhpa he a rei a nao via tly?

10 Kheihtarai châ sala khizaw liata Chyhsa Sawchapawpa ta molei ngiahthai theina a hnei tahpa nama pahnona awpa ta,” asypa hnohna chata

11 “Ei cha tah chu, thyu la, na hmophaw la la, na o lâ a di teh,” tah ta.

12 Ama mothlâh ha nota ano cha thlai thyu ta, hmophaw cha la ta, pua ha ta; cha vâna chata ama zydua ta ama noâh ta, Khazohpa palyupalihpa ta, “He hawhpa he hmô beih ma pi,” tahpa ta reih ei ta.

Livai awna(Mt 8:9-13; Lk 5:27-32)

13 Chatawhcha Tilaipi ngiakâ lâta pua heih ta; zawpi zydua cha a hnohta a vy ei ta, âmo a pachu haw ei.

14 A sie nahta, Livai, Alphu sawchapawpa cha chhiekheina su liata atyupa hmô ta, a hnohta, “Na zi teh,” tah ta. Livai cha thyu ta, zi ha ta.

15 Chatawhcha Zisu cha Livai o liata pati a dôh nahta, chhiekheituhpa hluhpizy nata moleipazy nata a pachupazy chhaota a hnohta pati dôhkhei ei ta, ano zituhpazy hluhpi châ tlôh ei ta.

16 Pharisaizy hryta Ryhpa pachutuhpa thokhazy chata Zisu ta chhiekheituhpazy nata moleipazy hnohta pati a dôhpa ama hmô nahta, a pachupazy hnohta, “Kheihtazie ta e, chhiekheituhpazy nata moleipazy hnohta nie ta a do tly?” tah ei ta.

17 Zisu ta a vaw pahno nahta, ama hnohta, “Chyhsa hri-iah pathaihpazy ta patlâhtuhpa a ngiah veih ei; chyhsa chietlâhpazy deikua ta amâ ngiah; chyhsa siapa tlua awpa ta a zupa châ leipa na ta, moleipazy tlua awpa ta a zupa ei châ,” tah ta.

Pati nie leina kyh(Mt 9:14-17; Lk 5:33-39)

18 Zawhana pachupazy nata Pharisaizy chata pati nie leipa ta y ei ta; chyhsazy a vy ei ta, Zisu hnohta, “Khazia e Zawhana pachupazy nata Pharisai pachupazy chata pati nie leipa ta y tyh ei ta, na pachupazy deikua cha pati nie leipa ta y tlôh hra ei va?” tah ei ta.

19 Zisu ta ama hnohta, “Myuthieh alykheituhpazy hnohta myuhneituhpa cha a y chhôh na chata pati nie leipa ta ama y thei rai ma? Myuhneituhpa cha ama hnohta a y chhôhna cha pati nie leipa ta y thei veih ei.

20 Châhrasala myuhneituhpa cha ama hry tawhta lana noh a vaw y aw, cha noh deikua chata pati nie leipa ta ama y aw.

21 Ahyhmah ta poh parohpa liata poh thiehpa bai beih veih ei; baipa châ sala, a baithlana chata tlao a daoparu aw ta, a thiehpa chata a parohpa cha hrie aw ta, tlao a hrie via aw.

22 Chatawhcha ahyhmahta kresawti thiehpa, savo titheih parohpa liata ryh beih veih ei; ryhpa châ ha sala, kresawti chata savo titheih cha tochhei aw ta, kresawti nata savo tithei cha ama lei rairie aw; kresawti thiehpa cha savo tithei thiehpa liata tlao ama ryh tyh,” tah ta.

Pahânoh ta sâh su ama thlie(Mt 12:1-8; Lk 6:1-5)

23 Zisu cha pahânoh ta sâh thihzy liata sie ta; a pachupazy chata ama siepa ta sâh su cha thlie ei ta.

24 Chatawhcha Pharisaizy chata a hnohta, “Moh teh, khazia pahânoh ta hmo ânapazy cha ama tao tly?” tah ei ta.

25 Ano chata ama hnohta, “Davi nata a viasazy ta a phahlapa ta ama nodi nota ama hmotaopa kha reih veih eichi ma?

26 Abiatha theihthai beichaipa a châ nota, Khazohpa o liata a ngia ta. Theihthaipazy leipa ta nie anapa viahchhâ Sopa cha nie ta, a viasazy chhao a pie hrapa kyh kha?” tah ta.

27 Chatawhcha ama hnohta, “Pahânoh he chyhsapa châta taopa châ ta, chyhsapa he pahânoh châta taopa châ vei;

28 chatanachata Chyhsa Sawchapawpa he pahânoh Beipa chhao châ tlôh hra ta,” tah ta.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 3

Chyhsa ku sypa (Mt 12:9-14; Lk 6:6-11)

1 Apakhyna-o liata a ngia heih ta, cha liana chata chyhsa pakha ku sypa y ta.

2 Ano ama leih thei nawpa ta, pahânoh ta a patlâh nata patlâh lei mo thlâh ha ei ta.

3 Ano chata ku sypa hnohna chata, “A vy teh,” tah ta.

4 Chatawhcha ama hnohta, “Pahânoh ta khâpa tao awpa ta ma eima ryhpa ta maniah a pasai? Bao awpa ta ma, tlao pasasa awpa ta maw? Chyhsa hrona pachha awpa ta ma, tlao thie awpa ta?” tahpa ta zawpizy hiahri ta. Châhrasala a thlih thlâh ha ei ta.

5 Ama kuchha ngaitapa vâta pathi-ia ngaitapa ta âmo moh thlâh ha ta, ku sypa hnohna chata, “Na ku pazawh teh” tah ta. Chatawhcha thlai pazawh ta, a ku cha tlâ ha ta.

6 Pharisaizy cha pua ei ta, ano ama thie theina awpa ta pachâpa ta Herawda pyzy nata thlai a chhohia ei ta.

Zawpi hluhpi ta ama zi

7 Zisu cha a pachupazy nata tilaipi lâta sie ha ei ta, Kalili râh tawhta chyhsa hluhpi ta ano cha ama zi;

8 hmotaopa rôhnahzie cha ama thei nahta Zudia râh tawhta zy, Zerusale tawhta zy, Idumia râh tawhta zy, Zawdâh khôlâ tawhta zy, Tyre nata Sidaw khih chheipâh tawhta zy zawpi hluhpi ta ano ama vaw pangai.

9 Chatawhcha zawpi ama hluh ngaita kawpa vâta ano ama cha-ie lei nawpa ta a pachupazy hnohta balyh chyhpa a paruapa awpa ta chho ta.

10 Chyhsa hluhpi patlâ ha tlôh ta, hri-ohpazy ta ano ama hria thei nawpa ta a byh hôlô ei ta.

11 Chatawhcha ahripa puapazy chhaota ano cha ama hmô na maih ta, a hmiakô ta paopa ta, “Nâ Khazohpa Sawchapawpa cha na châ,” tahpa ta ama aw tyh.

12 Chatawhcha ama hnohta a thâtih cha phuah lei awpa ta bie pie ha ta.

Pahrawhleino a tlypazy(Mt 10:1-4; Lk 6:12-16)

13 Chatawhcha tlâh lâna chata khy ta, ano ta a khopazy maih cha aw ta; a hnohta khy haw ei ta.

14 Chatawhcha pahrawhleinozy cha a hnohta ama y thei nawpa ta nata biechhopa ta a tuah thei nawpa ta

15 nata ahripa papua theina bie ama hnei thei nawpa ta rao ta, ama moh ta Apostolzy bi ta.

16 Saimaw, Pity a bipa zy;

17 Zebadi sawchapawpa Zami nata Zami unawhpa Zawhana zy, âmo cha Bôanazi bi ta, cha cha tôkalôhpa a thuapa sawzy tahna a châ;

18 Adru zy, Phili zy, Bathawlawmu zy, Mathai zy, Thawma zy, Zami, Alphu sawchapawpa zy; Thadia zy, Saimaw Kana chyhsa zy,

19 ano patusatuhpa Zuda Iskari zy ama châ.

Belzebul nata Zisu(Mt 12:22-32; Lk 11:14-23; 12:10)

Chatawhcha o lâ a ngia ta;

20 chyhsa hluhpi a hnohta a vy pakhy heih ei ta, cha vâna chata pati chhao nie hmâ leipa ei ta.

21 Chatawhcha a sanawhzy ama pahno nahta, “Ahru ha ei chuh,” tahpa ta ano patu awpa ta a thao ei ta.

22 Zerusale tawhta Ryhpa pachutuhpazy a zupa chata, “Ano cha Belzebul ta a hneipa a châ he, ahripa beipa a châpa vâ heta ahripa a papua thei hih,” tah ei ta.

23 Chatawhcha Zisu cha aw ta, ama hnohta pakhona ta reih ta, “Kheihta e Sâtâ ta Sâtâ a papua thei aw?

24 Khihnarâh chhao anosasyh ta adyuh khiahta cha kheihta e a duah thei aw.

25 Chhôhkha nata chhôhkha adyuh ei sala, a duah rairieh veih ei.

26 Sâtâ chhao anosasyh ta a dyuh khiahta cha, a pachhaih aw ta, a duah thei aw vei, tlao a lei aw.

27 Ahyhmah ta chyhsa thatlôpa o liata a ngiapa ta a sôhzy hrao thei vei, chyhsa thatlôpa cha chahrypa a châ tua leipa ta cha; cha khai nah chata a o cha a hrao thei aw.

28 “Hmeihseihta ta, ei cha chho ei chuh, chyhsapa sawzy ama moleina zydua nata ama Khazohpa reipachhiena zydua a ngiahthai theipa a châ;

29 anodeikuacha ahyrai Khazohpa Thlahpa Pathaihpa reipachhiepa cha khati nota hmahta a ngiahthaipa châ aw vei, chhâzaw moleina kyh liana chata thai leipa ta tlao a y aw,” tah ta.

30 Ano cha “Thlahpa puapa a hneipa a châ,” ama tahpa vâta he he a reih.

Zisu unawhpazy nata a nô zy(Mt 12:46-50; Lk 8:19-21)

31 Chatawhcha a nô nata a unawhpazy a vy ei ta; khôtho liata a duah ei ta, ano awpa ta chyhsa tuah ei ta.

32 A kiapâh ta zawpi atyuh hôlô ei ta; a hnohta, “Na nô nata na unawhpazy ta cha tlua ei ta, khôtho liata ama y,” tah ei ta.

33 Chatawhcha ano chata ama hnohta, “Ei nô nata ei unawhpazy cha ahyzy e ama châ tly?” tahpa ta a chhy ta.

34 Chatawhcha a kiapâh ta atyuhpazy cha moh ta, “Hezy he ei nô nata ei unawhpazy ama châ!

35 Ahyrai Khazohpa kho viapa lâ a taopa maih cha, cha tlai cha ei unawhpa zy, ei sietanô zy, ei nô zy ama châ,” tah ta.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 4

Chi hietuhpa pakhona (Mt 13:1-9; Lk 8:4-8)

1 Tilaipi kiah liata pachu pathao heih ta. Zawpi hluhpi a hnohta a vy pakhy ei ta, tilaipi liata balyh liana chata kiah ta a tyuh ta; zawpi zydua deikua cha tilaipi kiah liana chata y ei ta.

2 Chatawhcha pakhona bie ta, hmo hluhpi âmo pachu ta, a pachuna liana cha ama hnohta;

3 “Nahthlie ula! Moh teh u, chi hietuhpa cha chi hiepa ta pua ta.

4 A hi nahta thokha cha lâpi kiah liata tla ei ta, pavawzy a vy ei ta, dy khai haw ei ta.

5 Thokha cha lôphiariapa, alei a pahna su liata tla ta, alei a chha leipa vâta thlai kaw pyuh ta, a lei a papa vâta;

6 chatawhcha noh a sa nata vaw aih ta, a thari a hnei leipa vâta uah ha ta.

7 Chi thokha cha ahloh hryta tla ta, ahloh cha vaw seih ta, di sao ha ta, a thei rai pathei khao vei.

8 Chatawhcha a hrohpa cha alei phapa liana cha tla ta, thlai pyuh ta, kaw lai ta, vaw pathei ha ta. A lie sythôh zy, a lie sycharu ta zy, alie za kha zy ta vaw pôh ha ta,” tah ta.

9 Chatawhcha ano cha, “Ahyrai theina awpa ta nahkhao a hneipa ta cha thei se,” tah ta.

Pakhona biezy ta a chhuahpa(Mt 13:10-17; Lk 8:9-10)

10 Zisu deita ta a y nota, a kiapâh ta a ypazy nata pahrawhleinopazy chata pakhona bie cha hiahri ei ta.

11 Chatawhcha ano chata ama hnohta; “Khazohpa Khihnarâh bienyupa cha nâmo pahnopa cha pasaipa châ ta, khôtho lâtahpazy châta deikua cha ato pakhona ta reipa a châ;

12 cha vâna chata hmô la hmô ei ta, châhrasala pahno veih ei, nahkhao ta thei ei ta, a pachânazie cha pahno veih ei; chata leipa ta la a vaw heih heih aw ei ta, a ngiahthaipa ama châ pathlei aw na,” tah ta.

Chi hietuhpa pakhona chhopasiana(Mt 13:18-23; Lk 8:11-15)

13 Chatawhcha ama hnohta, “He pakhona bie he pahno thai vei chi ma? Kheihta e pakhona bie hropa zydua nama pahno thei aw?

14 Chi hietuhpa chata bie cha hie ta.

15 Lâpi kiah liata tlapa cha he he ama châ; bie cha ama thei nahta Sâtâ chata ama palôhrupa liata bie ama hiepa cha thlai a lapa tyh ei.

16 Cha hawhna hra chata lôphiariapa liata hiepa cha he he ama châ, bie ama pahno pata nahta aly ngaitapa ta thlai a pyhpazy hih;

17 châhrasala âmo liata thari rai ama hnei leipa vâta bohpi leipa ta ama tha azei tyh; cha khai nah chata bie vâta rietheina tlyma, pasa taona tlyma a vaw y pata nahta thlai ama pao tyh.

18 Chatawhcha a hropazy cha ahloh hryta hiepa cha ama châ; chazy chata bie cha thei ei ta,

19 châhrasala khizaw pachâna kyh zy, hneirôna dôna kyh zy, hmo hropa byuhnazy cha a vaw ngia nahta, bie cha disao ta, pathei leipa ta a y tyh.

20 Châhrasala alei phapa liata hiepa cha hezy he ama châ, bie cha thei ta a pyh ta, lie sythôh ta zy, a lie sycharu nata a lie za kha zy ta a patheipa he ama châ,” tah ta.

Khaihna sona a dopa(Lk 8:16-18)

21 Zisu chata ama hnohta, “Meiôh cha rao ei sala, a sona liata soh leipa ta, bai ry liata tlyma, rakhô ryta tlyma soh awpa ta ama la beih ma?

22 Phuah leipa ta nyupa khâpahmah y vei;

23 Ahyrai theina awpa ta nahkhao a hneipa ta cha thei se,” tah ta.

24 Ano chata ama hnohta, “Nama nahthliepa cha khâpa e a châ, a chado teh u; nama panuana lilaw ta cha panuapa hra aw ei ta, cha hlâta hluh viapa chhaota.

25 Ahyrai a hneipa cha pie baichha aw ei ta; ahyrai a hnei leipa cha a hnei chhôhpa chhao lapa a châ hra aw,” tah ta.

Chi a ru lâta laiseihpa pakhona

26 Zisu chata, “Khazohpa Khihnarâh cha chyhsa ta alei liata chi hie sala,

27 zâ ta a môpa ta, chhô ta thyu tyh sala, chi cha a yzie pahno leipa ta vaw pyuh ta, vaw laiseih sala, cha hawhpa cha a châ.

28 Alei ta ano tlaita patheisa sala; a hmiatua ta a kô, cha khaihna ta a su, cha khaih heihna chata a thei a vaw châ.

29 Châhrasala chyhsa ta a thei cha a vaw hmô nahta, sâh hriana daihti a châ hapa vâta savâ ta a tai tyh,” tah ta.

Ahrâ chi pakhona(Mt 13:31-32. Lk 13:18-19

30 Zisu chata, “Khazohpa Khihnarâh cha kheihta e eima pakhopâ aw, cha leipa ta kheihawhpa pakhona e eima hmâh aw?

31 Ahrâ chi hmô kha alei liata hiepa hawhpa he a châ. Alei liata chi zydua hlâta chyh chai hra sala;

32 a hie nata kaw pyuh ta chicheipa zydua hlâta lai chai ha ta, chiah lai ngaitapa ta pachiah ta. chatanachata avâ liata pavawzy chata a chiah liata amâ rie tyh,” tah ta.

Pakhona bie a hmâna zie(Mt 13:34-35)

33 Pakhona bie a hluhpi cha ama pahno theina awpa ta ama hnohta a reih tyh;

34 châhrasala pakhona bie leipa ta cha ama hnohta reih beih vei; a pachupazy hnohta deikua cha a ru lâta ato a chhopasia tyh ei.

Thlihpipa a chalihsa(Mt 8:23-27; Lk 8:22-25)

35 Cha noh tlai chata zâlâ a vaw châ nahta ama hnohta, “Haosâ lâ chakâ ei suh vy,” tah ta.

36 Chatawhcha zawpizy cha siesaipa ta, ano cha a y tyhpa ualua ta balyh liana chata siekhei haw ei ta. Balyh chyhpazy chhao a hnohta ama y.

37 Chatawhcha thlihpipa ru ngaitapa vaw pathli ta, ti chalâparâpazy cha balyh liata thata a chathôh ta, balyh cha ti ta bie daihmâ ta.

38 Châhrasala ano cha balyh chao lâna cha lahua a huapa ta a mô thlâh ha ta; ano cha kei pathyu ei ta, a hnohta, “Pachutuhpa, eima leidiapa he pei tah va chi ma?” tah ei ta.

39 Chatawhcha ano cha thyu ta, thlih cha ra ta, tilaipi hnohna chhao chata, “A chalih la! Na y tyhpa hawhta y teh!” tah ta. Chatawhcha thlih cha a chalih ha ta, si dia ha ta.

40 Zisu chata ama hnohta, “Khazia e nama chi kaw tly? Ngiapâna hnei veih eichi ma?” tah ta.

41 Zisu cha chi ngaita ei ta, “He chyhsa he ahyma a châ tly, thlih nata tilaipi chhaota a bie amâ ngiahpa he?” âmosasyh ta a tah ei ta.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 5

Kerasene chyhsa ahripa ta a patupa (Mt 8:28-34; Lk 8:26-39)

1 Tilaipi haosâ, Kerasene* chyhsa râh cha vaw tlô ei ta.

2 Balyh tawhta a pua nahta chyhsa pakha thlahpa puapa a hneipa thlâ tawhta a vaw puapa chata a tyh ta,

3 cha chyhsa cha thlâ liata a pahrâ tyhpa châ ta; ahyma ta bâlia chhaota chahry thei veih ei;

4 keihraizy daipa ta balia chhaota chahry tyh ei ta, châhrasala bâlia cha chhie ta, keihrai chhao a chaphie khai ha tyh; ahyhmah ta kheihta tao thei veih ei.

5 A chhô zâ ta thlâ liata nata tlâh liata zy awh thlâh ha tyh ta, anosasy ta alôzy ta a â tyh ta.

6 Lâhlapi tawhta Zisu a hmô patanahta a kei râ ta, a naoh ta;

7 ao paro ngaitapa ta awh ta; Zisu Khazohpa Chônôchaipa Sawchapawpa, keima liata khâpa taopa e na hnei? Rie na patheisa leipa ta Khazohpa moh ta ei châ haw na,” tah ta.

8 Zisu chata a hnohta, “Nâ thlahpa puapa, chyhsapa chhôh tawhtapa pua teh!” tah ta.

9 Zisu ta a hnohta, “Na moh ahy e?” tahpa ta hiahri ta. Ano chata a hnohta, “Ei moh cha Zahluhpi a châ; a hluhpi cha tlô pi ta,” tah ta.

10 Chatawhcha cha râh tawhta ama pua leina awpa ta thata a haw ei ta.

11 Tlâh baikhaihpa liana cha vao zaw ama lao chuahpa ta y ei ta;

12 âmo chata, “Vaozy hnohta maniah pasiesa la, âmo liata eima ngia theina awpa ta,” tahpa ta a haw ei ta.

13 Zisu ta âmo cha pasai ta, thlahpa puapazy cha pua ei ta, vao chhôh liatazy a ngia ei ta, chatanachata vao zaw cha sâh no dua châ ei ta, tilaipi kiah lâta a zâ râ ei ta, tilaipi liana chata ama tlasao khai haw.

14 Chatawhcha vao pasatuhpazy cha a râ ei ta, khihpi liata nata cha râh chheipâh liata a ypazy hnohta reih ei ta. Khâpa hmo e a vaw tlô tly tahpa mo awpa ta zawpizy a vy ei ta.

15 Zisu hnohta amâ vy nahta, ahripa ta a patupa, Zahluhpi kha poh a bupa ta palôh soh hapa ta, a tyuhpa ama hmô; chatanachata chi kaw ei ta.

16 Chatawhcha a hmôtuhpazy chata ahripa patupa chô liata hmo a vaw ypa nata vao thâtihzy cha âmo chho ei ta.

17 Cha sahlao chata Zisu cha ama râh tawhta puasai awpa ta a haw ei ta.

18 Zisu balyh a kia nata ahripa ta a patupa khata Zisu hnohta y thlâh ha awpa ta a haw ta.

19 Châhrasala Zisu deikua chata pasaih leipa ta a hnohta, “O lâ a di la, na chyhsazy hnohta Abeipa ta na châta hmo a cha taopa he a rôhnahzie nata a cha ngiachhie zie va chho teh,” tah ta.

20 Chatanachata sie ta, Dekapoli lianazy chata, Zisu ta a chôta hmo a taopa rôhnahzie cha tlâh awhkhei ta; chyhsa zydua cha ama noâh kaw ta.

Zairu sawchanônô nata chanô thi lohpa thâtih(Mt 9:18-26; Lk 8:40-56)

21 Zisu cha balyh ta haosâ lâ a chaka nahta, zawpi a hluhpi ta ano vaw byh ei ta; ano cha tilaipi ngiakâ liata y ta.

22 Chatawhcha apakhyna-o hyutuhpazy hryta pakha, a moh Zairu cha a vy ta; Zisu a hmô patanahta a phei thaby liata pao ta,

23 “Ei sawchanô hawtipa cha thi daihmâpa ta y ta. A vy la, a chôta na ku pazawh teh, vaw tlâhpa ta a hroh theina awpa ta,” tahpa ta a haw chaimâh ta.

24 Chatanachata Zisu a hnohta vawh ta. Zawpi hluhpi ta pazi ei ta, ano cha chakho hôlô ei ta.

25 Chanô pakha kô hrawhleino thi lohpa y ta,

26 dawhty hluhpi ta mohôh ei ta, a hneina zydua chhao a pahryu khai tawhta phana hlâta tlao paru via rili ha ta.

27 Cha chanô chata Zisu thâtihzy a thei nahta, a hnôh lâta zawpi hnohna chata a vy ta,

28 “A pohpai chhâ ei hria khiahta cha, ei tlâh thlyu aw,” tahpa palôh hnei ta.

29 A pohpai cha hria ta, a thi lohpa cha thlai a hâh ha ta; a pasana cha patlâhpa a châ haw tahpa a pôhpa liata a vaw pahno ta.

30 Zisu chata a chhôh tawhtapa hmotaotheina a pua haw tahpa a pahno nahta, zawpi hryta thlai a heih ta, “Ahyma ei pohpai a hria tly?” tah ta.

31 A pachupazy chata a hnohta, “Zawpizy ta ama cha chakho hôlôpa he hmô thlâh ha chi ta, Ahyma na hria tly?’ Kheihtazie ta a tahpa e na châ?” tah ei ta.

32 Zisu ta cha a hriatuhpa cha hmô a chhuahpa ta moh ngâ kaw ta.

33 Chatawhcha chanô ta a chô liata hmo a tao papa cha pahnopa ta, china nata a chalyuna chôta a vy ta, a hmiakô ta pao ta, a hnohta bie dopa cha chho khai ha ta.

34 Zisu ta a hnohta, ’”Ei sawchanô, nâ ngiapâna ta a cha patlâh haw; thlahlôhpa ta sie la, na pasana tawhtapa cha vaw tlâh pasia ha mah y,” tah ta.

35 A rei hai nona chata, apakhyna-o hyutuhpa o tawhta chyhsa a vy ei ta, “Na sawchanônô a thi haw. Khazia e Hyutuhpa cha rie na pathei tly?” tah ei ta.

36 Zisu deikua chata ama bie reipa cha uasa leipa ta, apakhyna-o hyutuhpa hnohna chata, “Chi khâ, a ngiapâ thlâh ha teh.” tah ta.

37 Pity zy, Zami zy, Zami unawh Zawhana zy dei leipa cha ahyhmah ta ano zi awpa pasai leipa ta.

38 Chatawhcha apakhyna-o hyutuhpa o cha ama tlô nahta, atymâ ngaitapa ta, zawpizy a chapa nata sâh awh ngâpazy cha hmô ta.

39 A kei ngia ta, ama hnohta, “Kheihtazie ta e atymâ ngaitapa ta nama cha ngâ tly? Hawtipa cha thi leipa ta â môpa dei tlao a châ,” tah ta.

40 Âmo chata pahneisao ei ta. Châhrasala ama zydua ta khôtho lâ papua khai ha ta, hawti paw nata nô nata a pachupa pathôhzy cha a chhi ta, hawti yna lâ cha a ngia ei ta.

41 Hawtipa ku cha patu ta, a hnohta, “Talitha-kumi,” tah ta; cha yzie cha, “Laihsa, thyu la ei cha tah na,” tahna a châ.

42 Chatawhcha chanô hawtipa cha thlai thyu ta, sie thei ha ta; ano cha kô hrawhleinopa chanô a châ. Cha hmo a vaw tlôpa cha ama noâh ngâsâ ta.

43 Ahy hnohta hmah he thâtih he pahnosa lei awpa ta Zisu ta ama hnohta khâchâ bie pie ta. Chatawhcha, “Chanô hawtipa cha niepa pie teh u.” tah ta.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 6

Nazari khih liata Zisu amâ hao (Ml 13:53-58; Lk 4:16-30)

1 Cha su tawhtapa cha pua ta, a yna khih lâta ngai ta; a pachupazy chata ano cha ama zi lymâ.

2 Chatawhcha pahânoh ta apakhyna-o liata pachu pathao ta; a bie theituhpa hluhpi cha noâhpa ta, “He biezy he khataih tawhta e a pahno? He chyhsa hnohta sona piepa he kheihawhpa sona e a châ? A ku tlai ta hmonoâhpa a tao theipa he kheihtazie ta a châ!

3 He chyhsa he Mari sawchapawpa Zami zy, Zôse zy, Zuda zy, Saimaw zy unawhpa thobyh taotuhpa kha châ vei ma, a sietanôzy chhao eima hnohta a ypazy he châ vei ma?” tah ei ta. Chatanachata a chôta ama palôh tlâh leipa ta.

4 Zisu chata ama hnohta, “Hrohsopa cha a khih nata a chiheih nata a o liata zy dei leipa la palyupalih leipa ta y beih vei,” tah ta.

5 Chatawhcha atlâh leipa chyhsa chyhta chô liata, a ku pazawh ta a patlâhsapa dei leipa cha, hmonoâhpa tao thei vei.

6 Amâ ngiapâ leipa cha a noâh kaw ta.

Pahrawhleino a tuapazy(Ml 10:5-15; Lk 9:1-6)

Chatawhcha Zisu cha pachu lymâna chôta khihzy chahryh lymâ ta.

7 Pahrawhleinopazy cha aw ta, pano lymâ ta tuah ta, ama hnohta ahripa puapazy chôta biehneina pie hra ta.

8 Ama hnohta chôhchahrei dei leipa cha khâpa hmah ta; viahchhâ tlyma, sahria tlyma, ama chaisaihna liata tâkâ tlyma a chei lei awpa ta bie pie ta;

9 pheiky deikua cha a kypa ta viahpakao sâno a ky leipa ta.

10 Ama hnohta, ‘Khataih lia rai nama tlôna o cha nama siesai hlâ lei cha puasai kha u.

11 Chatanachata khataih su lia raita, châly leipa ei sala nama bie chhao ama nahthlie vei khiahta cha, nama siesai tita, ama châna pahnosana awpa ta nama phei liatahpa buhchado chatho thlu teh u,” tah ta.

12 Chatanachata pua ei ta, chyhsazy ama rona awpa ta bie chho ei ta.

13 Ahripa a hluhpi papua ei ta, a tlâh leipa hluhpi chhao sathaw thu ei ta, ama patlâh hra.

Bâtituhpa Zawhana thina(Ml 14:1-12; Lk 9:1-9)

14 Herawda chata Zisu thâtih pathâhpa cha pahno ta. Thokhazy ta, “Bâtituhpa Zawhana kha athihpa hry tawhta vaw thyu heih ta; cha hmotaotheinazy chata ano liata a hria,” tah ei ta.

15 Châhrasala thokhazy chata, “Elaiza a châ,” tah ei ta. A hropazy heih ta, “Hrohsopa na a châ, hrohsopa parohpa hry liata pakha khana a lyu,” tah ei ta.

16 Herawda deikua cha a pahno nahta, “Zawhana, a luh ei taipa kha, a vaw thyu heih cha,” tah ta.

17 Herawda chata a unawhpa Phili lahpinô Herawdi vâta, chyhsa tuah ta Zawhana cha patusa ta, lô-o liata chahryna chôta khô ta, Herawdi cha lahpinô ta hnei ha tlôh ta.

18 Zawhana chata Herawda hnohta, “Na unawhpa lahpinô na hneipa cha ânapana a châ,” tahpa ta a chhopa vâta.

19 Cha vâna chata Herawdi chata ano cha a hao ngaita kaw ta, thie khoh ta. Châhrasala tao thei vei,

20 Herawda ta Zawhana cha chyhsa siapa nata pathaihpa a châ tahpa a pahnopa vâta chi ta, pabohsa tlôh ta. A bie a thei nahta, a nôpo kaw tyh ta; châhrasala aly ngaitapa ta nahthlie tyh ta.

21 Herawda chata a pina daihti a tyheihna noh liata a chyhsa rôhnahpazy nata a pheisaih hyutuhpazy nata Kalili râh liata molaipazy chata zâ ta kyhchhina a tao no ta, Herawdi châta daihti rypaohpa vaw y ta.

22 Herawdi sawchanônô cha a vaw ngia ta, lâh ta, Herawda nata pati a dôlâhpazy cha palysa ta; chatanachata abeipa ta chanâ hâti hnohna chata, “Na khopa maih na hiah teh, ei cha pie aw,” tah ta.

23 “Khâparai eina hiapa maih chi cha, ei râh a khophie chhao ei cha pie aw,” tahpa ta a hnohta chhie a sakhâh ta.

24 Ano cha pua ta, a nô hnohna chata. “Khâpa e ei hiah aw?” tah ta. A nô chata, “Bâtituhpa Zawhana luh,” tah ta.

25 Ano cha abeipa hnohna chata thlai a ngia ta, a hnohta, “Beikoh ta Bâtituhpa Zawhana luh thlai eina pie awpa chi ta ei khoh,” tah ta.

26 Chatawhcha abeipa cha a pachârôh ngâsâ ta; châhrasala a pati dôlâhpazy hmiakô ta chhie a sakhâh hapa vâta, a bie cha ei khoh leipa ta.

27 Chatawhcha abeipa chata a vaihtuhpa pheisaih thlai tuah ta, Zawhana luh vaw cheih awpa ta bie pie ta. Ano chata lô-o liana chata a luh kei tai ta,

28 beikoh ta a luh cha vaw cheih ta, chanô hawti hnohna chata pie ta, ano chata a nô hnohta a pie haw.

29 Zawhana pachupazy chata ama pahno nahta, a ri cha la ei ta, thlâ liata ama pabu haw.

Sâh pangawh rih a pabie(Ml 14:13-21; Lk 9:10-17; Zh 6:1-14)

30 Apôstôlzy cha Zisu hnohta vaw kua ei ta, ama hmotaopa nata pachupazy chho ei ta.

31 Ama hnohta, “Nâmo sahlao deita ta râhpathohpa su liata a vy ula, a pahâ chy teh u,” tah ta. Chyhsa hluhpi zu heih khy heih ama tahpa vâta pati dâhdei chhao nie hmâ leipa ei ta.

32 Chatawhcha balyh ta râhpathohpa su lâta sie haw ei ta.

33 Chyhsa hluhpi ta ama siepa cha hmô ei ta, âmo cha pahno hra ei ta, khi to tawhtapa cha liana chata phei ta a vaw râ chyu ei ta, vaw tlô khâh haw ei ta.

34 Zisu cha balyh tawhta a pua nata zawpi hluhpi hmô ta, vaihtuhpa hnei leipa mietahkupa hawhta ama châpa vâta âmo cha a tha pasa ta; hmo hluhpi âmo pachu haw ta.

35 Chatawhcha vaw zâlâ ha ta, a pachupazy chata a hnohta a vy ei ta, “He he râhpathohpa su châ ta, zâlâ chhao châ ha ta;

36 âmozy he eima chheipâh khih nata lyu liatazy siepa ta ama niepa khâpa tlyma chhâ ama chalei theina awpa ta pasiesa châh chi,” tah ei ta.

37 Zisu deikua chata ama hnohta, “Nâmo ta niepa pie teh u,” tahpa ta a chhy ta. Âmo chata a hnohta, “Denarius zano mâ ta viahchhâ va chalei ei sihla ma, niepa âmo eima pi aw?” tah ei ta.

38 Ano chata ama hnohta, “Viahchhâ khazie e nama hnei? vawh ula, tlua teh u,” tah ta. Chatawhcha ama hneipazie ama pahno nahta, “Mia pangawh nata nga sâno,” tah ei ta.

39 Zisu ta a pachupazy hnohta, “Zawpizy cha a hlao hlao ta, sibiepa hropa chô liata patyusa teh u,” tahpa ta biepie ta.

40 Chatanachata sypangawh sai ta, tlâ za kha ta atyuh ei ta.

41 Chatawhcha ano chata viahchhâ sâpangawh nata nga sâno cha la ta, a vâ lâ uapa ta, byhnâ aw ta. viahchhâzy cha eichheih ta, zawpizy to awpa ta a pachupazy hnohta pie ta; nga sâno chhao cha ama zydua hryta rai hra ta.

42 Ama zydua ta niepa ta ama rih bie sai ta.

43 Chatawhcha viahchhâ nata ngasa ama nie bâhpa cha hrâbyh hmo hrawhleino a biepa ta hru ei ta.

44 Viahchhâ nietuhpazy cha paw tlohpa saita sâ pangawh ama châ.

Zisu tilaipi liata a charei(Mt 14:22-27; Zh 6:16-21)

45 Zawpizy a pasiesa chhôh ta, a pachupazy cha a hmia lâta haosâ lâ Besaida khih lâta balyh ta thlai pasiesa chhielie ta.

46 Âmo cha a pasiesa khai nahta, tlâ lâta thlahchhâ awpa ta sie ta.

47 Chatawhcha zâlâ a vaw châ nahta, balyh cha tilaipi liah liata y ta, ano cha ano deita ta tlâh liata y ta.

48 Thlih ta thata a supa vâna chata ama balyh hiapa cha riethei kawpa ta âmo cha hmô ta. Chatawhcha khihdei chyta tilapi liana cha phei ta siepa ta, âmo vaw pangai ta. Âmo siepakhô a chhuah ta,

49 châhrasala âmo chata tilaipi chô liata phei ta a siepa cha ama hmô nahta, thlahhmipa a châ nata pangiasa ei ta, thata sâh ei ta;

50 ama zydua ta ano hmô ei ta, chi ngaita ei ta. Châhrasala ano chata ama hnohta, “Thlahlôhpa ta y teh u, keima na ei châ; chi kha u,” thlai tah ta.

51 Chatawhcha ama hnohta balyh liata kiah ta, thlih cha a chalih ha ta. Chatawhcha âmo cha ama noâh ngâsâ ta,

52 viahchhâ chô liata hmo vaw tlôpa kha ama pahno leipa vâta ama palôhrupa kuhchha tlôh ta.

Kenesare liata a tlâh leipa a patlâh(Mt 14:34-36)

53 Chatawhcha haosâ lâ ama chaka nahta, Kenesare râh tlô ei ta, ngiakâ liana chata ama balyh cha hraih ei ta.

54 Balyh tawhta ama pua nahta, chyhsazy ta ano cha thlai pahno haw ei ta,

55 cha râh chheipâh zydua liana cha thlai sie ei ta, a tlâh leipazy cha a yna su ama pahnona lia maihta ama hmophaw chhaota a vaw sy ei ta.

56 Chatawhcha khih chyhpa liata zy, khihpi liata zy, lyu liata zy khataih liata rai a siena maihta, tlâh leipazy cha daohpi su liata zy paziapa ta a pohpai chhâ ama hria theina awpa ta thata hiah ei ta; ano a hriapa maih cha ama tlâh lymâ.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 7

Machâzy biechhyna (Mt 15:1-9)

1 Pharisaizy nata Ryhpa pachutuhpa thokhazy Zisu hnohta a vy pakhy ei ta, chazy cha Zerusale tawhta a vypazy ama châ,

2 chazy chata a pachupazy thokha ku puapa ta pati ama niepa hmô ei ta, a puapa tahna he a si leipa tahna a châ.

3 Pharisaizy nata Zu zydua chata machâzy biechhypa cha amâ pyhpa vâta ama ku liahsa amâ si leipa ta cha nie beih leipa ei ta;

4 chatawhcha sôhdaona su tawhta amâ vaw di khiahta cha ama ngai amâ si tua tyh; ama biechhypa hluhpi chhao ama zi tyh, nyuzy, beihzy, dawbeihzy, rakhôzy ama pasi tyhpa hawhpa hih.

5 Chatanachata Pharisaizy nata Ryhpa pachutuhpazy chata Zisu hnohta, “Khazia e, na pachupazy ta machâ biechhypa cha tao leipa ta, ku puapa ta pati ama nie tly?” tahpa ta hiahri ei ta.

6 Ano chata ama hnohta, “Isai ta nâmo chyhsa haiphiahpazy kyh a vaw chhochhieliepa he â do tlai na, 'He chyhsazy heta ama hmao ta na palyupalih ei ta, ama pathipalôh deikua cha einâ hla kaw ei;

7 ama pachuna liata chyhsa ryhpa taopazy ama pachu vâta, einâ chhyna ei he khâpa hrao leipa ta a châ!’ tahpa a ropa hawhna khata.

8 Khazohpa biepiepazy cha siesaipa ta, chyhsa biechhypa cha khâchâ tlao nama patu hih,” tah ta.

9 Chatawhcha ano chata ama hnohta, “Nama biechhypazy namâ pyh theina awpa ta Khazohpa biepiepazy nama khoh leipa he a ryhpaona nama pahno ngâsâ!

10 Mawsi ta, ‘Na nô nata paw palyupalih teh,’ Ahyrai a nô tlyma a paw tlyma a reipachhiepa maih cha thi tlai se,’ tah tlôh ta;

11 nâmo deikua ta, ‘Chyhsa ta a nô tlyma a paw tlyma hnohta, Kôrban (cha cha Khazohpa hnohta ei pie khai haw tahna a châ) a chahawh a tah khiahta cha

12 a nô châta tlyma a paw chata tlyma khâpa hmah taopa awpa pasaih veih eichi,

13 chyhsa hnohta nama biechhypa pie pachhuah tyhpa heta Khazohpa bie he khâpa hrao leipa ta nama tao tyh. Cha hawhpa hmo cha a hluhpi nama tao,” tah ta.

Hmo pathaih leipazy(Mt 15:10-20)

14 Chatawhcha zawpi cha aw heih ta, ama hnohta, “Ei bie he nahthlie ula, pahno hra teh u;

15 khôtho lâta a ngiapa ta khâpahmah ta chyhsa papua vei; châhrasala chhôh lâ tawhta a vaw puapa chata chyhsa tlao a papua,” tah ta.

16 Chyhsa ahyrai theina awpa ta nahkhao a hneipa ta cha thei se.

17 Chatawhcha zawpizy cha o liata a ngia sai tawhta a pachupazy ta pakhona cha ano hiahri ei ta.

18 Ano chata ama hnohta, “Nâmo chhao pahno thai ngâsâ veih eichi ma? Khôtho lâ tawhta chyhsapa chhôh liata a ngiapa chata papua vei,

19 palôhrupa liata a ngia leipa ta, pavyh liata tlao a ngia, chatanachata lyupâh puana lâta a pua heih tyh tahpa pahno veih eichi ma?” tah ta. (Cha cha niepa zydua cha a pathaih tahna a châ).

20 Chatawhcha ano chata, “Chyhsa chhôh tawhta a kaw puapa chata chyhsa a papua tyh.

21 A chhôh liatahpa, chyhsapa pathipalôh tawhta pachâna moleipazy a pua tyh, apatlana zy, paruna zy, lianycheina zy, apheina zy,

22 uahvana zy, moleina zy, dôna zy, parâna zy, kiaphaona zy, reipachhiena zy, apalaina zy, hruna zy hih.

23 He hmo zydua he a chhôh tawhta puapa ta, chyhsa a papua tyh,” tahpa ta reih ta.

Syrôphônisia chanô a ngiapâna(Mt 15:21-28)

24 Cha tawhna chata Zisu cha thyu ta Tyre khih lâta sie ta. Chatawhcha o liata a ngia ta, ahyhmah ama pahnopa khoh leipa ta; châhrasala a nyu thei hlei vei.

25 Chanô pakha, sawchanônô chyhpa ta thlahpa puapa a hneipa chata Zisu thâtih cha pahno ta, a hnohta a vy ta a phei thaby liata a khu lâta pao ta.

26 Cha chanô cha Krika reih hmâhpa, Suria râh liata Phônisia chanô châ ta. Chatawhcha ano chata a sawchanônô tawhtapa ahripa papuapa awpa ta hiah chaimâh ta.

27 Ano chata a hnohta, “Sawzy cha ama rih bie tua se, saw ku liata viahchhâ chhu ta, izy hnohta thypa cha yzie châ vei,” tah ta.

28 Ano chata a hnohta, “A châ na, Abeipa; châhrasala tlâhkhai ry liata izy chhaota sawzy viahchhâ zôpa a tlapazy cha ama nie tyh,” tahpa ta a chhy ta.

29 Chatawhcha ano chata a hnohta, “Na bie reipa vâna chata sie teh; ahripa cha na sawchanônô chhôh tawhta a pua ha na,” tah ta.

30 Chatawhcha o lâna cha a vaw di ta, a saw cha ahripa ta puasai ha ta, rakhô liata a zia thlâh hapa hmô ta.

Nahpâpa nata reih pathlie thei leipa a patlâh

31 Tyre râh tawhta kua heih ta, Sidaw khih siepalâh ta, Dekapôli râh lâta sie lymâ ta Kalili Tipo cha tlô ha ta.

32 Chatawhcha chyhsa pakha nahpâpa nata reih pathlie thei leipa a hnohta a vaw chhi ei ta; a chô liata a ku pazawh awpa ta a haw ei ta.

33 Zisu ta zawpi hry tawhta ano deita ta, a nano ta a chhi ta, a kudy ta a nahkhaozy hria ta, a pachih pachhao ta, a paleih hria ta;

34 avâ lâ mopa ta, a hu so ta, a hnohta, “Ephatha,” tah ta, cha cha “A vaw pahy teh,” tahna a châ.

35 Chatawhcha a nahzy cha a vaw pahy ta, a paleih chahryna chhao cha a vaw pathlâ ta, a sia ngâsâpa ta a reih thei haw.

36 Ano chata ama hnohta ahyhmah chho lei awpa ta bie pie ta; châhrasala thata a khâh nahta, thata tlao ama pathâhsa via rili tyh.

37 Chatanachata noâh tah ngaitapa ta, “Ano chata ato a pha ngâsâpa ta tao ta; nahpâpa pavâhsa ta, reih pathlie thei leipa chhao a pareisa haw,” tahpa ta reih ei ta.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

Maka 8

Sâh palih rih a pabie (Mt 15:32-39)

1 Cha nohzy liana chata zawpi thata a vy pakhy heih ei ta, niepa khâpahmah hnei veih ei, Zisu ta a pachupazy aw ta, ama hnohta,

2 “Zawpizy he atahmâ noh thôh tlai ei hnohta y haw ei ta, niepa khâpahmah ama hnei leipa vâta, ei tha eina pasa ei;

3 nie leipa ta ama o lâ ei padisa khiahtala, lâpi liata panao tlôh ei ta, thokhazy cha amâ vyna a hla kaw tlôh ta,” tah ta.

4 A pachupazy chata, “Chyhsa ta he râhpathohpa liana heta khataih liata viahchhâ ta e, he zydua chyhsa he ama rih eima pabiesa thei aw,” tahpa ta ano a chhy ei ta.

5 Ano chata, “Viahchhâ tlâ khazie e nama hnei?” tahpa ta âmo cha hiahri ta. Âmo chata, “Tlâ sari,” tah ei ta.

6 Chatawhcha zawpizy cha alei liata patyusa ta; viahchhâ tlâ sari cha la ta, alyna bie a rei khai nahta, ei chheih ta, a pachupazy hnohta zawpizy rai awpa ta pie ta; âmo chata zawpizy cha tô ei ta.

7 Chatawhcha nga dipa a chyhta hnei hra ei ta; ano chata byhnâ aw ta, cha chhao cha ama hmiakô liata tô awpa ta pie ta.

8 Chatanachata nie ei ta, ama rih bie khai chyu ta; ama nie laibâhpa a zôpa chhao cha hrâbyh hmo sari a biepa ta amâ huah.

9 Chatawhcha a niepa zydua cha sâh palih rachhôh ama châ.’

10 Chatawhcha âmo cha pasiesa ta; balyh liana chata a pachupazy chhaota thlai kiah ei ta. Dal-manutha râh cha a ngia ei ta.

Ngiana amâ hnaw(Mt 16:1-4; Lk 12:54-56)

11 Pharisaizy vaw pua ei ta, Zisu pasiapa awpa ta, ano liata avâ tawhta ngiana tluapa ta ano cha ei ei ta.

12 Ano chata a palôhrupa ta thata a rôh ta, “Khazia e atahmâ ta thyutliazy heta ngiana ama tlua? Hmeihseihta ta, ei cha chho ei chuh, atahmâ ta thyutliazy hnohna heta ngiana rai piepa châ aw vei,” tah ta.

13 Chatawhcha âmo cha siesai ta, balyh liata kiah heih ta, haosâ lâ chaka ha ta.

Pharisai nata Herawda thinô(Mt 16:5-12)

14 A pachupazy chata viahchhâ a chei awpa my haw ei ta; balyh liana cha viahchhâ tlâ kha dei leipa cha a hropa rai hnei veih ei.

15 Chatawhcha ano chata ama hnohta, “Pharisaizy thinô nata Herawda thinô liana chata a vaih ula, a chado teh u,” tah ta.

16 Chatawhcha âmo chata, “Viahchha hnei ma pi,” tahpa ta reih ei ta.

17 Zisu ta cha cha pahno ta ama hnohta, “Khazia e viahchhâ nama hnei leipa kyh cha nama reih ngâ tly? Atahmâ taih pahno thai to veih eichi ma? Nama pathipalôh cha a kuhchha haw ma?

18 Mo hnei eichi ta hmô veih eichi ma, nahkhao hnei eichi ta thei veih eichi ma? Pahno thlâh ha veih eichi ma?

19 Sâh pangawh hryta viahchhâ tlâ pangawh ei pachhai nona khata, nama nie laibâhpa kha hrâbyh hmo khazie namâ huah khâ?” tah ta. Chatawhcha âmo chata, “Hmo hrawhleino,” tah ei ta.

20 “Cha khiahtala chyhsa sâh palih hryta, viahchhâ tlâ sari ei pachhaih nona khata a laibâhpa khazie e namâ huah?” tah ta. Chatawhcha âmo chata, “Hmo sari,” tah ei ta.

21 Ano chata ama hnohta, “A pachâna pahno thai to veih eichi mâ?” tah ta.

Besaida liata mochaopa a patlâh

22 Besaida khih cha vaw tlô ei ta. A hnohta mochaopa a vaw chhi ei ta, ano hria awpa ta a haw ei ta.

23 Chatawhcha ano chata mochaopa ku cha patu ta, khih tawhta puakhei ta; a mo liata a pachih pachhao ta, a chô liata a ku a pazawh khai nahta, “Khâpa chhâ na hmô thei ma?” tahpa ta hiahri ta.

24 Chyhsa cha kaw ua ta, “Chyhsa hmô na ta; tho a pasiepasâ ngâpa hawhta ei hmô,” tah ta.

25 A mo liana chata a ku pazawh heih ta; ano cha moh thlâh ha ta, a vaw tlâ haw, ato a sia ngâsâpa ta a hmô thei haw.

26 Zisu chata, “Khih liata a ngia khah y,” tahpa ta o lâta padisa ha ta.

Pity ta Zisu a palâhâhna(Mt 16:13-20; Lk 9:18-21)

27 Zisu nata a pachupazy cha pua ei ta, Kaisaria Philipi khih lâta sie ei ta; ama sie laih nota a pachupazy hnohta, “Chyhsazy ta ahy a châ eina tah ei?” tahpa ta hiahri ta.

28 Âmo chata, “Bâtituhpa Zawhana a châ, cha tah ei ta; a hropazy ta, Elaiza a châ, cha tah ei ta; thokhazy ta hrohsopa ahy tlyma a châ, ama cha tah,” tahpa ta chho ei ta.

29 Chatawhcha ano chata ama hnohta, “Cha khiahtala nâmo zaw ahy a châ eina tah ei chi?” tahpa ta hiahri ta. Pity chata a hnohta, “Mesiah cha na châ,” tahpa ta a chhy ta.

30 Ano chata a thâtih ahyhmah chho lei awpa ta bie pie ta.

Zisu ta a thina awpa a reih chhielie(Mt 16:21-28; Lk 9:22-27)

31 Chyhsa Sawchapawpa chata hmo hluhpi pasa a tao awpazy, machâzy, theihthaipa abeizy, Ryhpa pachutuhpazy khoh leipa ta a y awpa zy, thiepa ta a y awpa zy, noh thôh khai tawhta a thyu heih awpa zy cha, âmo pachu pathao ha ta.

32 Cha bie cha a sia ngâsâpa ta reih ta. Pity chata a chhi nano ta, ra ta.

33 Anodeikua cha a vaw heih ta, a pachupazy moh ta. “Sâtâ, ei hnôh lâta sie teh! Khazohpa hmozy pachâ leipa ta, chyhsapa hmozy tlao na pachâ via he,” tahpa ta Pity ra ta.

34 Zawpi cha a pachupazy chhaota aw ta ama hnohta, “Ahyrai ta eina zi khoh khiahtala, rietheina a papeisa leipa ta, a kraws pupa ta na zi mawh sy.

35 Ahyrai a hro a pabohsa khohpa maihta pahlei aw ta; ahyrai keima vâta nata thâtihpha vâta a hro a pahleipa maih a pabohsa aw.

36 Chyhsa ta khizaw he a pôhpa ta hnei sala, a hro pahlei sala a châta khâpa e a phahnai aw?

37 Chyhsa ta a hrona vyuhpa ta khâpa a pie thei aw?

38 Ahyrai he thyutlia apheipa nata moleipa chhâ chô liana heta, keima nata ei biezy a zakheipa maih cha, ano cha Chyhsa Sawchapawpa heta a Paw rôhnahna nata vâlyuhchâpa pathaihpazy chhaota a zu tita a zakhei hra aw,” tah ta.

Maka (Mark)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16