Zisu Pila hmiakô liata (Mt 27:1-2, 11-14; Lk 23:1-6; Zh 18:28-38)
1 My a vaw châ patanahta theihthai abeizy, machâzy nata Ryhpa pachutuhpazy nata ryureituhpa zydua chhaota a chhohiapa ta, Zisu cha chahrypa ta a chhi haw ei ta, Pila hnohta thlai ama pie haw.
2 Pila chata a hnohta, “Zuzy Beipa na châ ma?” tahpa ta hiahri ta. Ano chata a hnohta, “Na tah cha zaw,” tahpa ta a chhy ta.
3 Chatawhcha theihthaipa abeizy chata kyh hluhpi ta leih ei ta.
4 Pila ta hiahri heih ta, a hnohta, “Khâpa ta hmah a chhy va chi ma? He ama cha leih-na zydua rimâ he,” tah ta.
5 Zisu deikua chata khâpa ta hmah a chhy leipa ta, chatanachata Pila cha a noâh ngâsâ ta.
Zisu thie awpa ta ama pathlu(Mt 27:15-26; Lk 23:13-25; Zh 18:39-19:16)
6 Pila ta Zawpakhô kyhchhi noh liana chata chyhsa atâhpa zawpi ta amâ hawpa maih pakha cha papua tyh ta.
7 Atâhpa hry liata chyhsa pakha, a moh Baraba ama tahpa cha lô-o liana chata chahrypa ta y thlâh ha ta; ano cha lianycheipa a châ.
8 Zawpizy khy ei ta, Pila ta ama châta a tao tyhpa hawhta tao awpa ta a haw ei ta.
9 Ano chata ama hnohta a chhy ta, “Zuzy Beipa he cha pathliepa aw ei sala nama khoh ma?” tah ta.
10 Theihthaipa abeizy ta hnâchhaona vâta ama patusa tahpa pahno tlôh ta.
11 Châhrasala theihthaipa abeizy chata zawpizy cha Baraba cha a vyuhpa ta pathlie awpa ta pasyu ei ta.
12 Pila chata ama hnohta, “Zuzy Beipa nama bipa he kheihta ma ei tao aw tly?” tahpa ta a chhy heih ta.
13 Âmo chata, “Ano cha khaipâ teh,” tahpa ta thata awh heih ei ta.
14 Pila chata ama hnohta, “Khazia e, khâpa moleina e a tao?” tah ta. Châhrasala âmo sahlao chata, “Ano cha khaipâ teh,” tahpa ta thata awh rili ei ta.
15 Pila ta zawpizy cha a palysa khohpa vâta Baraba cha papuapa ta; Zisu cha a chhei khai nata khaipâ awpa ta pie ha ta.
Pheisaihzy ta Zisu ama taola(Ml 27:27-31; Zh 19:2-3)
16 Pheisaihzy chata o dôhpachhôh tlyhmia (cha cha pritôria ama tahpa) liana chata a ngiakhei ei ta; ama py liatahpa zydua awpakhy ei ta.
17 Chatanachata poh-nosaihpa pabusapa ta, ahloh lakho phieh ei ta, pakho ei ta.
18 “Hroh parei mah y, Zuzy Beipa!” tahpa ta anaoh ei ta.
19 Chatawhcha a luh liana chata lothi ta chhei ei ta, ano chôta ama pachih pachhao ei ta, ama pakhu paneihpa ta ano anaoh ei ta.
20 Ama taola khai nahta poh nohsaihpa cha la ei ta, ano poh pabusa heih ei ta. Khaipâ awpa ta puakhei haw ei ta.
Ama khaipâna(Mt 27:32-44; Lk 23:26-43; Zh 19:17-27)
21 Chyhsa a khiekhâpa pakha, râh lâ tawhta a vypa Saimaw Kurini khihpa, Alezanda nata Rufasa paw cha, a kraws cha papusa raruah ei ta.
22 Zisu cha Kôlkôtha su lâta a chhi ei ta, (cha cha Luh-ru su) tahna a châ.
23 Chatawhcha kresawti myr nata pahlaopa pie ei ta; châhrasala la khoh leipa ta.
24 Ano ama khaipâ khai nahta, ano pohzy cha a rai ei ta, ahy to awpa ma a châ, tahpa ta pachao ei ta.
25 Zisu ama khaipâpa cha, my dawh chakipa liata a châ.
26 Ano leih-na bie a chô liata ropa cha, “Zuzy Beipa,” tahpa ta.
27 Chatawhcha ano hnohna chata phihmâhpa pano khaipâ hra ei ta, a chachâh lâ pakha, a chavei lâ pakha.
28 Chatanachata moleipazy hryta reipâpa ta y aw ta, tahpa Khazohpa châ bie a vaw tlô haw.]
29 Chatawhcha chyhsa a hlaihlâpa maih chata ama luh chahuahpa ta, “Aw! Na Khazohpa achhyna-o phie ta, noh thôh ta a sa heih tuhpa chi,
30 nâmasasyh tlaita a pachha la, kraws tawhtapa za chô teh!” tahpa ta eilaw ei ta.
31 Cha hawhna hra chata theihthaipa abeizy nata Ryhpa pachutuhpazy chhaota âmo hry liata eilawpa ta,“Chyhsa hropazy pachha tyh ta ano hmâhchhâ a pachha thei vei huh.
32 Mesia Izarel Beipa cha atahmâ heta kraws tawhtapa a za chôpa hmô ei sih la, eimâ ngiapâ thei nawpa ta,” tah ei ta. Chatawhcha ano hnohta ama khaipâ hrapazy chata ano reipachhie hra ei ta.
Zisu thina(Mt 27:45-56; Lk 23:44-49; Zh 19:20-30)
33 Chatawhcha dawh hrawhleinopa tawhta zâ dawh thôhpa taihta, râh zydua cha zoh ha ta.
34 Chatawhcha dawh thôhpa liana chata Zisu cha ao paro ngaitapa ta awh ta, “Eloi Eloi, lama sabach-thani?” tahpa ta, cha yzie cha “Ei Khazohpa, ei Khazohpa, khazia e, eina pathlua chi?” tahna a châ.
35 Chatawhcha a kiapâh ta a duahpa thokhazy chata, “Nahthlie teh u, Elaiza a awh chuh,” tah ei ta.
36 Chyhsa pakha a râ ta, sponge kresawti thaopa pabiepa ta, lothi pawhmao liata pataoh ta, dopa ta pie ta, “Hâ tua ei suh u, ano la awpa ta Elaiza a zu ma, moh ei suh u,” tah ei ta.
37 Zisu cha ao paro ngaitapa ta awh ta, a hu chhâ ha ta.
38 Khazohpa achhyna-o poh paraipa cha a chô lâ tawhta a ry lâ taihta a vaw hrie ha ta.
39 Chatawhcha a hmiakô ta aduahpa, pheisaih zakha hyutuhpa chata cha hawhta a hu chhâpa a hmô nah chata, “He chyhsa he Khazohpa Sawchapawpa a châ hmeiseih tlai na,” tah ta.
40 Chatawhcha chanôzy chhao lâhla tawhta saipa ta y ei ta, cha hry liana chata Mari Madali zy, Mari Zami chyhpa nata Zôsi nô zy, Salômi zy a hlao ei ta,
41 chazy cha Kalili râh liata a y nota, ano zi ei ta, a chakao tyhpazy cha ama châ; chanô hropa hluhpi Zerusale khih liata ano hnohta a khypazy chhao a hlao hra ei ta.
Zisu ama pabuna(Mt 27:57-61; Lk 23:50-53; Zh 19:38-42)
42 Chatawhcha zâlâ a vaw châ nahta, Apachyna noh a châpa vâna chata, cha cha pahânoh chy ta noh he a châ,
43 Zawsi Arimathai khih liatahpa, ryureituhpa za a chhihpa, Khazohpa Khihnarâh hnabeisei hrapa a vy ta, riapha ngaitapa ta Pila hnohta a ngia ta, Zisu ri cha hia ta.
44 Pila cha cha hawhta thlai a thi thlâh hapa cha noâh tah kaw ta, chatanachata pheisaih zakha hyutuhpa cha aw ta, a thi tawhta bohpi a châ ha mâ tahpa ta hiahri ta.
45 Chatawhcha pheisaih zakha hyutuhpa pakah tawhta a pahno nah chata, a ri cha Zawsi hnohta pie ta.
46 Zawsi chata poh naipa chalei ta, ano la ta, poh naipa chata pahly ta, thlâ lôpu liana chata pazia ta; thlâ paka liana chata alô pamai ta.
47 Mari Madali nata Zôsi nô Mari chata a paziana cha hmô thlâh ha ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||