Chhihthatuhpazy ta Zisu ama leih (Mt 26:1-5; Lk 22:1-2; Zh 11:45-53)
1 Zawpakhô nata viahchhô Thinô a hlao leipa kyhchhih tlô hlâ noh nopa liana cha ta. Theihthaipa abeizy nata Ryhpa pachutuhpazy chata ano cha dôpakhei ta patupa ta, ama thie theina awpa kyh tlua ei ta;
2 “Châhrasala kyhchhi chhôh châ leipa sala, chata leipa ta la zawpizy a patypamâ pathlei aw na,” tah ei ta.
Zisu cha Bethani liata sathaw thupa a châ(Mt 26:6-13; Zh 12:1-8)
3 Bethani liata Saimaw aphawhpa o liata pati a dôh nota, chanô pakha ta alabasta byh spina thaw, sôh ngaitapa cha vaw cheih ta, a byh cha pakei ta, Zisu luh liata lei thlu ta.
4 Châhrasala thokha cha ama hie hâh kaw ta, “Khazia e sathaw rohpahâhpa he a pahryupadâh tly?
5 He sathaw he denarius za thôh hlâta a hluh viapa ta zuah sa la, dyhchhiepazy hnohta pie theipa châ tlôh ta,” tah ei ta. Chatanachata a chô liana chata paphôh ngâ kaw ei ta.
6 Zisu deikua chata, “Kheita hmah tah khah u, khazia e nama patypamâ tly? Ei chô liana heta hmophapa a taopa a châ.
7 Chyhsa dyhchhiepazy cha nama hnohta khâ a ypa châ ei ta, nama khona maihta âmo châta hmopha nama tao thei; keima deikua cha nama hnohta khâ a y awpa châ va na.
8 Chanô heta a tao theina rakha a taopa a châ; ei sapa pabu awpa ta a thu chhieliepa a châ hih.
9 Hmeiseihta ta, ei cha chho ei chuh, khizaw zydua liata khataih liata rai chhao thâtihpha ama chhona lia maihta he chanô hmotaopa chhao he ano pahno thlâh hana awpa ta ama reih lymâ aw,” tah ta.
Zudâh ta Zisu patupa a ryh a tah(Mt 26:14-16; Lk 22:3-6)
10 Zuda Iskari pahrawhleino hryta pakha khata, Zisu cha a patusa theina awpa ei ta, theihthaipa abeizy hnohta vawh ta.
11 Âmo chata ama pahno patanahta aly kaw ei ta, a hnohta tâkâ piepa bie taih haw ei ta. Chatanachata Zisu a patusa theina awpa ta Zuda ta ryhpaona tlua ha ta.
Zisu a pachupazy chhaota zawpakhô kyhchhi(Mt 26:17-25; Lk 22:7-14. 21-23; Zh 13:21-30)
12 Chatawhcha Viahchhâ Thinô a hlao leipa noh, noh hmiatua chaipa, zawpakhô mietahkupa taw ama thie tyhna noh liana chata, a pachupazy ta a hnohta, “Zawpakhô pati na nie theina awpa ta khataih liata e a kei chhuahdy ei sihla na khoh?” tah ei ta.
13 Chatawhcha a pachupazy hryta pano tuah ta, “Khihpi liata va ngia ula, cha liana chata chapaw alô beih-rai ta ti a vaw cheihpa ta cha tyh aw ei ta, ano cha zi muh vy,
14 a ngiana lia maihna chata, cha o hneituhpa hnohta, ‘Pachutuhpa chata ei pachupazy chhaota zawpakhô pati ei niena awpa ta, ei khichhai chhôhpadâhpa cha khataih liata a y?’ tah muh vy.
15 Chatanachata ano chata a chô chaita chhôhpadâhpa a laipa tobi chiehpa nata amâ chiehpa a cha pamosa aw ei; cha liana chata keimo châta a chhuahdy muh vy,” tah ta.
16 Chatawhcha pachupazy cha pua haw ei ta, khihpi liana chata a kei ngia ei ta, ama hnohta a reipa hawhna tlai khata hmô ei ta; zawpakhô pati cha a chhuahdy haw ei ta.
17 Chatawhcha zâlâ ta pahrawhleinozy chhaota ano cha vawh ei ta.
18 Chatawhcha dôh ei ta, ama nie hai nota, Zisu ta, “Hmeiseihta ta, ei cha chho ei chuh, nama hryta chyhsa pakha ei hnohta a nie ngâ hrapa tlai heta eina patusa aw,” tah ta.
19 Ama pachâ rôh kaw ta, pakha pakha ta a hnohta, “Keima ei châ ma?” a tah chyu ei ta.
20 Chatawhcha ano chata ama hnohta, “Pahrawhleino hryta beikoh liata na nylâhpa he a châ.
21 Chyhsa Sawchapawpa he a thâtih ropa hawhna heta a sie aw, châhrasala Chyhsa Sawchapawpa a patusatuhpa chyhsa cha a hu a po na! Cha chyhsa cha pih leipa sala a châta a pha via aw,” tah ta.
Abeipa tlâhkhai dôhna zie(Mt.26:26-30; Lk 22:15-20; 1 Kaw 11:23-26)
22 Chatawhcha ama nie hai nota, Zisu ta viahchhâ la ta, byhnâ a aw khai nahta, eichheih ta, ama hnohta pie ta, “La teh u; he he ei sapa a châ,” tah ta.
23 Chatawhcha nyu la ta, alyna bie a rei khai nahta ama hnohta pie ta, ama zydua ta dôh chyu ei ta.
24 Chatawhcha ano chata ama hnohta, “He he ei thisaih chyhsa hluhpi châta a loh awpa biehraina cha a châ.
25 Hmeiseihta ta, ei cha chho ei chuh, Khazohpa Khihnarâh liata a thiehpa ei dôna noh a tlô hlâ lei la, krezôh patheipa liatahpa doh heih khao aw va na,” tah ta.
Pity a paphana kyh a chhochhielie(Mt 26:31-35; Lk 22:31-34; Zh 13:36-38)
26 Chatawhcha hla ama sa khai nata pua ei ta, Ôli Tlâh lâta sie haw ei ta.
27 Zisu ta ama hnohta, “Nama zydua ta paipa ta nama y khai aw, ‘Mietahkuvaihtuhpa cha tu aw na ta, mietahkupazy cha ama pai aw,’ tahpa ropa châ tlôh ta.
28 Châhrasala ei thyu heih tawhta Kalili râh lâta nama hmiakô liata ei sie aw,” tah ta.
29 Pity deikua chata a hnohta, “Ama zydua ta paopa ta y hra ei sala, kei la pao aw va na,” tah ta.
30 Chatawhcha Zisu ta a hnohta, “Hmeiseihta ta, ei cha chho chuh, atazâ lia tlai heta awh ei no a khoh hlâta, ei thôh einâ papha aw chi,” tah ta.
31 Pity deikua chata “Na thina liana chata, thi hra aw sala, châ papha cheita aw va na,” tahpa ta reih ta. Cha hawhna hra chata a pachupazy ta tah chyu ei ta.
Kesamani lia thlah a chhâ(Ml 26:36-46; Lk 22:39-46)
32 Kesamani ama tahpa lâna chata sie ei ta; a pachupazy hnohta, “Thlah ei chhâ chhôhta, he liana heta a vaw tyuh chy teh u,” tah ta.
33 Pity, Zami nata Zawhana cha a hnohta a chhi ta, thlazo ngâsâpa ta a nôpo ha ta.
34 Ano chata ama hnohta, “Ei palôhrupa riethei ngâsâ ta, thina taih tlaita; he liana he y ula, riahvai teh u,” tah ta.
35 Chatawhcha bâhta a hmialâ sie ta, alei liata a khu lâta pao ta, tah theipa châ sala, cha dawh cha ano khô awpa ta thlahchhâ ta.
36 “Abba, Ei Paw, nâ cha ato tao thei chi ta; he nyu he keima tawhtapa pasie teh; châhrasala keima rei châ leipa sala, nâma rei sai tlao châ se,” tah ta.
37 Chatawhcha a vy ta âmo sahlao cha a môpa ta vaw hmô ta, Pity hnohta, ‘Saimaw, nâ mô ha mâ? Dawh kha likawh ta chhao, riahvaipa ta y thei va chi ma?
38 Reipasaona liata namâ ngia leina awpa ta riah vaih ula, thlahchhâ teh u; thlahpa ta la hoh ta, sapa deikua cha a dadieh,” tah ta.
39 Vawh heih ta, a bie reipa ualua ta thlahchhâ heih ta.
40 Chatawhcha a vaw kua heih nah chata, âmo sahlao cha a môpa ta vaw hmô heih ta, ama mo a ku ngâsâpa vâta; achhyna awpa chhao pahno veih ei.
41 Chatawhcha a ei thôhna liata vaw kua heih ta, ama hnohta, “Khâ namâ mô thlâh ha mâ? a pahâ bâ teh u. A daih ha na; a daihti cha a vaw tlô haw; Chyhsa Sawchapawpa he moleipazy ku ta ama patusa aw hih.
42 Thyu ula, sie suh u; moh teh u, na patusa awpa cha a vaw hnia ha hih,” tah ta.
Zisu ama patu(Mt 26:47-56; Lk 22:47-53; Zh 18:2-11)
43 Chatawhcha a rei hai nota, Zuda, pahrawhleino hryta pakha kha vaw tlô pâ ha ta, ano hnohna chata theihthaipa abeizy nata Ryhpa pachutuhpazy nata machâzy tawhtapa zawpi sahlao zaozi nata thothu a cheipa ta vaw tlô hra ei ta.
44 A patusatuh awpa chata, “Ei sypa maih cha ano a châ aw; patu ula, a bohpa ta a chhi teh u,” tahpa ta zawpi lâta ngiana vaw chhochhielie khai ha ta.
45 Chatanachata a tlô patanahta ano thlai pangai ta, “Pachutuhpa,” tah ta. Ano cha sy ta.
46 Ano cha chahnao chakhi ei ta, patu haw ei ta.
47 Chatawhcha a kiapâh ta a duahpazy hry liata pakha ta a zaozi phia ta, Theihthai Beichaipa sei cha chhawh ta, a nahkao pathai pathla ha ta.
48 Zisu chata ama hnohta, “‘Zaozizy, thothuzy a cheipa ta, phihmâhpa patu awpa hawhta na patu awpa ta nam vaw pua mâ?
49 Khazohpa o liata noh to pachupa ta nama hnohta y tyh na ta, na patu leipa eichi ta. Châhrasala Khazohpa châ bie cha a vaw tlô theina awpa a châ hih,” tah ta.
50 Chatawhcha ama zydua ta ano cha pathluapa ta a râ khai haw ei ta.
Satliapa a râpa
51 Satliapa ahy tlyma, pohnaipa a bupa ta ano cha zi ta; ano cha vaw patu ei ta,
52 châhrasala a poh naipa cha siesai ta, sasaihpa ta a râ ha ta.
Zisu ryureina hmiakô liata(Mt 26:57-68; Lk 22:54-55, 63-71, Zh 18:12-14, 19-24)
53 Zisu cha Theihthai Beichaipa hnohta a chhi ei ta; ano hnohna chata theihthaipa abeizy, Ryhpa pachutuhpazy, machâzy ama zydua ta a vy pakhy ei ta.
54 Pity cha â hlapapi ta ano cha zi ta, Theihthai Beichaipa o dôhpachhôh tlyhmia taihta; a vaihtuhpazy hryta mei a aihpa ta a tyuh hra ta.
55 Zisu ama thie theina awpa châta theihthaipa abeizy nata ryureituhpa zydua chata ano leih-na tlua ei ta; hmô tlôh leipa ei ta.
56 Chyhsa hluhpi ta haipa ta leih ei ta, châhrasala ama leih-na bie cha a lyu tlâ tlôh lei khâh ta.
57 Chatawhcha ahyzy tlyma a duah ei ta, haipa ta leih ei ta,
58 “He chyhsa heta, ‘He Khazohpa achhyna-o ku ta sapa he phie aw na ta, noh thôh chhôhta achhyna-o hropa ku ta sa leipa ei sa aw,’ a tahpa eima pahno,” tah ei ta.
59 Âmo pahnosana bie chhao cha a raoh hra leipa ta.
60 Chatawhcha Theihthai Beichaipa cha a liah liah ta a duah ta, Zisu hnohta, “Khâpa ta hmah a chhy va chi ma? Hezy heta ama cha leipa he kheihta zie ma a châ?” tahpa ta hiahri ta.
61 Ano deikua cha a chalih thlâh ha ta, khâpa ta hmah a chhy leipa ta. Theihthai Beichaipa chata a hnohta, “Mesia, Huhiepa Sawchapawpa cha na châ ma?” tahpa ta hiahrih heih ta.
62 Zisu ta, “Ei châ chah â; Chyhsa Sawchapawpa he Hmotaotheina chachâh lâta atyuh ta, avâ meihdo hry liata a zupa nama hmô aw,” tah ta.
63 Chatawhcha Theihthai Beichaipa chata a pohzy hrie ta, “Pahnotuhpa hropa khazia eimâ ngiah khao aw?
64 Khazohpa a reipachhienazie cha nama thei haw. Kheihta e nama pachâ?” tah ta. Chatanachata ama zydua ta ano cha a thie tlâh ta rao ei ta.
65 Chatanachata thokha ta ano cha pachih ta pachhao ei ta, a hmia pahly ei ta, tu ei ta, a hnohta “Reih teh ahy châ tu!” tah ei ta. Chatawhcha a vaihtuhpazy chata patu pâpa ta chabaih ei ta.
Pity ta Zisu â papha(Mt 26:69-75; Lk 22:56-62; Zh 18:15-18, 25-27)
66 Pity cha a ru lâta o dôhpachhôh tlyhmia liata a y nona chata, Theihthai Beichaipa chakaotuhpa, laihsa hryta pakha a vy ta;
67 Pity mei a aihpa cha hmô ta, ano cha moh ta, “Nâ chhao he Zisu Nazari chyhsa hnohta a ypa kha na châ hih,” tah ta.
68 Ano deikua chata a papha ta, “Na reipa cha pahno va na, a yzie chhao pahno thei va na,” tah ta. Chatawhcha aikah lâ pua ta, [awh khoh ha ta.]
69 Chatawhcha laihsa chata hmô ta, a kiapâh liata a duahpazy hnohna chata “He chyhsa he ama hry liatahpa a châ,” tah heih ta.
70 Châhrasala a papha heih ta. Chatawhcha cha hnôh lâna chata a kiapâh ta a duahpazy chata Pity hnohta, “Ama hry liatahpa na châ; Kalili râh liata chyhsa châ tlôh chi ta,” tah ei ta.
71 Ano deikua chata, “Cha chyhsa na reipa cha pahno va na,” tahpa ta chhie a sakhâh ta.
72 Chatawhcha awhkhypa cha a ei nona ta khoh pâ ha ta. Pity chata Zisu ta a hnohta, “Awhkhypa ei no a khoh hlâta, nâ ta ei thôh einâ papha aw chi,” a tahpa bie kha a vaw thei heih ta. Cha chata a palôh pachhie ta cha ha ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||